ထီးလင်းမြို့နယ်အတွင်း ကျင်းကျေးရွာဒေသရှိ ကျေးရွာကိုးရွာ လှပ်စစ်မီးရရှိရေးစီစဥ်ဆောင်ရွက် ပေးရန် အစီအစဥ်ရှိ/မရှိနှင့်စပ်လျဥ်းသည့်မေးခွန်း

ဦးမြတ်လေးဦး (ထီးလင်းမဲဆန္ဒနယ်)

ထီးလင်းမဲဆန္ဒနယ်အတွင်းရှိ ကျင်းဒေသသည် ပုံတောင်ပုံညာကြားတွင် တည်ရှိပြီး တောင်နှင့် မြောက်အလျားလိုက်တည်ရှိနေသော ဒေသလေးတစ်ခုဖြစ်ပါကြောင်း၊ ထီးလင်းမြို့နှင့် ၂၃ မိုင်ကျော် ဝေးကွာသည့်ဒေသတစ်ခုဖြစ်ပါကြောင်း၊ အဆိုပါဒေသသည် ထီးလင်း-ပေါက်ကားလမ်းပေါ်တွင် တည်ရှိပြီး သွားလာရလွယ်ကူသောဒေသတစ်ခုလည်းဖြစ်ပါသည့်အပြင် ကျေးရွာအုပ်စုပေါင်း ကိုးခု၊ အိမ်ထောင်စုပေါင်း ၁၀၀၀ ကျော်၊ လူဦးရေပေါင်း ၄၀၀၀ ကျော် နေထိုင်သည့်ဒေသဖြစ်ပါကြောင်း၊ ၎င်းဒေသသည် တစ်ရွာနှင့်တစ်ရွာနီးကပ်စွာတည်ရှိပြီး တောင်စွန်းနှင့်မြောက်စွန်းသည် ၁၅ မိုင်ခန့် သာရှိပြီး ဆောမြို့နယ်ဘက်က တပြင်းကျေးရွာနှင့်လည်းဆက်သွယ်လျက်ရှိပါကြောင်း၊ လမ်းပမ်း ဆက်သွယ်ရေးအနေဖြင့် ကောင်းမွန်သောကျေးရွာများလည်းဖြစ်ပါကြောင်း၊ ဒေသခံပြည်သူများ အနေဖြင့်လည်း အချက်အခြာကျသော ကျင်းကျေးရွာကိုမှီခိုအားထားပြီး နေထိုင်ကြရပါကြောင်း၊ ကျင်းကျေးရွာသည် တက္ကသိုလ်ဝင်ခွင့်စာစစ်ဌာနဖွင့်ပြီးဖြစ်သော အခြေခံပညာအထက်တန်းကျောင်း၊ တိုက်နယ်ဆေးရုံ၊ ရဲစခန်းများရှိသောကျေးရွာလည်းဖြစ်ပါကြောင်း၊ ထို့အတွက်ကြောင့် ၎င်း အထက်တန်းကျောင်းတွင် လာရောက်ပြီး ပညာသင်ကြားနေသော ဒေသအသီးသီးက ကျောင်းသူ ကျောင်းသားများ၏ ပညာရေး၊ ဒေသခံပြည်သူများ၏ကျန်းမာရေး၊ အခြားဖွံ့ဖြိုးရေးလုပ်ငန်းများ အတွက် လျှပ်စစ်မီးသည် အဓိကလိုအပ်နေသည့်အပြင် ကျင်းကျေးရွာမှတစ်ဆင့် အခြားကျေးရွာများသို့ လည်း ကျင်း-တပြင်းလမ်းမကြီးအတိုင်း လွယ်ကူစွာသွယ်တန်းဆက်သွယ်သွားမည်ဆိုပါက ယင်းဒေသတစ်ခုလုံး လျှပ်စစ်မီးရရှိသွားမည် ဖြစ်ပါကြောင်း၊ ယခုလက်ရှိအချိန်တွင် ကျင်းကျေးရွာရှိဒေသတစ်ခုလုံး သည် မိမိအစီအစဉ်ဖြင့်မိမိ ကိုယ်ထူကိုယ်ထလှပ်စစ်မီးများကိုသာ အသုံးပြုရပြီး တစ်ညလျှင် နှစ်နာရီ မှ သုံးနာရီခန့်သာ အလင်းရောင်အတွက် ရရှိနေခြင်းဖြစ်သည့်အတွက် ကျောင်းသူ ကျောင်းသားများ အတွက် ပညာရေးသာမက ပြည်သူလူထုများအတွက် စီးပွားရေး၊ ကျန်းမာရေး၊ မိုးလေဝသသတင်း အချက်အလက်များကအစ အခြားဖျော်ဖြေရေးအစီအစဉ်များပါ လေ့လာနိုင်ရန် ခက်ခဲနေပါကြောင်း၊ ထို့ကြောင့် အဆိုပါဒေသတွင် လှပ်စစ်မီးရရှိပါက ဒေသရှိကျောင်းသူ ကျောင်းသားများ၏ ပညာရေး၊ ပြည်သူများ၏ကျန်းမာရေး၊ စီးပွားရေးသာမက အခြားဖွံ့ဖြိုးရေးလုပ်ငန်းများပါ ဆောင်ရွက်လာနိုင်မည် ဖြစ်သည့်အတွက် အမှန်တကယ် လိုအပ်နေသည့်အတွက် ထီးလင်းမြို့နယ် ကျင်းဒေသရှိ ကျေးရွာ ကိုးရွာကို လှပ်စစ်မီးရရှိရေးဆောင်ရွက်ပေးရန် အစီအစဉ်ရှိ/မရှိ၊ အစီအစဥ်ရှိပါက မည်သည့်အချိန်တွင် ဆောင်ရွက်ပေးမည်၊ အစီအစဥ်မရှိပါက မည်သည့်အတွက်ကြောင့်ဆိုသည်ကို သိရှိလိုပါကြောင်း မေးမြန်းပါသည်။

မကွေးတိုင်းဒေသကြီး၊ ဂန့်ဂေါခရိုင်၊ ထီးလင်းမြို့နယ်အတွင်း ကျင်းကျေးရွာဒေသရှိ ကျေးရွာကိုးရွာတွင် အိမ်ခြေ ၁၀၀၀ ခန့်ရှိပြီး အနီးပတ်ဝန်းကျင်တွင် ဖြတ်သန်းသွားသောဓာတ်အားလိုင်းသည် ၆၆ ကေဗွီ ဗို့အားအဆင့်ရှိ ပေါက်-ကျောက်ထု ဓာတ်အားလိုင်းဖြစ်ပါသည့်အတွက် ၆၆ ကေဗွီဓာတ်အား လိုင်းသည် ကျေးရွာများကို တိုက်ရိုက်လှပ်စစ်ဓာတ်အားဖြန့်ဖြူးပေးနိုင်သော ၁၁ ကေဗွီဓာတ်အား လိုင်းအမျိုးအစား မဟုတ်ကြောင်း စစ်ဆေးတွေ့ရှိရပါကြောင်း၊ အဆိုပါ ၆၆ ကေဗွီဓာတ်အားလိုင်းမှ ၁၁ ကေဗွီ ဓာတ်အားလိုင်းအဆင့်ကို တည်ဆောက်ရန် နောက်ထပ် ထပ်ဆင့်ခွဲရုံများအဆင့်ဆင့် တည်ဆောက်ပြီးမှသာ ဓာတ်အားဆက်သွယ်ရရှိနိုင်မည့် အခြေအနေဖြစ်ပါကြောင်း၊ မကွေးတိုင်းဒေသ ကြီး၊ ထီးလင်းမြို့နယ် ကျင်းကျေးရွာဒေသရှိ ကျေးရွာကိုးရွာ လှပ်စစ်ဓာတ်အားရရှိနိုင်ရန် ၁၁ ကေဗွီဓာတ်အားလိုင်းဖြင့် ဓာတ်အားဖြန့်ဖြူးပေးပါက အနီးဆုံးရှိ ၁၁ ကေဗွီဗို့အားရှိသည့်နေရာသည် ထီးလင်းရှိ ၆၆/၁၁ ကေဗွီ ၅ အမ်ဗွီအေဓာတ်အားခွဲရုံဖြစ်ကြောင်း စိစစ်တွေ့ရှိရပါကြောင်း၊ အဆိုပါ ခွဲရုံမှ အနီးဆုံးကျေးရွာဖြစ်သော ကျင်းကျေးရွာထိကို ၁၁ ကေဗွီဓာတ်အားလိုင်း တည်ဆောက်ပါက ဓာတ်အားလိုင်းမိုင်ရှည် ၂၄ မိုင်တည်ဆောက်ရပါကြောင်း၊ ပြီးမှ ကျေးရွာအုပ်စုအတွင်းရှိ ကျန်ကျေးရွာ ရှစ်ရွာကို ဓာတ်အားဆက်ပေးနိုင်ရန်အတွက် ၁၁ ကေဗွီဓာတ်အားလိုင်း နောက်ထပ် ၁၇.၅ မိုင်တည်ဆောက်ရမည်ဖြစ်သည့်အတွက်ကြောင့် စုစုပေါင်း ၁၁ ကေဗွီဓာတ်အား လိုင်း ၄၁.၅ မိုင် တည်ဆောက်မှသာ အဆိုပါကျေးရွာများ လျှပ်စစ်ဓာတ်အားရရှိနိုင်မည်ကို စိစစ်တွေ့ရှိရမည် ဖြစ်ပါကြောင်း၊  ၆၆/၁၁ ကေဗွီ ၅ အမ်ဗွီအေ ထီးလင်းဓာတ်အားခွဲရုံမှ ၁၁ ကေဗွီဓာတ်အားလိုင်း ၄၁.၅ မိုင်အထိ ရှည်လျားစွာတည်ဆောက်ပါက နည်းပညာအရ ဗို့အားပြည့်မီအောင် ဆောင်ရွက်ပေးနိုင်မည် မဟုတ်ကြောင်းလည်း စိစစ်တွေ့ရှိရသည့်အပြင် အဆိုပါဒေသသည်  တောတောင်ထူထပ်လွန်းသည့် အတွက်ကြောင့် သစ်ပင်သစ်ကိုင်းများဖြင့် ဓာတ်အားလိုင်းများ အပြစ်ဖြစ်ပေါ်ပါက အဆိုပါ ဓာတ်အားလိုင်း မိုင် ၄၀ ကျော်တစ်လှောက်ကို လူအင်အားဖြင့် လိုက်လံစစ်ဆေးပြုပြင်ပြီးမှ လှပ်စစ်ကို ပုံမှန်ပြန်ပေးနိုင်မည်ဖြစ်သည့်အတွက်ကြောင့် ကျေးရွာများတွင် ဓာတ်အားပြတ်တောက်မည့်အချိန် ကြန့်ကြာမည့်အခက်အခဲများ ဝန်ထမ်းများလည်း များစွာလိုအပ်မည့် အခြေအနေများကို စစ်ဆေး တွေ့ရှိရခြင်း ဖြစ်ပါကြောင်း၊ မကွေးတိုင်းဒေသကြီး၊ ထီးလင်းမြို့နယ်အတွင်းရှိ ကျင်းကျေးရွာဒေသ ကျေးရွာကိုးရွာကို ဓာတ်အားစနစ်မှ ဓာတ်အားဖြန့်ဖြူးပေးနိုင်ရေး ကိစ္စရပ်မှာ နည်းပညာအခြေအနေနှင့် အဆိုပါဒေသ၏ မြေမျက်နှာပြင်အနေအထား၊ အခက်အခဲများကြောင့် လတ်တလော ဆောင်ရွက် ပေးနိုင်ရန် အစီအစဉ်မရှိသေးပါကြောင်းနှင့် Off Grid System (Solar) ဖြင့်သာ လှပ်စစ် ဓာတ်အားဖြန့်ဖြူးပေးရန် သင့်လျော်သည့်အတွက်ကြောင့် အဆိုပါနည်းလမ်းဖြင့် ကျေးရွာများ လှပ်စစ်ဓာတ်အားရရှိရန် စီစဉ်ဆောင်ရွက်နေပါသော စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာနလက်အောက်က ကျေးလက်ဒေသဖွံ့ဖြိုးတိုးတက်ရေးဦးစီးဌာနသို့ ညှိနှိုင်းအကြောင်းကြား ထားပါကြောင်း ပြန်လည်ရှင်းလင်းဖြေကြားပါသည်။

Source :            httpss://www.pyithuhluttaw.gov.mm/