တောင်ငူ-လွိုင်ကော်-ဟိုပုန်း ပြည်ထောင်စုလမ်းမပေါ် ဆိုက်ခေါင်မှတောင်ဘက် ကယားနယ်စပ်အထိ နှင့် (၂)မိုင်အတွင်းရှိကျေးရွာများအား ဓာတ်အားလိုင်း သွယ်တန်းပေးမည့်အစီအစဉ်ရှိ/မရှိနှင့် စပ်လျဉ်းသည့်မေးခွန်း

ဦးခွန်သန်းထူး( ဆီဆိုင် မဲဆန္ဒနယ်)
 

ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့နယ်သည် စတုရန်းမိုင် ၉၇၁ ကျယ်ဝန်းပြီး မြို့ပေါ် ခြောက်ရပ်ကွက်၊ ကျေးရွာအုပ်စု ၁၃ အုပ်စု၊ ရွာပေါင်း ၃၂၂ ရွာဖြင့့်် ဖွဲ့စည်းထားရှိပြီး ပအိုဝ်း၊ ရှမ်း၊ ဗမာ၊ ကယန်း၊ လီဆူး၊ အင်းသားနှင့် အခြားတိုင်းရင်းသားများအပါအဝင် စုစုပေါင်း လူဦးရေ ၁၅၀၀၀၀ ခန့် နေထိုင်လျက်ရှိပါကြောင်း၊ အရှေ့ဘက်တွင်  မောက်မယ်မြို့နယ်၊ လွိုင်လင်မြို့နယ်၊ အနောက်ဘက် တွင် တောင်ကြီးမြို့နယ်နှင့် ညောင်ရွှေမြို့နယ်၊ ဖယ်ခုံမြို့နယ်နှင့် တောင်ဘက်တွင် လောပိတရေအား လျှပ်စစ်စက်ရုံတည်ရှိရာ ကယားပြည်နယ် လွိုင်ကော်မြို့နယ်နှင့် နယ်နိမိတ်ထိစပ်လျက်ရှိပါကြောင်း၊ ၎င်းအနက် အရှေ့ရိုးမတောင်တန်းပေါ် ဖြတ်သန်းဖောက်လုပ်ထားသော အရှည် ၂၁၇ မိုင်ရှည်လျားသည့် တောင်ငူ-လိပ်သို-လွိုင်ကော်-ဟိုပုန်း ပြည်ထောင်စုလမ်းမကြီး၏ ၄၆ မိုင် အစိတ်အပိုင်းသည် ဆီဆိုင်မြို့နယ်ကို တောင်မှမြောက် အလျားလိုက် ဖြတ်သန်းလျက်ရှိပါကြောင်း၊ ဆီဆိုင်မြို့နယ်သည် ၂၀၁၅ ခုနှစ် နှစ်ဆန်းပိုင်းမှစတင်ပြီး လျှပ်စစ်မီးရရှိခဲ့ပါကြောင်း၊ မီးလင်းရေး ဆောင်ရွက်ရာတွင်လည်း ဒေသနေတိုင်းရင်းသားပြည်သူများက အခက်အခဲများစွာကြားထဲမှ ဝိုင်းဝန်း တာဝန်ယူပြီး ငွေကြေးများစွာ စိုက်ထုတ်ကျခံကာ ကိုယ့်အားကိုယ်ကိုး ပါဝင်ဆောင်ရွက်ခဲ့ကြ ပါကြောင်း၊ ဆီဆိုင်မြို့နယ်၏ကျေးလက်မီးလင်းခွင့်ရာခိုင်နှုန်းသည် ၁၀ ရာခိုင်နှုန်းခန့်သာ ရှိသေး ပါကြောင်း၊ ယခုအခါ နိုင်ငံတော်အစိုးရ၊ ဝန်ကြီးဌာနအစီအစဉ်ဖြင့် မီးလင်းခွင့်ရရှိသော ကျေးရွာများ၏ ကုန်ကျငွေသည် Meter Box ဌာန သွင်းငွေနှင့် Service ကြိုး၊ Main ခုံတစ်ခု၊ မီးသုံးခွင့်အပါ ၂၅၀၀၀၀ ကျပ်ဖြစ်ပြီး ကိုယ့်အားကိုယ်ကိုးပါဝင်သောကျေးရွာများတွင် အိမ်ထဲမီးအလင်းကုန်ကျငွေက ခုနစ်သိန်း ခန့် ကုန်ကျနေသောကြောင့် ဝန်ထုပ်ဝန်ပိုးဖြစ်လျက်ရှိပြီး ဒေသခံပြည်သူအချို့ကလည်း ညည်းညူ နေကြပါကြောင်း၊ အိမ်တိုင်းမီးလင်းခွင့်ရရှိရန်အတွက်လည်း အဟန့်အတားဖြစ်စေလျက်ရှိပါကြောင်း၊ ကျေးလက်နေဘဝတူပြည်သူများအကြား ကွဲပြားမှု၊ ခွဲခြားမှုရှိနေသကဲ့သို့ဖြစ်နေပြီး မြို့ပြနေ ပြည်သူများသည် ကိုယ့်အားကိုယ်ကိုးထည့်ဝင်စရာမလိုကြောင်း တွေ့ရှိရပါကြောင်း၊ ကျေးလက်ဒေသ တွင် နေထိုင်ကြသော တိုင်းရင်းသားပြည်သူအများစုသည် စိုက်ပျိုးရေးလုပ်ငန်းလုပ်ကိုင်ပြီး အသက် မွေးဝမ်းကျောင်းပြုသည်မှာ အားလုံးအသိသာ ဖြစ်ပါကြောင်း၊ ယခုနှစ်ကာလများတွင် စိုက်ပျိုးသီးနှံ အများစု ကုန်ဈေးနှုန်းကျဆင်းခြင်း၊ သွင်းအားစုနှင့် စရိတ်စကမြင့်မားလာခြင်းတို့ကြောင့် စားဝတ် နေရေး အခက်အခဲများ ကြုံတွေ့လျက်ရှိပြီး မူလသဘောသဘာဝအရ အစစအရာရာ နိမ့်ကျနောက်ကျ ကျန်ရစ်နေသော ကျေးလက်နေပြည်သူများဘဝဖွံ့ဖြိုးတိုးတက်ရေးအတွက် လျှပ်စစ်/စွမ်းအင်ကဏ္ဍက လွန်စွာအရေးပါသည့်အတွက် လာမည့်ဘဏ္ဍာရေးနှစ်များတွင် ဘဏ္ဍာငွေပိုမိုခွဲဝေလျာထားသုံးစွဲ ပေးရန် တိုက်တွန်းတင်ပြ တောင်းဆိုလိုပါကြောင်း၊

ဆီဆိုင်မြို့နယ်အတွင်းရှိ ပြည်ထောင်စုကားလမ်းမတစ်လျှောက်ကျေးရွာများသည် လျှပ်စစ်မီးမရသေး သော်လည်း ကယားပြည်နယ်အတွင်း အဆိုပါပြည်ထောင်စုကားလမ်းမတစ်လျှောက်ရှိ ကျေးရွာများ ဆီဆိုင်မြို့နယ်စပ်ထိရှိသော လွိုင်လင်လေးကျေးရွာ၊ ထီးစဲခါးရေတံခွန်ရှိရာကျေးရွာအထိကို ၂၀၁၂ ခုနှစ်ကတည်းက မီးလင်းခွင့်ရရှိခဲ့ကြပါကြောင်း၊ လျှပ်စစ်မီးမရှိခြင်းကြောင့် ပညာရေး၊ ကျန်းမာရေး၊ လူမှုဘဝတွင် အဖက်ဖက်နိမ့်ကျကျန်ရစ်ကာ သစ်တောများလည်း အဆမတန် ပြုန်းတီးမှု များပြားလာပါကြောင်း၊ ဆီဆိုင်မြို့နယ်တွင် ဆိုက်ခေါင် ဓာတ်အားခွဲရုံ ၃၃/၁၁ ကေဗွီ၊ ၁၀ အမ်ဗွီအေ၊ ဆီဆိုင်မြို့ခွဲရုံ ၃၃/၁၁ ကေဗွီ၊ ၅ အမ်ဗွီအေကို ၂၀၁၅ ခုနှစ်တွင်လည်းကောင်း၊ ဘန်းယဉ်ကျေးရွာ ၃၃/၁၁ ကေဗွီ၊ ၅ အမ်ဗွီအေကို ၂၀၁၇ ခုနှစ်တွင်လည်းကောင်း သွယ်တန်းပြီးစီးခဲ့ပါကြောင်း၊ ပြည်ထောင်စုလမ်းမကြီး၏မြောက်ဘက်ခြမ်း ၁၆ မိုင်အတွင်း လမ်းမပေါ်ရှိကျေးရွာအများစု၏ ၉၅ ရာခိုင်နှုန်းခန့်က မီးလင်းခွင့်ရရှိခဲ့သော်လည်း လမ်းမကြီးတောင်ဘက်ခြမ်း မိုင် ၃၀ အတွင်း ကယား ပြည်နယ် နယ်စပ်အထိ လမ်းမပေါ်ရှိကျေးရွာနှင့် နှစ်မိုင်အတွင်းရှိ ကျေးရွာ ၂၅ ရွာတွင် လေးရွာသာ မီးလင်းခွင့်ရရှိသေးသည့်အတွက် တောင်ငူ-လွိုင်ကော်-ဟိုပုန်း ပြည်ထောင်စုလမ်းမပေါ် ဆိုက်ခေါင်မှ တောင်ဘက် ကယားနယ်စပ်အထိနှင့် (၂)မိုင်အတွင်းရှိကျေးရွာများအား ဓာတ်အားလိုင်း သွယ်တန်း ပေးမည့် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။

တောင်ငူ-လွိုင်ကော်-ဟိုပုန်း ပြည်ထောင်စုလမ်းမကြီးပေါ် ဆိုက်ခေါင်မှ တောင်ဘက် ကယားနယ်စပ် အထိ တခေါ့ခွန်၊ ထီဖူး၊ ညောင်ကိုင်း၊ ထီတမောင်း၊ ထီလော့၊ မီးသွေးကုန်း၊ ကောင်းမှုဗွာ၊ ထီမန့်၊ ဝါးခရာ၊ နန်းသြ၊ ထီကလိုး၊ ပုံလောင်း၊ နောင်အယ်၊ မဲတောင်၊ လုံးဖို၊ နောင်ခလောက်၊ နောင်ရင်းဒုံ၊ နောင်ရွေး၊ နောင်ဘို၊ ပန်တိုင်း၊ ကယန်းလေးကျေးရွာနှင့် ရေဖြူကျေးရွာဆိုပြီး စုစုပေါင်း ကျေးရွာ ၂၂ ရွာရှိပါကြောင်း၊

အဆိုပါကျေးရွာများအနက် ထီမန့်ကျေးရွာ လျှပ်စစ်ဓာတ်အားရရှိရန်အတွက် ၁၁ ကေဗွီဓာတ်အားလိုင်း ၅၀၀ ပေ၊ ၁၁/ဝ.၄ ကေဗွီ၊ ၂၀၀ ကေဗွီအေ ထရန်စဖော်မာ၊ ၄၀၀ ဗို့ ဓာတ်အားလိုင်း ၁.၅ မိုင်၊ ကောင်းမှုဗွာကျေးရွာဓာတ်အားရရှိရေးအတွက် ၄၀၀ ဗို့ဓာတ်အားလိုင်း ၁.၅ မိုင်တို့ကို ၂၀၁၇-၁၈ ဘဏ္ဍာရေးနှစ်အတွင်း ပြည်နယ်အစိုးရ၏ရန်ပုံငွေဖြင့် အကောင်အထည်ဖော်ဆောင်ရွက်ထားပြီး ဖြစ်သည့်အပြင် ထီကလိုးကျေးရွာ လျှပ်စစ်ဓာတ်အားရရှိရန်အတွက် ၁၁ ကေဗွီဓာတ်အားလိုင်း ဝ.၈ မိုင်နှင့် ၁၁/ဝ.၄ ကေဗွီ၊ ၂၀၀ ကေဗွီအေ ထရန်စဖော်မာတစ်လုံးတို့ကို ၂၀၁၈ ခုနှစ် ဧပြီလမှ စက်တင်ဘာလအထိ ၆ လ ဘတ်ဂျက်တွင် ပြည်နယ်အစိုးရ၏ရန်ပုံငွေဖြင့် ဆောင်ရွက်ခဲ့ရာ ၁၀၀ ရာခိုင်နှုန်း ပြီးစီးပြီဖြစ်ပါကြောင်း၊ မီးသွေးကုန်းကျေးရွာနှင့် ကောင်းမှုဗွာကျေးရွာနှစ်ရွာ ဓာတ်အား ရရှိရန်လိုအပ်သော ၁၁ ကေဗွီ ဓာတ်အားလိုင်းနှင့် ၁၁/ဝ.၄ ကေဗွီ ထရန်စဖော်မာများကို အမျိုးသား လျှပ်စစ်ဓာတ်အားရရှိရေးစီမံကိန်း NEP ၏ ပထမအဆင့်တွင် ပါရှိပါကြောင်း၊ ဝါးခရာကျေးရွာနှင့် နန်းသြကျေးရွာနှစ်ရွာသည်  NEP ၏ ဒုတိယအဆင့်တွင် ပါရှိပါကြောင်း၊ တခေါ့ခွန်၊ ထီဖူး၊ ပုံလောင်း၊ နောင်အယ်၊ ညောင်ကိုင်း၊ ထီတမောင်း၊ ထီလော့စသော ကျေးရွာခုနစ်ရွာ လျှပ်စစ်ဓာတ်အား ရရှိရေးနှင့်ပတ်သက်ပြီး ပြည်ထောင်စုလွှတ်တော်ထံ တင်ပြအတည်ပြုချက်ရယူပြီးဖြစ်သော ဂျာမနီ ချေးငွေဖြင့် အကောင်အထည်ဖော်ဆောင်ရွက်မည့် KFW စီမံကိန်း၏ ဒုတိယအဆင့်တွင် ထည့်သွင်း လျာထားပြီးဖြစ်ပါကြောင်း၊ ကျန်ရှိသည့်ကျေးရွာများဖြစ်သော မဲတောင်၊ လုံးဖို၊ နောင်ခလောက်၊ နောင်ရင်းဒုံ၊ နောင်ရွေး၊ နောင်ဘို၊ ပန်တိုင်း၊ ကယန်းလေးကျေးရွာနှင့် ရေဖြူကျေးရွာ စသည့်ကျေးရွာ ကိုးရွာ လျှပ်စစ်ဓာတ်အားရရှိနိုင်ရန်အတွက် ဆီဆိုင်မှသည် နောင်ရင်းဒုံအထိကို ၃၃ ကေဗွီဓာတ်အား လိုင်း ၁၇.၁၄ မိုင်တည်ဆောက်ပြီး နောင်ရင်းဒုံကျေးရွာတွင် ၃၃/၁၁ ကေဗွီ၊ ၅ အမ်ဗွီအေ ဓာတ်အား ခွဲရုံတစ်ရုံတည်ဆောက်မှသာ အဆိုပါကျေးရွာကိုးရွာကို ဓာတ်အားဖြန့်ဖြူးပေးနိုင်မည့် အခြေအနေ ဖြစ်ပါကြောင်း၊ အဆိုပါဓာတ်အားလိုင်းနှင့် ဓာတ်အားခွဲရုံတည်ဆောက်ခြင်း လုပ်ငန်းများအတွက် ငါးနှစ်စီမံကိန်း၏ ၂၀၂၀-၂၁ ဘဏ္ဍာရေးနှစ် ပြည်ထောင်စုဘဏ္ဍာရန်ပုံငွေတွင် ထည့်သွင်းလျာထား ဆောင်ရွက်သွားမည်ဖြစ်ပါကြောင်း၊

မိမိတို့လျှပ်စစ်နှင့်စွမ်းအင်ဝန်ကြီးဌာနအနေဖြင့် ကျေးရွာများ လျှပ်စစ်ဓာတ်အားရရှိရန် ကြိုးပမ်း ဆောင်ရွက်နေပါကြောင်း၊ အဆိုပါကဲ့သို့ ဆောင်ရွက်နေချိန်တွင် ပြည်တွင်းပြည်ပချေးငွေများနှင့် ပြည်ထောင်စုဘဏ္ဍာရန်ပုံငွေများကို အသုံးပြုပြီးတည်ဆောက်ခြင်းရှိပါကြောင်း၊ သို့ရာတွင် ဘတ်ဂျက် များ လုံလောက်မှုမရှိဘဲ တိုင်းပြည်တွင် လျှပ်စစ်ဓာတ်အားရရှိရန်အတွက် တည်‌ဆောက်ရန် များစွာ ဆောင်ရွက်ပေးရဦးမည် ဖြစ်ပါကြောင်း၊ နှစ်စဉ်ဘတ်ဂျက်တင်ပြတောင်းခံပြီး ဆောင်ရွက်ချိန်တွင် လည်း မိမိတို့က ဓာတ်အားထုတ်လုပ်မှုကုန်ကျစရိတ်နှင့် ဓာတ်အားကို ပြန်လည်ရောင်းချသော ဝင်ငွေ၏နှုန်းထားများ ကွာဟချက်ကြောင့် နှစ်စဉ်ဘီလီယံ ၅၀၀၊ ၆၀၀ ဆုံးရှုံးနေလျက်ရှိပါကြောင်း၊ အကယ်၍သာ အဆိုပါဆုံးရှုံးမှုသာမရှိခဲ့ပါက တင်ပြပါကွာဟသွားသော ဘတ်ဂျက်ပမာဏဖြင့် ကျေးရွာများအတွက် ယခုကဲ့သို့သော လိုအပ်သည့်ဓာတ်အားလိုင်းပမာဏပေါင်းများစွာကို နှစ်စဉ် ကြိုးပမ်းတည်ဆောက်ပေးသွားနိုင်မည် ဖြစ်ပါကြောင်း၊ အဓိကအချက်က မြို့ပြရှိလက်ရှိလျှပ်စစ် ဓာတ်အားရရှိပြီးနေသူများအတွက် လျှပ်စစ်ဓာတ်အားခ ချိုသာစွာ ပေးနေရသည့်အတွက် လွှတ်တော်ကိုယ်စားလှယ်ကြီး ဆွေးနွေးသွားသကဲ့သို့ လျှပ်စစ်ဓာတ်အားမရရှိသေးသော ကျေးလက်နေ ပြည်သူများအတွက် ဆောင်ရွက်ရာတွင် ဘဏ္ဍာငွေအဟန့်အတား ဖြစ်နေပါကြောင်း ရှင်းလင်း ဖြေကြားပါသည်။

Source....httpss://www.pyithuhluttaw.gov.mm/