တောင်ဥက္ကလာပမြို့နယ်အတွင်း သက်တမ်းကြာနေပြီဖြစ်သော လျှပ်စစ်မီးကြိုးများနေရာတွင် လျှပ်စစ်မီးကြိုးအသစ်များ အစားထိုးဆောင်ရွက်ခြင်းကို မည်ကဲ့သို့သော အစီအစဉ်ဖြင့် စီမံချက်ချ၍ ဆောင်ရွက်ထားသည်ကို သိလိုခြင်းနှင့်စပ်လျဉ်းသည့်မေးခွန်း

တောင်ဥက္ကလာပမြို့နယ်အတွင်း သက်တမ်းကြာနေပြီဖြစ်သော လျှပ်စစ်မီးကြိုးများနေရာတွင် လျှပ်စစ်မီးကြိုးအသစ်များ အစားထိုးဆောင်ရွက်ခြင်းကို မည်ကဲ့သို့သော အစီအစဉ်ဖြင့် စီမံချက်ချ၍ ဆောင်ရွက်ထားသည်ကို သိလိုခြင်းနှင့်စပ်လျဉ်းသည့်မေးခွန်း

ဒေါက်တာစောနိုင်( တောင်ဥက္ကလာပ မဲဆန္ဒနယ်)

ယခု မိုးဦးကျအချိန်သည် လေပြင်းတိုက်ခတ်မှုများကြောင့် လျှပ်စစ်ဓာတ်ကြိုးများ ပြတ်ကျခြင်းတို့ ဖြစ်ပွားနေသည့်အချိန် ဖြစ်ပါကြောင်း၊ ဓာတ်ကြိုးပြတ်ကျသည့် အကြောင်းရင်းများထဲတွင် ဓာတ်ကြိုးနှင့်မလွတ်သည့် အပင်/အကိုင်းများကလည်း အကြောင်းအရင်းတစ်ခု ဖြစ်နေပါကြောင်း၊ ၂၀၁၆ ခုနှစ်အထိ လျှပ်စစ်ဌာနသည် လျှပ်စစ်ကြိုးနှင့် မလွတ်သည့် အပင်/ကိုင်းများကို ခုတ်ပါကြောင်း၊ မြို့နယ်စည်ပင်က သိမ်းဆည်းခြင်းလုပ်ငန်းများ ဆောင်ရွက်ခြင်းကို တွေ့ရှိရပါကြောင်း၊ ၂၀၁၇ ခုနှစ်ကစပြီး မြို့နယ်လျှပ်စစ်ဌာနသည် ဝန်ထမ်းအင်အားမရှိသဖြင့် လျှပ်စစ်ကြိုးနှင့်မလွတ်သည့် အပင်/ကိုင်းများကို  ခုတ်ယူခြင်းမရှိတော့ပါကြောင်း၊ မြို့နယ်စည်ပင်က ဆောင်ရွက်နေခြင်းကို တွေ့ရှိရပါကြောင်း၊ မြို့နယ်စည်ပင်အနေဖြင်‌့လည်း လျှပ်စစ်ကြိုးနှင့်မလွတ်သည့် အပင်/ကိုင်းများ ခုတ်သည့်အခါ လျှပ်စစ်မီးဖြတ်ပေးရန်ကို လျှပ်စစ်ဌာနကို အကြောင်းကြားပြီး ဆောင်ရွက်နေရခြင်း ဖြစ်သည့်အတွက် မိုးတွင်းကာလမတိုင်မီ လုပ်ငန်းများပြီးစီးနိုင်ခြင်း မရှိသည်ကို တွေ့ရှိနေရပြီး လျှပ်စစ်မီးကြိုးများလည်း မကြာခဏပြတ်ကျမှုများ ဖြစ်ပေါ်လျက်ရှိပါကြောင်း၊

ထို့ကြောင့် မြို့နယ်လျှပ်စစ်ဌာနအနေဖြင့် လျှပ်စစ်မီးကြိုးနှင့်မလွတ်သည့် အပင်/ကိုင်းများကို ဌာနအနေဖြင့် ခုတ်ပေးနိုင်ရေးအတွက်ကို မည်ကဲ့သို့ စီစဉ်ထားသည်ကိုလည်း သိရှိလိုပါကြောင်း၊ နောက်တစ်ခုအနေဖြင့် မြို့နယ်တွင်ရှိသည့် လျှပ်စစ်မီးကြိုးများ သက်တမ်းကြာနေပြီ ဖြစ်သဖြင့် လျှပ်စစ်အန္တရာယ် ကင်းရှင်းနိုင်ရေးအတွက် Insulated ဝါယာကဲ့သို့သော Cover ပါသော လျှပ်စစ်မီးကြိုးများ လဲလှယ်တပ်ဆင်ပေးရန်လည်း လိုအပ်လျက်ရှိနေပြီ ဖြစ်ပါကြောင်း၊ Insulated ဝါယာများအစားထိုး လဲလှယ်ခြင်းအတွက်လည်း မည်ကဲ့သို့ စီစဉ်ဆောင်ရွက်ထားသည်ကို သိရှိလိုပါသဖြင်‌့ လျှပ်စစ်အန္တရာယ်ကြိုတင် ကာကွယ်နိုင်ရေးအတွက် သိရှိလိုပါကြောင်း မေးမြန်းပါသည်။

အဆိုပါ ကိစ္စပတ်သက်ပြီး သစ်ပင်/သစ်ကိုင်းများကို ခုတ်ထွင်ရှင်းလင်း ဆောင်ရွက်ရေးသည် အဆိုပါ နယ်မြေဒေသတွင်ရှိသည့် စည်ပင်သာယာလုပ်ငန်းကို တာဝန်ယူရသည့် အဖွဲ့၏အဓိက တာဝန်ဖြစ်ပါကြောင်း၊ သို့ရာတွင် သစ်ပင်/သစ်ကိုင်းများ ခုတ်သည့်အချိန်တွင် ဓာတ်ကြိုးနှင့် မလွတ်သည့် ကိစ္စရပ်ကြောင်‌့ ဓာတ်လိုက်မှုအန္တရာယ် ဖြစ်ပေါ်နိုင်ပါက အသက်အန္တရာယ် ကင်းဝေးစေရေးအလို့ငှာ အဆိုပါ ဓာတ်အားလိုင်းများကို ဓာတ်အားပိတ်ပေးခြင်း လုပ်ငန်းကိုတာဝန်ယူ ဆောင်ရွက်ရမည်မှာ လျှပ်စစ်ဌာန၏ တာဝန်ဖြစ်ပါကြောင်း၊ လက်ရှိဖြစ်ပေါ်နေသော အခြေအနေများက သစ်ပင်/သစ်ကိုင်း ခုတ်ရန်တာဝန်ကို စည်ပင်သာယာရေး ကော်မတီဘက်က ပူးပေါင်းဆောင်ရွက်သည့်အခါ ၎င်းတို့ဘက်ကလည်း အခက်အခဲရှိသည် ဆိုသည့်အတွက်ကြောင့် ပူးပေါင်းဆောင်ရွက်မှုများ မဖြစ်ပေါ်ဘဲ ဓာတ်ကြိုးပြတ်ကျလျှင် မလွှဲမရှောင်သာ တာဝန်ရှိနေသည့် လျှပ်စစ်ဌာနက သစ်ပင်/သစ်ကိုင်း ခုတ်ရသည့် လုပ်ငန်းတာဝန်ကို ဘတ်ဂျက်စိုက်၊ လူစိုက်ပြီး ထပ်မံတာဝန်ယူ ဆောင်ရွက်နေရသည့် အခြေအနေဖြစ်ပါကြောင်း၊ အမှန်တကယ် စည်ပင်သာယာရေး ဘက်မှ အပြည့်အဝတာဝန်ယူ မည်ဆိုပါက လျှပ်စစ်ဌာနဘက်က လျှပ်စစ်အန္တရာယ်ကင်းဝေး စေနိုင်ရေးအတွက် ဓာတ်အားပိတ်ပေးခြင်း လုပ်ငန်းကို ပူးပေါင်းဆောင်ရွက်နိုင်ရန် ရာနှုန်းပြည့်တာဝန် ယူပါသည်ဟု ဖြေကြားလိုပါကြောင်း၊

သို့ရာတွင် လျှပ်စစ်ဌာနအနေဖြင့် ပြည်သူလူထု၏ အသက်အန္တရာယ် ကင်းဝေးရေး၊ လျှပ်စစ်အန္တရာယ် ကင်းဝေးရေးကို မိမိတို့ဝန်ကြီးဌာနသည် ဝန်ထမ်းဦးရေ ခန့်ထားခွင်‌့လုံးဝ မရခြင်းကြောင့် အခက်အခဲကိုလည်း အကြိမ်ပေါင်းများစွာ တင်ပြခဲ့ပါသည်။ ဝန်ထမ်းမရှိသည့် အတွက်ကြောင့် လျှပ်စစ်လုပ်ငန်းများကို ထိန်းသိမ်းပြုပြင်ခြင်း လုပ်ငန်းများအား အလှည်‌့ကျတာဝန် ထမ်းဆောင် နေရသည့် အခက်အခဲကြားမှ လူအားစိုက်ပြီး ခုတ်ထွင်ရှင်းလင်းသော်လည်း သစ်ပင်/သစ်ကိုင်းများ ကိုလည်း စည်ပင်ကလာရောက် သိမ်းဆည်းပေးခြင်းမရှိဘဲ လျှပ်စစ်ဌာနကသာ သိမ်းဆည်းပေး ရအုံးမည်ဆိုလျှင် လူအင်အားအများကြီး လိုအပ်လျက်ရှိပါကြောင်း၊ ထို့ကြောင့် ၎င်းကိစ္စနှင့် ပတ်သက်ပြီး သက်ဆိုင်ရာ ရန်ကုန်လျှပ်စစ် ဓာတ်အားပေးရေး Cooperation မှတစ်ဆင့်ရန်ကုန်စည်ပင်သာယာရေး ကော်မတီနှင့် ပေါင်းစပ်ညှိနှိုင်း ဆောင်ရွက်ပေးရေးကိုလည်း ဆောင်ရွက် ပေးသွားမည် ဖြစ်ပါကြောင်း၊

ဆက်လက်ပြီး တောင်ဥက္ကလာပမြို့နယ်အတွင်း ၂၀၁၈ ခုနှစ် ဧပြီလမှစပြီး ယနေ့အထိ ယခင်က လျှပ်ကာအခွံမပါသည့် ACSR ကြိုးများ၏ နေရာတွင် လျှပ်ကာအခွံပါသည့် SAC ကေဗယ်ကြိုးများဖြင်‌့ 6.6 ကေဗွီ ဓာတ်အားလိုင်းများနေရာ အစားထိုးလဲလှယ်ခြင်းများ ဆောင်ရွက်ပေးခဲ့ပါကြောင်း၊ အလားတူ လျှပ်ကာအခွံမပါသည့် ၄၀၀ ဗို့လိုင်း ကြေးကြိုးများနေရာတွင်လည်း လျှပ်ကာအခွံပါသည့် ABC ကေဗယ်ကြိုးများဖြင့် လဲလှယ်အစားထိုး ဆောင်ရွက်ပေးခြင်း လုပ်ငန်းများကို ဆောင်ရွက် ပေးလျက်ရှိပါကြောင်း၊ ထိုကဲ့သို့ ‌ဆောင်ရွက်ပေးခဲ့သည့် မှတ်တမ်းစာရင်းများ စုစုပေါင်း ဆောင်ရွက်ပေးခဲ့သည့် အခြေအနေများသည် 6.6 ကေဗွီဝေဇယန္တာ-ဗလိလက (၁) ဖီဒါတွင် SAC ကေဗယ်ပေါင်း ပေ ၄၈၀၀၊ ဝေဇယန္တာ-မေတ္တာ ဖီဒါတွင် SAC ကေဗယ်ပေါင်း ပေ ၃၄၀၀၊ စိန်ပန်းမြိုင်-ပါရမီ ဖီဒါတွင် SAC ကေဗယ်ပေါင်း ၆၈၀၃ ပေ၊ တောင်ဥက္ကလာပမြို့နယ်အတွင်း 11.4 ကေဗွီ၊ ၂၀၀ ကေဗွီအေ ထရန်စဖော်မာအားလုံး အလုံး ၁၅ လုံးနှင့် ၄၀၀ ဗို့ ABC ကေဗယ် စုစုပေါင်း ပေ ၁၀၆၈၀  မိမိတို့ အစားထိုးလဲလှယ်ပေးခဲ့ခြင်း ဖြစ်ပါကြောင်း၊ မိမိတို့တောင်ဥက္ကလာပမြို့နယ် တစ်ခုတည်း အတွင်းသာမက ကျန်ရှိသည့် မြို့နယ်များအတွင်း ယခုကဲ့သို့ အစားထိုးလဲလှယ်ခြင်း လုပ်ငန်းများကို မျှတပြီး ဆောင်ရွက်ပေးလျက်ရှိခြင်း ဖြစ်ပါကြောင်း၊ နှစ်အလိုက်ဘဏ္ဍာ ရန်ပုံငွေတွင် မူလလိုင်းဟောင်းများကို အစားထိုးလဲလှယ်ခြင်း ဆောင်ရွက်ပေးနေသကဲ့သို့ လျှပ်စစ်ဓာတ်အား မရှိသေးသည့် ဧရိယာများတွင်လည်း ထပ်မံဖြည့်စွက် ဆောင်ရွက်ပေးနေခြင်းဖြစ်သည့် အတွက်ကြောင့် ရာနှုန်းပြည့်ဆောင်ရွက်ပေးနိုင်ခြင်း လတ်တလော မရှိသေးသော်လည်း တဖြည်းဖြည်း စီစဉ်ဆောင်ရွက် ပေးသွားမည်ဖြစ်ပါကြောင်း ရှင်းလင်းဖြေကြား ပါသည်။

လျှပ်စစ်နှင်‌့စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်              

Source: https://www.pyithuhluttaw.gov.mm/question-3834