ဒဂုံမြို့သစ် (တောင်ပိုင်း) မြို့နယ်တွင် လိုအပ်လျက်ရှိသော 66/11 KVA ဓာတ်အားခွဲရုံများ ဆောက်လုပ် ပေးပါရန်၊ ဝါယာကြိုးများ တပ်ဆင်ခြင်း၊ ပြုပြင်ခြင်း၊ လမ်းမီးသီး/မီးလုံးများ ပြုပြင်တပ်ဆင်ခြင်း၊ ရှုပ်ထွေးဝါယာကြိုးများ ရှင်းလင်းရေးအတွက် ထရိန်းကား သို့မဟုတ် လုပ်ငန်းသုံးကားတစ်စီးနှင့် လျှပ်စစ်ကာကွယ်ရေးအသုံးအဆောင်ပစ္စည်းများ လုံလောက်စွာချထားပေးပါရန်၊ သုံးစွဲမီတာ၊ သုံးစွဲထရန်စဖော်မာများအတွက် ကိုက်ညီသော မြို့နယ်လျှပ်စစ်ဓာတ်အားပေးရေးအဖွဲ့ ဝန်ထမ်းဖွဲ့စည်းပုံ တိုးချဲ့ခန့်ထားပေးပါရန် သို့မဟုတ် မြို့နယ် လျှပ်စစ်ဓာတ်အား ပေးရေးအဖွဲ့ခွဲအင်အား ချထားပေးပါရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

ဒဂုံမြို့သစ် (တောင်ပိုင်း) မြို့နယ်တွင် လိုအပ်လျက်ရှိသော 66/11 KVA ဓာတ်အားခွဲရုံများ ဆောက်လုပ် ပေးပါရန်၊ ဝါယာကြိုးများ တပ်ဆင်ခြင်း၊ ပြုပြင်ခြင်း၊ လမ်းမီးသီး/မီးလုံးများ ပြုပြင်တပ်ဆင်ခြင်း၊ ရှုပ်ထွေးဝါယာကြိုးများ ရှင်းလင်းရေးအတွက် ထရိန်းကား သို့မဟုတ် လုပ်ငန်းသုံးကားတစ်စီးနှင့် လျှပ်စစ်ကာကွယ်ရေးအသုံးအဆောင်ပစ္စည်းများ လုံလောက်စွာချထားပေးပါရန်၊ သုံးစွဲမီတာ၊ သုံးစွဲထရန်စဖော်မာများအတွက် ကိုက်ညီသော မြို့နယ်လျှပ်စစ်ဓာတ်အားပေးရေးအဖွဲ့ ဝန်ထမ်းဖွဲ့စည်းပုံ တိုးချဲ့ခန့်ထားပေးပါရန် သို့မဟုတ် မြို့နယ် လျှပ်စစ်ဓာတ်အား ပေးရေးအဖွဲ့ခွဲအင်အား ချထားပေးပါရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

ဦးအေးနိုင်(ဒဂုံမြို့သစ်(တောင်ပိုင်း) မဲဆန္ဒနယ်)

ဒဂုံမြို့သစ် (တောင်ပိုင်း) မြို့နယ်သည် လူနေ ၃၂ ရပ်ကွက်၊ လူနေရန်ထပ်မံ အသစ်ဖော်ထုတ်ပြီးရပ်ကွက် ၁၀ ရပ်ကွက်ရှိပြီး လူဦးရေအားဖြင့် ၃၇၀၀၀၀၊ စက်မှုဇုန်လေးဇုန်၊ စက်ရုံအလုပ်ရုံပေါင်း ၁၀၀၀ ကျော်ရှိပြီး လူနေအိမ်များ၊ စက်ရုံအလုပ်ရုံများ၊ လျှပ်စစ်ဓာတ်အားသုံးစွဲမှုကို ကြည့်မည်ဆိုလျှင် မီးသုံးစွဲသူ မီတာ အလုံးရေ ၇၂၈၂၉ လုံးသုံးစွဲလျက်ရှိပါကြောင်း၊ ထို့ကြောင့် လျှပ်စစ်ဓာတ်အား ပြည့်ဝတည်ငြိမ်စွာ ပေးနိုင်ရေးအတွက် လုံလောက်သည့် ဓာတ်အားခွဲရုံများ လိုအပ်လာမည် ဖြစ်ပါကြောင်း၊ လက်ရှိလျှပ်စစ် ဓာတ်အားခွဲရုံများမှာ လျှပ်စစ်ဓာတ်အား ထုတ်လုပ်ပေးနေသော်လည်း ထပ်မံတပ်ဆင်လိုသည့် မီတာလုံးရေများ၊ တိုးချဲ့လာမည့် အိမ်ရာစီမံကိန်းများ၊ စက်ရုံအလုပ်ရုံများ၊ စက်မှုလက်မှုလုပ်ငန်းများကို အဆင့်မြှင့်တင်ရန် စတင်ဆောင်ရွက်နေမှုများကြောင့် ဓာတ်အားခွဲရုံများ ထပ်မံလိုအပ်လာမည် ဖြစ်ပါကြောင်း၊ ထို့အတွက် မိမိမှ ရန်ကုန်တိုင်းဒေသကြီးအစိုးရပိုင် ဒဂုံမြို့သစ် (တောင်ပိုင်း)၊ ၁၀၆ ရပ်ကွက်ရှိ မြေဧကသုံးဧကအား ဝန်ကြီးချုပ်ထံတင်ပြတောင်းခံခဲ့ရာ ခွင့်ပြုမိန့်ရရှိခဲ့ပြီးလည်း ဖြစ်ပါကြောင်း၊

ထို့ကြောင့် ၁၀၆ ရပ်ကွက်၊ စိုက်မွေးရပ်ကွက်၊ ၇၀ ရပ်ကွက်များတွင် 66/11 KVA ဓာတ်အားခွဲရုံများ အမြန်ဆုံးတပ်ဆင်ပေးပါရန် အစီအစဉ်ရှိ/မရှိနှင့် မိမိတို့မြို့နယ်တွင် လျှပ်စစ်ဝန်ထမ်းများအနေဖြင့် ဝါယာကြိုးများတပ်ဆင်ခြင်း၊ ရှင်းလင်းခြင်း၊ လမ်းမီးတိုင်များပေါ် မီးလုံး၊ မီးချောင်းများ လဲလှယ်ခြင်းများတွင် ကရိန်းကားများ၊ ကာကွယ်ရေးဝတ်စုံများ မရှိပါသဖြင့် အန္တရာယ်များစွာနှင့် ဆောင်ရွက်နေရပါကြောင်း၊ မြို့နယ်ပိုင်ပလပ်ဖောင်း ထရပ်ကရိန်းကားတစ်စီး၊ လျှပ်ကာဝတ်စုံများ၊ လျှပ်ကာလုပ်ငန်းသုံးပစ္စည်း ကိရိယာများချထားပေးပါရန် အစီအစဉ်ရှိ/မရှိ တင်ပြလိုခြင်းဖြစ်ပါကြောင်း၊ ဥပမာ-ဒဂုံမြို့သစ် (တောင်ပိုင်း) မြို့နယ်တွင် ၂၀၁၇-၁၈ ဘဏ္ဍာရေးနှစ်တွင် ဝန်ထမ်းအချို့ အသက်အန္တရာယ် ထိခိုက်ခဲ့ရပြီး မြို့နယ်လျှပ်စစ်မန်နေဂျာနှင့် မြို့နယ်အင်ဂျင်နီယာ ဝန်ထမ်းနှစ်ဦးအား အရေးယူခြင်းကိုသာ ဆောင်ရွက်ခဲ့ပြီး လိုအပ်သည့်ပံ့ပိုးမှုကို မဖြည့်ဆည်းပေးခဲ့ကြောင်း၊ ထို့အပြင် ဒဂုံမြို့သစ် (တောင်ပိုင်း) မြို့နယ်လျှပ်စစ်ဓာတ်အားပေးအဖွဲ့ ဝန်ထမ်းအင်အားမှာ ၂၀၀၆-၀၇ ခုနှစ် မီးသုံးစွဲသူ ၄၀၀၀၀ ခန့်နှင့် ချထားပေးခဲ့ခြင်းဖြစ်၍ ယခု ၂၀၁၈-၁၉ ခုနှစ်ကို မီးသုံးစွဲသူ ၇၀၀၀၀ ကျော်နှင့် ကိုက်ညီသည့် ဖွဲ့စည်းပုံ၊ 66/11 KVA ဓာတ်အားခွဲရုံများ၊ 33/11 KVA ဓာတ်အားခွဲရုံများအတွက် ဖွဲ့စည်းပုံချထားပေးပါရန် အစီအစဉ်ရှိ/မရှိ မေးမြန်းပါသည်။

မေးခွန်း (၃) ခုအနက် ပထမဦးဆုံးမေးခွန်းဖြစ်သော ဒဂုံမြို့သစ် (တောင်ပိုင်း) မြို့နယ်တွင် လျှပ်စစ်ဓာတ်အားပြည့်ဝစွာ သုံးစွဲနိုင်ရေးအတွက် 66/11 KVA ဓာတ်အားခွဲရုံ တည်ဆောက်ပေးရန်ရှိ/မရှိ နှင့်ပတ်သက်ပြီး လိုအပ်သောမြေနေရာကို လွှတ်တော်ကိုယ်စားလှယ်ကြီးနှင့် ရန်ကုန်တိုင်းဒေသကြီး အစိုးရအဖွဲ့တို့က ပေါင်းစပ်ညှိနှိုင်း စီစဉ်ဆောင်ရွက်ပေးသောကြောင့် ကျေးဇူးတင်ပါကြောင်း၊ အဆိုပါမြေနေရာတွင် 66/11 KVA ၊ 20 MVA ထရန်စဖော်မာနှစ်လုံး တပ်ဆင်မည့် ဓာတ်အားခွဲရုံ တည်ဆောက်ခြင်းလုပ်ငန်းကို လာမည့် ၂၀၁၉-၂၀ ခုနှစ် ပြည်ထောင်စုဘဏ္ဍာ ရန်ပုံငွေတွင် ထည့်သွင်းလျာထား ဆောင်ရွက်ပေးရန် စီစဉ်လျက်ရှိပါကြောင်း ရှင်းလင်းဖြေကြားပါသည်။

ဒုတိယမေးခွန်းဖြစ်သော ဒဂုံမြို့သစ် (တောင်ပိုင်း) မြို့နယ်အတွင်း ဝါယာကြိုးများတပ်ဆင်ခြင်း၊ ပြုပြင်ခြင်း၊ လမ်းမီးသီးနှင့်မီးလုံးများ ပြုပြင်တပ်ဆင်ခြင်း၊ ရှုပ်ထွေးဝါယာကြိုးများ ရှင်းလင်းရေးလုပ်ငန်းများအတွက် ထရိန်းကား သို့မဟုတ် လုပ်ငန်းသုံးကားတစ်စီးနှင့် လျှပ်စစ်ကာကွယ်ရေး အသုံးအဆောင်ပစ္စည်းများ လုံလောက်စွာ ချထားပေးနိုင်ရေးနှင့်ပတ်သက်၍ ဒဂုံမြို့သစ် (တောင်ပိုင်း) မြို့နယ်၏ ဓာတ်အားဖြန့်ဖြူးရေး လုပ်ငန်းများကို ပုဂ္ဂလိကကုမ္ပဏီဖြစ်သည့် Global Lighting Star ကုမ္ပဏီက တာဝန်ယူဆောင်ရွက်ပြီး 11 KV နှင့် ၎င်းထက်ဗို့အားနိမ့် ဓာတ်အားလိုင်းများ၏ ဓာတ်အားဖြန့်ဖြူးရေးလုပ်ငန်းများကို ဆောင်ရွက်ခွင့် ရရှိထားပါကြောင်း၊ ထို့ကြောင့် လွှတ်တော်ကိုယ်စားလှယ်ကြီး မေးမြန်းသော ရှုပ်ထွေးဝါယာကြိုးများ ရှင်းလင်းရန်လိုအပ်သည့် တစ်တန်ခွဲကရိန်းကားကို အဆိုပါကုမ္ပဏီက လိုအပ်ချိန်မှာ ဖြည့်ဆည်း ဆောင်ရွက်လျက်ရှိသည်ဟု သိရှိရပါကြောင်း၊ သို့ရာတွင် အဆိုပါကရိန်းကားသည် မြို့နယ်တွင် လုပ်ငန်းဆောင်ရွက်ရန်အတွက် အချိန်ပြည့်စီစဉ်ထားမှု မရှိသည်ကို သိရှိရပါကြောင်း၊ ရန်ကုန်မြို့တော် လျှပ်စစ်ဓာတ်အားပေးရေး ကော်ပိုရေးရှင်းအနေဖြင့် အဆိုပါမြို့နယ်မှာ လုပ်ငန်းသုံးယာဉ် လိုက်ထရပ် တစ်စီး အမြဲတမ်းထားရှိဆောင်ရွက် ပေးထားခြင်းဖြစ်ပါကြောင်း၊ ကျန်သောလျှပ်စစ်ကာကွယ်ရေး အသုံးအဆောင် ပစ္စည်းများနှင့်ပတ်သက်ပြီး ကုမ္ပဏီကဖြည့်ဆည်းဆောင်ရွက်ပေးရန် လိုအပ်သောကြောင့် အဆိုပါကုမ္ပဏီကို ဖြည့်ဆည်းဆောင်ရွက်ပေးနိုင်ရေး စီစဉ်ကြီးကြပ်သွားမည် ဖြစ်ပါကြောင်း ရှင်းလင်းဖြေကြားပါသည်။

တတိယမေးခွန်းဖြစ်သည့် လက်ရှိမြို့နယ်အတွင်းရှိ ရပ်ကွက်ပမာဏ၊ လူအင်အား၊ ဧရိယာ၊ ထရန်စဖော်မာ အင်အား၊ မီးသုံးစွဲမှုအင်အားနှင့် ကိုက်ညီသော မြို့နယ်လျှပ်စစ်ဝန်ထမ်းအင်အား တိုးချဲ့ချထားပေးနိုင်ရန် မေးမြန်းခြင်းနှင့်ပတ်သက်ပြီး ဒဂုံမြို့သစ် (တောင်ပိုင်း) မြို့နယ်အတွင်း ရပ်ကွက်ပေါင်း ၃၂ ရပ်ကွက်၊ နေထိုင်သူ လူဦးရေပေါင်း ၃၇၀၀၀၀ ကျော် နေထိုင်သည့်မြို့နယ် ဖြစ်ပါကြောင်း၊ အဆိုပါ မြို့နယ်အတွင်းတွင် စက်မှုဇုန်ကလေးဇုန်ရှိပြီး စက်ရုံပေါင်း ၁၀၀၀ ကျော်ခန့်ရှိပါကြောင်း၊ တပ်ဆင် အသုံးပြုနေသည့် မီတာအလုံးရေပေါင်း ၇၁၀၀၀ ကျော်ရှိပြီး ဧရိယာအကျယ်အဝန်း ၉ စတုရန်းမိုင်ခန့် ရှိပါကြောင်း၊ အဆိုပါမြို့နယ်အတွင်း 66 KV ဓာတ်အားခွဲရုံ နှစ်ရုံ၊ 33 KV ဓာတ်အားခွဲရုံ လေးရုံ ရှိပါကြောင်း၊ အဆိုပါ 66 KV ဓာတ်အားခွဲရုံကို ၂၄ နာရီ အလှည့်ကျတာဝန် ထမ်းဆောင်ရန်အတွက် လိုအပ်သည့် ဝန်ထမ်းဦးရေမှာ ခွဲရုံနှစ်ရုံစာအတွက် ဝန်ထမ်း ၄၀ ဦးလိုအပ်ပါကြောင်း၊ အလားတူ 33 KV ဓာတ်အားခွဲရုံအတွက် ဝန်ထမ်း ၂၄ ဦး လိုအပ်ပါကြောင်း၊ သို့သော် အဆိုပါခွဲရုံခြောက်ရုံအတွက် ဝန်ထမ်း ဖွဲ့စည်းပုံ မိမိတို့မှာမရှိသေးပါကြောင်း၊ ထို့ကြောင့် ဖွဲ့စည်းပုံရှိမှသာ ဝန်ထမ်းခန့်ထားခွင့် ရှိသည့်အတွက် ခန့်ထားနိုင်သောဦးရေက လုံးဝမရှိဘဲ ဝန်ထမ်းဦးရေမှာ ၆၄ ဦးလိုအပ်နေပါကြောင်း၊ အလားတူ မြို့နယ်လျှပ်စစ်အင်ဂျင်နီယာရုံးက တစ်ရုံးရှိပြီး လိုအပ်သောဝန်ထမ်းဦးရေမှာ  ၈၇ ဦး ရှိပါကြောင်း၊ မြို့နယ်လျှပ်စစ်အင်ဂျင်နီယာရုံးအတွက် ဝန်ထမ်းဖွဲ့စည်းပုံရှိပါကြောင်း၊ သို့သော် ခန့်ထားသည့် ဦးရေမှာ ၇၃ ဦးဖြစ်၍ မြို့နယ်ရုံးမှာ ၁၄ ဦး လိုအပ်ပါကြောင်း၊ ထို့ကြောင့် ဒဂုံမြို့သစ် (တောင်ပိုင်း) မြို့နယ်အတွင်းတွင် အမှန်တကယ်လိုအပ်သည့် ဝန်ထမ်းဦးရေမှာ ၁၅၁ ဦးဖြစ်ပြီး လက်ရှိ ခန့်ထားသည်မှာ ၇၃ ဦးဖြစ်ကာ ၈၇ ဦးလိုအပ်နေပါကြောင်း၊ 66 KV ဓာတ်အားခွဲရုံနှင့် 33 KV ဓာတ်အားခွဲရုံများမှာ ဖွဲ့စည်းပုံမကျသောကြောင့် လွှတ်တော်ကိုယ်စားလှယ်ကြီး ဆွေးနွေးသကဲ့သို့ မြို့နယ်လျှပ်စစ် အင်ဂျင်နီယာရုံးမှာ ဓာတ်အားလိုင်းနှင့် 11 KV ထရန်စဖော်မာများကိစ္စ တာဝန်ယူ ဆောင်ရွက်ရမည့် ဝန်ထမ်းများကို 66 KV ဓာတ်အားခွဲရုံနှင့် 33 KV ဓာတ်အားခွဲရုံများမှာ မဖြစ်မနေ သွားရောက်ခွဲဝေမျှတ တာဝန်ထမ်းဆောင်စေရသောအခါ လျှပ်စစ်အင်ဂျင်နီယာရုံး၏ လုပ်ငန်းများလည်း တာဝန်ထမ်းဆောင်နိုင်သည့် ဦးရေနည်းပါးသွားခြင်း ဖြစ်ပါကြောင်း၊

ရန်ကုန်တိုင်းဒေသကြီး တစ်ခုလုံးနှင့်ပတ်သက်ပြီး အနည်းငယ်ရှင်းလင်း တင်ပြလိုပါကြောင်း၊ ရန်ကုန်တိုင်း ဒေသကြီးတစ်ခုလုံးတွင် 66 KV ဓာတ်အားခွဲရုံပေါင်း ၂၈ ရုံနှင့် 33 KV ဓာတ်အားခွဲရုံပေါင်း ၁၁၃ ရုံ စုစုပေါင်းခွဲရုံပေါင်း ၁၄၁ ရုံအတွက် သတ်မှတ်သည့်လူဦးရေအရ ဝန်ထမ်း ၁၂၃၈ ဦး လိုအပ်နေပါကြောင်း၊ အဆိုပါခွဲရုံ ၁၄၁ ရုံလုံးအတွက် ဖွဲ့စည်းပုံခွင့်ပြုလုံးဝ မရရှိသည့်အတွက်ကြောင့် ခွဲရုံတိုင်းအားလုံးအတွက် တရားဝင်ဝန်ထမ်း မရှိသေးပါကြောင်း၊ မြို့နယ်လျှပ်စစ်အင်ဂျင်နီယာရုံးက ဝန်ထမ်းများကိုသာ အလှည့်ကျ တာဝန်သွားရောက် ထမ်းဆောင်စေရခြင်း ဖြစ်ပါကြောင်း၊ ဒဂုံမြို့သစ် (တောင်ပိုင်း) အပါအဝင် ရန်ကုန်တိုင်းဒေသကြီးရှိ 66 KV ဓာတ်အားခွဲရုံအားလုံးနှင့် 33 KV ဓာတ်အားခွဲရုံ ၁၁၃ ရုံတို့အတွက် ဝန်ထမ်းခန့်ထားခွင့်နှင့် ပတ်သက်ပြီး မိမိတို့လျှပ်စစ်နှင့်စွမ်းအင် ဝန်ကြီးဌာနက ၂၀၁၇ ခုနှစ် နှစ်ဆန်းပိုင်းမှစပြီး စီမံကိန်းနှင့်ဘဏ္ဍာရေးဝန်ကြီးဌာနနှင့် စီမံကိန်းနှင့်ဖွဲ့စည်းပုံ စိစစ်ရေးအဖွဲ့တို့ထံ တင်ပြခဲ့ပြီး ပြည်ထောင်စုအစိုးရအဖွဲ့ထံ ဆက်လက်တင်ပြရန် အကြောင်းပြန်ကြားချက်များကို ရရှိပြီး အဆင့်ဆင့်တင်ပြခဲ့ရာ ပြည်ထောင်စုအစိုးရအဖွဲ့ရုံးကလည်း ရသုံး၏သဘောထားမှတ်ချက်များ ပြန်လည်တောင်းခံပါ ဆိုသည့်အခါ ဒုတိယအကြိမ်ပြန်လည်တောင်းခံ လိုက်သည့်အခါမှာ စီမံကိန်းနှင့် ဘဏ္ဍာရေးဝန်ကြီးဌာနက ခေတ္တဆိုင်းငံ့ထားရန်ဟု ပြန်ကြားခဲ့ပါကြောင်း၊

ထို့ကြောင့် မိမိတို့ခေတ္တဆိုင်းငံ့ထားပြီး ဒုတိယအကြိမ်ထပ်မံတင်ပြခြင်း၊ တတိယအကြိမ်ထပ်မံ တင်ပြခြင်းတို့ ဆောင်ရွက်သည့်အခါ စီမံကိန်းနှင့်ဘဏ္ဍာရေးဝန်ကြီးဌာန စီမံကိန်းစိစစ်ရေးနှင့် တိုးတက်မှု အစီရင်ခံရေးဦးစီးဌာနက စီမံကိန်းနှင့်ဖွဲ့စည်းပုံ စိစစ်ရေးအဖွဲ့အနေဖြင့် ပြည်ထောင်စု အဆင့်အဖွဲ့အစည်းများနှင့် ပြည်ထောင်စုဝန်ကြီးဌာနများတွင် ဖွဲ့စည်းပုံတိုးချဲ့ပြင်ဆင် ဖွဲ့စည်းခြင်း၊ ဝန်ထမ်းခန့်ထားခြင်းနှင့် စပ်လျဉ်း၍ ချမှတ်သင့်သည့် မူဝါဒအခြေခံများအတွက် မူဝါဒတစ်ရပ်ကို ညှိနှိုင်းရေးဆွဲ ဆောင်ရွက်လျက်ရှိပါကြောင်းနှင့် ဝန်ထမ်းဖွဲ့စည်းပုံ တိုးချဲ့ပြင်ဆင်ခြင်း၊ ဝန်ထမ်း ခန့်ထားခြင်းတို့အား မူဝါဒချမှတ်ပြီးမှသာ မူဝါဒနှင့်အညီ ဆောင်ရွက်၍ ပြန်လည်တင်ပြရန် ဖြစ်ပါကြောင်း၊ ယခုအချိန်တွင် ဖွဲ့စည်းပုံအသစ်ရရှိရန်နှင့် ဖွဲ့စည်းပုံအသစ်ရရှိမှသာ ဝန်ထမ်း ခန့်ထားရေးကို စီမံကိန်းနှင့် ဘဏ္ဍာရေးဝန်ကြီးဌာန၏ ပြန်ကြားချက်အရ မူဝါဒချမှတ်ပြီးချိန်ထိ စောင့်ဆိုင်းလျက် ရှိပါကြောင်း လတ်တလော ဆက်လက်ဆောင်ရွက် ပေးနိုင်ခြင်းမရှိ သေးပါကြောင်း ရှင်းလင်းဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်

Source: https://www.pyithuhluttaw.gov.mm/question-3853