ပျော်ဘွယ်မြို့နယ်တွင် သူဌေးကုန်းမှ ရွှေညောင်ဖူး/ကျောက်ချပ် 33 KV လျှပ်စစ်ဓာတ်အားလိုင်းကို ကိုယ့်အားကိုယ်ကိုး ကျေးလက်မီးလင်းရေးကော်မတီဖွဲ့စည်း၍ တည်ဆောက်လျက်ရှိရာ ကော်မတီတွင်ပါဝင်ခဲ့သည့် ကျေးရွာအချို့အား NEP စီမံချက်အရ နိုင်ငံတော်အစိုးရရန်ပုံငွေဖြင့် တည်ဆောက်ခွင့်ရရှိခြင်းကြောင့် အဆိုပါ ဓာတ်အားလိုင်းအား နိုင်ငံတော်အစိုးရ၏ ဓာတ်အားလိုင်း အဖြစ် လွှဲပြောင်းတည်ဆောက်ပေးနိုင်ခြင်းရှိ/မရှိနှင့် စပ်လျဉ်းသည့်မေးခွန်း

ပျော်ဘွယ်မြို့နယ်တွင် သူဌေးကုန်းမှ ရွှေညောင်ဖူး/ကျောက်ချပ် 33 KV လျှပ်စစ်ဓာတ်အားလိုင်းကို ကိုယ့်အားကိုယ်ကိုး ကျေးလက်မီးလင်းရေးကော်မတီဖွဲ့စည်း၍ တည်ဆောက်လျက်ရှိရာ ကော်မတီတွင်ပါဝင်ခဲ့သည့် ကျေးရွာအချို့အား NEP စီမံချက်အရ နိုင်ငံတော်အစိုးရရန်ပုံငွေဖြင့် တည်ဆောက်ခွင့်ရရှိခြင်းကြောင့် အဆိုပါ ဓာတ်အားလိုင်းအား နိုင်ငံတော်အစိုးရ၏ ဓာတ်အားလိုင်း အဖြစ် လွှဲပြောင်းတည်ဆောက်ပေးနိုင်ခြင်းရှိ/မရှိနှင့် စပ်လျဉ်းသည့်မေးခွန်း

ဦးသောင်းအေး( ပျော်ဘွယ်မဲဆန္ဒနယ်)

ပျော်ဘွယ်မြို့၏ အရှေ့ဘက် ၁၀ မိုင်ခန့်အကွာရှိသည့် ရွှေညောင်ဖူး/ကျောက်ချပ် ကျေးရွာအုပ်စုသည် အိမ်ခြေပေါင်း ၁၃၀၀ ကျော်နှင့် တိုက်နယ်ဆေးရုံတစ်ခု၊ ရဲစခန်းတစ်ခု၊ အထက်တန်းကျောင်း တစ်ကျောင်းနှင့် စည်ပင်ဈေးများတည်ရှိရာ ကျေးရွာအုပ်စုကြီးများဖြစ်ပြီး ပတ်ဝန်းကျင်တွင် ကျေးရွာအုပ်စု ၉ စုဖြင့် ကျေးရွာပေါင်း ၃၀ ကျော် ဆက်စပ်တည်ရှိလျက် ရှိပါကြောင်း၊ ကျေးရွာအုပ်စု အသီးသီးတွင် ကျေးရွာသူ/သားများ ဒေသဖွံ့ဖြိုးရေးအတွက်၊ လူမှုစီးပွားရေးဘဝ တိုးတက်ရန်အတွက် အခြေခံကျသည့် လျှပ်စစ်မီးရရှိရန် ဆန္ဒပြင်းပြသည့်အားလျော်စွာ ၂၀၁၄ ခုနှစ်တွင် ကိုယ့်အားကိုယ်ကိုး မီးလင်းရေးဆောင်ရွက်ရန် ကြိုတင်ညှိနှိုင်းခဲ့ကြပြီး ၂၀၁၅ ခုနှစ် သြဂုတ်လတွင် လုပ်ငန်းစတင် အကောင်အထည်ဖော် ဆောင်ရွက်ခဲ့ကြပါကြောင်း၊ လုပ်ထုံးလုပ်နည်းနှင့်အညီ မီးလင်းရေးကော်မတီများ ဖွဲ့စည်းပြီး သက်ဆိုင်ရာလျှပ်စစ်ဌာန၏ ခွင့်ပြုချက်ဖြင့် ဆောင်ရွက်ခဲ့သည်ကို တွေ့ရှိရပါကြောင်း၊ ၁၀ မိုင်ခန့်ရှိသော ၃၃ KV ဓာတ်အားလိုင်း တည်ဆောက် နိုင်ရေးအတွက် ကုန်ကျငွေကို ကျေးရွာအသီးသီးရှိ အိမ်ထောင်စုဦးရေအလိုက် အချိုးကျထည့်ဝင်ရန် သဘောတူဆုံးဖြတ်ပြီး ပုဂ္ဂလိကကုမ္ပဏီတစ်ခုထံတွင် လုပ်ငန်းအပ်နှံဆောင်ရွက် ခဲ့ကြခြင်း ဖြစ်ပါကြောင်း၊ ယခုလိုဆောင်ရွက်သည့် နေရာတွင် ကျေးရွာအလိုက် ထည့်ဝင်ငွေအပြည့်အဝ မရရှိသေးမီ ကြိုတင်ငွေရရှိအောင် မြို့နယ်သမဝါယမ ငွေစုငွေချေးလုပ်ငန်းမှ ငွေကြေးများချေးယူ ဆောင်ရွက်ခဲ့ကြောင်း သိရှိရပါသည်။ ယခုကိုယ့်အားကိုယ်ကိုး 33 KV ဓာတ်အားလိုင်း တည်ဆောက်ရေးကို ကြိုးစားဆောင်ရွက်လျက် ရှိနေသည့် ကျေးရွာသူ/ရွာသားများကို နိုင်ငံတော်က ပံ့ပိုးကူညီပေးစေလိုသည့်ဆန္ဒဖြင့် ဒုတိယအကြိမ် ပြည်သူ့လွှတ်တော် တတိယအကြိမ်ပုံမှန် အစည်းအဝေး ၂၉-၁၁-၂၀၁၆ ရက်နေ့တွင် လွှတ်တော်ဥက္ကဋ္ဌကြီးထံမှတစ်ဆင့် သက်ဆိုင်ရာ လျှပ်စစ်နှင့် စွမ်းအင်ဝန်ကြီးဌာနကို 33 KV ဓာတ်အားခွဲရုံနှင့် ဓာတ်အားလိုင်း တည်ဆောက်ရေး ကူညီပံ့ပိုးပေးရန် မေးခွန်းမေးမြန်း တင်ပြခဲ့ပါသည်။ ယခုမိမိတင်တင်ပြချက်ကို သက်ဆိုင်ရာ ဝန်ကြီးဌာနက လက်ခံခွင့်ပြုသည့်အတွက် ရွှေညောင်ဖူး ဓာတ်အားခွဲရုံတစ်ရုံနှင့် ဓာတ်အားလိုင်း ၂.၅ မိုင်ကို ၂၀၁၇-၁၈ ဘဏ္ဍာရေးနှစ်တွင် ရရှိခဲ့ပါကြောင်း၊ အဆိုပါလုပ်ငန်းကို မီးလင်းရေးကော်မတီ၊ ပုဂ္ဂလိကကုမ္ပဏီနှင့် မြို့နယ်လျှပ်စစ်တို့ ပူးပေါင်းဆောင်ရွက်မှုကြောင့် လုပ်ငန်းသည် ရာခိုင်နှုန်းပြည့် နီးပါး ပြီးစီးနေပြီ ဖြစ်ပါကြောင်း၊ ယခုလို ကျေးလက်နေပြည်သူအများစုက စေတနာသဒ္ဒါ ထက်သန်စွာဖြင့် 33 KV ဓာတ်အားလိုင်းတစ်ခုကို ကိုယ့်အားကိုယ်ကိုး မီးလင်းရေးကော်မတီ ဆောင်ရွက်ပြီးခဲ့ပါသော်လည်း လက်ရှိနိုင်ငံတော်အစိုးရနှင့် တိုင်းဒေသကြီး လျှပ်စစ်ကော်ပိုရေးရှင်း အသီးသီး၏ လျာထားချက်အစီအမံများနှင့် NEP စီမံချက်များအရ ကိုယ့်အားကိုယ်ကိုး ဆောင်ရွက်နေရသည့် ကျေးရွာအချို့ကို နိုင်ငံတော်က စီမံဆောင်ရွက်ပေးရန် အစီအစဉ်များရှိသည်ကို ကြားသိလာရသည့်အတွက် မူလမီးလင်းရေးကော်မတီ၏ သဘောတူထားချက်နှင့်အညီ အိမ်ထောင်စုအလိုက်၊ ကျေးရွာအလိုက် ထည့်ဝင်ရမည့်ငွေကြေးများ ဆက်လက်ထည့်ဝင်ခြင်း မရှိကြောင်း သိရှိရပါသည့်အတွက် တည်ဆောက်ပြီးသည့် 33 KV ဓာတ်အားလိုင်း တည်ဆောက်ထားသည့် သမဝါယမချေးငွေများ မီးလင်းရေးကော်မတီတွင် ပြန်လည်ပေးဆပ်ရာ အခက်အခဲများ ဖြစ်ပေါ်လျက်ရှိကြောင်း တွေ့ရသည်နှင့်ပတ်သက်ပြီး မြို့နယ်စီမံခန့်ခွဲမှု ကော်မတီ၊ မြို့နယ်လျှပ်စစ်၊ တိုင်းဒေသကြီး တာဝန်ရှိသူများနှင့် မီးလင်းရေးကော်မတီတို့တွေ့ဆုံပြီး ဆွေးနွေးအဖြေရှာ ခဲ့သော်လည်း ချေးငွေများပြန်လည် ပေးဆပ်နိုင်ရန် မူလလျာထားသည့် ကျေးရွာ၊ အိမ်ထောင်စုအလိုက် ထည့်ဝင်ရမည့် ငွေများရရှိရေးကို ဖြေရှင်းပေးနိုင်ခြင်း မရှိခဲ့ပါကြောင်း၊ လက်ရှိအခြေအနေတွင် တိုင်းဒေသကြီးအစိုးရအနေဖြင့်လည်း လှိုင်းတက်ကနေပြီး ဓာတ်အားခွဲရုံမှ ယခုတည်ဆောက်ပြီးသည့် ရွှေညောင်ဖူးဓာတ်အားခွဲရုံအထိကို 33 KV ဓာတ်အားလိုင်း ၁၆ မိုင် တည်ဆောက်လျက်ရှိပြီး ကိုယ့်အားကိုယ်ကိုး တည်ဆောက်ထားသော ရွှေညောင်ဖူး-ပျော်ဘွယ် 33 KV ဓာတ်အားလိုင်းနှင့် ချိတ်ဆက်ပြီး ပျော်ဘွယ်မြို့နယ်ကို ဓာတ်အားပို့လွှတ်ရန် စီစဉ်နေကြောင်း သိရှိရပါသည်။ ၎င်းအစီအစဉ်အရ ပျော်ဘွယ်မြို့နယ်အတွက် 33 KV ဓာတ်အားလိုင်းသစ်တစ်ခု ထိုလမ်းကြောင်းအတိုင်း ဖြစ်ပေါ်လာမည်ဆိုလျှင် မီးလင်းရေးကော်မတီ တည်ဆောက်လျက် ရှိနေသော ပျော်ဘွယ်-ရွှေညောင်ဖူး 33 KV ကိုယ့်အားကိုယ်ကိုး ဓာတ်အားလိုင်းကို နိုင်ငံတော် ဓာတ်အားလိုင်းအဖြစ် သတ်မှတ်ဆောင်ရွက်ခြင်းက ပိုမိုသင့်‌တော်မည်ဟု ယူဆပါတယ်။ ထို့ကြောင့်‌ယခုကဲ့သို့ နိုင်ငံတော်ပိုင် ဓာတ်အားလိုင်းအဖြစ် သတ်မှတ်ပြီး ရန်ပုံငွေခွင့်ပြုချထားပေးမည်ဆိုလျှင် အားကြိုးမာန်တက် ဆောင်ရွက်နေကြသော ကျေးလက်နေပြည်သူများ ကျေးလက်မီးလင်းရေး ကော်မတီများ၏ ဆောင်ရွက်မှုကို အသိအမှတ်ပြုရာ ရောက်သကဲ့သို့ ငွေကြေးအခက်အခဲ များကိုလည်း ကူညီဖြေရှင်းပေးနိုင်ပြီး နိုင်ငံတော်၏ အမျိုးသားလျှပ်စစ်စွမ်းအား မြင့်မားရေးကိုပါ အထောက်အကူ ပြုလာနိုင်မည်ဖြစ်သည့်အတွက် ပြည်ထောင်စုအစိုးရမှ ဆောင်ရွက်ပေးနိုင်ခြင်းရှိ/မရှိ သိရှိလိုပါကြောင်း မေးမြန်းပါသည်။

အဆိုပါ ဓာတ်အားလိုင်းကိစ္စနှင့်ပတ်သက်ပြီး ယခင်ကလည်း မေးခွန်းပုံစံတစ်မျိုးဖြင့် အကြောင်းအရာ တူမေးမြန်းခဲ့ပြီး ဖြစ်ပါကြောင်း၊ အဆိုပါ 33 KV ရွှေညောင်ဖူး ဓာတ်အားလိုင်း ၁၂ မိုင်ကို ကျေးရွာမီးလင်းရေး ကော်မတီများက ၎င်းတို့၏ ရန်ပုံငွေများနှင့် တည်ဆောက်မည်ဆိုပြီး ခွင့်ပြုချက်တောင်းခဲ့သည့် အတွက်ကြောင့် မန္တလေးလျှပ်စစ် ဓာတ်အားပေးရေးကော်ပိုရေးရှင်းက လုပ်ထုံးလုပ်နည်းနှင့်အညီ တည်ဆောက်ခွင့်ပြုခဲ့ခြင်း ဖြစ်ပါကြောင်း၊ မီးလင်းရေးကော်မတီက ၉.၅ မိုင် တည်ဆောက် ပြီးစီးခဲ့ပါကြောင်း၊ ကျန်ရှိသည့် ၂.၅ မိုင်နှင့် ရွှေညောင်းဖူးဓာတ်အားခွဲရုံ ၃၃/၁၁ ကေဗွီ ၃ အမ်ဗီအေ ဓာတ်အားခွဲရုံ၊ ၃၃ ကေဗွီ သဖန်းချောင်း ဓာတ်အားလိုင်း ၁၆ မိုင်နှင့် ၃၃/၁၁ ကေဗွီ ၅ အမ်ဗွီအေ သဖန်းချောင်းဓာတ်အားခွဲရုံတစ်ရုံ စုစုပေါင်း ၃၃ ကေဗွီဓာတ်အားလိုင်း ၁၈.၅ မိုင်တို့ကို ပြည်ထောင်စုဘတ်ဂျက်ဖြင့် တည်ဆောက်ပေးခဲ့ပြီး သဖန်းချောင်းဓာတ်အားခွဲရုံကို ၂၀၁၈ ခုနှစ် မေလကတည်းက ဓာတ်အားလွှတ်ခဲ့ခြင်း ဖြစ်ပါကြောင်း၊ ရွှေညောင်ဖူးဓာတ်အားခွဲရုံသည်လည်း ဓာတ်အားလွှတ်ရန် အဆင်သင့်အနေအထား ဖြစ်သော်ငြားလည်း လွှတ်တော်ကိုယ်စားလှယ်ကြီး မေးခွန်းတွင် ပါရှိသကဲ့သို့ ကျေးရွာမီးလင်းရေး ကော်မတီများနှင့် လုပ်ငန်းအပ်နှံထားသော ပုဂ္ဂလိကကုမ္ပဏီ ထူးမြတ်စံကျော်တို့အကြား ပေးရန်ရှိ ငွေစာရင်းများ ကျန်ရှိနေသည့်အတွက်ကြောင့် အဆိုပါ တည်ဆောက်သည့်ကုမ္ပဏီက ကန့်ကွက်ပြီး ဓာတ်အားလွှတ်မရခြင်း ဖြစ်ပါကြောင်း၊ ကိုယ်စားလှယ်ကြီး၏ မေးခွန်းတွင် ဖော်ပြထားသကဲ့သို့ အဆိုပါ မီးလင်းရေးလုပ်ငန်း ဆောင်ရွက်ရန် သမဝါယမ ငွေစုငွေချေးလုပ်ငန်းက ချေးယူထားသော ကျေးရွာမီးလင်းရေး ကော်မတီများ၏ ပေးရန်တာဝန်ကို အဆိုပါဓာတ်အားလိုင်းအား အစိုးရကဌာနပိုင်အဖြစ် လွှဲယူခြင်းဖြင့် ပေးရန်ရှိငွေကြး တာဝန်ကိုပါ လွှဲယူရန်ဆိုသည့်ကိစ္စက တည်ဆဲဘဏ္ဍာရေးစည်းမျဉ်း စည်းကမ်းများနှင်‌့ ကိုက်ညီမှုမရှိပါကြောင်း၊ အကယ်၍ မီးလင်းရေးကော်မတီနှင့်ပ ပုဂ္ဂလိကတည်ဆောက်ရေး ကော်မတီတို့ အကြားတွင်ရှိသည့် ငွေရေးကြေးရေးကိစ္စများကို ရှင်းလင်းပြီးသည့် နောက်ပိုင်း အဆိုပါ ဓာတ်အားလိုင်းကို ဓာတ်အားလွှတ်နိုင်ပြီးသည့် အချိန်တွင် ကတိခံဝန်ချက် (၁၂) ချက်ပါအရ အဆိုပါ ဓာတ်အားလိုင်းကို ဌာနကလွှဲပြောင်းပြီး ရေရှည်စစ်ဆေးခြင်း၊ ထိန်းသိမ်းခြင်း၊ ပြန်လည်ပြုပြင်ခြင်း လုပ်ငန်းများကို ဘတ်ဂျက်စိုက်ထုတ်ပြီး တာဝန်ယူဆောင်ရွက် ပေးသွားမည်ဖြစ်ပါကြောင်း ရှင်းလင်းဖြေကြားပါသည်။

ဦးသောင်းအေး (ပျော်ဘွယ်မဲဆန္ဒနယ်) က ဆက်စပ်မေးခွန်းမေးမြန်းပါသည်။

ဒုတိယဝန်ကြီး၏ ဖြေကြားချက်အပေါ် မိမိမှလွန်စွာစိတ်မကောင်း ဖြစ်မိပါကြောင်း၊ မီးပြတ်တောက်မှုနှင့် ပတ်သက်၍ နိုင်ငံတော်အတွက် လျှပ်စစ်ဓာတ်အားရရှိရေးသည် ပြည်သူများအတွက် လိုလားတောင့်တနေသည့် လိုအပ်ချက်ဖြစ်ပါကြောင်း၊ မီးလင်းရေးကော်မတီ ဆိုတာ ဝန်ကြီးလည်း ဖြတ်သန်းခဲ့သည့် ဘဝတစ်လျှောက်တွင် မြင်ခဲ့၊ ကြားခဲ့၊ သိရှိခဲ့ပြီးဖြစ်ပါကြောင်း၊ နိုင်ငံတော်အစိုးရ လုပ်နေသည့်လုပ်ငန်းကို သက်ဆိုင်ရာပြည်သူများက ဝိုင်းကူသည့် သဘော ဖြစ်ပါကြောင်း၊ ယခုလို ဝိုင်းကူသည့်နေရာတွင်လည်း မူလစီမံချက်အရ မီးလင်းရေးကော်မတီဆိုသည့် ပုံစံနှင့်အညီ မီးရရှိမည့် ကျေးရွာအသီးသီးတွင်ရှိသော ကျေးရွာသူ/ရွာသားများက ကုန်ကျမည့် စရိတ်ကို စုပေါင်းထည့်ဝင် ဆောင်ရွက်ခဲ့ကြခြင်း ဖြစ်ပါကြောင်း၊ အဆိုပါကျေးရွာအုပ်စုသည် စုပေါင်းထည့်ဝင်ငွေကို စောင့်မနေဘဲ လျင်လျင်မြန်မြန် ပြီးပြတ်အောင် ချေးငွေနှင့် ၎င်းတို့ ဆောင်ရွက်လိုက်ခြင်း ဖြစ်ပါကြောင်း၊ သို့သော်လည်း ၂၀၁၅ ခုနှစ် အစိုးရအလွှဲအပြောင်းဖြစ်ပြီးသည့် နောက်ပိုင်း ခုနလျှပ်စစ်မီး နိုင်ငံတော်အစိုးရက အလကားပေးမည်ဆိုသည့် သတင်းများ ထွက်လာပြီးသည့် နောက်ပိုင်း အဆိုပါ မီးလင်းရေးကော်မတီတွင် ပါနေသည့်ကျေးရွာများသည် ထည့်ဝင်ရမည့် ထည့်ဝင်ငွေကို မထည့်တော့ပါကြောင်း၊ ယခုလိုဖြစ်သည့်အတွက်၊ ငွေမရရှိသည့် လုပ်ငန်းအပ်နှံသည့်ကုမ္ပဏီကို ငွေကြေးမပေးချေနိုင်ခြင်းဖြစ်ကြောင်း၊ ကော်မတီနှင့် ကုမ္ပဏီ၏ ကြားတွင် ငွေကြေးအရှုပ်အရှင်းဖြစ်ခြင်း မဟုတ်ပါကြောင်း၊ ပြည်သူလူထုက ၎င်းတို့၏လုံ့လဝီရိယနှင့် သူတို့ငွေကြေးချွေးနဲစာဖြင့် စောင့်နေသည့်ကာလ ဖြစ်သည့်အတွက် ယခုလိုခြေအနေ ဖြစ်ပေါ်ပြီး သတင်းထွက်လာသည့်အတွက် ထည့်ဝင်မှုရပ်ဆိုင်းသွားပြီး လုပ်ထားသည့်ကော်မတီတွင် ဝန်ထုပ်ဝန်ပိုး ဖြစ်နေသည်ကို အစိုးရတစ်ရပ်အနေဖြင့် လက်ပိုက်ကြည့်မနေသင်‌့ပါကြောင်း၊ ဝိုင်းဝန်းဖြေရှင်းပေးသင့်သည်ဟု ယူဆမိသည့်အတွက် မေးမြန်းရခြင်း ဖြစ်ပါကြောင်း၊ တချို့တိုင်းဒေသကြီးများတွင်လည်း ယခုလို တိုင်းဒေသကြီးအစိုးရကနေပြီး တည်ဆောက် နေဆဲလိုင်းကို နိုင်ငံတော်အစိုးရလိုင်းအဖြစ် ခွင့်ပြုချပေးလိုက်သည့်အတွက် အထိုက်အလျောက် ထည့်ဝင်ကုန်ကျထားသည့ပ် ငွေကြေးများ ပြန်လည်ရရှိပြီး ကျေးလက်လည်းမီးလင်း၊ ကော်မတီက ပေးဆပ်ရမည့် ငွေကြေးများလည်း အဆင်ပြေသွားကြောင်း မိမိမှကြားသိရပါသည်။ ထို့ကြောင့် စေတနာသဒ္ဒါ အပြည့်အဝဖြင့် ကြည့်ရှုစောင့်ရှောက်ပေးနိုင်ခြင်းရှိ/မရှိ မေးမြန်းရခြင်းဖြစ်ပါကြောင်း၊ အဆိုပါ ၃၃ ကေဗွီ ဓာတ်အားလိုင်းဆိုသည်မှာ နိုင်ငံတော်အစိုးရက ဆောင်ရွက်ပေးရသည့်လိုင်း ဖြစ်ပါကြောင်း၊ ထို့ကြောင့် ဆက်စပ်မေးခွန်းမေးမြန်းလိုသည်မှာ အဆိုပါလိုင်းသည် မီးမရရှိသေး ပါကြောင်း၊ ထို့ကြောင့် ၎င်းလိုင်းလုပ်ပေးဖို့အတွက်က နိုင်ငံတော်အစိုးရတွင် တာဝန်ရှိပါကြောင်း၊ ပြည်ထောင်စုအစိုးရအနေဖြင့် ပျော်ဘွယ်မှ ရွှေညောင်ဖူး/ကျောက်ချပ်အထိ ၃၃ ကေဗွီ ဓာတ်အား လိုင်းကို ဘတ်ဂျက်တွင် ထည်‌့သွင်းပြီး ချပေးနိုင်ခြင်းရှိ/မရှိ ဆက်စပ်မေးခွန်း မေးမြန်းရခြင်း ဖြစ်ပါကြောင်း၊ ၎င်းကိစ္စသည်လည်း လှိုင်းတက်ကနေပြီး ပျော်ဘွယ်ကို ဓာတ်အားခွဲရုံသွင်းပြီး ပျော်ဘွယ်ကို ၃၃ ကေဗွီဓာတ်အားလိုင်း ပေးမည်ဆိုသည့် စီမံချက်ရှိသဖြင့် နိုင်ငံတော်လိုင်းလည်း ဖြစ်နေခြင်းဖြစ်သည့်အတွက် ကိုယ့်အားကိုယ်ကိုးလိုင်းကို ခုနမီးလင်းရေး ကော်မတီက လွှဲပြောင်းပေး သော်လည်း ၎င်းကိစ္စအဆင်မပြေနိုင်သည့်အတွက် ထပ်ဆင့် မေးမြန်းရခြင်းဖြစ်ပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး၊ ဒေါက်တာထွန်းနိုင်

ဝန်ကြီးဌာနများသည် ဘဏ္ဍာရေးလုပ်ထုံး လုပ်နည်းများကို ကိုက်ညီအောင် လိုက်နာဆောင်ရွက် ရပါကြောင်း၊ စာရင်းစစ်ဆေးခြင်းကို ခံယူရသည့်အတွက်ကြောင့် ဝန်ကြီးဌာနကနေပြီး ပုဂ္ဂလိက အဖွဲ့အစည်းများ၏ အကြွေးများကို ဘတ်ဂျက်ထဲတွင်ထည့်ပြီး ပေးဆပ်ရန် ဆိုသည့်ကိစ္စရပ်သည် ဘဏ္ဍာရေးစည်းမျဉ်း စည်းကမ်းနှင့်လုံးဝကိုက်ညီခြင်း မရှိသည့်အတွက်ကြောင့် မြေပြင်တွင် ဖြစ်ပေါ်နေသော အခက်အခဲတစ်ရပ်ကို ဖြေရှင်းပေးနိုင်ရန်အလို့ငှာ သနားကြင်နာခြင်းဆိုသည့် စိတ်ဓာတ်တစ်ခုဖြင့် ဆောင်ရွက်လိုက်လျှင် ဝန်ကြီးဌာနတွင် မြောက်မြားစွာသော စာရင်းစစ်ကန့်ကွက် ချက်များ၊ ပြဿနာရပ်များကို ဖြေရှင်းရမည် ဖြစ်သည့်အပြင် အလားတူ ကိစ္စရပ်များသည် စီရင်ထုံး၊ ဖြတ်ထုံးများကဲ့သို့ ဖြစ်လာပြီး တစ်နိုင်ငံလုံး ယခုလိုဖြစ်ပေါ်နေသည့် အခြေအနေ အရပ်ရပ်အားလုံးကို အလားတူတင်ပြတောင်းဆို နေမည်ဆိုပါက ဘဏ္ဍာရေးစည်းမျဉ်း စည်းကမ်းကို နှစ်ပေါင်းများစွာ အကြိမ်ကြိမ်ဖောက်ဖျက်ရမည့် အနေအထားများကို ထပ်မံကျရောက်လာနိုင်သည့် အခြေအနေ များကိုလည်း ဆင်ခြင်သုံးသပ်ရန် လိုအပ်ခြင်း ဖြစ်ပါကြောင်း၊ ထို့ကြောင့် ပြည်သူများ လျှပ်စစ်ဓာတ်အား ရရှိရန်အတွက် လျှပ်စစ်နှင့်စွမ်းအင် ဝန်ကြီးဌာနက နိုင်ငံတကာချေးငွေပေါင်းများစွာ ချေးယူပြီး ယနေ့လည်း တင်ပြတောင်းခံပြီး ဆက်လက်ဆောင်ရွက်သွားရန် အစီအစဉ်များ ရှိနေခြင်း ဖြစ်ပါကြောင်း၊ သို့သော်လည်း ယခုလွှတ်တော်ကိုယ်စားလှယ်ကြီး၏ မေးမြန်းသည့်မေးခွန်းတွင် ပါရှိနေသော ရွှေညောင်ဖူး ဓာတ်အားလိုင်း ကိစ္စနှင့်ပတ်သက်ပြီး ဘဏ္ဍာရေးစည်းမျဉ်း စည်းကမ်းများနှင့် ကိုက်ညီခြင်းမရှိသည့် အတွက်ကြောင့် ဝန်ကြီးဌာနအနေဖြင့် ဘတ်ဂျက်မှ တောင်းခံပြီး စိုက်ထုတ်လျော်ပေးနိုင်စွမ်း မရှိခြင်းဖြစ်ပါကြောင်း ထပ်မံရှင်းလင်း ဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်     

Source: https://www.pyithuhluttaw.gov.mm/question-3744