ပွင့်ဖြူမြို့နယ်ရှိ ကျေးရွာလူထုက သဘောမတူဘဲ၊ တိုင်းဒေသကြီးအစိုးရ၏ ခွင်‌့ပြုချက်မရဘဲ စက်သုံးဆီအရောင်းဆိုင်သစ် ဆောက်လုပ်ခြင်းကို မည်သို့အရေးယူဆောင်ရွက်မည်နှင်‌့ မည်သည့် ဌာနမှ မည်ကဲ့သို့ ခွင့်ပြုထားသည်ကို သိလိုခြင်းနှင်‌့စပ်လျဉ်းသည့်မေးခွန်း

ပွင့်ဖြူမြို့နယ်ရှိ ကျေးရွာလူထုက သဘောမတူဘဲ၊ တိုင်းဒေသကြီးအစိုးရ၏ ခွင်‌့ပြုချက်မရဘဲ စက်သုံးဆီအရောင်းဆိုင်သစ် ဆောက်လုပ်ခြင်းကို မည်သို့အရေးယူဆောင်ရွက်မည်နှင်‌့ မည်သည့် ဌာနမှ မည်ကဲ့သို့ ခွင့်ပြုထားသည်ကို သိလိုခြင်းနှင်‌့စပ်လျဉ်းသည့်မေးခွန်း

ဦးထွန်းထွန်း(ပွင့်ဖြူမဲဆန္ဒနယ်)

မကွေးတိုင်းဒေသကြီး၊ ပွင့်ဖြူမြို့နယ်၊ သရက်အုပ်ကျေးရွာအုပ်စု၊ ကုလားကုန်းကျေးရွာတွင် စက်သုံးဆီ အရောင်းဆိုင်အသစ် ဖွင်‌့လှစ်ရန်အတွက် စက်သုံးဆီဆိုင် ဆောက်လုပ်နေမှုကို ကျေးရွာသူ/သား ၂၁၆ ဦးမှ လက်မှတ်ရေးထိုးပြီး ၈-၄-၂၀၁၆ ရက်တွက် မကွေးတိုင်းဒေသကြီး ဝန်ကြီးချုပ်ထံလိပ်မူပြီး မိမိထံမိတ္တူ ပေးခဲ့ပါကြောင်း၊ ၎င်းရက်တွင် ဝန်ကြီးချုပ်က ကျေးရွာသူ/သားများမှ သဘောတူညီ ကြောင်း၊ လက်မှတ်ရေးထိုးပြီး တင်ပြလာပါက ဖွင်‌့လှစ်ခွင့်ပြုမည်ဟုလည်း စာပြန်ခဲ့ပြီးဖြစ်ပါကြောင်း၊  သို့သော်လည်း ကျေးရွာသူ/သားများ၏ သဘောတူညီချက်ကို ရယူသည့်စာပြန်လည် တင်ပြလာခြင်း မရှိပါကြောင်း၊

၂၀၁၆ နှစ်ဦးပိုင်း ဆီဆိုင်စတင်မဆောက်လုပ်မီ အုတ်၊ သဲ၊ ကျောက်များမပုံမီ ကျေးရွာသူ/သားများက ကန့်ကွက်ကြပါကြောင်း၊ ကန့်ကွက်သည့်ကြားထဲမှ တိုင်းဒေသကြီးကလည်း ခွင့်မပြုသည်ကို ဆီဆိုင်များက ဆက်လက်ဆောက်လုပ် နေကြပါကြောင်း၊ ၎င်းကို မြို့နယ်၊ ခရိုင်၊ တိုင်းဒေသကြီး အစိုးရကလည်း အတန်တန်တားနေသည့် ကြားထဲက ယခုလို ပြီးစီးအောင်အထိ ဆောက်လုပ်ခြင်းသည် အင်မတန် အတင်‌့ရဲလှပါကြောင်း၊ မည်သူ၏ ခွင်‌့ပြုမိန့်ဖြင့်ဆောက်သနည်း၊ မည်သူ့အားကိုးဖြင့် လုပ်သနည်း၊ ငွေအားကိုးဖြင့်လုပ်ခြင်းလား၊ လူအားကိုးဖြင့် လုပ်ခြင်းလား ဆိုသည်မှာ မေးစရာများ ဖြစ်လာပါကြောင်း၊ ဥပဒေစည်းမျဉ်းစည်းကမ်း၊ လုပ်ထုံးလုပ်နည်းများ ကျော်ပြီး တရားမဝင် မည်သည့်အတွက်ကြောင့် တည်ဆောက်ခြင်း ဖြစ်သနည်း။ တရားမဝင်သည်ကို တရားဝင်ဖြစ်အောင်၊ စည်းမျဉ်းစည်းကမ်းနှင်‌့ မညီသည်ကို စည်းမျဉ်းစည်းကမ်းနှင်‌့ မညီညီအောင် မည်သူများက လုပ်ဆောင်ပေးထားပါသနည်း၊ မည်သူများက ခွင့်ပြုပါသနည်း၊ ယခုလို တည်ဆောက်ခြင်းသည် လက်ရှိအစိုးရကို မထီမဲ့မြင်ပြုရာ ရောက်သကဲ့သို့ ပြည်သူ့အစိုးရကို ယုံမှား သံသယများ ဖြစ်ပေါ်စေပါကြောင်း၊ လက်ရှိသွားနေသည့် လမ်းကြောင်းအမှန်ဖြစ်သည့် တရားဥပဒေ စိုးမိုးရေး၊ အဂတိလိုက်စားမှု တိုက်ဖျက်ရေး လမ်းကြောင်းများကိုလည်း သွေဖယ်သွားစေပါကြောင်း၊ သို့ဖြစ်ပါ၍ လုပ်ထုံးလုပ်နည်း၊ စည်းမျဉ်းစည်းကမ်း များနှင့်အညီ ဆောင်ရွက်နိုင်ရန်၊ အဂတိလိုက်စားမှု အကျင့်ပျက်ခြစားမှုများ နည်းပါးအောင် မလိုလားအပ်သော ပြဿနာများ မဖြစ်ပေါ်စေရန်အတွက် အထက်ပါမေးခွန်းကို မေးမြန်းရခြင်းဖြစ်ပါသည်။

ပွင့်ဖြူမြို့နယ်၊ သရက်အုပ်ကျေးရွာအုပ်စု၊ ကုလားကုန်းကျေးရွာအနီးတွင် စက်သုံးဆီဆိုင် တည်ဆောက်ရန်အတွက် မကွေးမြို့၊ အောင်ဇေယျရပ်ကွက်နေ ဦးမင်းနိုင်မှ အဆိုပြုတင်ပြလာသည့် အချက်တွင် မြေအကျယ်အဝန်း အဆောက်အဦဒီဇိုင်း ပန့်တိုင်ထိုင်ထားမှုများ မြေပေါ်မြေအောက် သိုလှောင်ကန်များ၏ တည်နေရာနှင်‌့ အကွာအဝေးများ ဒီဇိုင်းများနှင့် Detal Drawing များကို မြန်မာ့ ရေနံထွက် ပစ္စည်းရောင်းဝယ်ရေး လုပ်ငန်းရုံးချုပ်ကို အဆိုပြုတင်ပြလာခဲ့ခြင်း ဖြစ်ပါကြောင်း၊ အဆိုပြု တင်ပြလာသည့် အချက်တွင်ပါဝင်သည့် ဒီဇိုင်းများနှင့် Detal Drawing များကို ဆီဆိုင်တစ်ဆိုင် ဖွင်‌့လှစ်နိုင် ရန်သတ်မှတ်ချက်များနှင်‌့ ကိုက်ညီမှုရှိ/မရှိ ဆိုသည့်အချက်ကို အဓိကထားပြီး မြန်မာ့ရေနံထွက် လုပ်ငန်းက ဦးစွာစိစစ်ပြီး အကြောင်းပြန်ကြားခဲ့ခြင်း ဖြစ်ပါကြောင်း၊ ထို့နောက် ၂၀၁၆ ခုနှစ်၊ ဒီဇင်ဘာလတွင် ကုလားကုန်းကျေးရွာတွင် နေထိုင်သည့် ပြည်သူလူထုကနေပြီး မကွေးတိုင်းဒေသကြီး အစိုးရအဖွဲ့သို့ တိုင်ကြားချက်အရ မကွေးတိုင်းဒေသကြီး အစိုးရအဖွဲ့က ၂၀၁၆ ခုနှစ် နှစ်ကုန်တွင် အဆိုပါစက်သုံးဆီဆိုင်အား တည်ဆောက်ခြင်းကို ချက်ခြင်းရပ်တန့်စေရေး သတိပေးကြပ်မတ် ဆောင်ရွက်သွားရန် ဆုံးဖြတ်ချက်အရ ခရိုင်အထွေထွေအုပ်ချုပ်ရေး ဦးစီးဌာနမှ ၂၀၁၆ ခုနှစ် နိုဝင်ဘာလတွင် စာတစ်စောင် ထုတ်၍လည်းကောင်း၊ ၂၀၁၇ ခုနှစ် နိုဝင်ဘာလတွင် ဒုတိယစာတစ်စောင် ထုတ်၍လည်းကောင်း အကြောင်းကြားပြီး တားမြစ်ခဲ့ခြင်း ဖြစ်ပါကြောင်း၊

မကွေးတိုင်းဒေသကြီး အစိုးရအဖွဲ့၏ ၂၄-၁၀-၂၀၁၇ ရက်နေ့တွင် ကျင်းပပြုလုပ်သည့် မကွေးတိုင်းဒေသကြီး အစိုးရအဖွဲ့ အစည်းအဝေးအမှတ်စဉ် (၃၉/၂၀၁၇) ဆုံးဖြတ်ချက် အပိုဒ် ၁၁ အရလည်း စက်သုံးဆီအရောင်းဆိုင် တည်ဆောက်ခြင်း လုပ်ငန်းအား ခွင့်မပြုကြောင်း ဆုံးဖြတ်ထားရှိမှုကို ကာယကံရှင်အား အသိပေးချပြ ရှင်းလင်းနိုင်ရန်အတွက် ၂၈-၁၁-၂၀၁၇ ရက်နေ့တွင် ပွင့်ဖြူမြို့နယ် အထွေထွေအုပ်ချုပ်ရေး ဦးစီးဌာန မြို့နယ်အုပ်ချုပ်ရေးမှူး ရုံးခန်း၌ မြို့နယ်စီမံခန့်ခွဲရေး ကော်မတီများ၏ ရှေ့မှောက်တွင် ဆီဆိုင်တည်ဆောက်နေသူ ဦးမင်းနိုင်အား တွေ့ဆုံပြီးအသိပေး ရှင်းလင်းခဲ့ကြောင်း သိရှိရပါသည်။ ထိုသို့အသိပေးရှင်းလင်း ခဲ့သည့်တိုင် ဦးမင်းနိုင်အနေဖြင့် လိုက်နာဆောင်ရွက်ခြင်း မရှိဘဲ စက်သုံးဆီဆိုင် တည်ဆောက်ခြင်း လုပ်ငန်းကို ဆက်လက်ဆောင်ရွက် ခဲ့သည့်အတွက် ဦးမင်းနိုင်အား ပွင့်ဖြူမြို့နယ် အထွေထွေအုပ်ချုပ်ရေး ဦးစီးဌာန၏ ၂၇-၂-၂၀၁၈ ရက်စွဲပါစာဖြင့် စက်သုံးဆီဆိုင်တည်ဆောက်ခြင်း လုပ်ငန်းကို ဆက်လက် ဆောင်ရွက်ခြင်း မပြုရန်နှင့် လိုက်နာမှုမရှိပါက ဥပဒေနှင်‌့အညီ ဆောင်ရွက်သွားမည် ဖြစ်ပါကြောင်း ထပ်မံစာဖြင့် အကြောင်းကြားခဲ့ပါကြောင်း၊

အဆိုပါတားမြစ်ချက်များအပေါ် လိုက်နာဆောင်ရွက်မှု မရှိခြင်းကြောင့် မကွေးတိုင်းဒေသကြီး အစိုးရအဖွဲ့၏ ၂-၄-၂၀၁၈ ရက်နေ့တွင် ကျင်းပသည့် လုံခြုံရေးနှင်‌့သတင်းညှိနှိုင်း အစည်းအဝေးတွင် အမှတ်စဉ် (၁၀/၂၀၁၈) ဆုံးဖြတ်ချက်အပိုဒ် ၁ အရ မင်းထက်ကြွယ် (၂) စက်သုံးဆီဆိုင်အား ကျေးရွာ အုပ်ချုပ်ရေးမှူးမှ တရားလိုပြုလုပ်၍ အမှုဖွင့်အရေးယူ ဆောင်ရွက်ရန် ဆုံးဖြတ်ချက်အရ ၁၉-၄-၂၀၁၈ ရက်နေ့တွင် သရက်အုပ်ကျေးရွာအုပ်စု အုပ်ချုပ်ရေးမှူးမှ တရားလိုပြုလုပ်၍ တရားစွဲဆိုဆောင်ရွက် သွားရန် အကြောင်းကြားခဲ့ပါသည်။ ထိုသို့အကြောင်းကြားချက်အရ သရက်အုပ်ကျေးရွာအုပ်စု အုပ်ချုပ်ရေးမှူးက ပွင်‌့ဖြူမြို့မရဲစခန်းသို့ ဥပဒေအရအရေးယူ ဆောင်ရွက်ပေးနိုင်ပါရန် တိုင်ကြားခဲ့ပြီး ပွင့်ဖြူမြို့နယ် တရားရုံးတွင် ကျေးရွာအုပ်စုအုပ်ချုပ်ရေးမှူးက တရားလိုပြုလုပ်၍ တရားစွဲဆိုဆောင် ရွက်လျက် ရှိပါကြောင်း ရှင်းလင်းဖြေကြားပါသည်။

ဦးထွန်းထွန်း (ပွင့်ဖြူမဲဆန္ဒနယ်) က ဆက်စပ်မေးခွန်း မေးမြန်းပါသည်။

တိုင်းဒေသကြီးအစိုးရမှ ညွှန်ကြားထားသော တင်ပြထားသည့်စာများကိုလည်း မိမိတင်ပြ ထားပါကြောင်း၊ အဆိုပါကိစ္စကို အကြိမ်ကြိမ်တားနေသည့် ကြားထဲက တည်ဆောက်ပြီးစီး သွားပါကြောင်း၊ ယခုသက်ဆိုင်ရာရပ်/ကျေး အုပ်ချုပ်ရေးမှူးမှ တရားလိုပြုပြီး တရားစွဲရမည်ဆိုသည့် အကြောင်းလည်း ပါရှိပါကြောင်း၊ သို့သော် ၎င်းမှပြန်ပြီး ရွာတာဝန်ခံနှင့် တိုင်ကြားသည့်သူများကို တရားစွဲဆိုထားခြင်းမျိုးလည်း ရှိပါကြောင်း၊ ထို့ကြောင့် သက်ဆိုင်ရာဝန်ကြီးဌာနအနေဖြင့် မည်ကဲ့သို့ အရေးယူဆောင်ရွက်မည်နည်း၊ ၎င်းတွင်ပါသော ပတ်သက်ရာပတ်သက်ကြောင်းဖြစ်သည့် ဌာနဆိုင်ရာ ဝန်ထမ်းများကိုလည်း စုံစမ်းစစ်ဆေးပြီး အပြစ်ပေးအရေးယူခြင်းမျိုး ရှိ/မရှိသိရှိ လိုပါကြောင်း မေးမြန်းပါသည်။

လျှပ်စစ်နှင့်စွမ်းအင် ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

ပြည်ထောင်စု ဝန်ကြီးဌာနအနေဖြင့် စက်သုံးဆီဆိုင်များကို စီမံခန့်ခွဲရာ စက်သုံးဆီဆိုင်က တည်ဆောက်မည့် ဒီဇိုင်းအသေးစိတ်များကို စိစစ်ခြင်းတာဝန်ယူရပါကြောင်း၊ အဆိုပါ ဒီဇိုင်းအတိုင်း မတည်ဆောက်မီ ကနဦးတင်ပြရပါကြောင်း၊ ကနဦးတင်ပြချက်များကို စိစစ်ပြီး ဒီဇိုင်းအတည်ပြုချက်ကို ပြန်ကြားခြင်း ဖြစ်ပါကြောင်း၊ ဒီဇိုင်းအတည်ပြုချက်အတိုင်း တည်ဆောက်ခြင်းကို တိုင်းဒေသကြီးနှင့် ပြည်နယ်အစိုးရအဖွဲ့များက မြေအသုံးချခွင့်ပြုမိန့်များ၊ ဒေသပြည်သူများ၏ စက်သုံးဆီဆိုင် ရောင်းချမှုအပေါ် ထောက်ခံချက်များ၊ မြေပေါ်၊ မြေအောက်သိုလှောင်ကန်များ တည်ဆောက် ထားခဲ့လျှင် သက်ဆိုင်ရာသယံဇာတနှင့် ပတ်ဝန်းကျင်ဝန်ကြီးဌာနမှ စက်သုံးဆီသိုလှောင်ခွင့် ခွင့်ပြုမိန့်၊ မီးသတ်ဦးစီးဌာန၏ မီးဘေးအန္တရာယ် ကင်းရှင်းကြောင်း ထောက်ခံချက်များ အပြည်‌့အစုံနှင့်တကွ ဒုတိယအကြိမ် ပြန်လည်တင်ပြလာသည့်အခါကျမှ အချက်အလက်များ ပြည့်စုံမှန်ကန်မှုရှိပါက ပြည်ထောင်စု ဝန်ကြီးဌာနအနေဖြင့် အဆိုပါဆီဆိုင်အား စက်သုံးဆီသိုလှောင် ရောင်းချခွင့် လိုင်စင်ထုတ်ပေးခြင်း ဖြစ်ပါကြောင်း၊ ယခုအချိန်အထိ ပြည်ထောင်စုဝန်ကြီး ဌာနအနေဖြင့် စက်သုံးဆီသိုလှောင်‌ ရောင်းချခွင့်လိုင်စင် ထုတ်ပေးထားခြင်း မရှိသေးပါကြောင်း၊ ၎င်းအတွက် လိုင်စင်မရှိဘဲ ရောင်းချခြင်းပြုလုပ်သည့် အချိန်ကျမှသာ ဥပဒေအရ ပြည်ထောင်စုဝန်ကြီးဌာနက ဥပဒေသက်ရောက်ပြီး အရေးယူနိုင်မည်ဖြစ်ပြီး လက်ရှိအခြေအနေတွင် တည်ဆောက်ဆဲအဆင့်၊ တည်ဆောက်ပြီးအဆင့်သာ ဖြစ်နေသည့်အတွက်ကြောင့် လိုင်စင်ဆက်လက်ပြီး လျှောက်ထားသော အဆင့်တွင်လည်း ရပ်တန့်ထားခြင်း ဖြစ်သည့်တွက်ကြောင့် ဥပဒေကို ရေနံထွက်ပစ္စည်းများ သိုလှောင်ဖြန့်ဖြူး ရောင်းချခြင်း ဥပဒေအရ ကျူးလွန်နေသည့် အဆင့်ကို မရောက်ရှိသည့်အတွက် ဥပဒေနှင့်အရေးယူ၍ မရသေးခြင်း ဖြစ်ပါကြောင်း၊

ကိုယ်စားလှယ်ကြီးမေးမြန်းသည့် ဝန်ထမ်းများ၏ ပါဝင်ပတ်သက်မှု ရှိနေခြင်းအား မည်ကဲ့သို့ အရေးယူ မည်နည်းဆိုသည့် ကိစ္စနှင့်ပတ်သက်ပြီး တိကျသည့်အချက်အလက်များနှင့် ပေးပို့တိုင်ကြား ခဲ့မည်ဆိုပါက မိမိတို့ဝန်ကြီးဌာနက လုပ်ထုံးလုပ်နည်းများနှင့်အညီ အဖွဲ့များဖွဲ့စည်းပြီး စိစစ်၍ ဖောက်ဖျက်ကျူးလွန်မှု များရှိပါက နိုင်ငံ့ဝန်ထမ်း ဥပဒေများနှင့်အညီ အရေးယူအပြစ် ပေးသွားမည် ဖြစ်ပါကြောင်း ပြန်လည်ရှင်းလင်း ဖြေကြားပါသည်။

လျှပ်စစ်နှင်‌့စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်

Source: https://www.pyithuhluttaw.gov.mm/question-3691