ကနီမြို့နယ်ရှိ ကိုယ်ထူကိုယ်ထ လျှပ်စစ်မီးလင်းရေးလုပ်ငန်းများတွင် မီတာဘောက်စ်ရရှိရေး များစွာနှောင့်နှေးခက်ခဲနေခြင်းကို မည်သို့ဆောင်ရွက်ပေးမည်၊ ချင်းတွင်းမြစ်အထက်ပိုင်း မြစ်ဘေးဝဲယာရှိ ၁၁ ဓာတ်အားလိုင်းမရောက်ရှိသေးသော ကျေးရွာ ၃၅ ရွာအား ဓာတ်အားလိုင်းသွယ်တန်းပေးရန်နှင့် ဓာတ်အားနိုင်နင်းမှုရှိစေရေးအတွက် လိုအပ်သော ဓာတ်အားခွဲရုံများ တည်ဆောက်ပေးရန် အစီအစဉ် ရှိ/မရှိနှင့် စပ်လျဉ်းသည့်မေးခွန်း

ကနီမြို့နယ်ရှိ ကိုယ်ထူကိုယ်ထ လျှပ်စစ်မီးလင်းရေးလုပ်ငန်းများတွင် မီတာဘောက်စ်ရရှိရေး များစွာနှောင့်နှေးခက်ခဲနေခြင်းကို မည်သို့ဆောင်ရွက်ပေးမည်၊ ချင်းတွင်းမြစ်အထက်ပိုင်း မြစ်ဘေးဝဲယာရှိ  ၁၁ ဓာတ်အားလိုင်းမရောက်ရှိသေးသော ကျေးရွာ ၃၅ ရွာအား ဓာတ်အားလိုင်းသွယ်တန်းပေးရန်နှင့် ဓာတ်အားနိုင်နင်းမှုရှိစေရေးအတွက် လိုအပ်သော ဓာတ်အားခွဲရုံများ တည်ဆောက်ပေးရန် အစီအစဉ် ရှိ/မရှိနှင့် စပ်လျဉ်းသည့်မေးခွန်း

ဦးထွန်းထွန်းနိုင်(ကနီ မဲဆန္ဒနယ်)

မိမိတို့မြို့နယ်တွင် ကျေးရွာပေါင်း ၁၁၈ ရွာ ရှိပြီး လျှပ်စစ်မီးလင်းနေသည့် ကျေးရွာပေါင်းက ၄၇ ရွာရှိပါကြောင်း၊ ၎င်း ၄၇ ရွာမှာ မိမိတို့ မီတာဘောက်စ် လိုအပ်ချက်က ၂၀၀၀ ကျော်ရှိပါကြောင်း၊ ယခု လောလောဆယ်တွင်လည်း NEP ပထမအဆင့်တွင် မီးလင်းမည့် ကျေးရွာပေါင်းက ၂၃ ရွာရှိပြီး ကျေးရွာများ အားလုံးပေါင်းလိုက်လျှင် မီတာဘောက်စ် လိုအပ်ချက်က ၄၀၀၀ ဝန်းကျင်အထိရှိလာမည် ဖြစ်ပါကြောင်း၊ လက်ရှိမီတာဘောက်စ် ချထားပေးမှုသည်လည်း တစ်ခါချပေးမှ တစ်ရွာကို လေးငါးလုံးချင်း ချပေးနေခြင်း ဖြစ်ပါကြောင်း၊

ကျေးရွာများမီးလင်းရေးတွင် မီတာဘောက်စ် ခက်ခဲနေသည့် ပြဿနာဖြစ်ခြင်းကြောင့် မီးလင်းရေးတွင်လည်း တာဝန်ကျငွေ စိုက်ထုတ်ထားသည့် ပြည်သူများမှာလည်း နစ်နာမှု ဖြစ်ရပါကြောင်း၊ ပြီးခဲ့သည့်နှစ်ကတည်းက မိမိတို့မီတာဘောက်စ် ခက်ခဲနေသည့် ပြဿနာနှင့် ပတ်သက်ပြီး ဒုတိယဝန်ကြီးဆီသို့ စာရေးပြီးတင်ပြခဲ့ဖူးသော်လည်း ထူးခြားမှုရှိမလာခဲ့ပါကြောင်း၊ နောက်တစ်ခုက ဓာတ်အားလိုင်းကိစ္စတွင်လည်း မီးလင်းရေးမှာ လက်ရှိဓာတ်အားလိုင်း ရောက်ရှိနေသော ကျေးရွာများ၊ NEP ဖြင့် မီးလင်းမည့် ကျေးရွာများစသဖြင့်ရှိပါကြောင်း၊ ဒုတိယအဆင့် NEP ပြီးလျှင် ကျေးရွာပေါင်း ၁၀၀ ကျော် မိမိတို့မြို့နယ်တွင် မီးလင်းလာမည် ဖြစ်သော်လည်း ကနီမြို့နယ်၏ ချင်းတွင်းမြစ်အထက်ပိုင်း မြစ်ဘေးဝဲယာရှိ ကျေးရွာ ၃၀ ကျော်က ကျန်ရှိနေအုံးမည် ဖြစ်ပါကြောင်း၊

ထို့ကြောင့် မြစ်ဘေးဝဲယာတစ်လျောက် ၁၁ ကေဗွီ ဓာတ်အားလိုင်းများ သွယ်တန်းပေးရန် လိုအပ်မည် ဖြစ်ပါကြောင်း၊ နောက်တစ်ခုက လက်ရှိကနီမြို့နယ်ကို ဓာတ်အားလိုင်း ဖြန့်ဖြူးပေးနေသော အနေအထားက မြစ်အနောက်ဘက်ပိုင်းတွင် ရွှေအောင်ဦး၊ အောင်ဇေယျဓာတ်အားခွဲရုံနှင့် မြစ်အရှေ့ဘက်ပိုင်း သခွတ္တနယ်ဓာတ်အားခွဲရုံတို့ကနေပြီး ဓာတ်အားလိုင်းများ ဖြန့်ဖြူးပေးနေခြင်း ဖြစ်ပါကြောင်း၊ ၎င်းဓာတ်အားခွဲရုံများသည် ကနီမြို့နယ်နှင့်ဆိုလျှင် ၁၅ မိုင်မှ မိုင် ၃၀ ကျော်အထိ ကွာဝေးနေခြင်း ဖြစ်သည့်အတွက် ရေရှည်တွင် မိမိတို့မြို့နယ်အတွက် ဓာတ်အားခွဲရုံများကို မဖြစ်မနေ တည်ဆောက်ပေးရမည် ဖြစ်ပါကြောင်း၊ သို့အတွက်ကြောင့် ကနီမြို့နယ်ရှိ ကိုယ်ထူကိုယ်ထ လျှပ်စစ်မီးလင်းရေးတွင် မီတာဘောက်စ်ရရှိရေးများစွာ နှောင့်နှေးခဲ့လျက်ရှိရာ မည်သို့ဆောင်ရွက် ပေးမည်ကိုသိရှိလိုခြင်းနှင့် ကနီမြို့နယ် ချင်းတွင်းမြစ်အထက်ပိုင်း မြစ်ဘေးဝဲယာရှိ ၁၁ ဓာတ်အားလိုင်း မရောက်ရှိသေးသော ကျေးရွာ ၃၅ ရွာ အားဓာတ်အားလိုင်း သွယ်တန်းပေးရန်နှင့် ဓာတ်အားလိုင်း နိုင်နင်းမှုရှိစေရန်အတွက် လိုအပ်သောဓာတ်အားခွဲရုံများ တည်ဆောက်ပေးခြင်း လုပ်ငန်းများကို ဆောင်ရွက်ပေးနိုင်ခြင်း ရှိ/မရှိကို သိရှိလိုပါကြောင်း မေးမြန်းပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင် ဝန်ကြီးဌာနအနေဖြင့် အိမ်သုံးမီတာများကို နိုင်ငံနှင့်အဝန်း တပ်ဆင်နိုင်ရန် မြို့နယ် အသီးအသီး၏ လိုအပ်ချက်များကို ခွဲဝေတပ်ဆင်ပေးခဲ့ပါကြောင်း၊ ကနီမြို့နယ်အတွင်း ၂၀၁၈ ခုနှစ် ၅ လပိုင်းမှ ၂၀၁၉ ခုနှစ် ၅ လပိုင်းအထိ မီတာလုံးရေ စုစုပေါင်း ၂၅၈၀ လုံး ခွဲဝေ တပ်ဆင်ပေးခဲ့ပြီး ဖြစ်ပါကြောင်း၊

ယခုအခါမှာ ကနီမြို့နယ်နှင့်အနီးတစ်ဝိုက်တွင် ရှိသည့်ကျေးရွာများ တိုးချဲ့ပြီး လျှပ်စစ်သွယ်တန်းခြင်း ကိစ္စများကြောင့် ထပ်မံလိုအပ်သော မီတာလုံးရေ တင်ပြတောင်းခံထားမှု စာရင်းသည် ၁၈၅၀ လုံး တောင်းခံထားကြောင်း စိစစ်တွေ့ရှိရပါသည်။ ကနီမြို့နယ်အပြင် စစ်ကိုင်းတိုင်းဒေသကြီး အတွင်းရှိ မြို့များနှင့် အနီးအနားတွင်ရှိသည့် ကျေးရွာများ၏ အိမ်သုံးမီတာများ ထပ်မံတပ်ဆင်နိုင်ရေးအတွက် ၃၀-၅-၂၀၁၉ ရက်နေ့တွင် စစ်ကိုင်းတိုင်းဒေသကြီးအတွက် မီတာလုံးရေ ၈၀၀၀ ထပ်မံခွဲဝေ ထုတ်ပေးထားပြီး ဖြစ်ပါကြောင်း၊ ထို့အပြင် ဆက်လက်ပြီး ကနီမြို့နယ်အတွင်း ဓာတ်အား မရရှိသေးသော ကျေးရွာများ ဓာတ်အားရရှိရေးနှင့် ချင်းတွင်းမြစ်အထက်ပိုင်းတွင်ရှိသည့် မီးမလင်းသေးသော ကျေးရွာများမှာ မြစ်အရှေ့ဘက်တွင် ၂၂ ရွာနှင့် မြစ်အနောက်ဘက်တွင် ၂၈ ရွာခန့်ရှိမည် ဖြစ်ပါကြောင်း၊ အရှေ့ဘက်ခြမ်းရှိ ကျေးရွာများကို ဘုတလင်မြို့နယ်အတွင်းရှိသည့် ၃၃ ကေဗွီ ခွဲရုံ ၅ အမ်ဗွီအေ သခွတ္တနယ်ဓာတ်အားခွဲရုံမှလည်းကောင်း၊ အနောက်ဘက်ခြမ်းတွင်ရှိသည့် ကျေးရွာများကို ယင်းမာပင်မြို့နယ်တွင်ရှိသည့် အောင်ဇေယျ ၅ အမ်ဗွီအေ ဓာတ်အားခွဲရုံမှ လည်းကောင်း၊ ၁၁ အမ်ဗွီအေ ဓာတ်အားလိုင်းများနှင့် ဓာတ်အားဖြန့်ဖြူးပေးလျက်ရှိခြင်း ဖြစ်ပါကြောင်း၊

အနောက်ဘက်ခြမ်းတွင်ရှိသည့် ကျေးရွာများကို နောင်တစ်ချိန် တိုးတက်လိုအပ်လာသည့် လျှပ်စစ် ဓာတ်အားများ ထပ်မံဖြန့်ဖြူးပေးနိုင်ရန်အတွက် JICA Phase II အစီအစဉ်ဖြင့် ကနီမြို့နယ်တွင် ၆၆ ကေဗွီအေဓာတ်အားလိုင်း တစ်မိုင်ဆွဲပြီး ၆၆/၁၁ ကေဗွီ ၁၀ အမ်ဗွီအေ ခွဲရုံတစ်ရုံနှင့် ၁၁ ကေဗွီအေ ဓာတ်အားလိုင်း ၂ မိုင် တည်ဆောက်ခြင်းလုပ်ငန်းများ ဆောင်ရွက်ရန်အတွက် ယခုအခါ ပစ္စည်းဝယ်ယူရေး တင်ဒါများခေါ်ယူ ဆောင်ရွက်နေပြီ ဖြစ်ပါကြောင်း၊ အရှေ့ဘက်ခြမ်းတွင်ရှိသည့် ကျေးရွာများကို လျှပ်စစ်ဓာတ်အားပေးနိုင်ရန်အတွက် သခွတ္တနယ်မှ မိုးကောင်း ၃၃ ကေဗွီအေ ဓာတ်အားလိုင်း ၁၀ မိုင်နှင့် ၃၃/၁၁ ကေဗွီ၊ ၅ အမ်ဗွီအေ ဓာတ်အားခွဲရုံတစ်ရုံ တည်ဆောက်သွားရမည် ဖြစ်သည့်အတွက်ကြောင့် ၃၃ ကေဗွီအေ ဓာတ်အားလိုင်း ၁၀ မိုင် တည်ဆောက်ခြင်း လုပ်ငန်းကို ယခုလာမည်‌့ ၂၀၁၉-၂၀ ဘဏ္ဍာရေးနှစ် ပြည်ထောင်စုရန်ပုံငွေ လျာထားချက်တွင် ထည်‌့သွင်းလျာထား တင်ပြထားပြီး ဖြစ်ပါကြောင်းနှင့် လိုအပ်သည့်ဓာတ်အားခွဲရုံ တည်ဆောက်ခြင်း လုပ်ငန်းကို ၂၀၂၀-၂၁ ဘဏ္ဍာရေးနှစ် ပြည်ထောင်စုဘဏ္ဍာရန်ပုံငွေတွင် ဆက်လက်လျာထား ဆောင်ရွက်သွားမည် ဖြစ်ပါကြောင်း ရှင်းလင်းဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်

Source: https://www.pyithuhluttaw.gov.mm/question-3852