MOEE

ပျော်ဘွယ်မြို့နယ်မြောက်ပိုင်းရှိ လျှပ်စစ်မီးမရရှိသေးသော ကျေးရွာပေါင်း (၃၀)ခန့် လျှပ်စစ်မီး ရရှိသုံးစွဲ နိုင်ရန်အတွက် ယင်းတော်ရွာတွင် 33/11 KV 3 MVA ဓာတ်အားခွဲရုံ (၁)ရုံနှင့် ကျေးရွာများ အတွက် 11 KV ဓာတ်အားလိုင်း(၁၂) မိုင်ခန့် တည်ဆောက်ပေးရန် အစီအစဉ် ရှိ/မရှိနှင့် စပ်လျဉ်းသည့် မေးခွန်း

ပျော်ဘွယ်မြို့နယ်မြောက်ပိုင်းရှိ လျှပ်စစ်မီးမရရှိသေးသော ကျေးရွာပေါင်း (၃၀)ခန့် လျှပ်စစ်မီး ရရှိသုံးစွဲ နိုင်ရန်အတွက် ယင်းတော်ရွာတွင် 33/11 KV 3 MVA ဓာတ်အားခွဲရုံ (၁)ရုံနှင့် ကျေးရွာများ အတွက် 11 KV ဓာတ်အားလိုင်း(၁၂) မိုင်ခန့် တည်ဆောက်ပေးရန် အစီအစဉ် ရှိ/မရှိနှင့် စပ်လျဉ်းသည့် မေးခွန်း

ပျော်ဘွယ်မြို့နယ် ကျေးလက်နေ ပြည်သူများ လျှပ်စစ်ဓာတ်အား သုံးစွဲခွင့်ရရှိနိုင်ရေးအတွက် မေးခွန်း မေးမြန်းမည်ဖြစ်ကြောင်း၊ မိမိတို့ ပျော်ဘွယ်မြို့နယ်တွင် ကျေးရွာပေါင်း ၃၁၇ ရွာရှိပြီး ၁၂၇ ရွာ သာ လျှပ်စစ်မီး ရရှိကြောင်း၊ ကျန်ရွာများသည် လျှပ်စစ်မီး ရရှိရန် လိုအပ်လျက် ရှိကြောင်း၊ ပျော်ဘွယ် မြို့နယ်သည် ၃၃ ဓာတ်အားလိုင်းကို မိတ္ထီလာ-သာစည် မှတစ်ဆင့် ဖြန့်ဖြူးရရှိခြင်း ဖြစ်ကြောင်း၊ ၎င်းဓာတ်အားလိုင်းသည် ပျော်ဘွယ်မြို့နယ် မြောက်ဘက်ခြမ်းတွင် ရှိသည့် ယင်းတော်ကျေးရွာကို ဖြတ်သန်းလာခြင်း ဖြစ်ကြောင်း၊ ၎င်းယင်းတော်ကျေးရွာသည် ယင်းတော်ရွာမနှင့် ယင်းတော်မြို့မ ရွာ နှစ် ရွာ ရှိပြီး အိမ်ခြေပေါင်း ၁၃၇၆ အိမ် ရှိကြောင်း၊ ၎င်းရွာသည် ၃၃ ကေဗွီဓာတ်အားလိုင်းမှ ၄၀၀ ဓာတ်အားလိုင်း 33.4 ထုတ်ပြီး သွယ်တန်းခွင့် တိုက်ရိုက်ရရှိသည့် ကျေးရွာဖြစ်သည့်အတွက် လက်ရှိ လျှပ်စစ်မီးလင်းနေပြီဖြစ်ကြောင်း၊ ၎င်းကျေးရွာ၏ အရှေ့၊ အနောက်တွင် ကျေးရွာပေါင်း များစွာ ရှိပြီးလျှပ်စစ်မီး သုံးစွဲနိုင်ခြင်း မရှိသေးကြောင်း၊

ယခုလက်ရှိကာလတွင် ၃၃ ကေဗွီဓာတ်အားလိုင်းမှ ၄၀၀ ဗို့အားလိုင်းကို တိုက်ရိုက် သွယ်တန်းခွင့် မပြုတော့ကြောင်း၊ ထို့ကြောင့် ယင်းတော်ရွာ၏ အရှေ့၊ အနောက်ကျေးရွာများကို လျှပ်စစ်ဓာတ်အား သွယ်တန်းဖြန့်ဖြူးရန် လွယ်ကူချောမွေ့စေရန်အတွက် ရည်ရွယ်ပြီး ယင်းတော်ကျေးရွာတွင် 33/11 KV နှင့် 3 MVA ဓာတ်အားခွဲရုံ တစ်ရုံနှင့် 11 KV ဓာတ်အားလိုင်းကို ခွင့်ပြုပေးရန် လိုအပ်လျက် ရှိကြောင်း၊ ၎င်း ဓာတ်အားခွဲရုံအတွက် လိုအပ်သည့် မြေနေရာကို သက်ဆိုင်ရာ ကျေးရွာတွင် ရှာဖွေရရှိထားပြီး ဖြစ်ကြောင်း၊ 33/11 KV ဓာတ်အားခွဲရုံနှင့် 11 KV ဓာတ်အားလိုင်း ၁၂ မိုင် ခွင့်ပြုမည်ဆိုပါက ယင်းတော်ကျေးရွာမှ ပတ်ဝန်းကျင် ကျေးရွာပေါင်း ၃၀ သည် လှျပ်စစ်ဓာတ်အား သုံးစွဲခွင့် ရရှိကြမည် ဖြစ်ကြောင်း၊ ထို့ကြောင့် မန္တလေးတိုင်းဒေသကြီး၊ ပျော်ဘွယ်မြို့နယ်၏ မြောက်ဘက်တွင် ရှိသည့် လျှပ်စစ်မီး မရရှိသည့် ကျေးရွာပေါင်း ၃၀ ခန့်ကို လျှပ်စစ်မီး ရရှိသုံးစွဲနိုင်ရန်အတွက် ယင်းတော် ကျေးရွာတွင် 33/11 KV၊ 3 MVA ဓာတ်အားခွဲရုံ တစ်ရုံနှင့် ကျေးရွာများအတွက် 11 KV ဓာတ်အားလိုင်း ၁၂ မိုင်ခန့်ကို တည်ဆောက် ခွင့်ပြုပေးနိုင်ခြင်း ရှိ/မရှိနှင့် ခွင့်ပြုပါက မည်သည့်ကာလတွင် ဆောင်ရွက်ပေးနိုင်မည်၊ ခွင့်ပြုနိုင်ခြင် မရှိဘူးပါက မည်သည့် အတွက်ကြောင့် ခွင့်ပြုနိုင်ခြင်း မရှိကြောင်းဖြစ်ကြောင်း၊ ၎င်းကျေးရွာများကို မည်သည့်ကာလတွင် လှျပ်စစ်မီး ရရှိစေရန် မည်သို့စီမံ ဆောင်ရွက်ပေးမည်ကို သိလိုသည့်အတွက် မေးမြန်းပါသည်။

ယင်းတော်ကျေးရွာအနီး လှျပ်စစ်ဓာတ်အား မရရှိသည့် ကျေးရွာ ၃၀ ခန့်ကို လှျပ်စစ် ဓာတ်အား ရရှိနိုင်ရေးအတွက် ယင်းတော်ကျေးရွာတွင် ဓာတ်အားခွဲရုံ တည်ဆောက်ရန် မြေနေရာ လျာထားပြီး ဖြစ်ကြောင်း၊ ယင်းတော်ဓာတ်အားခွဲရုံ တည်ဆောက်ရန်အတွက် ၃၃ ကေဗွီဓာတ်အားလိုင်း တစ်မိုင်နှင့် 33/11 KV၊ 5 MVA ဓာတ်အားခွဲရုံတစ်ရုံ၊ 11 KV ဓာတ်အားလိုင်း ၁၂ မိုင် တည်ဆောက် ခြင်း လုပ်ငန်းများအတွက် လိုအပ်သည့်ဘတ်ဂျက်ရန်ပုံငွေကို မန္တလေးတိုင်းဒေသကြီးအစိုးရ၏ ၂၀၂၁-၂၀၂၂ ဘဏ္ဍာရေးနှစ် ငါးနှစ်စီမံကိန်းတွင် ထည့်သွင်းလျာထားပြီးဖြစ်ကြောင်း၊ ဘတ်ဂျက်လျာထားမှုကို ဘတ်ဂျက် အတည်ပြုချက် ရရှိပါက လုပ်ငန်းများကို အကောင်အထည်ဖော် ဆောင်ရွက်ပေးသွားမည် ဖြစ်ပါကြောင်း မန္တလေးတိုင်းဒေသကြီး အစိုးရအဖွဲ့၏ ကိုယ်စား ရှင်းလင်းဖြေကြားပါသည်။

ဦးသောင်းအေး (ပျော်ဘွယ် မဲဆန္ဒနယ်) က ဆက်စပ်မေးခွန်း မေးမြန်းပါသည်။

မိမိတို့ တောင်းဆိုထားသည့် 3 MVA အစား 5 MVA ဓာတ်အားခွဲရုံ ရမည်ဆိုသည့်အတွက် အထူး ကျေးဇူးတင်ကြောင်း၊ သို့သော် ခွင့်ပြုမည့် ကာလသည် ၂၀၂၁-၂၀၂၂ ခုနှစ်ဖြစ်နေသည့်အတွက် မိမိ အကြံပြု တင်ပြတောင်းလိုသည်က ပြည်ထောင်စုလွှတ်တော်တွင် လာမည့် ၂၀၁၉-၂၀၂၀ ဘဏ္ဍာရေး အတွက် ဘဏ္ဍာငွေ ခွဲယူမှုများကို ဆောင်ရွက်စိစစ်နေသည့် ကာလဖြစ်ပါကြောင်း၊ ၎င်းအဖွဲ့များသည် မလိုအပ်သည့် သုံးစွဲမှုများကို ဖြတ်တောက်ပြီး လျှော့ချဆောင်ရွက်မည် ဖြစ်သည့်အတွက် ဘတ်ဂျက်စိစစ်ရေးတွင် ငွေကြေးဖြတ်တောက်မှု ပိုလျှံလာမည်ဆိုပါက ၎င်းငွေများထဲမှ ၂၀၁၉-၂၀၂၀ ခုနှစ်တွင် ပြန်လည်တောင်းခံပြီး တင်ပြခဲ့သည့် ယင်းတော်မြို့ ဓာတ်အားခွဲရုံနှင့် ဓာတ်အားလိုင်းကို ဆောင်ရွက်ပေးနိုင်ခြင်း ရှိ/မရှိ ဆက်စပ်မေးမြန်းပါသည်။

လျှပ်စစ်နှင့် စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လွှတ်တော် ကိုယ်စားလှယ်ကြီး ထပ်ဆင့်မေးခွန်းအရ ယခု လွှတ်တော်သို့ တင်ပြထားသည့် ၂၀၁၉-၂၀၂၀ ဘဏ္ဍာရေးနှစ်အတွက် ပြည်ထောင်စု၏ ဘတ်ဂျက်ရန်ပုံငွေ လျာထားချက်များကို စိစစ်လျော့ ချနေခြင်းကို သက်ဆိုင်ရာ လွှတ်တော်က တာဝန်ပေးထားသည့် ကော်မတီများက ဆောင်ရွက်နေသည့် အချိန်ဖြစ်ကြောင်း၊ မည်မှျလျော့ချ ဖြတ်တောက်မည် ဆိုသည့်အချက်ကို မိမိတို့ သိရှိခြင်းမရှိပါကြောင်း၊ ထို့အပြင် တင်ပြပါလုပ်ငန်းနှင့်ပတ်သက်ပြီး မန္တလေးတိုင်းဒေသကြီးအစိုးရ၏ ဘတ်ဂျက်တွင် လျာထား သည်ဖြစ်ပြီး ပြည်ထောင်စုဝန်ကြီးဌာန၏ ဘတ်ဂျက်တွင် လျာထားဆောင်ရွက်ထားခြင်း မဟုတ် ကြောင်း၊ ထို့ကြောင့် ဘဏ္ဍာရေးကော်မရှင်ကို ဖြတ်သန်းလာသည့် အချက်များတွင် လုပ်ငန်းအမည် ပါဝင်ခြင်း မရှိကြောင်း၊ ပြည်ထောင်စုလွှတ်တော်မှ ၎င်းလုပ်ငန်းကို ၂၀၁၉-၂၀၂၀ ဘဏ္ဍာရေးနှစ်အတွင်း တွင် လုပ်ငန်းခေါင်းစဉ်နှင့် ဘတ်ဂျက်ရန်ပုံငွေ ပြန်လည် ဖြည့်စွက်ပေးမည်ဆိုပါက မိမိတို့ ပြည်ထောင်စု ဝန်ကြီးဌာနမှ အဆိုပါလုပ်ငန်းကို ဆောင်ရွက်ပေးနိုင်ခြင်းရှိသည်ကို ပြန်လည် ရှင်းလင်းဖြေကြား ပါသည်။

လျှပ်စစ်နှင့် စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်

https://www.pyithuhluttaw.gov.mm/question-3927

07-Aug-2019

« PREV NEXT »

The Republic of the union of myanmar

Ministry Of Electricity And Energy

Total visitors

နောက်ဆုံးရ တင်ဒါသတင်းများ

အများပြည်သူသို့ ပန်ကြားလွှာ

ဗွီဒီယိုမှတ်တမ်းများ

ဓါတ်ပုံမှတ်တမ်းများ

Electricity And Energy

Total visitors