လျှပ်စစ်ဓာတ်အားပြတ်တောက်မှု မရှိစေရန်နှင့် လုံလောက်စွာရရှိနိုင်ရေးအတွက် အရန်ပမာဏ ထားရှိနိုင်ရန်အထိ တိုးမြှင့်ထုတ်လုပ်ခြင်းကို စီမံကိန်းချလုပ်ဆောင်ရန် အစီအစဉ်ရှိ / မရှိ နှင့် စပ်လျဉ်းသည့်မေးခွန်း

ဦးနေမျိုးထက်( ကျောက်တံတားမဲဆန္ဒနယ်)

၂၀၁၉ ခုနှစ်တွင် မြန်မာနိုင်ငံအတွင်း လှပ်စစ်ပြတ်တောက်မှုများဖြစ်ပေါ်ပြီး လှပ်စစ်ထုတ်လုပ်မှုသည် လုံလောက်စွာ ထုတ်လုပ်ပေးနိုင်ခြင်းမရှိခြင်းကြောင့် အလှည့်ကျဓာတ်အားပေးမှုများကို ပြုလုပ်ခဲ့ရပါ ကြောင်း၊ ဇူလိုင်လတွင် ရှေလီမှာ စက်တစ်လုံး ချို့ယွင်းပြီး၊ အလုံတွင်လည်း Toyo Thai တစ်လုံး ချို့ယွင်းသည်ဆိုပြီး ထုတ်လုပ်မှုပြဿနာများရှိသည့်အလျောက် အလှည့်ကျ ဓာတ်အားဝန်လျော့ဖို့ လုပ်ပြီး ဖြတ်တောက်မှု များကိုလည်း ဇူလိုင်လ ၂၃ ရက်နေ့၊ ဇူလိုင်လထဲမှာလည်း  မိမိတို့ လုပ်ခဲ့ရပါကြောင်း၊  မိမိတို့နိုင်ငံတွင် မိုးရွာနေပြီဆိုသော်လည်း  ရေအားလှပ်စစ်တွေကို ဆည်များတွင် ရေဝင်ရောက်မှု အခြေအနေမှ နည်းနေသည်ကို တွေ့ရှိရပါကြောင်း၊ ၎င်းကိုကြည့်ခြင်းအားဖြင့် ၂၀၂၀ ခုနှစ် နွေရာသီတွင် ရေအားများလျော့နည်းနေမည်ဖြစ်သည့်အတွက် ရေအားတစ်ခုတည်းနှင့် မှီခို၍မရဘဲ ထုတ်လုပ်ရေး အပိုင်းများကို တခြား Generation များနှင့် လုပ်ဆောင်ရမည်ဖြစ်ပါကြောင်း၊ လုပ်ဆောင်မှသာလျင် လာမည့်ရှေ့နှစ်များတွင် မီးကောင်းမည်ဖြစ်ပါကြောင်း၊ များသောအားဖြင့် ခေတ်မီတိုးတက်သော နိုင်ငံများတွင် လှပ်စစ်ကို ပြည်သူလူထုသုံးစွဲသည်ထက်ကို ပိုပြီး အရန်ပမာဏ အထိ တိုးမှင့်ထုတ်လုပ်နိုင်ရန် စီစဉ်ဆောင်ရွက်ထားပါကြောင်း၊ ပြည်သူလူထု၏ သုံးစွဲမှုသည် အတိအကျတွက်ချက်ရန် ခက်ခဲသည့်အတွက် ခန့်မှန်းခြေတွက်ချက်ပြီး ခန့်မှန်းခြေထက်ပိုပြီး လုပ်နိုင်မှသာ မိမိတို့နိုင်ငံသည် ခေတ်မီတိုးတက်ပြီး လျှပ်စစ်၊ စီးပွားရေး၊ လူမှုရေး အစစအရာရာ ကောင်းမွန်သည့်နိုင်ငံဖြစ်မည်ဖြစ်ပါကြောင်း၊  ရင်းနှီးမှုပ်နှံသူများက ဆွေးနွေးသည့်အခါ လျှပ်စစ်ရရှိမှု အခက်အခဲများကြောင့် Investors များ ဝင်ရောက်မှုမှ အခက်အခဲရှိနေသည် သိရှိရပါကြောင်း၊ ထို့ကြောင့် မြန်မာနိုင်ငံအနေဖြင့် ၂၀၂၀ ခုနှစ်နှင့် ရှေ့လာမည့် နှစ်များတွင် လျှပ်စစ်ပြတ်တောက်မှု မရှိစေရန်နှင့် လုံလောက်စွာသုံးစွဲနိုင်ရန်အတွက် အရန်ပမာဏအထိ ထားရှိနိုင်ရန် လျှပ်စစ်ဝန်ကြီးဌာန အနေဖြင့် ထုတ်လုပ်ရေးလုပ်ငန်းများကို မည်ကဲ့သို့စီမံကိန်းချပြီး ဆောင်ရွက်နေသည်ကို သိရှိလိုပါကြောင်းနှင့် ထုတ်လုပ်ရေးကို မည်သို့တိုးချဲ့ မည်ဆိုသည်ကို သိရှိလိုပါကြောင်းဖြင့် မေးမြန်းပါသည်။

လျှပ်စစ်နှင့်စွမ်းအင်ဝန်ကြီးဌာနမှ တစ်နိုင်ငံလုံးရှိ နိုင်ငံပိုင်နှင့်ပုဂ္ဂလိကပိုင် ဓာတ်အားပေးစက်ရုံ ၅၁ ရုံ တည်ဆောက် ထားရှိပါကြောင်း၊  အဆိုပါစက်ရုံများ၏ စက်တပ်ဆင်အင်အားကတော့ ၅၆၀၀ မဂ္ဂါဝပ် ကျော်ခန့် ရှိပါကြောင်း၊ မြန်မာနိုင်ငံတွင် အိမ်ထောင်စုပေါင်း ၁၀.၈ သန်းကျော်ရှိသည့်အနက် အိမ်ထောင်စုပေါင်း ၄.၉ သန်းကျော် လှပ်စစ်မီးကို သုံးစွဲလျက်ရှိပါကြောင်း၊ ၂၀၁၉ ခုနှစ်အကုန်တွင် လျှပ်စစ်မီးရရှိ သုံးစွဲနိုင် သည့် အိမ်ထောင်စုပေါင်း ၅၀ ရာခိုင်နှုန်းအထိ သုံးစွဲနိုင်အောင် ဝန်ကြီးဌာနမှ ရည်မှန်းကြိုးစားနေခြင်း ဖြစ်ပါကြောင်း၊ လက်ရှိလှပ်စစ်ဓာတ်အားသုံးစွဲမှုအခြေအနေနှင့် နောက်တိုး လျှပ်စစ်ဓာတ်အားသုံးစွဲမည့် အိမ်ထောင်စုများ၏ လျှပ်စစ်လိုအပ်ချက်ကို ဖြည့်ဆည်းပေးနိုင်ရန် လျှပ်စစ်ဓာတ်အားထုတ်လုပ်မှုကို တိုးမြင့်ဆောင်ရွက်သွားရန် လိုအပ်သည်ကိုသိရှိပါ ကြောင်း၊  ရေရှည်တွင် လျှပ်စစ်ဓာတ်အား လုံလောက်မှု ရှိနိုင်စေရန်အတွက် တနင်္သာရီတိုင်းဒေသကြီး၊ ကံပေါက်ဒေသတွင် ၁၂၃၀ မဂ္ဂါဝပ်၊ ရန်ကုန်တိုင်းဒေသကြီး၊ အလုံတွင် ၃၇၇ မဂ္ဂါဝပ်၊ ဧရာဝတီတိုင်း ဒေသကြီး၊ မီးလင်းဂျိုင့်ဒေသတွင် ၁၃၉၀ မဂ္ဂါဝပ် ထုတ်လုပ်နိုင်မည့် စီမံကိန်းသုံးခုကို ဆောင်ရွက်ထားရှိပါကြောင်း၊ ၂၀၂၁-၂၂ ခုနှစ်တွင် ၂၅၀ မဂ္ဂါဝပ် စတင် ဓာတ်အားထုတ်လုပ်နိုင်မှာဖြစ်ပြီး ၂၀၂၅-၂၆ ခုနှစ်တွင် ၃၀၀၀ မဂ္ဂါဝပ်အထိ လျှပ်စစ်ဓာတ်အား ထုတ်လုပ်ပေးသွားနိုင်မည်ဖြစ်ပါကြောင်း၊ ၂၀၁၉ ခုနှစ် နွေရာသီကာလတွင် ဓာတ်အားမလုံလောက်သည့် အတွက်ကြောင့် အလှည့်ကျ ဓာတ်အားပေးခဲ့ရသည့်အခြေအနေ ပေါ်ပေါက်ခဲ့ပါကြောင်း၊ ထို့သို့ ပေါ်ပေါက် ခဲ့ခြင်း သည် ၂၀၁၈ ခုနှစ် မိုးရာသီကာလကုန်သည့်နောက်ပိုင်းတွင် ရေအားလျှပ်စစ်ဆည်များ၏ ရေများကို အကောင်ဆုံး အနေအထားဖြင့် သိုလှောင်ထားရှိပြီး ၂၀၁၉ ခုနှစ် နွေရာသီတွင် ရေအားလျှပ်စစ်ဓာတ်အားပေး စက်ရုံများမှ လျှပ်စစ်ပိုမိုထုတ်လုပ်နိုင်ရန် အားထုတ်ကြိုးပမ်းဆောင်ရွက်ခဲ့ပါကြောင်း၊ ကြိုးပမ်း ဆောင်ရွက်ခဲ့သည့်အတိုင်း ထုတ်လုပ်နိုင်ခဲ့သော်လည်း ၂၀၁၉ ခုနှစ် နွေရာသီသည် ရာသီဥတုအပူချိန် အလွန်ပြင်းထန်ခြင်း၊ နေရာဒေသများစွာတွင် အပူဒဏ်ခံရသည့်အတွက် လျှပ်စစ်ဓာတ်အားကို ပိုမို ထုတ်လုပ်ပေးခဲ့ရင်းနှင့် မိုးဦးကာလသည် မိုးနှောင်းခဲ့သည့်အတွက်ကြောင့် ဆည်ရေများ ကုန်သွားပြီး သည့် အချိန်တွင် ပြန်လည်ဖြည့်တင်းရန် နောက်ကျသည့်အတွက် လျှပ်စစ်ဓာတ်အားမလုံလောက်မှုကို ကြုံတွေ့ခဲ့ရခြင်းဖြစ်ပါကြောင်း၊ ထို့ကြောင့် ၂၀၂၀ ခုနှစ် နွေရာသီတွင် လျှပ်စစ်ဓာတ်အားလိုအပ်ချက်ကို ယခုအချိန်မှစပြီး အချိန်တိုအတွင်း ဖြည့်ဆည်းပေးနိုင်ရန်လိုအပ်သည့်အခြေအနေတစ်ရပ်လည်း ထပ်မံပေါ်ပေါက်လာခြင်းဖြစ်ပါကြောင်း၊ ရေတိုစီမံချက်အနေဖြင့် ပုဂ္ဂလိကရင်းနှီးမှုပ်နှံမှုအဖြစ် Gas Engine Power Plant / Power Barge/Power Ship စသည့် တစ်နည်းနည်းနှင့်ထုတ်လုပ်နိုင်မည့် စီမံကိန်းများကို ကွန်းချောင်းတွင် ၂၀ မဂ္ဂါဝပ်၊       အလုံတွင် ၁၂၀ မဂ္ဂါဝပ်၊ ကျောက်ဖြူတွင် ၁၅၀ မဂ္ဂါဝပ်၊ သန်လျင်တွင် ၃၅၀ မဂ္ဂါဝပ်၊ ပုသိမ် သို့မဟုတ် သာကေတတွင် ၄၀၀ မဂ္ဂါဝပ် စုစုပေါင်းစက်တပ်ဆင် အင်အား ၁၀၄၀ မဂ္ဂါဝပ်ထုတ်လုပ်နိုင်မည့် စီမံကိန်းငါးခုကို International Competitive Bidding စနစ်ဖြင့်         ၂၈-၆-၂၀၁၉ ရက်နေ့တွင် နိုင်ငံပိုင်သတင်းစာများ၊ နိုင်ငံခြားသံရုံးများ၊ ဝန်ကြီးဌာနများ၏ Website များမှ တစ်ဆင့် တင်ဒါခေါ်ယူဆောင်ရွက်ခဲ့ပြီး ၂၉-၇-၂၀၁၉ ရက်နေ့တွင် တင်ဒါပိတ်သိမ်းပြီး ကုမ္ပဏီများမှ တင်ပြလာသည့် အဆိုပြုလှာများကို တင်ဒါစိစစ်ရွေးချယ်ရေးကော်မတီက စိစစ်ဆောင်ရွက်လျက် ရှိပါကြောင်း၊ အလားတူ မြင်းခြံဒေသတွင် ယခင်ကတည်ဆောက်ထားခဲ့သော ၁၃၃ မဂ္ဂါဝပ် Gas Engine ဓာတ်အားပေးစက်ရုံမှ ဓာတ်အားမထုတ်ဘဲရပ်တန့်ထားသည့် စက်အပိုများ စုစုပေါင်း ၆၆ မဂ္ဂါဝပ်ကို သဘာဝဓာတ်ငွေ့ ထောက်ပံ့နိုင်မှုနှင့် ဓာတ်အားလိုင်းနိုင်နင်းမှုရှိသည့် မကွေးဓာတ်အားခွဲရုံသို့ ပြောင်းရွှေ့ပြီး ဓာတ်အား ထုတ်လုပ်နိုင်ရန်လည်း စီစဉ်ထားပါကြောင်း၊ ထို့အပြင် ယခင်က တင်ဒါအောင်မြင်ထားသော ရှေတောင်သဘာဝဓာတ်ငွေ့သုံး ဓာတ်အားပေးစက်ရုံစီမံကိန်း ၂၈ မဂ္ဂါဝပ် ထုတ်လုပ်မည့် ဓာတ်အားကို ဝယ်ယူနိုင်ရန်အတွက်လည်း ဓာတ်အားဝယ်ယူရေးစာချုပ်ချုပ်ဆိုနိုင်ရန် ဆက်လက် ညှိနှိုင်းဆောင်ရွက် လျက် ရှိပါကြောင်း၊ ဆိပ်ကြီးခနောင်တိုမြို့နယ်တွင် ၃၀၀ မဂ္ဂါဝပ် ဓာတ်အား ထုတ်လုပ်နိုင်မည့် ဓာတ်အားပေးစက်ရုံစီမံကိန်းဆောင်ရွက်ခွင့်ကို စီမံကိန်းနှင့်ဘဏ္ဍာရေးဝန်ကြီးနှင့် ညှိနှိုင်းဆောင်ရွက် လျက် ရှိပါကြောင်း၊ အချိန်တိုအတွင်း ဆောင်ရွက်ရမည့်စီမံကိန်းများအတွက် ဝန်ကြီးဌာနမှ နိုင်ငံတော်၏ ငွေကြေး ရင်းနှီးမှုပ်နှံရန် မလိုအပ်သော်လည်း ဓာတ်အားဝယ်ယူစရိတ် ပေးချေနိုင်ရန် အတွက် ၂၀၁၉-၂၀ ဘဏ္ဍာရေးနှစ် သာမန်အသုံးစရိတ် ခွင့်ပြုရန်ပုံငွေ ခွင့်ပြုချက်ရရှိထား ပြီးဖြစ်ပါကြောင်း၊ ၂၀၂၀-၂၁ ခုနှစ်တွင် JICA ၏ Grant အထောက်အပံ့ဖြင့်ဆောင်ရွက်လျက်ရှိသည့် မြန်အောင် ၂၄ မဂ္ဂါဝပ် Gas Engine စီမံကိန်းပြီးစီးတော့မည်ဖြစ်ပြီး ရခိုင်ပြည်နယ်၊ ကျောက်ဖြူ ဒေသမှာဆောင်ရွက်မည့် ၁၃၅ မဂ္ဂါဝပ် CCGT ဓာတ်အားပေးစက်ရုံအတွက်လည်း ဓာတ်အားဝယ်ယူ ရေးစာချုပ် လက်မှတ်ရေးထိုးခွင့်ကို တင်ပြဆောင်ရွက်လျက်ရှိပါကြောင်း၊ နောင်အနာဂတ်အတွက် လျှပ်စစ်ဓာတ်အားထုတ်လုပ်နိုင်ရန် ရွာမတွင် မဂ္ဂါဝပ် ၃၀၀ ဝန်းကျင် ထုတ်လုပ် နိုင်မည့် Combined Cycle Gas Turbine စီမံကိန်းကိုလည်း ကမ္ဘာ့ဘဏ် ၏ ချေးငွေဖြင့် ရယူ ဆောင်ရွက်နိုင်ရန်အတွက် လိုအပ်သော Feasibility Study နှင့် EIA, SIA လုပ်ငန်း များကို ဆောင်ရွက်လျက်ရှိပြီး ချေးငွေရရှိရေးကို ဆက်လက်ဆွေးနွေးညှိနှိုင်း ဆောင်ရွက်သွားမည် ဖြစ်ပါကြောင်း၊ ပြန်လည် ပြည့်ဖြိုးမြဲစွမ်းအင်ဖြစ်သည့် မင်းဘူးဒေသတွင် နေရောင်ခြည်သုံး ဓာတ်အားပေးစက်ရုံ စီမံကိန်းကို ဆောင်ရွက်ပြီး ပထမအဆင့် ၄၀ မဂ္ဂါဝပ်ကို ထုတ်လုပ်နိုင်ခဲ့ပြီဖြစ်ပါကြောင်း၊  ရေအားလျှပ်စစ်စီ မံကိန်းများ ဖြစ်သည့် တာပိန်(၁)စီမံကိန်းမှ လျှပ်စစ်ဓာတ်အားကို သွယ်တန်းရယူနိုင်ရန်လိုအပ်သည့် ၂၃၀ ကေဗွီ ဓာတ်အားလိုင်းစီမံကိန်းကို ဗန်းမော်၊ နဘား၊ ရှေဘို၊ အုန်းတောအထိ တည်ဆောက်နေပြီး ဓာတ်အားလိုင်း စီမံကိန်းပြီးစီးသွားပါက နောက်ထပ် မဂ္ဂါဝပ် ၁၀၀ ရယူနိုင်မှာဖြစ်ပါကြောင်း၊ အထက် ကျိုင်းတောင်းစီမံကိန်း ၅၁ မဂ္ဂါဝပ်၊ အထက်ရဲရွာစီမံကိန်း ၂၈၀ မဂ္ဂါဝပ်၊ ဒီးဒုတ် ၆၀ မဂ္ဂါဝပ်၊ မိုင်းဝ ၆၆ မဂ္ဂါဝပ်၊ နမ်‌့ပေါ်ရေအား ၂၀ မဂ္ဂါဝပ်၊ အလယ်ပေါင်းလောင်း ၁၅၂ မဂ္ဂါဝပ်နှင့် သူဌေးချောင်း ၁၁၁ မဂ္ဂါဝပ်၊ ရှေလီ(၃) ၆၇၁ မဂ္ဂါဝပ်စီမံကိန်းများကိုလည်း တစ်ပြိုင်ထဲ ကြိုးပမ်းတည်ဆောက်လျက်ရှိပါ ကြောင်း၊ ဝန်ကြီးဌာနအနေဖြင့် ဓာတ်အားထုတ်လုပ်မှုအပိုင်းတွင် စွမ်းအင်အရင်းအမြစ်မျိုးစုံမှ ဓာတ်အားထုတ်လုပ်ပေးနိုင်ရေးကို ဆောင်ရွက်လျက်ရှိရာ ကျောက်မီးသွေးသုံးဓတ်အားပေးစက်ရုံ စီမံကိန်းအချို့ကိုလည်း သင့်တော်သည့် နေရာဒေသများတွင် သဘာဝပတ်ဝန်းကျင်ထိခိုက်မှု အနည်းဆုံးသောနည်းလမ်းများနှင့် အကောင်အထည်ဖော်ဆောင်ရွက်သွားနိုင်ရန် အတွက်လည်း ဆွေးနွေးညှိနှိုင်းစီမံလျက်ရှိပါကြောင်း၊ လက်ရှိ ဆောင်ရွက်ထားသည့် အစီအမံများအရ နှစ်အလိုက် ဓာတ်အားတိုးမြှင့်ထုတ်လုပ်သွားနိုင်မည့် အခြေအနေများ ပေါ်ပေါက်လာမည်ဖြစ်ပြီး အနာဂတ် ကာလတွင် အရန်ဓာတ်အားထုတ်လုပ်နိုင်မယ့်ပမာဏ ထားရှိနိုင်ရေးအတွက်ကိုလည်း စီစဉ်ဆောင်ရွက် လျက်ရှိပါကြောင်း၊ မိမိတို့နိုင်ငံ၏ အမြင့်ဆုံး လျှပ်စစ်ဓာတ်အားသုံးစွဲမှုပမာဏထက် နောင်အနာဂတ် တွင် Reserve Power ကို ၁၀ ရာခိုင်နှုန်းမှ တဖြည်းဖြည်း ၂၀ ရာခိုင်နှုန်း အထိ တိုးမြှင့်ထားရှိသွား နိုင်အောင် စီစဉ်ဆောင်ရွက်လျက်ရှိပါကြောင်း ဖြေကြားခဲ့ပါသည်။

လျှပ်စစ်နှင့်စွမ်းအင်ဝန်ကြီးဌာန၊ဒုတိယဝန်ကြီးဒေါက်တာထွန်းနိုင်

လျှပ်စစ်နှင့်စွမ်းအင်

https://www.pyithuhluttaw.gov.mm/question-3928