ကန်ပေါက်ဒေသ၊ဧရာဝတီတိုင်းဒေသကြီးနှင့် ရန်ကုန်တိုင်းဒေသကြီးတို့တွင် ကုမ္ပဏီများနှင့် စာချုပ်လက်မှတ်ရေးထိုးနိုင်သည့် အဆင့်သို့ရောက်ရှိအောင် တင်ဒါစတင်ခေါ် ယူသည်မှစတင်၍ မည်သို့သောအဆင့်များကို ပွင့်လင်းမြင်သာစွာနှင့် ဆောင်ရွက်ခဲ့သည်နှင့် စပ်လျဉ်းသည့်မေးခွန်း

ဦးမောင်မြင့်(မင်းကင်း မဲဆန္ဒနယ်)

          ကန်ပေါက်ဒေသတွင် ဆောင်ရွက်မည့်စီမံကိန်းကို Total Gas & Power Business Service S.A.S နှင့် SIEMENS A.G နှင့်လည်းကောင်း၊ ဧရာဝတီတိုင်းဒေသကြီးတွင် ဆောင်ရွက်မည့်စီမံကိန်းကို Zhefu Holding Co.Ltd နှင့် Supreme Trading Co.Ltd နှင့်လည်းကောင်း၊ ရန်ကုန်တိုင်းဒေသကြီးတွင် ဆောင်ရွက်မည့်စီမံကိန်းကို TTCL Public Company Limited နှင့်လည်းကောင်း၊ ရခိုင်ပြည်နယ် ကျောက်ဖြူတွင် ဆောင်ရွက်မည့်စီမံကိန်းကို Sinohydro Coporation Limited နှင့် Supreme Trading Co.Ltd နှင့်လည်းကောင်း လက်မှတ်ရေးထိုးခဲ့ကြောင်း လေ့လာသိရှိရပါသဖြင့် ၎င်းကုမ္ပဏီများနှင့် စာချုပ်လက်မှတ်ရေးထိုးနိုင်သည့် အဆင့်သို့ရောက်ရှိအောင် တင်ဒါစတင်ခေါ် ယူသည်မှစတင်၍ မည်သို့သောအဆင့်များကို ပွင့်လင်းမြင်သာစွာနှင့် ဆောင်ရွက်ခဲ့သည်ကို သိလိုခြင်းနှင့် စပ်လျဉ်းသည့်မေးခွန်း

          ၃၁-၁-၂၀၁၈ ရက်နေ့ကထုတ်ပြန်သည့် သတင်းစာတွင် LNG ဓာတ်အားပေးစက်ရုံများ တည်ဆောက်အကောင်အထည်ဖော်ရန်အတွက် စီမံကိန်းဆောင်ရွက်မည့် ကုမ္ပဏီများကို Notice to Proceed ထုတ်ပေးသည့် ပွဲကျင်းပကြောင်း သိရှိရပါသည်။ ကန်ပေါက်ဒေသ၊ ဧရာဝတီတိုင်းဒေသကြီး၊ ရန်ကုန်တိုင်းဒေသကြီး၊ ကျောက်ဖြူတို့တွင် ဆောင်ရွက်မည့် စီမံကိန်းကြီးလေးခု တန်ဖိုးအားဖြင့် ၅ ဘီလီယံဒေါ်လာကျော် ရှိကြောင်းတွေ့ရပြီး မြန်မာနိုင်ငံတွင် အကြီးမားဆုံးစီမံကိန်းကြီး ဖြစ်ပါကြောင်း၊ နိုင်ငံတော်သမ္မတရုံးက လုပ်ငန်းတစ်ရပ်လုပ်မည်ဆိုလျှင် တင်ဒါခေါ်ယူရန်အတွက် ညွှန်ကြားချက် (၁/၂၀၁၇) ကို ထုတ်ပြန်ခဲ့သော်လည်း တင်ဒါခေါ်ယူခြင်း မရှိသည်ကို သုံးသပ်ရပါကြောင်း၊ ဝန်ကြီးဌာနတိုင်းတွင် ပေါ်လစီရှိပြီး ပေါ်လစီ၏အောက်တွင် Vision, Mission ဖြင့် သွားကြရပါကြောင်း၊ လျှပ်စစ်စွမ်းအား‌ဝန်ကြီးဌာနအနေဖြင့် ပြီးခဲ့သည့် ဦးသိန်းစိန်အစိုးရ လက်ထက်တုန်းက JICA နှင့် ADB တို့၏ နည်းပညာအကူအညီဖြင့် National Energy Master Plan ဆိုသည်ကို ရေးခဲ့ပါကြောင်း၊ လက်ရှိရှိပြီးသား Facilities များနှင့် ကျန်ရှိသည့်အရာများ ပေါင်းစပ်ပြီးမှ အချိုးညီညီပေါင်းရန် ဆောင်ရွက်ထားခြင်း ဖြစ်ပါကြောင်း၊ နိုင်ငံအချို့၏ Energy Mixed Plan ကိုလည်း လေ့လာကြည့်ပါ။ အရင်းအမြစ် တစ်ခုတည်းအပေါ် မှီခိုသည်မှာ ရှားပါးပါကြောင်း၊ Energy Policy တွင် အဓိကသုံးချက်ပါပါကြောင်း၊ ၎င်းတို့မှာ Physical Security, Price Security နှင့် Geo Political ဖြစ်ပါကြောင်း၊ လျှပ်စစ်ကဏ္ဍအနေဖြင့် ရည်မှန်းချက်ငါးချက်ရှိပြီး Price, Quality, Security,(EIA,SIA) လျှော့ချနိုင်ရန်နှင့် Assess လျှော့သင့်နိုင်ရန် ဆိုသည့်အချက်များ ဖြစ်ပါကြောင်း၊ ယခုအခါမ ဝန်ကြီးဌာနက ဆောင်ရွက်သည်မှာ မဂ္ဂါဝပ် ၃၀၀၀ လုံးကို LNG တစ်ခုတည်းအပေါ် မှီခိုသည်မှာ မမျှော်မှန်းနိုင်သည့် ပြဿနာတစ်ခုကြုံတွေ့လာလျှင် နိုင်ငံအတွက်ကြီးမားသည့် အခက်အခဲတစ်ခု မလွဲမသွေကြုံရမည် ဖြစ်ပါကြောင်း၊ လျှပ်စစ်ထုတ်သည့် နေရာတွင် ရေအားနှင့် ကျောက်မီးသွေးက ဈေးအချိုဆုံး ဖြစ်သော်လည်း ထုတ်လုပ်မှုလက်ရှိရေအားက ၆၀ ရာခိုင်နှုန်း၊ ဓာတ်ငွေ့က ၄၀ ရာခိုင်နှုန်း ဖြစ်ပြီး ပျမ်းမျှတစ်ယူနစ်ကို ၁၀၀ ကျပ်ကျော်နေခြင်း၊ ဖြန့်ဖြူးရေးစရိတ် ၁၅ ရာခိုင်နှုန်းထည့်ပေါင်းလျှင် အရင်းက ၁၁၅ ကျပ်ဖြစ်ခြင်းများကြောင့် လျှပ်စစ်က မိမိတို့အရှုံးခံရပြီး ဘီလီယံ ၅၀၀ နှစ်တိုင်းရှုံးနေပါကြောင်း၊ LNG ကိုသာ မဂ္ဂါဝပ် ၃၀၀၀ အပေါ် မှီခိုလိုက်မည်ဆိုလျှင် ထုတ်လုပ်မှုအချိုးအစားမှာ ရေအားက ၂၀ ရာခိုင်နှုန်းနှင့် ဓာတ်ငွေ့က ၈၀ ရာခိုင်နှုန်း ဖြစ်သွားမည်ဆိုလျှင် ၎င်းအချိန်ကျလျှင် ပြည်သူကိုရောင်းချသည့် တစ်ယူနစ်ဈေးနှုန်းသည် အနည်းဆုံး ၁၅၀ မှ မရောင်းလျှင် မိမိတို့ရောင်း၍မရပါကြောင်း၊ ရောင်းလျှင်လည်း တော်တော်ရှုံးအုံးမည်ဆိုသည်ကို တွက်ဆ၍ရပါကြောင်း၊ နောက်တစ်ခုက Independent Power Project (IPP) ကနေပြီး အစိုးရက Power Purchasing Agreement လုပ်မည်ဆိုလျှင် မည်သည့်ဈေးဖြင့် ဝယ်မည်နည်း၊ မည်မျှဝယ်ယူမည်နည်း၊ မည်သည့်အချိန်တွင် ဝယ်မည်နည်းဆိုသည်ကို  အတိအကျ ဆောင်ရွက်ရန်လိုပါကြောင်း၊ နောက်ပြီး  PPA တွင် ငွေချေသည့်အခါ မြန်မာကျပ်ငွေဖြင့် ချေ၍မရသည့် ကိစ္စများ အများကြီးရှိပါကြောင်း၊ နိုင်ငံခြား ငွေနှင့် ချေရသည့်အခါတွင်လည်း မိမိမှ ပညာရှင်မဟုတ်သော်လည်း အကြမ်းဖျင်းတွက်ကြည့်သည့်အခါ နှစ်စဉ် 2.23 billions Dollar နှစ်တိုင်းပေးရမည်၊ ၎င်းငွေများကို မိမိတို့မည်သည့်နေရာက ရနိုင်မည်နည်း ဆိုသည်ကို တွက်ရန်လိုအပ်ပါကြောင်း၊ ဝန်ကြီးဌာနကစီမံကိန်းအရ ၂၀၂၀ ခုနှစ်တွင် လျှပ်စစ်ထွက်မည်ဟု ပြောပါကြောင်း၊ ၎င်းလျှပ်စစ်အားလုံး သုံးစွဲသူများကို ဖြန့်ဖြူးပေးရန်အတွက် ကုမ္ပဏီများက Transmission Line ကို တည်ဆောက်ပေးမည် ဆိုသော်လည်း Dismaying Line များ၊ ဓာတ်အားခွဲရုံများ တည်ဆောက်ရန် အများကြီးလိုသေးပါကြောင်း၊ ထို့ကြောင့် ၎င်းအရာများ မလုပ်နိုင် ပါက လျှပ်စစ်များဝယ်ပြီး ပိုက်ဆံများထိုင်ဖြုန်းသည်နှင့် အတူတူဖြစ်နေပါကြောင်း၊ ယခုကုမ္ပဏီများထဲတွင်လည်း Supreme Trading Co.Ltd က Project နှစ်ခုကို ပါဝင်ပတ်သက်ပါကြောင်း၊ ၎င်း လျှပ်စစ်ကို မရှုံးအောင် ဈေးထပ်တင်မည်ဆိုသည်ကို ယခုကြားနေရပြီး လူထုက မကျေနပ်လျှင် လမ်းပေါ်ကိုတက်လာနိုင်ပါကြောင်း၊ ထို့ကြောင့် တိုင်းပြည်မတည်ငြိမ်နိုင်ပါကြောင်း၊ ဦးသိန်းစိန်အစိုးရ လက်ထက်က ဗိုလ်တထောင် Port နှင့် ဆေးရုံဆောက်ခြင်းကို တင်ဒါမခေါ်ဘဲလုပ်ခဲ့ခြင်း၊ ယခုခေတ်တွင် လွှတ်တော်ကမဲခွဲပြီး ၎င်းကို ပယ်ဖျက်ခဲ့ကြပါကြောင်း၊ ယခုလည်း တင်ဒါမခေါ်ဘဲလုပ်သည်ဆိုလျှင် နောင်လာမည့် အစိုးရလက်ထပ်တွင် မည်ကဲ့သို့ ဖြစ်လာမလဲဆိုသည်ကို သတိပေးတင်ပြလိုပါကြောင်း၊ ထို့ကြောင့် ဒေသလေးခုတွင် ဆောင်ရွက်မည့် စီမံကိန်းကြီးလေးခုအတွက် Notice to Proceed ထုတ်ပေးနိုင်သည့် အဆင့်ထိရရှိအောင် တင်ဒါခေါ်ယူသည့် အချိန်ကစတင်ပြီး မည်သည့်အဆင့်များကို မည်ကဲ့သို့ပွင့်ပွင့်လင်းလင်း ထင်သာမြင်သာဆောင်ရွက်ခဲ့သည်ကို ရှင်းလင်းဖြေကြားပေးရန် မေးမြန်းပါသည်။

          တနင်္သာရီတိုင်းဒေသကြီး၊ ကန်ပေါက် LNG to Power စီမံကိန်းကို Total Gas & Power Business Service S.A.S နှင့် SIEMENS A.G တို့က လည်းကောင်း၊ ဧရာဝတီတိုင်းဒေသကြီး မီးလောင်ဂျိုင် LNG to Power စီမံကိန်းကို Zhefu Holding Co.Ltd နှင့် Supreme Trading Co.Ltd တို့ကလည်းကောင်း၊ ရန်ကုန်တိုင်းဒေသကြီး အလုံ LNG to Power စီမံကိန်းကို TTCL Public Company Limited ကလည်းကောင်း၊ ရခိုင်ပြည်နယ် ကျောက်ဖြူ CCGT စီမံကိန်းကို Sinohydro Corporation Limited နှင့် Supreme Trading Co.Ltd တို့ကလည်းကောင်း ရင်းနှီးမြှုပ်နှံဆောင်ရွက်သွားရန် Notice to Proceed (NTP) ကို ၃၀-၁-၂၀၁၈ ရက်နေ့တွင် ထုတ်ပေးခဲ့ပါကြောင်း၊ အစိုးရ-ပုဂ္ဂလိက ပူးပေါင်းဆောင်ရွက်မှု (PPP) စီမံကိန်းများနှင့် ပတ်သက်ပြီး ရင်းနှီးမြှုပ်နှံသူမှ ၎င်း၏အစီအစဉ်ဖြင့် ဆောင်ရွက်လိုကြောင်း အဆိုပြုတင်ပြလာသည့် Unsolicited Project များကို နိုင်ငံတော်နှင့် တိုင်းဒေသကြီး/ပြည်နယ်အတွက် အကျိုးဖြစ်ထွန်းနိုင်မှုအပေါ် မူတည်ပြီး တင်ဒါလုပ်ငန်းစဉ် မလိုအပ်ဘဲ စိစစ်ခွင့်ပြုဆောင်ရွက်ရန်ဖြစ်ကြောင်း ၁၁-၆-၂၀၁၇ ရက်နေ့တွင် ကျင်းပပြုလုပ်သည့် စီးပွားရေးရာကော်မတီ၏ အစည်းအဝေးအမှတ်စဉ် (၉/၂၀၁၇) ဆုံးဖြတ်ချက်အရ မြန်မာနိုင်ငံရင်းနှီးမြှုပ်နှံမှု ကော်မရှင်က မူဝါဒများထုတ်ပြန်ထားပြီး ဖြစ်ပါကြောင်း၊ တစ်ဆက်တည်း လျှပ်စစ်ဥပဒေပုဒ်မ ၁၂ အရ ပြည်ထောင်စုက စီမံခန့်ခွဲခွင့်ရှိသည့် အကြီးစား လျှပ်စစ်ဆိုင်ရာ လုပ်ငန်းများကို ပြည်တွင်းပြည်ပမှ ရင်းနှီးမြှုပ်နှံလုပ်ကိုင်ဆောင်ရွက်လိုသည့် မည်သည့်ပုဂ္ဂိုလ်၊ အဖွဲ့အစည်းကိုမဆို ခွင့်ပြုမိန့်ထုတ်ပေးနိုင်ပါကြောင်း၊ လျှပ်စစ်နည်းဥပဒေအပိုဒ် ၁၅ အရ ပြည်တွင်း/ပမှ ရင်းနှီးမြှုပ်နှံလုပ်ကိုင်ဆောင်ရွက်လိုသူကို လျှပ်စစ်ဓာတ်အားထုတ်လုပ်ခြင်း ခွင့်ပြုမိန့် လျှောက်ထားခြင်းမပြုမီ ဆောင်ရွက်ရန်လိုအပ်သော အကြီးစားလျှပ်စစ်ဓာတ်အား စူးစမ်းရှာဖွေခြင်းနှင့် ဖြစ်နိုင်စွမ်းလေ့လာမှု ပြုလုပ်ရန် ခွင့်ပြုနိုင်ပါကြောင်း၊ လျှပ်စစ်နည်းဥပဒေအပိုဒ် ၃၃ အရ အထူးရည်ရွယ်ချက်ဖြင့် ခွင့်ပြုသော လျှပ်စစ်ဓာတ်အားပို့လွှတ်ခြင်း ခွင့်ပြုမိန့်အား အများပြည်သူ အကျိုးစီးပွားကို မြှင့်တင်ပေးမည့် အထူးစီမံကိန်းများဆိုင်ရာ လုပ်ငန်းများအတွက် ခွင့်ပြုပေးနိုင်သည်ဟု ဆိုထားပါကြောင်း၊ အထက်တွင်တင်ပြခဲ့သည့် စီမံကိန်းများအတွက် နိုင်ငံတကာဘဏ်များ၊ ငွေကြေးအဖွဲ့အစည်း များနှင့် ဆွေးနွေးညှိနှိုင်းရန်၊ Engineering နှင့် Design ရေးဆွဲမှု၊ ESIA လေ့လာမှု၊ LNG တင်သွင်းမည့် အစီအစဉ်များကို ကုမ္ပဏီများက စတင်ဆောင်ရွက်နိုင်ရန် NTP စာကို ဌာနမှထုတ်ပေးခြင်းဖြစ်ပြီး သက်ဆိုင်ရာကုမ္ပဏီမှလည်း လက်ခံရရှိကြောင်း လက်မှတ်ရေးထိုး ခြင်း ဖြစ်ပါသည်။ လိုအပ်သည့် လုပ်ငန်းစဉ်များ အဆင့်ဆင့်ဆောင်ရွက်ပြီးမှသာလျှင် ပြည်သူများအတွက် ရေရှည်အကျိုးရှိပြီး ထိရောက်သော နည်းလမ်းများဖြင့် အကောင်အထည် ဖော်နိုင်မည့် စီမံကိန်းစာချုပ်များကို ချုပ်ဆိုသွားမည် ဖြစ်ပါကြောင်း၊ မြန်မာနိုင်ငံတွင် လက်ရှိစာရင်းများအရ လျှပ်စစ်ဓာတ်အားသုံးစွဲမှုကို ပြောရမည်ဆိုလျှင် ရန်ကုန်တွင် ၁၃၅၀ မဂ္ဂါဝပ်၊ မန္တလေးတွင် ၃၃၁.၃ မဂ္ဂါဝပ်နှင့် အခြားပြည်နယ်နှင့် တိုင်းဒေသကြီးများတွင် ၁၆၇၈.၇ မဂ္ဂါဝပ်ခန့် စုစုပေါင်း ၃၃၆၀ မဂ္ဂါဝပ် ထုတ်လုပ်ပေးလျက် ရှိပါကြောင်း၊ အိမ်ထောင်စုများ စုစုပေါင်း ၁၀.၈၇၈ သန်းရှိသည့်အနက် ၄.၃၄ သန်း၊ ရာခိုင်နှုန်းအားဖြင့်ဆိုလျှင် ၃၉.၈၈ သန်းကိုသာလျှင် မိမိတို့ လျှပ်စစ်ဖြန့်ဖြူး ပေးနိုင်သည့်အနေအထား ရှိပါကြောင်း၊ လျှပ်စစ်ဓာတ်အား Demand Forecast များ အရ နှစ်စဉ်ပျမ်းမျှ ၁၃ ရာခိုင်နှုန်းကနေပြီး ၁၅ ရာခိုင်နှုန်းခန့် တိုးတက်သွားမည်ဟု ခန့်မှန်းထားပါကြောင်း၊ ယနေ့ လျှပ်စစ်ဓာတ်အားကို ကိစ္စရပ်တိုင်းတွင် သုံးစွဲနေကြခြင်းဖြစ်ပါကြောင်း၊ ဓာတ်အားလိုင်း မရောက်သေးသည့် ဒေသများကနေပြီး အိမ်ထောင်စု ၆ သန်းကလည်း National Grid ဓာတ်အားကိုသာ လိုချင်ကြပါကြောင်း၊ အသေးစားစီးပွားရေးနှင့် စက်မှုလုပ်ငန်း SME များကလည်း National Grid မှသာလျှင် လျှပ်စစ်ဓာတ်အားကို လိုချင်ပါကြောင်း၊ ယခုလိုရမှသာလျှင် ကုန်ထုတ်လုပ်မှု စရိတ်များသက်သာနိုင်မည် ဖြစ်ပါကြောင်း၊ နိုင်ငံခြားရင်းနှီးမြှုပ်နှံမှုများအတွက် ကောင်းမွန် သည့် Investment Environment ၊ Doing Business တို့ဖြစ်ဖို့ဆိုလျှင် လျှပ်စစ်က အဓိကကျနေပါကြောင်း၊ ယခုခန့်မှန်းနေကြသည့် demand ကလည်း လိုအပ်သလောက် မရနိုင်သည့် supperss demand ဖြစ်နေပြီး နှစ်စဉ် demand တိုးတက်မှုက ရှေ့ကသွားပြီး supply က အနောက်က လိုက်နေရပါကြောင်း၊ မြန်မာနိုင်ငံ၏ အရင်းအမြစ် အပေါများဆုံးဖြစ်သည့် ရေအားလျှပ်စစ်စီမံကိန်းများကို ပြည်တွင်း/ပ ပုဂ္ဂလိက လုပ်ငန်းရှင်များ ပါဝင်ရင်းနှီးမြှုပ်နှံမှုဖြင့် ဆောင်ရွက်နိုင်ရန် ယခင်ခေတ်အဆက်ဆက်က MoU ၊ MoA  ၊ JVA စသည့် သဘောတူညီချက်များ လက်မှတ်ရေးထိုးခဲ့သည့် စာချုပ်ပေါင်း ၃၀ ရှိပြီး စီမံကိန်း စုစုပေါင်း ၅၀၊ ၎င်းကနေထွက်ရှိမည့်မဂ္ဂါဝပ် ၄၁၈၃၇.၄၀ ထုတ်လုပ်ရမည် ဖြစ်သော်လည်း လက်တွေ့ ဒီကနေ့တွင် ဘာမှမရှိသေးပါကြောင်း၊ မိမိတို့လက်ထဲတွင် ၎င်း မဂ္ဂါဝပ် လေးသောင်း မရှိပါကြောင်း၊ စာရွက်ပေါ်တွင်သာ ရှိပါကြောင်း၊ အကယ်၍ အခုကစပြီး အကောင်အထည်ဖော်မည် ဆိုလျှင် နောက်ထပ် ၈ နှစ်ကနေစပြီး ၁၀ နှစ်ကြာမှ ပြီးစီးမည် ဖြစ်ပါကြောင်း၊ ကမ်းလွန်သဘာဝဓာတ်ငွေ့ စီမံကိန်းများဖြစ်သည့် ရတနာသည် ၁၉၉၈ ခုနှစ်၊ ရဲတံခွန် ၂၀၀၀ ခုနှစ်၊ ရွှေစီမံကိန်း ၂၀၁၃ ခုနှစ်၊ ဇောတိကစီမံကိန်း ၂၀၁၄ ခုနှစ်တို့ကနေ စတင်ပြီး ဓာတ်ငွေ့များကို ထုတ်လုပ် သုံးစွဲခဲ့ခြင်းဖြစ်ပြီး ရတနာစီမံကိန်းဆိုလျှင် ၂၀၂၁ ခုနှစ်ကစပြီး ထုတ်လုပ်မှုများ ကျဆင်းလာတော့မည် ဖြစ်ပါကြောင်းဈ လက်ရှိ သဘာဝဓာတ်ငွေ့ ကုဗပေ ၄၀၈ သန်းကိုသုံးပြီး လျှပ်စစ်ဓာတ်အား ၁၄၉၆ မဂ္ဂါဝပ်ထုတ်နေနိုင်သော်လည်း ၂၀၂၁ ခုနှစ်မှစပြီး လျှော့ထွက်လာမည့် ဓာတ်ငွေ့ဖြင့်သာ စက်များလည်ပတ်ရမည်ဆိုလျှင် တစ်နည်းအားဖြင့် သဘာဝဓာတ်ငွေ့တွင်းအသစ် မထွက်ရှိလျှင် ဓာတ်အားပေး စက်ရုံများကို အဆင့်ဆင့်ရပ်တန့်သွားရမည် ဖြစ်ပါကြောင်း၊ ဓာတ်အားပေးစက်ရုံများကို ရပ်တန့်ထား၍ မဖြစ်နိုင်ပါ။ ထို့ကြောင့် ပြည်ပကနေပြီး Liquefied Natural Gas ကို တင်သွင်း ဖြည့်ဆည်းရန်ဆိုသည့် အမြော်အမြင်ဖြင့် World Bank ၏ အကူအညီနှင့် လေ့လာဆောင်ရွက်ခဲ့ရပါကြောင်း၊ ယင်းလေ့လာမှုအရ ကျောက်ဖြူ၊ ငရုတ်ကောင်း၊ ကုလားကုတ်၊ ရန်ကုန်မြစ်ဝနှင့် ကန်ပေါက်နေရာ ငါးခုတို့မှာ ပင်လယ်ရေနက်ဆိပ်ကမ်း တည်ဆောက်ပြီး LNG တင်သွင်းနိုင်မည့် အနေအထားကို World Bank Report ကနေပြီး သိရှိခဲ့ရပါကြောင်း၊ LNG တင်သွင်းရန် မိမိတို့စဉ်းစားသည့်အချိန်တွင် ကမ္ဘာ့ရေနံဈေးများကလည်း ကျဆင်းနေပါကြောင်း၊ LNG ကလည်း ဝယ်သူ့ဈေးကွက်ဖြစ်ပြီး ပေါက်ဈေးအနည်းဆုံး အချိန်ဖြစ်နေပါကြောင်း၊ အခြား Energy Resources များမှ ထုတ်လုပ်သည့် ဓာတ်အားချဈေးနှုန်းများနှင့် ယှဉ်နိုင်ပြီး Clean Energy တစ်ခုဖြစ်ခြင်း၊ အခြေခံဝန်အား (Base Load) အဖြစ် သုံးစွဲနိုင်ခြင်းစသည့် အချက်များကို တွေ့ရှိရပါကြောင်း၊ တစ်ဖက်တွင်လည်း ကျောက်မီးသွေးသုံး ဓာတ်အားပေးစက်ရုံစီမံကိန်းများနှင့် ရေအားလျှပ်စစ် စီမံကိန်းများအား ကန့်ကွက်မှုများစွာရှိနေပါကြောင်း၊ တည်ဆောက်ရေးကာလ မသေချာမှု များလည်း ရှိနေပြီး ကန်ပေါက်စီမံကိန်းနေရာဆိုလျှင် Gas Infrastructure များ လက်ရှိရှိပြီး မီးလောင်ဂျိုင် (ရွှေသောင်ယံ) စီမံကိန်းနေရာသည်လည်း အလားလာကောင်းသော ကမ်းလွန် သဘာဝဓာတ်ငွေ့ လုပ်ကွက်အနီး တည်ရှိပါကြောင်း၊ တစ်ချိန်ချိန် Domestic Gas အား ပြန်လည်အသုံးပြုလို့ရမည့် အနေအထားရှိပါကြောင်း၊ LNG သုံး ဓာတ်အားထုတ်လုပ်မှု လုပ်ငန်းကို ဆောင်ရွက်လိုသည့် ပြည်တွင်း/ပ ပုဂ္ဂလိကကုမ္ပဏီများ၏ အဆိုပြုချက် ၂၅ ခုကို ဝန်ကြီးဌာနအနေဖြင့် လက်ခံရရှိခဲ့ပါကြောင်း၊ ၎င်းအနက်က ယခု NTP ထုတ်ပေးထားသော စီမံကိန်းသုံးခုကို အောက်ဖော်ပြပါအချက်များအပေါ်  အခြေခံပြီး ရွေးချယ်ခဲ့ပါကြောင်း၊ (၁) ရင်းနှီးမြှုပ်နှံမည့် အဆိုပြုကုမ္ပဏီ၏ နောက်ခံအချက်အလက်များ၊ (၂) ကုမ္ပဏီ တည်ထောင်ထားသည့်နိုင်ငံ၊ (၃) စီမံကိန်းတည်နေရာနှင့် မြေနေရာရရှိနိုင်မှု၊ (၄) ဓာတ်အားစနစ် နှင့် ချိတ်ဆက်မည့် အစီအစဉ်၊ (၅) တင်သွင်းမည့် LNG အတွက် FSRU နှင့် Jetty အစီအစဉ်များ၊ LNG Supply စိတ်ချရမှု အခြေအနေများကို သုံးသပ်ခဲ့ပါကြောင်း၊ ကန်ပေါက်စီမံကိန်းကို TOTAL ကုမ္ပဏီ၏ သဘာဝဓာတ်ငွေ့ ပိုက်လိုင်းစခန်းဧရိယာအတွင်း မြေ အလွတ်တွင် ပြင်သစ်နိုင်ငံ Total ကုမ္ပဏီနှင့် ဂျာမနီနိုင်ငံ Siemens ကုမ္ပဏီတို့က ရင်းနှီးမြှုပ်နှံ တည်ဆောက်မည် ဖြစ်ပါကြောင်း၊ Floating Storage Regasification Unit (FSRU) ဖြင့် LNG  ပို့မှာ ဖြစ်ပြီး လက်ရှိရတနာသဘာဝဓာတ်ငွေ့ ပိုက်လိုင်းလမ်းကြောင်းကို အသုံးပြုသွယ်တန်းရန် ပါရှိပါကြောင်း၊ ကန်ပေါက်-မော်လမြိုင်-ဘုရားကြီး ၅၀၀ ကေဗွီဓာတ်အားလိုင်း ၄၅၀ ကီလိုမီတာနှင့် ဓာတ်အားခွဲရုံများကိုလည်း ကုမ္ပဏီ၏ ရင်းနှီးမြှုပ်နှံမှုနှင့် တည်ဆောက်ပြီး Build and Transfer စနစ်အရ မိမိဌာနသို့ လွှဲပြောင်းပေးအပ်မည် ဖြစ်ပါကြောင်း၊ NTP ထုတ်ပေးပြီး ၃၆ လတွင် Open Cycle နှင့် ၄၈ လတွင် စီမံကိန်းတစ်ခုလုံး ပြီးစီးအောင်ဆောင်ရွက်ရန် လျာထားပါကြောင်း၊ စီမံကိန်းမြေနေရာ အခက်အခဲမရှိခြင်း၊ Total နှင့် Siemens ကုမ္ပဏီတို့တွင် ကမ္ဘာ့အကြီးဆုံး ကုမ္ပဏီများထဲမှာ ပါဝင်ပြီး အရည်အသွေးရှိသော ကုမ္ပဏီများဖြစ်ခြင်း၊ ၎င်းတို့၏ ဆောင်ရွက်မှုအပေါ် ယုံကြည်စိတ်ချရခြင်း စသည်တို့ကြောင့် ရွေးချယ်ခဲ့ခြင်းဖြစ်ပါကြောင်း၊ မြန်မာနိုင်ငံ၏ North-South-East-West Grid ကြီးလေးခုကို အရေးပါသည့် တောင်ပိုင်းGrid (Southern Grid) အတွက် လုံလောက်သော ဓာတ်အားထုတ်လုပ်မှုနှင့် ၅၀၀ ကေဗွီ မဟာဓာတ်အားလိုင်း စနစ်ရရှိလာမည် ဖြစ်ပါကြောင်း၊ လက်ရှိထားဝယ်၊ မြိတ်ဒေသတို့တွင် ဓာတ်အားဈေး တစ်ယူနစ်လျှင် ၂၅၀ ကျပ်ကနေပြီး ၄၅၀ ကျပ်နှုန်းအထိ ဈေးမြင့်ပေးနေရသည့် အခြေအနေကနေပြီး သတ်မှတ်ဈေးနှုန်းနှင့် ဓာတ်အားစနစ်ကနေပြီး ဓာတ်အားများကို တစ်ပြေးညီအသုံးပြုခွင့် ရရှိလာမည် ဖြစ်ပါကြောင်း၊ ထားဝယ် SEZ အတွက်လည်း လုံလောက်သည့် လျှပ်စစ်ဓာတ်အားကိုလည်း ဖြန့်ဖြူးပေးလာနိုင်မည် ဖြစ်ပါကြောင်း၊ အလုံ LNG စီမံကိန်းကို အလုံဓာတ်အားပေးစက်ရုံဝန်းအတွင်းရှိ မြေလွတ်ပေါ်တွင် တည်ဆောက်မည် ဖြစ်ပြီး ထိုင်းနိုင်ငံ TTCL Public Company Limited က ရင်းနှီးမြှုပ်နှံမှာ ဖြစ်ပါကြောင်း၊ FSRU ကို ရန်ကုန်မြစ်ဝ၊ သန်လျင်တွင် ဆိုက်ကပ်ပြီး သာကေတ သို့မဟုတ် ဒလဘက်ကမ်းမှတစ်ဆင့် ပိုက်လိုင်းသွယ်တန်းနိုင်မည် ဖြစ်ပါကြောင်း၊ အလုံ-လှိုင်သာယာ ၂၃၀ ကေဗွီဓာတ်အားလိုင်း ၁၄ မိုင်ကိုလည်း ကုမ္ပဏီ၏ ရင်းနှီးမြှုပ်နှံငွေဖြင့် တည်ဆောက်မည်ဖြစ်ပြီး Build and Transfer စနစ်အရ မိမိဌာနသို့ လွှဲပြောင်းပေးရမည် ဖြစ်ပါကြောင်း၊ NTP ထုတ်ပေးအပြီး ၂၈ လတွင် စီမံကိန်းပြီးစီးရန် ဆောင်ရွက်ရမည် ဖြစ်ပါကြောင်း၊ စီမံကိန်းမြေနေရာက TTCL မှ B.O.T စနစ်ဖြင့် ၂၀၁၃ ခုနှစ်က စတင်လည်ပတ်နေသည့် မူလအလုံ ၁၂၁ မဂ္ဂါဝပ်ဓာတ်အားပေး စက်ရုံနှင့် တစ်ဆက်တစ်စပ်တည်း ဖြစ်ပြီး ရန်ကုန်မြို့ Downtown မြို့နယ်များဖြစ်သည့် မြို့နယ်များကို  တိုက်ရိုက် ဓာတ်အားပေးနိုင်သည့် တည်နေရာလည်း ဖြစ်ပါကြောင်း၊ TTCL ကုမ္ပဏီအနေဖြင့် လက်ရှိဓာတ်အားပေး စက်ရုံကိုလည်း ကောင်းစွာလည်ပတ်နိုင်သည့် အနေအထားလည်းရှိပါကြောင်း၊ ရွှေသောင်ယံဒေသ၊ မီးလောင်ဂျိုင် LNG စီမံကိန်းကို တရုတ်ပြည်သူ့သမ္မတနိုင်ငံ Zhefu Holding Group Co.,Ltd နှင့် မြန်မာနိုင်ငံသား Supreme Trading Co.,Ltd တို့က ရင်းနှီးမြှုပ်နှံမည် ဖြစ်ပါကြောင်း၊ Floating Storage Unit ကို ယင်းဓာတ်အားပေးစက်ရုံ အနီးဆိုက်ကပ်ပြီး LNG ကို ပိုက်လိုင်းဖြင့် သွယ်တန်းမည် ဖြစ်ပါကြောင်း၊ မီးလောင်ဂျိုင်-လှိုင်သာယာ ၅၀၀ ကေဗွီဓာတ်အားလိုင်း  မိုင် ၁၇၀ နှင့် ဓာတ်အားခွဲရုံများကို ကုမ္ပဏီ၏ရင်းနှီးမြှုပ်နှံငွေဖြင့် တည်ဆောက်မည်ဖြစ်ပြီး Build and Transfer စနစ်အရ ဌာနသို့ လွှဲပြောင်းပေးရမည် ဖြစ်ပါကြောင်း၊ NTP ထုတ်ပေးပြီး ၃၆ လတွင် Open Cycle နှင့် ၄၂ လ စီမံကိန်းတစ်ခုလုံး ပြီးစီးရမည် ဖြစ်ပါကြောင်း၊ ယခင်အစိုးရလက်ထက် ၇-၃-၂၀၁၆ ရက်နေ့တွင် MoU လက်မှတ်ရေးထိုးထားခြင်းဖြစ်ပြီး ကုမ္ပဏီမှ ဖြစ်နိုင်စွမ်းလေ့လာမှု အစီရင်ခံစာကို ၅-၅-၂၀၁၇ ရက်နေ့တွင် တင်ပြပြီးလည်း ဖြစ်ပါကြောင်း၊ Zhefu Holding Group Co.,Ltd အနေဖြင့် တရုတ်နိုင်ငံ၏ ထိပ်တန်းနိုင်ငံပိုင် လျှပ်စစ်ကုမ္ပဏီငါးခုတွင် အပါအဝင်ဖြစ်သည့် China Huadian Corporation နှင့် ပူးပေါင်းဆောင်ရွက်သွားမည် ဖြစ်ပါကြောင်း၊  ဓာတ်အားပေးစက်ရုံ မြေနေရာကို မြန်မာကုမ္ပဏီပိုင် မြေအဖြစ် တိုင်းဒေသကြီးအစိုးရနှင့် ညှိနှိုင်းရယူဆောင်ရွက်သွားမည် ဖြစ်ပါကြောင်း၊ Western Grid အတွက် လုံလောက်သော ဓာတ်အားထုတ်လုပ်မှုနှင့် ၅၀၀ ကေဗွီမဟာဓာတ်အားလိုင်း စနစ်ကိုရရှိနိုင်မည် ဖြစ်ပါကြောင်း၊ ကျောက်ဖြူသဘာဝဓာတ်ငွေ့နှင့် စွန့်ပစ်အပူသုံး ဓာတ်အားပေး စက်ရုံစီမံကိန်းကို တရုတ်နိုင်ငံ Sinohydro Corporation Limited (Power China) နှင့် မြန်မာနိုင်ငံ Supreme Trading Company Limited တို့က ရင်းနှီးမြှုပ်နှံပြီး လက်ရှိကျောက်ဖြူ Gas Engine ဓာတ်အားပေးစက်ရုံ ဝန်းအတွင်း တည်ဆောက်မည် ဖြစ်ပါကြောင်း၊ ရွှေသဘာဝဓာတ်ငွေ့ကို အသုံးပြုမည်ဖြစ်ပြီး ၂၃၀ ကေဗွီဓာတ်အားလိုင်းနှင့် ဓာတ်အားခွဲရုံများလည်း ကျောက်ဖြူတွင် အသင့်ရှိပြီးဖြစ်ပါကြောင်း၊ NTP ထုတ်ပေးပြီး ၂၉ လတွင် စီမံကိန်းပြီးစီးရမည် ဖြစ်ပါကြောင်း၊ ယခင် အစိုးရလက်ထက်က တရုတ်နိုင်ငံ EXIM Bank ၏ ချေးငွေဖြင့် ကျောက်ဖြူ Combined Cycle Gas Turbine စက်ရုံတည်ဆောက်ရန် တင်ဒါခေါ်ယူခဲ့ရာ Sinohydro Corporation Limited မှ အောင်မြင်ခဲ့ပါကြောင်း၊ ချေးငွေအတိုးနှုန်းများသဖြင့် ချေးငွေရရှိရေးကို ပြန်လည်သုံးသပ်ပြီး ပုဂ္ဂလိကရင်းနှီးမြှုပ်နှံမှုဖြင့် ဆောင်ရွက်ရန် စဉ်းစားခဲ့ခြင်းဖြစ်ပါကြောင်း၊ ကုမ္ပဏီအနေဖြင့် စီမံကိန်းဆိုင်ရာ ဖြစ်နိုင်စွမ်းလေ့လာမှု လုပ်ငန်းနှင့် ESIA များ ဆောင်ရွက်ပြီးဖြစ်ပြီး မြေနေရာလည်း အသင့်ရှိပြီးဖြစ်ပါကြောင်း၊ Sinohydro ကုမ္ပဏီသည် တရုတ်နိုင်ငံ၏ လျှပ်စစ်ကုမ္ပဏီကြီးများ တွင် ပါဝင်ပြီး ယုံကြည်စိတ်ချရသော ကုမ္ပဏီဖြစ်ကြောင်း တွေ့ရှိရပါသည်။

           ယခုရှင်းလင်းတင်ပြခဲ့သည့် စီမံကိန်း ၄ ခုလုံးတွင် နိုင်ငံတော်ဘတ်ဂျက် သုံးပြီး ဌာနကဆောင်ရွက်သည့် စီမံကိန်းများ မဟုတ်ပါကြောင်းနှင့် ရာခိုင်နှုန်းအပြည့်  ပုဂ္ဂလိကမှ ရင်းနှီးမြှုပ်နှံငွေဖြင့် ဆောင်ရွက်လိုကြောင်း အဆိုပြုလာသည့် Unsolicited Project များဖြစ်သော ကြောင့် တင်ဒါလုပ်ငန်းစဉ် မလိုအပ်ဘဲ P.P.P စီမံကိန်းများအတွက် နိုင်ငံတော်ကချမှတ်ထားသော မူဝါဒနှင့်အညီ စိစစ်ခွင့်ပြုခဲ့ခြင်း ဖြစ်ပါကြောင်း၊ လျှပ်စစ်ဥပဒေပုဒ်မ ၁၂၊ လျှပ်စစ်နည်းဥပဒေအပိုဒ် ၁၅ နှင့် ၃၃ တို့အရလည်း ခွင့်ပြုနိုင်သည့် စီမံကိန်းလုပ်ငန်းများတွင်လည်း ပါဝင်ပါကြောင်း၊ နိုင်ငံတော်သမ္မတကြီးကလည်း ၁၇-၄-၂၀၁၈ ရက်နေ့ နှစ်သစ်ကူးမိန့်ခွန်းတွင် လျှပ်စစ်နှင့်စွမ်းအင် ဝန်ကြီးဌာနအနေဖြင့် လျှပ်စစ်မီးတိုးမြှင့်ရရှိရေးအတွက် ယခုလက်ရှိထုတ်လုပ်မှု မဂ္ဂါဝပ် ၃၀၀၀ မှ လာမည့် သုံးနှစ်အတွင်း နောက်ထပ်မဂ္ဂါဝပ် ၃၀၀၀ ထပ်မံတိုးမြှင့်၍ စုစုပေါင်းမဂ္ဂါဝပ် ၆၀၀၀ ထုတ်လုပ်ပေးသွားမည် ဖြစ်ပါကြောင်း၊ လျှပ်စစ်ဓာတ်အားဖြန့်ဖြူးရေးတွင်လည်း လက်ရှိသုံးစွဲနေသည့် ၂၃၀ ကေဗွီလိုင်းအပြင် နောက်ထပ် ၅၀၀ ကေဗွီလိုင်းကိုလည်း သုံးနှစ်အတွင်း တိုးချဲ့ဖြန့်ဖြူးပေးသွားမည် ဖြစ်ပါကြောင်း မိန့်ကြားခဲ့ပါသည်။ မိမိတို့ လျှပ်စစ်နှင့်စွမ်းအင်ဝန်ကြီး ဌာနအနေဖြင့် နိုင်ငံတော်၏ လျှပ်စစ်စွမ်းအင်ဖူလုံရေးကို ပြည်သူများနှင့်အတူ လက်တွဲပြီး အင်တိုက်အားတိုက် ကြိုးပမ်းဆောင်ရွက်သွားမည် ဖြစ်ပါကြောင်း ရှင်းလင်းဖြေကြားပါသည်။

ဦးမောင်မြင့် (မင်းကင်းမဲဆန္ဒနယ်) က ဆက်စပ်မေးခွန်း မေးမြန်းပါသည်။

နိုင်ငံခြားကနေပြီး သူတို့၏ Total Investment ရှိလျှင် တင်ဒါခေါ်၍မရဘူးဟု ပြောသည်က မိမိမှ လုံးဝငြင်းဆန်ပါကြောင်း၊ မည်သည့်အတွက်ကြောင့်လဲဆိုလျှင် ဦးသိန်းစိန် အစိုးရလက်ထက်တွင် Ooredoo နှင့် Telenor က သူတို့ Investment လာလုပ်ခြင်း၊ ဒါကို မိမိတို့က International Tinder ခေါ်ပြီး Third Committee Standard ရွေးချယ်ပြီးမှ Nomination List တွင်ပါပြီး သူတို့ကို အတည်ပြုခဲ့ခြင်း ဖြစ်ပါကြောင်း၊ ယခု မိမိတို့ သုံးစွဲနေကြပြီ။ ထို့ကြောင့် နိုင်ငံတကာကလာပြီး ရင်းနှီးမြှုပ်နှံသည့် ပိုက်ဆံများ အားလုံးနှင့် ရင်းနှီးသည်နှင့် တင်ဒါမခေါ်ရဘူးဆိုသည်မှာ ဝန်ကြီး၏ အယူအဆမှားနေပါကြောင်း၊           နောက်တစ်ခုကတော့ တင်ဒါမခေါ်ရသည့် အကြောင်းအရင်းကို ဝန်ကြီးက အချက်လေးချက် ရှင်းပြသည်ကိုမှတ်မိပါကြောင်း၊ (၁) ဥပဒေသုံးခုကို ကိုးကားသွားခြင်း၊ လျှပ်စစ်ဥပဒေအပိုဒ် ၁၂ တွင် ပါကြောင်း၊ ပြည်ထောင်စုက စီမံခန့်ခွဲလျက်ရှိသည့် အကြီးစားလျှပ်စစ်ဆိုင်ရာ လုပ်ငန်းများဖြစ်ပါက ခွင့်ပြုမိန့်ထုတ်ပေးနိုင်သူ ဝန်ကြီးဌာနသည် ပြည်တွင်းပြည်ပမှ ရင်းနှီးမြှုပ်နှံလုပ်ကိုင်ဆောင်ရွက် လိုသည့် မည်သည့်ပုဂ္ဂိုလ်အဖွဲ့အစည်းကိုမဆို ပြည်ထောင်စုအစိုးရအဖွဲ့၏ သဘောတူညီချက်ဖြင့် ခွင့်ပြုမိန့်ထုတ်ပေးနိုင်သည်။ ပြည်ထောင်စုအစိုးရအဖွဲ့ကသဘောတူညီချက်၏ နောက်ကွယ်က Definition ကဘာလဲဆိုလျှင် တင်ဒါခေါ်ရမည်၊ စိစစ်ရမည်၊ စီး/ကော် တင်ရမည်၊ Cabinet တင်ရမည်၊ သို့မှသာ ပြည်ထောင်စုအစိုးရအဖွဲ့က သဘောတူလို့ရမည်ဆိုသည်ကို ပြောချင်ပါကြောင်း၊ ဒုတိယ ဥပဒေ၊ ဒါက နည်းဥပဒေ၊ နည်းဥပဒေ အပိုဒ် ၁၅ တွင်ရေးထားသည်ဆိုတာလည်း ပြည်ထောင်စုအစိုးရအဖွဲ့၏ သဘောတူညီချက်ဖြင့် ဆောင်ရွက်ခွင့်ရှိသည်ဆိုတာ နည်းဥပဒေတွင် လည်းပါပါကြောင်း၊ နောက်တစ်ခုက နည်းဥပဒေ ၃၃ တွင်ပါပါကြောင်း၊ နည်းဥပဒေ ၃၃ တွင်ကျ ဝန်ကြီးက ဒါကို ကိုးကားသွားပါကြောင်း၊ နည်းဥပဒေ ၃၃ တွင်ပါတာက ဓာတ်အားပို့လွှတ်ခြင်းကို ပြောခြင်း၊ ပြည်ထောင်စုအစိုးရ၏ သဘောတူညီချက်မလိုပါကြောင်း၊ သို့သော် ဓာတ်အား ပို့လွှတ်သည့် ကိစ္စများကို ပြောခြင်းဖြစ်ပါကြောင်း၊ ထုတ်လုပ်ခြင်း မပါဘူးဆိုတာကို ပြောချင်ပါကြောင်း၊ ထို့ကြောင့် ဝန်ကြီးတို့က ယခုလို ဥပဒေများကျ လုပ်ပါတယ်ဆိုလို့ ရှိရင်လည်း ထိုဥပဒေက ခင်ဗျားတို့ မှားနေပြီဟု မိမိမှပြောချင်ပါကြောင်း၊    စီးပွားရေးကော်မတီ၏ ဆုံးဖြတ်ချက်အရ လုပ်သည်ဟု ပြောခြင်း၊ စီးပွားရေးကော်မတီကရော ၎င်းဥပဒေကို ကျော်၍ရလား။ ထို့ကြောင့် စီးပွားရေးကော်မတီဆိုတာ ပွင့်ပွင့်လင်းလင်းပြောရလျှင် နိုင်ငံတော်သမ္မတရုံး၏ အောက်တွင်ရှိခြင်း၊ နိုင်ငံတော်သမ္မတရုံးက ၁/၂၀၁၇ နှင့်ထုတ်ထားခြင်း အဲဒါကို မလိုက်နာဘူးဆိုလျှင် စီးပွားရေး ကော်မတီက မှားနေပြီဟု မိမိမှထုတ်ပြချင်ပါကြောင်း၊ ထို့ကြောင့် အချက်ငါးချက်ဖြင့် Evaluation လုပ်ပြီး လာချဉ်းကပ်လာသည့် ကုမ္ပဏီကိုပေးခြင်း၊ ၎င်းအချက်ငါးချက်စိစစ်သည့် အခါမှာလည်း ဈေးနှုန်းလုံးဝမပါဝင်ပါကြောင်း၊ ဈေးနှုန်းအသက်သာဆုံး မဟုတ်ဘူးဆိုတာ မိမိမှ စွပ်စွဲချင်ပါကြောင်း၊ မိမိအနေဖြင့် မေးလိုသည်မှာ လျှပ်စစ်ဥပဒေ ပုဒ်မ ၁၂ အရ တင်ဒါမခေါ်ဘဲ ဝန်ကြီးဌာနက ပေးခွင့်ရှိမည်လား၊ နည်းဥပဒေပုဒ်မ ၁၅ အရ တင်ဒါမခေါ်ဘဲ ဝန်ကြီးဌာနက စွက်ဖက်ခွင့်ရှိမည်လား၊ Notice to Proceed ထုတ်ပေးထားသည့် ကုမ္ပဏီများကို PPA အရ ပေးအပ်မည်ဆိုသည့်အခါ ၁၀ ဆင့်ထက်ကျော်ပြီဆိုလျှင် ၁၅၀ အထက် ကျော်သွားပြီး တစ်ယူနစ် ရောင်းသည့် ဈေးနှုန်းက ၁၀ ဆင့်ဆိုလျှင် ၁ ရက်၊ တစ်ဘတ် ၁၅၀ ခန့်ရှိနေပြီး ဖြန့်ဖြူးရေးစရိတ်က ၁၅ ရာခိုင်နှုန်းပေါင်းလျှင် တစ်ယူနစ်ဈေးနှုန်း ၁၅၀ အထက်ရှိပါကြောင်းဖြင့် သိရှိလိုပါကြောင်း ဆက်စပ်မေးခွန်း မေးမြန်းပါသည်။

လျှပ်စစ်နှင့်စွမ်းအင်ဝန်ကြီးဌာန၊ ပြည်ထောင်စုဝန်ကြီး ဦးဝင်းခိုင်

မိမိတို့အစိုးရတက်ပြီးသည့် နောက်ပိုင်း လျှပ်စစ်ပြဿနာကို မဖြေရှင်းလို့မရပါကြောင်း။ ယခင်ခေတ်အဆက်ဆက်တွင် မဂ္ဂါဝပ် ၄၁၀၀၀ သည်စာရွက်ပေါ်တွင်သာရှိခဲ့ပါကြောင်း။ မဂ္ဂါဝပ် ၃၀၀၀ သည်ယခုအချိန်တွင်လည်း ၃၀၀၀ ကျော် သာ ရှိပါကြောင်း။ နောင်လာမည့်သုံးနှစ်တွင် ဖြစ်ပေါ်လာမည့် Electricity Demand သည်လည်း လိုအပ်မည်ဖြစ်ပါကြောင်း။၎င်းအပေါ်တွင် ရဲဝံ့ပြတ်သားစွာမလုပ်ပါက နောက်သုံးနှစ်တွင်လည်း လွှတ်တော်တွင် ယင်းအကြောင်းပဲဆက်ပြီး ပြောနေရမည်ဖြစ်ပါကြောင်း။ နိုင်ငံတော်ဘတ်ဂျက်အနေဖြင့် တစ်နှစ်လျှင် မဂ္ဂါဝပ် ၁၀၀ ဝန်းကျင်ရအောင် လုပ်နိုင်သည်မှာလည်းလက်တွေ့အခြေအနေဖြစ်ပါကြောင်း။ ယခုလိုသာ ဆောင်ရွက်ပါက ပြည်သူလူထုတောင်းတသည့် ယခင်နှစ်ပေါင်းများစွာက လုပ်သင့် လုပ်ထိုက်သည်ကို မလုပ်ခဲ့ခြင်းကြောင့် ယခုအချိန်တွင် မိမိတို့လက်ထက်မှ မဂ္ဂါဝပ် ၃၀၀၀ ကို လုပ်ရမည့်အခြေအနေ တစ်ခုရောက်နေသည်ဖြစ်သည့် အတွက် မိမိတို့လုပ်ရခြင်း ဖြစ်ပါကြောင်း။ လျှပ်စစ်နှင့်စွမ်းအင် ဝန်ကြီးတစ်ယောက်အနေဖြင့် နောက်လာမည့်သုံးနှစ် အတွင်း မိမိတို့တိုင်းပြည်တွင် ဓာတ်ငွေ့များကုန်သွားမည်ကို မလှုပ်ရှားဘဲနေလို့မရပါကြောင်း။ ဓာတ်ငွေ့စက်ရုံက လောလော ဆယ် မဂ္ဂါဝပ် ၁၄၀၀ ကျော် ပေးနေပါကြောင်း။ နောက်သုံးနှစ်တွင်  ပြည်တွင်းဓာတ်ငွေ့ မရပါက ၁၄၀၀ မဂ္ဂါဝပ် System ထဲမှ ပြုတ်ထွက်သွားမည်ဆိုပါက ဘာတွေဖြစ်ကုန်မလဲဆိုတာ မှန်းဆလို့ရပါကြောင်း။ မိမိအနေဖြင့် ကြိုတင်မြော်ကြည့်ပြီး တစ်ဘက်မှလည်း နိုင်ငံတော်၏ဓာတ်ငွေ့များ ပြန်လည်ရအောင် ဆောင်ရွက်နေပါကြောင်း။  အနည်းဆုံး လေး၊ ငါး၊ ခြောက်နှစ်ကြာမှ ရမည် ဖြစ်ပါကြောင်း။ သို့သော် မိမိတို့ စောင့်နေလို့မရပါကြောင်း။ မိမိတို့တိုင်းပြည်တွင်ရှိသည့် ရေအားလျှပ်စစ်ကို အဓိကထားပြီးသုံးရမည်ဖြစ်ပါကြောင်း။ ရေအားလျှပ်စစ် ဆိုသည်မှာ ရှစ်နှစ်၊ ၁၀ နှစ် ကြိုပြီးလုပ်ရသည့်အလုပ်ဖြစ်ပါကြောင်း။ အရင်မလုပ်ခဲ့သည့် လျှပ်စစ်ပြဿနာသည် မိမိတို့လက်ထက်တွင် ဖြေရှင်းရန်ရောက်လာသည့်အခါ LNG အသုံးမပြုပါက ဖြစ်နိုင်လိမ့်မည်မဟုတ်ပါကြောင်း။ လွန်ခဲ့သောငါးနှစ်တွင် LNG ဈေးကြီး၍ မစဉ်းစားနိုင်ခဲ့ပါကြောင်း။ ယခုချိန်တွင် နိုင်ငံခြားကဝယ်ယူလာသည့် LNG နှင့် မိမိတို့ တိုင်းပြည်တွင်ရှိသည့် သဘာဝဓာတ်ငွေ့ဈေး မှာအတူတူလောက်ကိုရှိနေပါကြောင်း။ ၎င်းအရာကိုကြည့်ခြင်းအားဖြင့် LNG ဆိုသည်မှာ ကြောက်စရာကြီးလည်းမဟုတ်သလို Global Market တစ်ခုလည်းုဖြစ်ပါကြောင်း။ မိမိတို့ မြန်မာပြည်တစ်ပြည်တည်း ရောင်းနေသည့် ‌ရောင်းကုန်တစ်ခုလည်းမဟုတ်ပါကြောင်း။ ကမ္ဘာကြီးတစ်ခုလုံးကို ရောင်းနေသည့်ပစ္စည်းတစ်ခုဖြစ်သည့်အတွက် မိမိတို့က Global Supply Changes တွင်ရှိသည့် တိုင်းပြည်လေးတစ်ပြည်ဖြစ်သည့်အတွက် LNG ရဖို့ရန်အတွက် ပူစရာမရှိပါကြောင်း။ ဈေးနှုန်းတွင် ယခု NTP ပေးထားသည့်သဘောမှာ မိမိတို့ ှမဆုံးဖြတ်သေးပါကြောင်း။  အကြိုအင်ဂျင်နီယာလုပ်ငန်းများနှင့်၊  ဈေးနှုန်းများကို မိမိတို့အများကြီး ဆွေးနွေးရန်လိုအပ်မည်ဖြစ်ပါကြောင်း။ ၎င်းအတွက် မိမိတို့က Award မဟုတ်ပါ။ Notice to Proceed လုပ်ငန်းကို လည်အောင် စပြီး ဆောင်ရွက်ကြရန်။ Feasibility  Study, EIA, SIA များကို။ မိမိတို့ပေးနိုင်သည့် ဈေးနှုန်းနှင့် မင်းတို့ညှိ၍ လုပ်ရန်အတွက် NTP ထုတ်ပေးခြင်းဖြစ်ပါကြောင်း၊ Contract Award မဟုတ်ပါကြောင်း၊ ၎င်းအပေါ် မိမိတို့အနေဖြင့် နောက်သုံးနှစ်အကြာတွင် မိမိအနေဖြင့် တာဝန်ရှိပါလိမ့်မည်၊ တာဝန်ယူမှု တာဝန်ခံမှုဖြစ်သည့်အတွက် လျှပ်စစ်နှင့်စွမ်းအင်ဝန်ကြီးအနေဖြင့် လိုအပ်သည့် လျှပ်စစ်ကို နည်းလမ်းပေါင်းစုံဖြင့် ရရှိအောင် ဆောင်ရွက်ရမည် ဖြစ်ပါကြောင်း၊ ယခုလို ဆောင်ရွက်သည့်အခါတွင်လည်း လွှတ်တော်၊ အစိုးရ၊ ပြည်သူအားလုံး ညီညီညွတ်ညွတ်ဖြင့် ဆောင်ရွက်သွားမည် ဖြစ်ပါကြောင်း၊ မိမိတစ်ဦးတစ်ယောက် သဘောထားနှင့် ဆောင်ရွက်မည်မဟုတ်ကြောင်းကို ရှင်းလင်းဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန၊ ပြည်ထောင်စုဝန်ကြီး ဦးဝင်းခိုင်

လျှပ်စစ်နှင့်စွမ်းအင်

Source : httpss://www.pyithuhluttaw.gov.mm/question-3114