ဆင်ပေါင်ဝဲမြို့နယ် အတွင်းရှိ အင်းလတ်၊ ဇောင်ချမ်းတောင်၊ အင်းမ၊ အလယ်ရွာ၊ သာဝတ္တိ စသည့် ကျေးရွာများ လျှပ်စစ်ဓာတ်အားရရှိရေး အတွက် လိုအပ်သောဓာတ်အားလိုင်း သွယ်တန်းမှုများနှင့် ထရန်စဖော်မာတပ်ဆင်ပေးခြင်း လုပ်ငန်းများအား ဆောင်ရွက်ပေးရန် အစီအစဉ်ရှိ/မရှိနှင့်စပ်လျဉ်းသည့် မေးခွန်း

ဆင်ပေါင်ဝဲမြို့နယ် အတွင်းရှိ အင်းလတ်၊ ဇောင်ချမ်းတောင်၊ အင်းမ၊ အလယ်ရွာ၊ သာဝတ္တိ စသည့် ကျေးရွာများ လျှပ်စစ်ဓာတ်အားရရှိရေး အတွက် လိုအပ်သောဓာတ်အားလိုင်း သွယ်တန်းမှုများနှင့် ထရန်စဖော်မာတပ်ဆင်ပေးခြင်း လုပ်ငန်းများအား ဆောင်ရွက်ပေးရန် အစီအစဉ်ရှိ/မရှိနှင့်စပ်လျဉ်းသည့် မေးခွန်း

ဦးနေထက်ဝင်း (ဆင်ပေါင်ဝဲ မဲဆန္ဒနယ်)

မိမိတို့အစိုးရသစ် လက်ထက်တွင် ၂၀၃၀ ခုနှစ်မတိုင်မီ ကျေးလက်၊ ကျေးရွာများအားလုံး မီးလင်းရမည်ဆိုပြီး မူဝါဒများချမှတ်ပြီး အကောင်အထည်ဖော် ဆောင်ရွက်နေခဲ့ခြင်း အားလုံးအသိ ဖြစ်ပါကြောင်း၊ ၂၀၁၅-၁၆ ဘဏ္ဍာရေးနှစ်အထိ ဆင်ပေါင်ဝဲမြို့နယ်တွင် ကျေးရွာနှစ်ရွာနှင့် ရပ်ကွက် သုံးရပ်ကွက်သာ မီးလင်းခဲ့ပါကြောင်း၊ သို့သော်လည်း အစိုးရသစ်တက်လာသည့်အချိန် ၂၀၁၆-၁၇ ဘဏ္ဍာရေးနှစ်တွင် ကျေးရွာပေါင်း ၁၅ ရွာ၊ ၂၀၁၇-၁၈ ဘဏ္ဍာရေးနှစ်တွင် ကျေးရွာနှစ်ရွာ၊  ၂၀၁၈-၁၉ Mini နှင့် Main Budget တွင် ကျေးရွာ ၁၄ ရွာ NEP စီမံချက်ဖြင့် ကျေးရွာ ၁၁ ရွာ စုစုပေါင်း ကျေးရွာပေါင်း ၄၂ ရွာခန့်ထိအောင် တိုးမြှင်‌့ပြီးဆောင်ရွက် လာနိုင်ခဲ့ခြင်း တွေ့ရှိရပါကြောင်း၊ ၂၀၂၀-၂၁ ခုနှစ်တွင် ဓနုံးမြောင်ခွဲရုံကို တည်ဆောက်သွားမည် ဖြစ်သည့်အတွက်ကြောင့် ကျေးရွာအများအပြား လျှပ်စစ်မီး ပိုမိုရရှိလာဖို့လည်း ရှိပါကြောင်း၊ အဆိုပါနေရာတွင် တစ်ခုထူးခြားသည်က ၂၀၁၈-၁၉ ဘဏ္ဍာရေးနှစ် မီးမရနိုင်သည့် အင်မတန်ခက်ခဲသော မြစ်အနောက်ဘက်ခြမ်းက ကျေးရွာရှစ်ရွာ မီးရရှိအရေးကို ဆောင်ရွက်နိုင်ခဲ့ပါကြောင်း၊ ယခုလို ဆောင်ရွက်နိုင်ခဲ့ခြင်းကြောင့် တစ်ဆက်တစ်စပ် တည်းဖြစ်သည့် ကျေးရွာများ အင်းလတ်၊ ဇောင်ချမ်းတောင်၊ အင်းမ၊ အလယ်ရွာ၊ သာဝတ္တိစသည့် ကျေးရွာများသည်လည်း မီးရရှိရေးကို လိုချင်တောင့်တလာကြခြင်း ဖြစ်ပါကြောင်း၊ မေးခွန်းပါ ကျေးရွာငါးရွာ လျှပ်စစ်မီးရရှိရေးအတွက် လိုအပ်သည့် ဓာတ်အားလိုင်းသွယ်တန်းမှုများနှင့် ထရန်စဖော်မာတပ်ဆင်ခြင်း လုပ်ငန်းများကိုဆောင်ရွက်သွားနိုင်မည်၊ နောက်တစ်ခုက နောင်တစ်ချိန် ချိန်တွင် ခွဲရုံတစ်ခုပါ ထပ်ပြီးဆောင်ရွက် ပေးနိုင်မည်ဆိုလျှင် ဧရာဝတီမြစ် အနောက်ဘက်ခြမ်းက ကမ်းရိုးတန်းတစ်လျှောက် ကျေးရွာအများအပြား လျှပ်စစ်မီးရရှိလာမည် ဖြစ်ပါကြောင်း၊ အင်းလတ်၊ ဇောင်ချမ်းတောင်၊ အင်းမ၊ အလယ်ရွာ၊ သာဝတ္တိစသည့် ကျေးရွာများအတွက် ဖော်ပြပါကိစ္စများ ဆောင်ရွက်နိုင်မည်ဆိုပါက အိမ်ထောင်စု ၁၃၀၀ ကျော်ခန့်ကို အကျိုးပြုသွားနိုင်မည် ဖြစ်ပါကြောင်း၊ သို့ဖြစ်ပါ၍ ဆင်ပေါင်ဝဲမြို့နယ်အတွင်းရှိ အင်းလတ်၊ ဇောင်ချမ်းတောင်၊ အင်းမ၊ အလယ်ရွာ၊ သာဝတ္တိစသည့် ကျေးရွာများ လျှပ်စစ်ဓာတ်အားရရှိရေးအတွက် လိုအပ်သောဓာတ်အားလိုင်း သွယ်တန်းမှုများနှင့် ထရန်စဖော်မာတပ်ဆင်ပေးခြင်း လုပ်ငန်းများအား ဆောင်ရွက်ပေးသွားရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။

ဆင်ပေါင်ဝဲမြို့နယ် အင်းလတ်ကျေးရွာ လျှပ်စစ်ဓာတ်အားရရှိနိုင်ရေးအတွက် လက်ရှိ ၁၁ ကေဗွီ ဓာတ်အားလိုင်း ရောက်ရှိပြီးဖြစ်သော ထူးပေါက်ကျေးရွာမှတစ်ဆင့် 11 ကေဗွီဓာတ်အားလိုင်း နှစ်မိုင် နှင့် 11.4 ကေဗွီ ၁၀၀ ကေဗွီအေ ထရန်စဖော်မာတစ်လုံး တပ်ဆင်ခြင်းလုပ်ငန်း၊ ဇောင်ချမ်းတောင် ကျေးရွာလျှပ်စစ် ဓာတ်အားရရှိရန် အင်းလတ်ကျေးရွာမှတစ်ဆင့် နောက်ထပ် 11 ကေဗွီ ဓာတ်အားလိုင်း နှစ်မိုင်ခွဲနှင့် ၂၀၀ ကေဗွီအေ ထရန်စဖော်မာနှစ်လုံး တည်ဆောက်ခြင်းလုပ်ငန်းများကို ၂၀၁၉-၂၀ ဘဏ္ဍာရေးနှစ်၊ မကွေးတိုင်းဒေသကြီး အစိုးရ၏ဘတ်ဂျက်တွင် ထည့်သွင်းလျာထားကာ အကောင်အထည် ဖော်ဆောင်ရွက် ပေးသွားမည်ဖြစ်ပါကြောင်း၊ အင်းမ၊ အလယ်ရွာနှင့်သာဝတ္ထိ ကျေးရွာများကို ဆက်လက်ဓာတ်အားပေးနိုင်ရန် လက်ရှိ ၃၃ ကေဗွီ မင်းလှခွဲရုံမှ ဇောင်ချောင်းတောင် ကျေးရွာအထိကို ဆွဲသားထားသည့် ၁၁ ကေဗွီ ဓာတ်အားလိုင်းသည် စုစုပေါင်း ၃၂ အထိ ရှည်လျားသွားမည် ဖြစ်သည့်အတွက်ကြောင့် ဗို့အားအလွန်အမင်းကျခြင်းများ၊ လျှပ်စစ်ဓာတ်အားပျောက်ဆုံးမှု အထူးများပြားခြင်းများ ဖြစ်ပေါ်လာမည် ဖြစ်သည့်အပြင် နောက်ထပ် မီးသုံးရမည့်သူများလည်း အဆင်မပြေ၊ လက်ရှိမီးသုံးနေသူများလည်း အဆင်မပြေဖြစ်လာမည့် အတွက် ကြောင့် နည်းပညာအရဆောင်ရွက်ရန် သင့်လျော်မှုမရှိပါကြောင်း စိစစ်တွေ့ရှိရပါသည်။ သို့အတွက် လက်ရှိလျှပ်စစ်ဓာတ်အား ရရှိနေသည့် ကစပ (၁၃) ခွဲရုံမှ ဇောင်းချောင်းတောင် ရွာသို့ ၃၃ ကေဗွီဓာတ်အားလိုင်းအသစ် ၁၃ မိုင်နှင့် ဇောင်းချောင်းတောင်ကျေးရွာတွင် ၃၃/၁၁ ကေဗွီ 5 MVA ဓာတ်အားခွဲရုံအသစ် တည်ဆောက်ခြင်း လုပ်ငန်းများကို ၂၀၂၃-၂၄ ဘဏ္ဍာရေးနှစ် ပြည်ထောင်စုဘဏ္ဍာ ရန်ပုံငွေဖြင့် ဆောင်ရွက်ပေးသွားမည် ဖြစ်ပါကြောင်း၊ အဆိုပါ ၃၃ ကေဗွီ ဓာတ်အားခွဲရုံ ပြီးစီးသွား သည့်အချိန်တွင် အင်းမ၊ အလယ်ရွာ၊ သာဝတ္ထိကျေးရွာများကို ဓာတ်အားပေးရန် လိုအပ်သည့် ၁၁ ကေဗွီ ဓာတ်အားလိုင်းများနှင့် ထရန်စဖော်မာများ တပ်ဆင်ခြင်း လုပ်ငန်းများကို မကွေးတိုင်းဒေသကြီး အစိုးရ၏ ဘတ်ဂျက်ဖြင့်နှစ်စဉ်လျာထား ဆောင်ရွက် ပေးသွားမည် ဖြစ်ပါကြောင်း ရှင်းလင်းဖြေကြားပါသည်။

ဦးနေထက်ဝင်း (ဆင်ပေါင်ဝဲမဲဆန္ဒနယ်) က ဆက်စပ်မေးခွန်း မေးမြန်းပါသည်။

အင်းလတ်နှင့်ဇောင်ချမ်းတောင် ကျေးရွာသည် ၂၀၁၉-၂၀ ဘဏ္ဍာရေးနှစ်တွင် လျှပ်စစ်မီးရမည် ဆိုသည်ကို သိရသည့်အတွက် ဝမ်းသာပါကြောင်း၊ 11 KV လိုင်းကို မိုင်များစွာရှည်လျားပြီး ဆွဲရခြင်းကြောင့် ဗို့အားတန်ဖိုးလျော့ခြင်း၊ လျှပ်စစ်ဓာတ်အားပျောက်ဆုံးမှုများ ရှိမည်ဆိုသည့်ကိစ္စကို ထည့်သွင်းပြောကြား သွားခြင်းရှိပါကြောင်း၊ ထို့ကြောင့် မိမိတို့ကျန်သည့်အင်းမ၊ အလယ်ရွာ၊ သာဝတ္ထိသုံးရွာ မေးခွန်းထဲတွင် ကျန်ရှိပါကြောင်း၊ ၎င်းကျေးရွာများဆက်လက် မီးရရှိရေးအတွက် ၃၃ ခွဲရုံတစ်ရုံ လိုအပ်မည်ဆိုသည် ကိုလည်း သိရပါကြောင်း၊ ထို့ကြောင့် ၎င်း ၃၃ ခွဲရုံကို အဆိုပါ ကျေးရွာ သုံးရွာအပြင် မေးခွန်းတွင် တင်ပြသွားသည့် ကမ်းနားတစ်လျှောက်၊ မြစ်ကမ်းတစ်လျှောက်၊ မြစ်ရိုးတစ်လျှောက် ကျေးရွာများအားလုံး မီးရရှိရေးအတွက် မည်သည့် အချိန်တွင် ၃၃ ခွဲရုံကို စတင်ဆောင်ရွက် ပေးသွားမည်ကို တစ်ဆက် တစ်စပ် တည်း မေးမြန်းပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လွှတ်တော်ကိုယ်စားလှယ် မေးမြန်းသည့် ဇောင်ချမ်းတောင်ကျေးရွာ အုပ်စုနှင့်အင်းမ၊ အလယ်ရွာ၊ သာဝတ္ထိကျေးရွာများကို လျှပ်စစ်ဓာတ်အား ရရှိရေးလိုအပ်သည့်အတွက် ၃၃ ကေဗွီ ဓာတ်အားခွဲရုံ အသစ် တည်ဆောက်ရေး ကိစ္စကို မူလအဖြေတွင်တည်းက  တစ်ပါးတည်းဖြေကြားထားခဲ့ခြင်း ဖြစ်ပါကြောင်း၊ ကပစ (၁၃) ခွဲရုံမှ ဇောင်ချမ်းတောင်ရွာသို့ ၃၃ ကေဗွီ ဓာတ်အားလိုင်းအသစ် ၁၃ မိုင်နှင့်ဇောင်ချမ်းတောင် ကျေးရွာ ၃၃/၁၁ ကေဗွီ ၅ အမ်ဗွီအေ ဓာတ်အားခွဲရုံ အသစ်တို့ကို ၂၀၂၃-၂၄ ဘဏ္ဍာရေးနှစ်တွင် ပြည်ထောင်စုဘဏ္ဍာရန်ပုံငွေနှင့် ဆောင်ရွက်ပေးသွားမည် ဖြစ်သည်ကို ဖြေကြားထားခဲ့ပါကြောင်း၊ အဆိုပါ ၃၃ ကေဗွီဓာတ်အားခွဲရုံ ပြီးစီးသွားသည့်အခါ အဆိုပါခွဲရုံမှ တစ်ဆင့်အင်းမ၊ အလယ်ရွာ၊ သာဝတ္ထိနှင့် မြစ်ရိုးတစ်လျှောက်တွင်ရှိသည့် ကျေးရွာများ လျှပ်စစ်ဓာတ်အား ထပ်မံဆက်သွယ်နိုင်ရေးအတွက် လိုအပ် သည့် 11 KV လိုင်းနှင့် 11 KV ထရန် စဖော်မာများကို မကွေးတိုင်းဒေသကြီးအစိုးရ၏ ဘတ်ဂျက်နှင့် နှစ်စဉ် အဆင့်အလိုက်လျာထား ဆောင်ရွက်ပေးသွားမည် ဆိုသည်ကို ထပ်မံရှင်းလင်း ဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်

Source: https://www.pyithuhluttaw.gov.mm/question-3841