မက်မန်းမြို့နယ်ရှိ နမ့်နန်းချောင်းမှ ရေအားလျှပ်စစ် ထုတ်လုပ်နိုင်ရေးအတွက် ရေအားလျှပ်စစ်စက်ရုံ တည်ဆောက်ပေးရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

မက်မန်းမြို့နယ်ရှိ နမ့်နန်းချောင်းမှ ရေအားလျှပ်စစ် ထုတ်လုပ်နိုင်ရေးအတွက် ရေအားလျှပ်စစ်စက်ရုံ တည်ဆောက်ပေးရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

ဦးတင်အေး(မက်မန်း မဲဆန္ဒနယ်)

မက်မန်းမြို့နယ်အတွင်း လျှပ်စစ်ဓာတ်အား ဖြန့်ဖြူးရေးအနေဖြင့် မက်မန်းမြို့ပေါ်တွင် ကျေးရွာအုပ်စု ငါးခုက ကျေးရွာခုနှစ်ရွာတွင် ဒီဇယ်ဆီစက်နှင့် နေ့စဉ်ညနေ ၆ နာရီမှ ၁၀ နာရီအထိ ၄ နာရီ ကြာ လျှပ်စစ်ဓာတ်အား ဖြန့်ဖြူးပေးလျက်ရှိပြီး နယ်စပ်ဒေသဖွံ့ဖြိုး တိုးတက်ရေးဌာန၊ ကျေးလက်ဒေသ ဖွံ့ဖြိုးတိုးတက်ရေးဌာနတို့၏ ဒေသဖွံ့ဖြိုးတိုးတက်ရေး စီစဉ်ဆောင်ရွက်မှုနှင့် ဆိုလာများထောက်ပံ့ ပေးမှုနှင့် ကျေးရွာမီးလင်းရေးကို ဆောင်ရွက်လျက် ရှိပါကြောင်း၊ လက်ရှိဒီဇယ်သုံးလျှပ်စစ် အင်ဂျင်စက် အနေဖြင့်နေ့စဉ် မီးပေးနိုင်ရန်အတွက် ၁၃၈ မိုင်ဝေးသော ကျိုင်းတုံမြို့မှ လစဉ်ဒီဇယ်စက်သုံးဆီ သယ်ယူမှု ခက်ခဲခြင်း၊ တစ်လလျှင်ဒီဇယ်ဆီဂါလံ ၁၈၃၄ ဂါလံကုန်ကျသည့်အတွက် ရေရှည်တွင် နိုင်ငံတော်ဘဏ္ဍာငွေ နှစ်စဉ်ဆုံးရှုံးကုန်ကျလျက် ရှိသည်ကို တွေ့ရှိရပါကြောင်း၊ မက်မန်းခရိုင်၊ မက်မန်းမြို့နယ် အေးဂျန့်ကျေးရွာအုပ်စု မွန်တို့ကျေးရွာအနီး နမ့်နန်းချောင်းမှ ရေအားလျှပ်စစ် ထုတ်လုပ်နိုင်ရေးအတွက် ၂၅-၂-၂၀၁၈ ရက်နေ့တွင် ခရိုင်နှင့်မြို့နယ်ဌာနဆိုင်ရာ တာဝန်ရှိသူများ၊ ရေအားလျှပ်စစ် အကောင်အထည်ဖော်ရေး ဦးစီးဌာနမှတာဝန်ရှိသူများ၊ ဦးစီးအရာရှိမြို့ပြအဖွဲ့နှင့် လျှပ်စစ်ဓာတ်အား ဖြန့်ဖြူးရေးဌာနမှ လျှပ်စစ်ကျွမ်းကျင် ပညာရှင်များ၊ ဒေသခံကုမ္ပဏီမှ ကျွမ်းကျင်ပညာရှင်များနှင့် ကနဦး တိုင်းတာခြင်း လုပ်ငန်းကို ဆောင်ရွက်ခဲ့ပါကြောင်း၊

အဆိုပါ တိုင်းတာခြင်းမှရရှိသော အချက်အလက်များ ပေါ်မူတည်၍ 300 KW ထွက်ရှိနိုင်မည့် စက်ရုံတည်ဆောက်ခြင်း၊ ရေကာတာနှင့်ကွန်ကရစ် ရေသွယ်မြောင်း တည်ဆောက်ခြင်းအတွက် ပူးပေါင်းခွင့်နှင့် တွက်ချက်ခဲ့ရာ ခန့်မှန်ကုန်ကျငွေ ၈၅၀ ကျပ်သန်း ရေအားလျှပ်စစ် ထုတ်လုပ်မည့် စက်ရုံမှ မက်မန်းမြို့သို့ အရှည်လေးမိုင်ကို 11 KVA လိုင်းတည်ဆောက်ခြင်း ကျပ် ၁၀၀ သန်း မက်မန်းမြို့မှ အေးဂျန့်အထိ အရှည်ခြောက်မိုင်ကို 11 KVA လိုင်းတည်ဆောက်ခြင်း ၁၅၆ သန်း ကုန်ကျမည်ဖြစ်ပြီး နမ့်နန်းချောင်းရေအားလျှပ်စစ် စက်ရုံတည်ဆောက် နိုင်ရေးအတွက် ခရိုင်စီမံခန့်ခွဲမှု ကော်မတီ  မက်မန်းခရိုင်၏ ၁၅-၃-၂၀၁၈ ရက်စွဲပါစာမှတ် (၅/၂၂-၆၀ ၀၇၁) ဦး‌နှင့် ၂၀၁၈-၁၉ ဘဏ္ဍာရေးနှစ် စီမံကိန်းတွင် ကျေးလက်ဒေသ ဖွံ့ဖြိုးတိုးတက်ရေးဦးစီးဌာန ပြည်နယ် ရန်ပုံငွေ လျှပ်စစ်ဓာတ်အား ဖြန့်ဖြူးရေးလုပ်ငန်း ပြည်နယ်ရန်ပုံငွေနှင့် နယ်စပ်ဒေသဖွံ့ဖြိုး တိုးတက်ရေး ပြည်ထောင်စုရန်ပုံငွေဟူ၍ ခွဲခြားလျာထားကာ ပြည်နယ်ဝန်ကြီးချုပ် ရှမ်းပြည်နယ် အစိုးရအဖွဲ့ရုံးကို တင်ပြထားရှိခဲ့သော်လည်း လုပ်ငန်းဆောင်ရွက်ခွင့် မရရှိခဲ့ဘဲ ၂၀၁၉-၂၀ ဘဏ္ဍာရေးနှစ်တွင် ဆောင်ရွက်မည့် ရင်းနှီးမြှုပ်နှံမှုအဆိုပြု စာရင်းတွင်လည်း ဆောင်ရွက်ခွင့် ရရှိရေးအတွက် ထပ်မံထည်‌့သွင်း လျာထားလျက်ရှိပါကြောင်း၊

မက်မန်းမြို့နယ်သည် ခရိုင်ရုံးစိုက်ရာ မြို့ဖြစ်လာသည့်အတွက် နမ့်နန်းချောင်း ရေအားလျှပ်စစ် စက်ရုံမှ လျှပ်စစ်ဓာတ်အား ဖြန့်ဖြူးပေးနိုင်ပါက အစိုးရဌာနဆိုင်ရာရုံးများ အနေဖြင့် မီးရရှိမှ ဆောင်ရွက်နိုင်မည်‌့ ရုံးလုပ်ငန်းများကို ညပိုင်းတွင် ဆောင်ရွက်ရန်မလိုဘဲ ရုံးလုပ်ငန်း နှောင့်နှေး ကြန့်ကြာမှုများ အဆင်မပြေမှုများ လျော့နည်းသွားမည်ဖြစ်သကဲ့သို့ ဒေသတွင်းအသေးစား ကုန်ထုတ်လုပ်ငန်းများ ဆောင်ရွက်လာနိုင်မည်ဖြစ်ပြီး နှစ်စဉ်နိုင်ငံတော်မှ စက်သုံးဆီ ကုန်ကျစရိတ်များ သက်သာခြင်း၊ တိုင်းရင်းသားပြည်သူလူထု၏ လူမှုစီးပွားဘဝ၊ ပညာရေး၊ ကျန်းမာရေးကဏ္ဍများ ဖွံ့ဖြိုးတိုးတက်လာခြင်း စသည့်အချက်များကြောင့် မက်မန်းမြို့နယ်ရှိ နမ့်နန်းချောင်းမှ ရေအားလျှပ်စစ်ထုတ်လုပ် နိုင်ရေးအတွက် ရေအားလျှပ်စစ်စက်ရုံ တည်ဆောက်ပေးရန် အစီအစဉ်ရှိ/မရှိနှင့် အစီအစဉ်ရှိပါက မည်သည်‌့ဘဏ္ဍာရေးနှစ်တွင် ဆောင်ရွက်ပေးမည်ကို သိရှိလိုပြီး အစီအစဉ်မရှိပါကလည်း မည်သည်‌့အတွက်ကြောင့် မရှိသည်ကို သိရှိလိုပါကြောင်း မေးမြန်းပါသည်။

 မက်မန်းမြို့နယ်ရှိ နမ့်နန်းချောင်း၏ ရေအားအရင်းအမြစ်ကို အသုံးပြု၍ ရေအားလျှပ်စစ်ထုတ် လုပ်နိုင်ရေးကိစ္စနှင့် ပတ်သက်ပြီး ရှမ်းပြည်နယ်အစိုးရ၏ ညှိနှိုင်းမှုအရ နည်းပညာဆိုင်ရာ အကူအညီ ပေးရန်အလို့ငှာ လျှပ်စစ်နှင့်စွမ်းအင်ဝန်ကြီးဌာန၊ ရေအားလျှပ်စစ်အကောင်အထည် ဖော်ရေးဦးစီးဌာနနှင့် လျှပ်စစ်ဓာတ်အားဖြန့်ဖြူး‌ရေး လုပ်ငန်းတို့မှ ၂၀၁၈ ခုနှစ် ဖေဖော်ဝါရီလအတွင်း သက်ဆိုင်ရာဒေသသို့ စူးစမ်းတိုင်းတာရေးအဖွဲ့ကို စေလွှတ်ပြီး နမ့်နန်းချောင်း၏ ရေအားလျှပ်စစ် အရင်းအမြစ်ကို စူးစမ်းတိုင်းတာရေး လုပ်ငန်းများ သွားရောက်ဆောင်ရွက် ပေးခဲ့ပါကြောင်း၊

စူးစမ်းတိုင်းတာ လေ့လာမှုများအရ နမ့်နန်းချောင်းမှနေ၍ လျှပ်စစ်ဓာတ်အား ၄၀၀ ကီလိုဝပ်ခန့်အထိ ထုတ်ယူအသုံးပြုနိုင်မည်ဖြစ်ကြောင်း တွက်ချက်ရရှိခဲ့ပါသည်။ စူးစမ်းတိုင်းတာ တွေ့ရှိမှု အခြေအနေများကို အစီရင်ခံစာပြုစုပြီး ရှမ်းပြည်နယ်အစိုးရအဖွဲ့ထံသို့ ၂၀၁၈ ခုနှစ် ဧပြီလတွင် ပေးပို့ခဲ့ပြီးဖြစ်ပါကြောင်း၊ ၄၀၀ ကီလိုဝပ်အရွယ်အစား ဖြစ်သည်‌့အတွက်ကြောင့် အသေးစားရေအား လျှပ်စစ်အမျိုးအစား ဖြစ်ပါကြောင်း၊ အသေးစား သို့မဟုတ် အလတ်စား ရေအားလျှပ်စစ် ထုတ်လုပ်ဖြန့်ဖြူးရေးနှင့်ပတ်သက်၍ ဖွဲ့စည်းပုံအခြေခံဥပဒေ ၂၀၀၈ ခုနှစ်၏ ပုဒ်မ ၁၈၈ ဇယား ၂ အပိုဒ် ၄ အပိုဒ်ခွဲ (က) တွင် ပြည်ထောင်စုက စီမံခန့်ခွဲခွင့်ရှိသည့် အကြီးစားလျှပ်စစ်ဓာတ်အား ထုတ်လုပ်ဖြန့်ဖြူး ရေးမှအပ မဟာဓာတ်အားလိုင်းနှင့် ဆက်သွယ်ခြင်းမရှိသော တိုင်းဒေသကြီး သို့မဟုတ် ပြည်နယ်က စီမံခန့်ခွဲခွင့်ရှိသည်‌့ အလတ်စားနှင့်အသေးစား လျှပ်စစ်ဓာတ်အား ထုတ်လုပ်ဖြန့်ဖြူးရေးဟု ဖော်ပြထားသည့်အတွက် နိုင်ငံတော်ဓာတ်အား ကွန်ယက်စနစ်နှင့်လည်း မချိတ်ဆက်သည်က တစ်ကြောင်း၊ အသေးစားရေအား လျှပ်စစ်စီမံကိန်း ဖြစ်သည်ကတစ်ကြောင်းကြောင့် ရှမ်းပြည်နယ်အစိုးရက စီမံခန့်ခွဲခွင့်ရှိသည့် ရေအားလျှပ်စစ် လုပ်ငန်းတစ်ခုဖြစ်ပါကြောင်း၊

ထို့အပြင် လျှပ်စစ်ဥပဒေ ၂၀၁၄ ခုနှစ် ပုဒ်မ ၁၃ တွင်လည်း ပြည်ထောင်စုက စီမံခန့်ခွဲခွင့်ရှိသည်‌့ အကြီးစားလျှပ်စစ်ဓာတ်အား ထုတ်လုပ်ဖြန့်ဖြူးရေးမှအပ မဟာဓာတ်အားလိုင်းနှင့် ဆက်သွယ်ခြင်း မရှိသော တိုင်းဒေသကြီး သို့မဟုတ် ပြည်နယ်ကစီမံ ခန့်ခွဲခွင့်ရှိသည်‌့ အလတ်စားနှင့် အသေးစား ရေအားလျှပ်စစ်ဓာတ်အား ထုတ်လုပ်ခြင်းနှင့် ဖြန့်ဖြူးခြင်းလုပ်ငန်းဖြစ်ပါက ခွင့်ပြုမိန်ထုတ်ပေးနိုင်သူ တိုင်းဒေသကြီး သို့မဟုတ် ပြည်နယ်အစိုးရအဖွဲ့သည် ပြည်တွင်း/ပမှ ရင်းနှီးမြှုပ်နှံလုပ်ငန်း ဆောင်ရွက်လိုသည်‌့ မည်သည့်ပုဂ္ဂိုလ် အဖွဲ့အစည်းကိုမဆို တည်ဆဲဥပဒေများနှင့်အညီ ခွင့်ပြုမိန့် ထုတ်ပေးနိုင်သည်ဟု ဖော်ပြထားရှိပါကြောင်း၊ သို့ဖြစ်ပါ၍ လွှတ်တော်ကိုယ်စားလှယ် မေးမြန်းထားသော မက်မန်းမြို့နယ်ရှိ နမ့်နမ်းချောင်းမှရေအားလျှပ်စစ် ထုတ်လုပ်ရေးအတွက် ဖွဲ့စည်းပုံအခြေခံဥပဒေအရ လည်းကောင်း၊ လျှပ်စစ်ဥပဒေအရလည်းကောင်း၊ ရှမ်းပြည်နယ် အစိုးရ၏ စီမံခန့်ခွဲမှုဖြင့် ဆက်လက်ဆောင်ရွက် သင်‌့ပါကြောင်း လျှပ်စစ်နှင့်စွမ်းအင် ဝန်ကြီးဌာနက ပြည်နယ်အစိုးရထံ အကြောင်းပြန်ကြားခဲ့ခြင်း ဖြစ်ပါကြောင်း၊ ယခုမေးခွန်းနှင့်ပတ်သက်ပြီး ဝန်ကြီးဌာနက ရှမ်းပြည်နယ်အစိုးရထံ ညှိနှိုင်းမေးမြန်းခဲ့ရာ နမ့်နန်းချောင်းမှ ရေအားလျှပ်စစ် ထုတ်လုပ်နိုင်ရေးအတွက် ၂၀၁၉-၂၀ ဘဏ္ဍာရေးနှစ်တွင် နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးရေးဦးစီးဌာန ပြည်ထောင်စု ရန်ပုံငွေဖြင့်လည်းကောင်း၊ လျှပ်စစ်ဓာတ်အား ဖြန့်ဖြူးရေးလုပ်ငန်း ပြည်နယ်ရန်ပုံငွေဖြင့် လည်းကောင်း၊ ကျေးလက်ဒေသ ဖွံ့ဖြိုးတိုးတက်ရေးဦးစီးဌာန ပြည်နယ် ရန်ပုံငွေဖြင်‌့လည်းကောင်း လျာထားဆောင်ရွက် နိုင်ရေးအတွက် ဆက်လက်စီစဉ် ဆောင်ရွက်လျက် ရှိပါကြောင်း ရှင်းလင်းဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန၊    ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်

Source : https://www.pyithuhluttaw.gov.mm/question-3690