ချီဖွေငယ်ရေးအားလျှပ်စစ်စီမံကိန်းဆောင်ရွက်ခဲ့သည့် CPI ကုမ္ပဏီမှ ဒေသခံတောင်သူများ၏ ခြံမြေနစ်နာမှုနှင့် သီးနှံပင်များလျော်ကြေးပေးရန် ကျန်ရှိနေသူများကို ကုမ္ပဏီမှမည်သည့်အချိန်တွင် မည်ကဲ့သို့ဆောင်ရွက်ပေးမည်ကိုသိလိုခြင်းနှင့် စပ်လျဉ်းသည့်မေးခွန်း

ချီဖွေငယ်ရေးအားလျှပ်စစ်စီမံကိန်းဆောင်ရွက်ခဲ့သည့် CPI ကုမ္ပဏီမှ ဒေသခံတောင်သူများ၏ ခြံမြေနစ်နာမှုနှင့် သီးနှံပင်များလျော်ကြေးပေးရန် ကျန်ရှိနေသူများကို ကုမ္ပဏီမှမည်သည့်အချိန်တွင် မည်ကဲ့သို့ဆောင်ရွက်ပေးမည်ကိုသိလိုခြင်းနှင့် စပ်လျဉ်းသည့်မေးခွန်း

ဦးဇုံးတိန့်(ချီဖွေမဲဆန္ဒနယ်)

ကချင်ပြည်နယ်၊ ချီဖွေမြို့နယ်တွင် CPI ကုမ္ပဏီမှ ချီဖွေငယ်ရေအား လျှပ်စစ်စီမံကိန်းကို လွန်ခဲ့သည့်  ၂၀၀၈ ခုနှစ်တွင် စီမံကိန်းလုပ်ငန်းကို စတင်ဆောင်ရွက်ခဲ့ပြီး ၂၀၁၂ ခုနှစ် တွင် ၃၃ မဂ္ဂါဝပ်ရေအားလျှပ်စစ် ထုတ်လုပ်စက်သုံးလုံးကို တည်ဆောက်တပ်ဆင်ခဲ့ပြီး လျှပ်စစ်ဓာတ်အား ကို ထုတ်လုပ်ရောင်းချခဲ့ပြီး ယခုအချိန်တွင် ဝင်ငွေများရရှိနေသော လုပ်ငန်းတစ်ခု ဖြစ်ပါကြောင်း၊ CPI ကုမ္ပဏီမှ ချီဖွေငယ်ရေအားလျှပ်စစ်စီမံကိန်းလုပ်ငန်းကို စတင်ဆောင်ရွက်ရန် ဒေသခံ တောင်သူများ၏ လုပ်အားများဖြင့် ခုတ်ထွင်ရှင်းလင်းဖော်ထုတ် စိုက်ပျိုးထားသော ခြံမြေများနှင့် သီးနှံပင်များရှိသည့် နေရာတွင် ရေအားလျှပ်စစ်ထုတ်လုပ်ရေး စီမံကိန်းစက်ရုံနှင့် ရေကာတာကို တည်ဆောက်ရန် နယ်မြေအဖြစ် သတ်မှတ်သိမ်းယူခဲ့ပြီး စတင်တည်ဆောက်ခဲ့သော စီမံကိန်းလုပ်ငန်း ဖြစ်ပါကြောင်း၊ ယခု ချီဖွေငယ်ရေအား လျှပ်စစ်စီမံကိန်း လုပ်ငန်းစတင် ဆောင်ရွက်ခဲ့စဉ် တောင်သူများ၏ လယ်မြေနှင့်သီးနှံပင်များ နစ်နာကြေးအချို့ကို ဆောင်ရွက်ပေးခဲ့ သော်လည်း ခြံမြေနှင့်သီးနှံပင်များ နစ်နာမှုအချို့ကို ယနေ့ထိတိုင်အောင် စီစဉ်ဆောင်ရွက်ပေးခြင်း မရှိဘဲ ရပ်ဆိုင်းနေပါကြောင်း၊ ချီဖွေငယ်ရေအားလျှပ်စစ်စီ မံကိန်းလုပ်ငန်းများသည် ယခုအချိန်တွင် ဝင်ငွေများရရှိနေပြီး နှစ်ကြာလများလည်း ကြာခဲ့ပြီးသော်လည်း ယနေ့အချိန်ထိ ဒေသခံ တောင်သူများ၏ ခြံမြေနစ်နာမှုနှင့် သီးနှံပင်များအတွက် လျော်ကြေးဆောင်ရွက်ပေးရန် အချို့ကျန်ရှိနေသည်ကို တွေ့ရှိရပါကြောင်း၊ အဆိုပါတောင်သူများ၏ လုပ်အားနှင့် ခုတ်ထွင် ရှင်းလင်းခဲ့သော ခြံမြေနစ်နာမှုနှင့် စိုက်ပျိုးထားသော သီးနှံပင်များနစ်နာကြေးကို  သက်ဆိုင်ရာမြို့ စီမံခန့်ခွဲအုပ်ချုပ်ရေး အဖွဲ့မှလည်း အကြိမ်ကြိမ်တင်ပြ ခဲ့သော်လည်း ၎င်းဒေသခံတောင်သူများ အချို့၏ ခြံမြေနစ်နာမှုနှင့် သီးနှံပင်များ နစ်နာမှုကို ပေးလျော်ရန် ကျန်ရှိနေသည်ကို တွေ့ရှိရပါကြောင်း။

ထို့ကြောင့် ချီဖွေငယ်ရေအားလျှပ်စစ် စီမံကိန်းတည်ဆောက်ခဲ့သော CPI ကုမ္ပဏီမှ ဒေသခံ တောင်သူများအတွက် ပေးရန်ကျန်ရှိနေသော ခြံမြေနစ်နာမှုနှင့် သီးနှံပင်များနစ်နာကြေးကို မည်သည့်အချိန်တွင် မည်ကဲ့သို့စီစဉ် ဆောင်ရွက်ပေးမည်ကို သိလိုပါကြောင်း မေးမြန်းပါသည်။

 ချီဖွေငယ်ရေအားလျှပ်စစ် စီမံကိန်း ၉၉ မဂ္ဂါဝပ်ကို ၂၀၀၈ ခုနှစ်တွင် စတင်တည်ဆောက် ခဲ့ပါကြောင်း၊ စီမံကိန်းနှင့်မလွတ်ကင်းသော နှစ်ရှည်ပင်များ၊ လယ်မြေများနှင့် နေအိမ်များကို ဒေသဆိုင်ရာ အစိုးရအဖွဲ့အစည်းများ၊ ရေအားလျှပ်စစ်အကောင်အထည် ဖော်ရေးဦးစီးဌာနနှင့် ကုမ္ပဏီတို့ပူးပေါင်းပြီး စာရင်းများအား အသေးစိတ်ကောက်ယူ ပြုစုခဲ့ခြင်းဖြစ်ပါကြောင်း၊ အဆိုပါ ပြုစုခဲ့သည့် စာရင်းများအရ ပေးလျော်ရန်ရှိသည့် ကိစ္စရပ်များကို စတင်ပေးလျော်ခဲ့ခြင်း ဖြစ်ပါကြောင်း၊  လုပ်ငန်းခွင်နှင့် မလွတ်ကင်းသည့်အတွက် လျော်ကြေးပေးရန် ခုနစ်ဦးရှိပါကြောင်း၊  ကုမ္ပဏီမှ ၂၀၀၈ ခုနှစ် ဒေသပေါက် ဈေးနှုန်းများအတိုင်း နစ်နာကြေးပေးချေခြင်း ဆိုင်ရာ သဘောတူ စာချုပ်ချုပ်ဆို၍ ချီဖွေမြို့နယ် အေးချမ်းသာယာရေးနှင့် ဖွံ့ဖြိုးရေးကောင်စီရုံး၌ သီးနှံပင်၊ နေအိမ်တဲနှင့် လယ်မြေများအတွက် ၁၀-၂-၂၀၁၀၊ ၈-၇-၂၀၁၁ ၊ ၁၀-၁-၂၀၀၉ ရက်နေ့နှင့် ၄-၃-၂၀၁၁ ရက်နေ့တို့တွင် ဒေသခံတောင်သူ ခုနစ်ဦးတို့ကို စုစုပေါင်းလျော်ကြေး ငွေကျပ်သန်း ၁၄၅၂၀၃၉၀ ကို  အပြီး ပေးလျော်ခဲ့ပါကြောင်း၊  စီမံကိန်းအကောင်အထည်ဖော် ဆောင်ရွက်ရာတွင် စက်ယန္တရားများ၊ စက်မှုလျှပ်စစ်ပစ္စည်းများနှင့် တည်ဆောက်ရေး ပစ္စည်းများ သယ်ယူရန်အတွက် စီမံကိန်းတည်နေရာနှင့် မသက်ဆိုင်သည့် မူလချီဖွေ-ပန်ဝါ လမ်းဟောင်းကို အခြေခံပြီး‌ ချီဖွေ-ပန်ဝါ လမ်းအသစ်အဖြစ် အဆင့်မြှင့်တင်ဖောက်လုပ်ခြင်း လုပ်ငန်းအဖြစ် ဆောင်ရွက်ပေးခဲ့ရပါကြောင်း၊ အဆိုပါလုပ်ငန်း ဆောင်ရွက်ရာတွင်  မလွတ်ကင်းသည့် စားပင်၊ သီးပင်၊ နှစ်ရှည်ပင်၊ အိုးအိမ်နှင့် လယ်မြေများကို လျော်ကြေးပေးရန် ထပ်မံအကြောင်း ပေါ်ပေါက်လာခဲ့ပါကြောင်း၊ အဆိုပါ ကိစ္စရပ်များအတွက် ၎င်းကာလက သက်ဆိုင်ရာဒေသအစိုးရ အဖွဲ့အစည်းများ၊ ရေအားလျှပ်စစ် အကောင်အထည်ဖော်ရေး ဦးစီးဌာနနှင့် ကုမ္ပဏီတို့ပူးပေါင်းပြီး စာရင်းများကို အသေးစိတ် ဆက်လက်ကောက်ယူခဲ့ပါကြောင်း၊ ကုမ္ပဏီသည် အထူးဒေသ (၁) အဖွဲ့အစည်း၏ အကြီးအကဲများနှင့်ညှိနှိုင်းပြီး ဒေသခံတောင်သူများထံ ကြိုတင်၍ နစ်နာကြေး ပေးချေမှုများကို ၎င်းတို့၏ အစီအစဉ်ဖြင်‌့ ဆောင်ရွက်ခဲ့ရာ စုစုပေါင်းအားဖြင့် တရုတ်ယွမ် ၁၅၉၇၆၁၀၈.၈ နှင့်ညီမျှသော မြန်မာငွေ ကျပ်သန်းပေါင်း ၁၉၉၇.၁၃၆ ကိုပေးချေခဲ့ပြီး ဖြစ်ပါကြောင်း။

ချီဖွေ-ပန်ဝါလမ်း ဖောက်လုပ်ခြင်းအတွက် လျော်ကြေးပေးလျော်နိုင်ရန် ၂၀၀၈ ခုနှစ် တွင် စာရင်း ကောက်ယူခဲ့ပြီးနောက် ကတိကဝတ်ပြုထားသော စာရင်းများအား တိုက်ဆိုင်စစ်ဆေး နိုင်ရေးအတွက် သက်ဆိုင်ရာဌာနများနှင့် ကုမ္ပဏီများပူးပေါင်းပြီး ၂၀၁၀ ခုနှစ် သြဂုတ်လတွင် ထပ်မံကွင်းဆင်း၍ စာရင်းများကိုကောက်ယူ ခဲ့ပါကြောင်း၊  ယခုအခါ ပေးလျော်ရန် ဆက်လက်ကျန်ရှိ နေသည်ဆိုသည့် အဓိကအချက်များမှာ မြေပြင်အတိုင်းအတာတွင် တောင်းဆိုချက် စာရင်းများနှင့် အကျယ်အဝန်းများ၊ ဧကများကွဲလွဲနေခြင်း၊ အပင်အရေအတွက်များ စာရင်းကောက်ယူခဲ့သည်နှင့် လျော်ကြေးတောင်းဆိုသည့် တောင်သူများ၏ တောင်းဆိုလာသည့် အပင်အရေအတွက်များ ကွဲလွဲနေခြင်း၊ သက်ဆိုင်သူမဟုတ်သည့် ပုဂ္ဂိုလ်များမှတောင်းဆိုနေခြင်း စသည့် စာရင်းများကွဲလွဲနေသည့်အတွက် လျော်ကြေးများပေးရန် ကျန်ရှိနေခြင်းဖြစ်ပါကြောင်း။

အခြားအကြောင်းတစ်ခုမှ အဆိုပါနယ်မြေအတွင်း ယခင်ကလျော်ကြေးငွေများကို ပေးလျော် နေခြင်း၊ နယ်မြေ၏တည်ငြိမ် လုံခြုံမှုအခြေအနေ ပျက်ပြားသည့် ကာလတစ်ခုပေါ်ပေါက် လာသည့်အတွက် ကုမ္ပဏီက လုပ်ငန်းခွင်ဧရိယာမှ ဆုတ်ခွာခဲ့သည့်အတွက် လျော်ကြေးပေးချေမှုနှင့် စာရင်းစစ်ဆေးညှိနှိုင်းမှု လုပ်ငန်းများရပ်ဆိုင်း ကြန့်ကြာမှုများ ထပ်မံပေါ်ပေါက်ခဲ့ခြင်း ဖြစ်ပါကြောင်း၊ အဆိုပါစာရင်းများကို တိုက်ဆိုင်စစ်ဆေးရာတွင် ထပ်တိုး တောင်းခံလာမှုများနှင့် ကွဲလွဲမှုဖြစ်နေသည့် အခြေအနေများကြောင့် လက်ရှိအခြေအနေတွင် လျော်ကြေးအပြီးအပြတ် ပေးချေပြီး နောက်ထပ်ငါးဦး၊ လျော်ကြေးပေးချေ ပြီးသော်လည်း ထပ်တိုးတောင်းခံနေသည့် တောင်သူ ၁၃ ဦး၊ လျော်ကြေးပေးချေရန် ကျန်ရှိနေသည့် တောင်သူ ၃၇ ဦးနှင့် ကွင်းဆင်းစစ်ဆေးရာတွင် စာရင်းမပါရှိဘဲ တောင်းခံနေသူတောင်သူ နှစ်ဦးရှိသည်ဟု စာရင်းပေါ်ပေါက် နေပါကြောင်း၊ ထို့ကြောင့် အဆိုပါ ကိစ္စရပ်များကို ဆက်လက်ဖြေရှင်း နိုင်ရေးအတွက် ကုမ္ပဏီနှင့်မူလသဘောတူ စာချုပ်ချုပ်ထားသော သူများကို ပေးလျော်ရန် ကျန်သည့်ငွေများအား ကုမ္ပဏီမှ ဆက်လက်ပေးလျော် တာဝန်ယူမည် ဖြစ်ပါကြောင်း ဝန်ကြီးဌာနထံ တင်ပြခဲ့ပါကြောင်း၊ သို့သော် မူလသဘောတူထားသည့် လျော်ကြေးပမာဏထက် ယခုအခါအဆိုပါပုဂ္ဂိုလ်များ၏ သဘောတူစာချုပ် ချုပ်ထားသည်‌့တိုင် လျော်ကြေးငွေများကို တိုးမြှင့်တောင်းခံနေခြင်းကြောင့် ကိစ္စရပ်များ မပြီးပြတ်ခြင်းများ ဖြစ်ပေါ်နေသည့်အတွက် ကွဲလွဲနေသော စာရင်းများကိစ္စရပ်ကို ပြည်နယ်အစိုးရနှင့် သက်ဆိုင်ရာဌာနများ၊ ဒေသခံ လွှတ်တော်ကိုယ်စားလှယ်များနှင့် ကုမ္ပဏီများပူးပေါင်းပြီး စာရင်းပြန်လည် ည်ှိနှိုင်းစစ်ဆေး သဘောတူညီချက်များ ရရှိပြီးနောက် ပေးလျော်ရန် တာဝန်ရှိသည်များကို ဆက်လက်ပေးလျော်‌ ဆောင်ရွက်သွားမည် ဖြစ်ပါကြောင်း ပြန်လည်ဖြေကြားခဲ့ပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး၊ဒေါက်တာထွန်းနိုင်

လျှပ်စစ်နှင့်စွမ်းအင်

Source: https://www.pyithuhluttaw.gov.mm/question-3694