ကိုယ်ထူကိုယ်ထမီးလင်းရေးဖြင့် လျှပ်စစ်ဓာတ်အားရရှိထားသည့်ကျေးရွာများတွင် လျှပ်စစ်ဓာတ်အား ရရှိရန်အတွက် သတ်မှတ်ထားသော ကြီးမြင့်သည့်နှုန်းကို မတတ်နိုင်သူများ၊ အများနည်းတူ လျှပ်စစ်မီးသုံးစွဲလို သူများအတွက် လျှပ်စစ်ဓာတ်အားရရှိရေးကို ဆောင်ရွက်ပေးရန်အစီအစဉ်ရှိ/မရှိနှင့် စပ်လျဉ်းသည့်မေးခွန်း

ဒေါ်ချိုချို(အုတ်တွင်းမဲဆန္ဒနယ်)

ကိုယ်ထူကိုယ်ထမီးလင်းရေးဖြင့် လျှပ်စစ်ဓာတ်အားရရှိထားသည့်ကျေးရွာများတွင် လျှပ်စစ်ဓာတ်အား ရရှိရန်အတွက် သတ်မှတ်ထားသော ကြီးမြင့်သည့်နှုန်းကို မတတ်နိုင်သူများ၊ အများနည်းတူ လျှပ်စစ်မီးသုံးစွဲလို သူများအတွက် လျှပ်စစ်ဓာတ်အားရရှိရေးကို ဆောင်ရွက်ပေးရန်အစီအစဉ်ရှိ/မရှိနှင့် စပ်လျဉ်းသည့်မေးခွန်း

ကိုယ်ထူကိုယ်ထ မီးလင်းရေးဖြင့် လျပ်စစ်ဓာတ်အားရရှိသည့် ကျေးရွာများတွင် မူလမီးလင်းရေး ဆောင်ရွက်စဉ်က သတ်မှတ်ထားသည့် ထည့်ဝင်ငွေသည် အနည်းဆုံး ၈၀၀၀၀၀ မှ အများဆုံး ၁၅၀၀၀၀၀ အထိရှိပါကြောင်း၊ ငွေကြေးမတတ်နိုင်သည့် ဒေသခံပြည်သူများအနေဖြင့် လျှပ်စစ်ဓာတ်အားရရှိချိန်၌ သင့်တင့်လျောက်ပတ်သည့် ငွေကြေးထည့်ဝင်ပြီး လျှပ်စစ်ဓာတ်အားကို ရရှိလိုကြပါကြောင်း၊ တချို့ကျေးရွာများ၏ မီးလင်းရေးကော်မတီများသည် နဂိုသတ်မှတ်ထည့်ဝင်ထား ငွေကြေးကိုသာလက်ခံနိုင်မည်ဖြစ်ပြီး တချို့ ကော်မတီအများစုက နောက်ကျမှထည့်ဝင်သည့်အတွက် သတ်မှတ်ထားသော ငွေကြေးအပြင် ဒဏ်ကြေးကိုပါ ထည့်ဝင်ရမည်ဆိုသောကြောင့် ငွေကြေးမတတ်နိုင်သူများအနေဖြင့် အခက်ကြုံရပြီး အများနည်းတူ လျှပ်စစ်ဓာတ်အားသုံးစွဲခွင့်မရ ဖြစ်နေကြရပါကြောင်း၊ ကိုယ်ထူကိုယ်ထမီးလင်းရေးဆောင်ရွက်မှုကြောင့် ၁၁ ကေဗွီကြိုးများ၊ ၄၀၀ ဗို့အားလိုင်းများ ထရန်စဖော်မာအိုးများအတွက်လည်း ငွေထပ်မံကုန်ကျစရာ မလိုအပ်သည့်အတွက် နောက်မှ ငွေကြေးထည့်ဝင်သူများအနေဖြင့် သက်သာသည့် ငွေကြေးထုတ်ပေးနိုင်ပါက အဆင်ပြေ မည်ဖြစ်သော်လည်း မီးလင်းရေးကော်မတီတချို့၏ စီမံခန့်ခွဲမှုလိုအပ်ချက်များကြောင့် ယခုကဲ့သို့ ပြဿနာများ ကြုံတွေ့နေရခြင်းဖြစ်ပါကြောင်း၊ နောက်ကျမှထည့်ဝင်ခြင်းသည်လည်း တမင်သက်သက် လုပ်ဆောင်ခြင်း မဟုတ်ဘဲ အမှန်တကယ်ကို မူလကသတ်မှတ်ထားသည့် နှုန်းထားကိုမတတ်နိုင်ခြင်း ကြောင့် ဖြစ်ပါကြောင်း၊

နိုင်ငံတော်မှတာဝန်ယူဆောင်ရွက်နေသည့် NEP အမျိုးသား လျှပ်စစ်ရရှိရေးစီမံကိန်းတွင် ပါဝင်သော ကျေးရွာများအနက် မူလသတ်မှတ်ထားသည့် စာရင်းတွင်ပါရှိသော်လည်း  ကိုယ်ထူကိုယ်ထမီးလင်းရေး ဆောင်ရွက်ခဲ့ကြသည့်ရွာများကို ချန်လှပ်ခံရပြီး ကျန်ရွာများအတွက်သာ ဆောင်ရွက်ပေးနေပါကြောင်း၊ ကိုယ်ထူကိုယ်ထ မီးလင်းရေး ဆောင်ရွက်သည့် ရွာများတွင် အိမ်ရှင်ထက်ဝက်ကျော်ခန့်သည် သတ်မှတ်ထားသည့် ငွေကြေးကို အမှန်တကယ်မတတ်နိုင်ကြောင့် မီးမလင်းလဲ ဖြစ်နေပါကြောင်း၊ ထို့ကြောင့် နိုင်ငံတော်မှလည်း ထောက်ပံ့ချက် တစ်စုံတစ်ရာမရရှိသည့် ကိုယ်ထူကိုယ်ထမီးလင်းရေးဖြင့် ဆောင်ရွက်ထားပြီးသည့် ကျေးရွာများရှိ အများနည်းတူ လျှပ်စစ်ဓာတ်အားသုံးစွဲခွင့်မရှိသူများမှာ လွန်စွာနစ်နာနေကြရပါကြောင်း၊

အဆိုပါလျှပ်စစ်ဓာတ်အားမရရှိသူများအနေဖြင့် အများနည်းတူ လျပ်စစ်ဓာတ်အားရရှိရေး အတွက် ငွေကြေး တစ်စုံတစ်ရာမပေးရဘဲ အလကားရမည်ဟု မှတ်ယူထားတာမရှိပါကြောင်းနှင့် ၎င်းတို့ အနေဖြင့် တတ်နိုင်သည့် သင့်တင့်သော ငွေကြေးကို ပေးဆောင်လိုကြသော်လည်း မီးလင်းရေး ကော်မတီများ၏  ငြင်းဆိုမှုကြောင့်သာ လျှပ်စစ်မီးမရခဲ့ခြင်းဖြစ်ပါကြောင်း၊ မီးလင်းရေးကော်မတီ အတွက် ချမှတ်ထားသည့် စည်းကမ်းချက်အချို့သည် လည်း  အမှန်တကယ်မီးလင်းလိုသူများအတွက် အခက်အခဲဖြစ်စေသည်ကို တွေ့ရှိရပါကြောင်း၊

ထို့ကြောင့် ကိုယ်ထူကိုယ်ထမီးလင်းရေးအဖြစ် ဆောင်ရွက်ပြီးသောကျေးရွာများတွင်ရှိသည့် သတ်မှတ် ထားသောငွေကြေးမတတ်နိုင်သူ အများနည်းတူလျှပ်စစ်ဓာတ်အားသုံးစွဲခွင့်မရရှိသူ ပြည်သူများအတွက် လျှပ်စစ်မီးကို အများနည်းတူပါဝင်သုံးစွဲခွင့်ရရှိနိုင်ရန် သက်ဆိုင်ရာဝန်ကြီးဌာနမှ မည်သို့ကူညီ ဆောင်ရွက်ပေး နိုင်မည်ကို သိရှိလိုပါကြောင်း မေးမြန်းပါသည်။

လျှပ်စစ်နှင့်စွမ်းအင်ဝန်ကြီးဌာနအနေဖြင့် နှစ်စဉ် ပြည်ထောင်စုလွှတ်တော်က အတည်ပြုခွင့်ပြုခဲ့ပြဋ္ဌာန်း ပေးခဲ့သည့် ဘဏ္ဍာငွေပေါ်မူတည်ပြီး မြန်မာတစ်နိုင်ငံလုံး လျှပ်စစ်ဓာတ်အားရရှိရေးအတွက် လျှပ်စစ်ဓာတ်အား ထုတ်လုပ်မှုအပိုင်း၊ ပို့လွှတ်မှုအပိုင်း၊ ဖြန့်ဖြူးမှုအပိုင်း၊ ကွပ်ကဲမှုအပိုင်းအားလုံးကို ဟန်ချက်ညီအောင် အတတ်နိုင်ဆုံးကြိုးပမ်းဆောင်ရွက် လျက်ရှိပါကြောင်း၊

တိုင်းဒေသကြီးနှင့် ပြည်နယ်များသည် ဓာတ်အားစနစ်ကို တိုးတက်ပြီးရောက်ရှိလာစေရန်နှင့် ဓာတ်အား စနစ် ရောက်ရှိပြီးသော တိုင်းဒေသကြီးနှင့် ပြည်နယ်များတွင်လည်း ကျေးလက်ဒေသများအထိကို ဓာတ်အားဖြန့်ဖြူးရေးလိုင်းများ ဆက်လက်ရောက်ရှိပြီး ဓာတ်အားဖြန့်ဖြူးနိုင်ရန် ဆောင်ရွက်ရပါ ကြောင်း၊ ဓာတ်အားထုတ်လုပ်မှုအပိုင်းတွင်  ဓာတ်အားပေးစက်ရုံများတည်ဆောက်ခြင်း၊ ပုဂ္ဂလိက ဓာတ်အားပေးစက်ရုံများထံက ဓာတ်အားဝယ်ယူရခြင်း၊ ပို့လွှတ်မှုအပိုင်းတွင် ဓာတ်အားစနစ်ကို ပိုမိုတည်ငြိမ်ရန်နှင့် ဓာတ်အားပျောက်ဆုံးမှု လျော့ချနိုင်ရန် ၅၀၀ ကေဗွီဗို့အားအဆင့်ထိ တိုးမြှင့်ပြီး ၂၃၀ ကေဗွီ၊ ၁၃၂ ကေဗွီ ဓာတ်အားလိုင်းများနှင့် ခွဲရုံများဖြန့်ဖြူးမှုအပိုင်းတွင်လည်း ၆၆ ကေဗွီ၊ ၃၃ ကေဗွီ၊ ၁၁ ကေဗွီဓာတ်အားလိုင်းနှင့် ဓာတ်အားခွဲရုံများကို နိုင်ငံတော်ဘဏ္ဍာငွေအပြင် ချေးငွေများ အထောက်အပံ့ များနှင့် ရယူဆောင်ရွက်နေခြင်းဖြစ်ပါကြောင်း၊ မိမိတို့နိုင်ငံတွင် ၂၀၁၉ ခုနှစ် ဖေဖော်ဝါရီလအထိ အိမ်ထောင်စုပေါင်း ၄၅ ရာခိုင်နှုန်းထိ သာ လျှပ်စစ်ဓာတ်အားရရှိသေးပါကြောင်း၊ ကျေးရွာပေါင်း ၆၃၂၇၇ ရွာအနက် ၁၄၁၄၉ ရွာ ရွာအားလုံး၏ ၂၂.၄ ရာခိုင်နှုန်းသာ လျှပ်စစ် ဓာတ်အားရရှိ သေးခြင်းဖြစ်ပါကြောင်း၊

ထို့ကြောင့် ဝန်ကြီးဌာနအနေဖြင့် ကျန်ရှိကျေးရွာများကို လျှပ်စစ်ဓာတ်အားရရှိနိုင်မှု၊ ကမ္ဘာ့ဘဏ် ချေးငွေနှင့် ဆောင်ရွက်သည့် အမျိုးသား လျှပ်စစ်ဓာတ်အားရရှိရေးစီမံကိန်းတွင် ပထမအဆင့်အနေဖြင့် ၁၁ ကေဗွီလိုင်း ကနေ ၂ မိုင်အတွင်း တည်ရှိသောကျေးရွာများကို လျှပ်စစ်ဓာတ်အားရရှိရေး ဒုတိယ အဆင့်အနေဖြင့် ၁၁ ကေဗွီလိုင်းမှ ၅ မိုင်အတွင်းရှိ ကျေးရွာများကို လျှပ်စစ်ဓာတ်အားရရှိရေး တတိယ အဆင့်အနေဖြင့် ၁၀ မိုင်အတွင်းရှိ ကျေးရွာများ လျှပ်စစ်ဓာတ်အားရရှိရေး၊ စတုတ္ထအဆင့်အနေဖြင့် ၁၀ မိုင်အထက်ရှိကျေးရွာများ လျှပ်စစ်ဓာတ်အားရရှိရေးကို အဆင့်အလိုက် စီမံချက်ချပြီး ဆောင်ရွက် နေတာဖြစ်ပါကြောင်း၊

လက်ရှိ ကမ္ဘာ့ဘဏ်က ချေးငွေရယူထားသည့် အမေရိကန်ဒေါ်လာ သန်း ၃၁ဝဖြင့် ဆောင်ရွက်နေသော အခြေအနေသည် ပထမအဆင့် ၂ မိုင်အတွင်း ရှိရွာပေါင်း ၅၀၈၀ နှင့် ဒုတိယအဆင့် ၅ မိုင်အတွင်းရှိ ကျေးရွာပေါင်း ၇၀၀၀ ကျော်ရှိသည့်အနက်မှ ကျေးရွာပေါင်း ၄၀၀၀ ခန့် အထိသာ လျှပ်စစ် ဓာတ်အားရရှိနိုင်ရန် စီစဉ်ဆောင်ရွက်ပေးနိုင်ဖြစ်ပါကြောင်း၊ ထို့ကြောင့် ဒုတိယ အဆင့်တွင် ကျန်ရှိမည့် ကျေးရွာများအပြင် တတိယအဆင့်၊ စတုတ္ထအဆင့်များအတွက်လည်း ဘဏ္ဍာရန်ပုံငွေများထပ်မံများစွာ လိုအပ်နေမည်ဖြစ်ပါကြောင်း၊ ကျေးရွာအားလုံး ဓာတ်အားစနစ်မှ လျပ်စစ်ဓာတ်အားပေးနိုင်ရန် နှစ်အတော်ကြာအချိန်ယူ ဆောင်ရွက်ရန် လိုအပ်နေသည့်အတွက်ကြောင့် ထိုအချိန်ကို မစောင့်နိုင်ဘဲ ကိုယ့်အားကိုယ်ကိုးကျေးရွာ မီးလင်းရေး ခွင့်ပြုရန် လျောက်ထားခြင်းများကို ခွင့်ပြုပေးခဲ့ခြင်း ဖြစ်ပါကြောင်း၊ လာတာတွေကို ခွင့်ပြုပေးခဲ့ခြင်းဖြစ်ပါကြောင်း၊

ကိုယ့်အားကိုယ်ကိုးကျေးရွာမီးလင်းရေးအတွက် လျှောက်ထားလာရာတွင် အထွေထွေ အုပ်ချုပ်ရေး ဦးစီးဌာန၏ အတည်ပြုမှုဖြင့် ကျေးရွာမီးလင်းရေးကော်မတီများကိုဖွဲ့စည်းပြီး ကျေးရွာအတွင်းက အများသဘောတူညီချက်နှင့် လက်မှတ်တွေရေးထိုးပြီး သတ်မှတ်ငွေကြေးကို ၎င်းတို့၏ ဆွေးနွေး တိုင်ပင်မှုကနေရရှိသည့် ရလဒ်ပေါ်ကတစ်ဆင့် စုစည်းကောက်ခံဆောင်ရွက်ကြခြင်း ဖြစ်ပါကြောင်း၊ ဝန်ကြီးဌာနအနေနဲ့ မည်မျ ကောက်ခံရန်ဆိုသည့် စည်းကမ်းကို သတ်မှတ်ပေးခဲ့ခြင်း မဟုတ်ပါကြောင်း၊

ယင်းသို့ ဆောင်ရွက်ရာတွင် ကျေးရွာသားအချို့က သတ်မှတ်နှုန်းထားကို ထည့်ဝင်ရန် မတတ်နိုင်သည့် အခြေအနေကြောင့်လည်း မထည့်ဝင်ခဲ့ခြင်းများရှိပါကြောင်း၊ ကျေးရွာသားအချို့သည် မီးလင်းရေး ကော်မတီ ဦးဆောင်ပုဂ္ဂိုလ်များနှင့် ပုဂ္ဂိုလ်ရေးအရ၊ လူမှုရေးအရ အကြောင်းကြောင်းကြောင့် အဆင်မပြေမှုခြင်းများ ရှိသည့်အတွက် ထည့်ဝင်ခြင်း မပြုခဲ့သည်များလည်း ရှိပါကြောင်း၊ တချို့က အများသဘောတူ သတ်မှတ်ကြေးကို ထည့်ဝင်လိုမှုမရှိခြင်းကြောင့် မထည့်ဝင်ခဲ့သည်များရှိပြီး အဆိုပါ ကျေးရွာများမှ လျှပ်စစ်ဓာတ်အားရရှိချိန်တွင် တချို့က အိမ်ထောင်စုများက လျှပ်စစ်ဓာတ်အား ရရှိပြီး တချို့သောအိမ်ထောင်စုများက လျှပ်စစ်ဓာတ်အားမရရှိဘဲ ကျန်ရှိနေခြင်းဖြစ်ပါကြောင်း၊

အမျိုးသားလျပ်စစ်ဓာတ်အားရရှိရေးစီမံကိန်းတွင် မပါဝင်ဘဲ လက်ရှိကိုယ်ထူကိုယ်ထမီးလင်းရေးနှင့် လျှပ်စစ်ဓာတ်အားရရှိပြီးသည့် ကျေးရွာများ လျှပ်စစ်ဓာတ်အားရရှိရန် သတ်မှတ်နှုန်းကို မထည့်ဝင်၍ အများနည်းတူ လျှပ်စစ်ဓာတ်အားသုံးစွဲနိုင်ရေး ကျန်ရှိနေသည့်အခြေအနေများကို ကျေးရွာသူကျေးရွာ သားအချင်းချင်း ဆွေးနွေးညှိနှိုင်းမှုမရှိဘဲ ပြည်ထောင်စုဝန်ကြီးဌာနက အခြားနည်းလမ်းဖြင့် ဆောင်ရွက် ပေးခဲ့မည်ဆိုပါက မူလက ငွေကြေးထည့်ဝင်ခဲ့ပြီးသူများအနေဖြင့် မကျေနပ်မှုကို ပြန်လည်ပေါ်ပေါက် လာပြီး ထည့်ဝင်သူများနှင့် မထည့်ဝင်သူများအကြား ထပ်မံရှုပ်ထွေးမှုများသာ ပေါ်ပေါက်လာမည် ဖြစ်ပါကြောင်း၊ အထက်ပါကဲ့သို့ အခြေအနေများ ပေါ်ပေါက်လာနိုင်မည်ဖြစ်သည့်အတွက် အဆိုပါ ကျေးရွာများတွင် ဖြစ်ပေါ်နေသည့် ကိစ္စရပ်များကို  မြို့နယ်/ကျေးရွာအုပ်ချုပ်ရေးအဖွဲ့များ၊ မြို့နယ် အုပ်ချုပ်ရေးအဖွဲ့များ၊ ကျေးရွာမီးလင်းရေးကော်မတီများ၊ မီးလင်းရန်ကျန်ရှိနေသည့် အိမ်ထောင်စုများ၊ မီးလင်းပြီးရန်ပုံငွေထည့်ဝင်ထားခဲ့သည့် ပြည်သူများ၊ လှတ်တော်ကိုယ်စားလှယ်များ အားလုံးဆွေးနွေး ညှိနှိုင်းဖြေရှင်းသွားရန် လိုအပ်ပါကြောင်း ပြန်လည်ဖြေကြားပါသည်။

ဒေါ်ချိုချို(အုတ်တွင်းမဲဆန္ဒနယ်)က ဆက်စပ်မေးခွန်းမေးမြန်းပါသည်။

ကိုယ်ထူကိုယ်ထမီးလင်းရေးကို ဆောင်ရွက်သည့် ကျေးရွာများသည် ဒုတိယဝန်ကြီးဖြေကြား ထားချက်တွင် ပါဝင်သည့်အတိုင်း မီးလင်းရေးကိုမစောင့်နိုင်၍ ကိုယ်ထူကိုယ်ထဆောင်ရွက်သည်မှာ မှန်သော်လည်း ယင်းသို့ ကိုယ်ထူကိုယ်ထဆောင်ရွက်သည့် ကျေးရွာများတွင် NEP စီမံကိန်းတွင် ပါဝင်သည့် ကျေးရွာများလည်း ပါဝင်ပါကြောင်း၊ ယခု NEP စီမံကိန်းကို အကောင်အထည်ဖော် ဆောင်ရာတွင် ကိုယ်ထူကိုယ်ထ ဆောက်လုပ် ခဲ့သည့် ကျေးရွာများ ပါဝင်ခြင်း မရှိတော့ပါကြောင်း၊ ထို့ကြောင့် ကိုယ်ထူကိုယ်ထမီးလင်းသည့် ကျေးရွာများ၏ တစ်ရွာလုံး၏ ထက်ဝက်ကျော် ငွေကြေး အင်အားမတတ်နိုင်သူများသည် မီးမရရှိကြသည့်အပြင် ကိုယ်ထူကိုယ်ထမီးလင်းရေး အစီအစဉ် ဆောင်ရွက်ခဲ့သည့်အတွက် NEP မီးလင်းရေးစီမံကိန်းတွင်လည်း ပါဝင်ခြင်းမရှိကြပါကြောင်း၊

ထို့ကြောင့် ၄င်းတို့အနေဖြင့် နိုင်ငံတော်၏ အထောက်အပံ့ကိုလည်း မရရှိသကဲ့သို့ ကိုယ်ထူကိုယ်ထ မီးလင်းရေး အတွက်လည်း မည်သို့မျှ တတ်နိုင်ခြင်း မရှိ၍ မီးမရရှိကြပါကြောင်း၊ ဒုတိယဝန်ကြီး ဖြေကြားခဲ့သကဲ့သို့ မီးလင်းရေးကော်မတီနှင့် ကော်မတီကိုမကျေနပ်သည့်အတွက် ငွေကြေး မထည့်ဝင်ခြင်း မဟုတ်ဘဲ အမှန်တကယ်ငွေကြေးတက်နိုင်ခြင်း မရှိခြင်းကြောင့် မီးမလင်းရခြင်း ဖြစ်ပါကြောင်း၊ ယခုအချိန်တွင် နိုင်ငံတော်က မီတာခနှုန်းထားများ တိုးမှင့်ကောက်ခဲ့ခြင်းကြောင့် ဝင်ငွေများလည်း တိုးမြှင့်လာပြီဖြစ်သည့်အတွက် ကိုယ်ထူကိုယ်ထမီးလင်းရေးတွင် မည်သို့ အထောက်အကူမှမရသော၊ အများနည်းတူ မီးလင်းချင်သူများအတွက် သက်ဆိုင်ရာဝန်ကြီးဌာနမှ မည်သို့ စီစဉ်ဆောင်ရွက်ထားသည်ကို သိရှိလိုပါကြောင်း မေးမြန်းပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

မူလ NEP Plan စာရင်းများကိုကောက်ယူခဲ့ချိန်တွင် Plan အတွင်းအကျုံးဝင်သောကျေးရွာများစာရင်း ထွက်ပေါ်လာခြင်းဖြစ်ပြီး အဆိုပါစာရင်းများထွက်ပေါ်လာသည့်တိုင်အောင် စာရင်းကောက်ယူသည့် ကာလသည် အမှန်တကယ်ဆောင်ရွက်ရန် စီမံကိန်းနှင့်ဘဏ္ဍာရေးဝန်ကြီးဌာနထံ ချေးငွေရယူရေး အဆိုပြု တင်ပြရန်နှင့် အစီရင်ခံစာများပြုစုရန် ကြိုတင်လုပ်ငန်းဆောင်ရွက်သည့် အချိန်ကာလကတည်း ကပေါ်ပေါက်ခြင်း ဖြစ်ပါကြောင်း၊ ချေးငွေအဆိုပြုသည့် အဆိုပြုချက်များ တင်ပြရပြီးနောက် ကမ္ဘာ့ ဘဏ်နှင့်လည်း ဆက်လက်ညှိနှိုင်းဆွေးနွေးရသည်ကိစ္စရပ်များကို အများကြီးအချိန်ယူ ဆောင်ရွက်ခဲ့ရ ပါကြောင်း၊ ထို့ကြောင့် အကျုံးဝင်သည့် ကျေးရွာစာရင်းများ ပေါ်ပေါက်လာသည့်တိုင်အောင် မြေပြင်တွင် လက်တွေ့တည်ဆောက်အကောင်အထည်ဖော်နိုင်ရန် အချိန်အများကြီး စောင့်ဆိုင်းခဲ့ရပါကြောင်း၊ ယင်းသို့ စောင့်ဆိုင်းခဲ့ရသည့်အတွက်ကြောင့် အချို့သောကျေးရွာများသည် စာရင်းထဲတွင် မည်မျှပင် ပါဝင်စေကာမူ ၎င်းတို့၏ အများသဘောတူဆန္ဒနှင့် ကိုယ့်အားကိုယ်ကိုးသာ ဆောင်ရွက်ပါမည်ဟု လျှောက်ထား လာတာဖြစ်ပါကြောင်း၊  ထိုကဲ့သို့လျှောက်ထားလာသည့်အပေါ် ကမ္ဘာ့ဘဏ်နှင့် ဆက်လက် ဆွေးနွေးညှိနှိုင်းရပြီး ကမ္ဘာ့ဘဏ်၏ ချေးငွေနှင့် Partially ဆောင်ရွက်ပေး၍ မရသည့် အခြေအနေပေါ်ပေါက်လာခြင်း ဖြစ်ပါကြောင်း၊ ထို့ကြောင့် ကိုယ့်အားကိုယ်ကိုးဆောင်ရွက်မည် ကျေးရွာ များအနေဖြင့်  ကမ္ဘာ့ဘဏ် ချေးငွေဖြင့် ဆောင်ရွက်မည့် NEP Plan တွင် ပါဝင်သော်လည်း အကယ်၍ ယင်းတို့အနေဖြင့် အချိန်ဦးပြီး ဆောလျင်စွာ ဆောင်ရွက်ခဲ့မည်ဆိုပါက စာရင်းမှဖယ်ပြီး ဆက်လက် ဆောင်ရွက်ရန် အသိပေးပြောကြားခဲ့ကြောင်း၊

ထို့ကြောင့် ကမ္ဘာ့ဘဏ်ချေးငွေမှ အဆိုပါရွာများကို  ဆက်လက်ပြီး ဘတ်ဂျက်စိုက်ထုတ်ဆောင်ရွက် နိုင်ရန် ဆက်လက်အကျုံးမဝင်တော့ခြင်းဖြစ်ပါကြောင်း၊ ပြည်ထောင်စုဝန်ကြီးဌာန၏ NEP Plan ဖြင့်ဆောင်ရွက် ပေးခြင်းမှာ အဆိုပါရွာကို ၁၁ ကေဗွီလိုင်းတည်ဆောက်ပေးခြင်း၊ ၁၁.၄ ထရန်စဖော်မာ တည်ဆောက်ပေးခြင်း အထိသာ ပါဝင်ပါကြောင်း၊

အဆိုပါကျေးရွာသည် ၁၁ ကေဗွီလိုင်းနှင့် ၁၁.၄ ထရန်စဖော်မာများ တပ်ဆင်ပြီးဖြစ်နေပြီဖြစ်ပါကြောင်း၊ ကမ္ဘာ့ဘဏ်ချေးငွေနှင့် ဆောင်ရွက်သော ကျေးရွာများ၏ အိမ်တစ်အိမ်ချင်းအရောက်ကို ၄၀၀ ဗို့လိုင်းနှင့် မီတာများ တပ်ဆင်ပေးခြင်း မပါဝင်ခြင်းဖြစ်ပါကြောင်း၊ ထို့ကြောင့် NEP Plan နှင့် တည်ဆောက်သည့် ရွာများတွင် ကျေးရွာ တစ်အိမ်ချင်း၊ မီးသုံးသူတစ်အိမ်ချင်းက ၄၀၀ ဗို့လိုင်းနှင့် မီတာတပ်ဆင်ခြင်း၊ အိမ်တွင်းဝါယာရိမ်း ရိုက်ခြင်းကို ၎င်းတို့၏ ကုန်ကျစရိတ်တွင် ဆောင်ရွက်ရပါကြောင်း၊ ယခုကိုယ်ထူကိုယ်ထ မီးလင်းပြီး ကျေးရွာတွင် ကျန်ရှိနေသော အိမ်များအနေဖြင့်လည်း ၄၀၀ ဗို့လိုင်းနှင့် အိမ်တွင်းဝါယာရိမ်းများ၊ မီတာခများကို ယင်းတို့ကသာ ဆက်လက်ဆောင်ရွက်ရမည်ဖြစ်ပါကြောင်း၊ အဆိုပါမီးလင်းရန်ကျန်ရှိနေသည့် အိမ်များ အတွက် ပြည်ထောင်စုဝန်ကြီးဌာန၏ အစီအစဉ်မှာ မူလကတည်းက NEP Plan မှာ ထိုအချက်က ပါရှိခြင်း မရှိသည့်အတွက်ကြောင့် ကိုယ်ထူကိုယ်ထ ကျေးရွာ‌များ မီးလင်းရေးကိစ္စများတွင် ဆက်လက် ဆောင်ရွက်ပေးနိုင်ခြင်း မရှိပါကြာင်း ပြန်လည် ဖြေကြားပါသည်။

လျပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျပ်စစ်နှင့်စွမ်းအင်

https://www.pyithuhluttaw.gov.mm/question-3929