(ဇ)-ပြည်သူပိုင်အဖြစ် ၁၉၆၉ ခုနှစ်တွင် သိမ်းဆည်းခံရသော လွိုင်လင်မြို့၊ ရပ်ကွက်(၄) ပင်လုံလမ်း၊ ကွင်းအမှတ်(၅၄)၊ ဦးပိုင်အမှတ်(၈၉)၊ ဧရိယာ(ဝ.၂၆၁)ဧကအား မူလပိုင်ရှင်သို့ ပြန်လည်စွန့်လွှတ်ပေးရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

ဦးခင်မောင်သီ(လွိုင်လင် မဲဆန္ဒနယ်) 

(ဇ)-ပြည်သူပိုင်အဖြစ် ၁၉၆၉ ခုနှစ်တွင် သိမ်းဆည်းခံရသော လွိုင်လင်မြို့၊ ရပ်ကွက်(၄) ပင်လုံလမ်း၊ ကွင်းအမှတ်(၅၄)၊ ဦးပိုင်အမှတ်(၈၉)၊ ဧရိယာ(ဝ.၂၆၁)ဧကအား မူလပိုင်ရှင်သို့ ပြန်လည်စွန့်လွှတ်ပေးရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

ရှမ်းပြည်နယ်(တောင်ပိုင်း)၊ လွိုင်လင်မြို့နယ်တွင် မြန်မာ့ရေနံရောင်းဝယ်‌ရေးလုပ်ငန်း ဆီအရောင်းဆိုင် အမှတ် (၀၇၇၀) ဧရိယာ ဝ.၂၆၀ ဧကအား မူလပိုင်ရှင်၏သမီးကြီး အထက်တန်းပြ ကျောင်းဆရာမကြီး (အငြိမ်းစား) ဒေါ်ခင်မြင့်မှ ပြန်လည်ရရှိပိုင်ဆိုင်လိုကြောင်းနှင့် လွှတ်တော်သို့တင်ပြပြီး သက်ဆိုင်ရာဝန်ကြီးဌာနမှ အရေးယူဆောင်ရွက် ပေးနိုင်ပါရန် တင်ပြလာပါသည်။ မြန်မာ့ရေနံရောင်းဝယ်ရေးလုပ်ငန်း ဆီအရောင်းဆိုင် အမှတ် (၀၇၇၀) သည် ရှမ်းပြည်နယ် (တောင်ပိုင်း)၊ လွိုင်လင်မြို့နယ်၊ အမှတ် (၄) ရပ်ကွက်၊ ကွင်းအမှတ် (၅၄) ဦးပိုင်အမှတ် (၈၉) ပင်လုံလမ်းတွင် တည်ရှိပါကြောင်း၊ မူလပိုင်ရှင်များမှာ ဦးကာကာ၏သား ဦးထွန်းပေတို့ဖြစ်ပြီး BOC ၏ ကိုယ်စားလှယ်များအဖြစ် စက်သုံးဆီရောင်းချခြင်းကို ဆောင်ရွက်ခဲ့ပါကြောင်း၊ ၁၉၆၉ ခုနှစ်တွင် ရှမ်းပြည်နယ်၊ လွိုင်လင်မြို့၊ ရပ်ကွက် (၄) ကွင်းအမှတ် (၅၄) ဦးပိုင်အမှတ် (၈၉) မြေဧရိယာ ဝ.၂၆၁ ဧကအား သက်ဆိုင်ရာဌာနမှ ပြည်သူပိုင်အဖြစ် သိမ်းဆည်းခြင်း ခံခဲ့ရပါကြောင်း၊ ပြည်သူပိုင်အဖြစ် သိမ်းဆည်းခြင်း ခံခဲ့ရသည့် အခြားမြို့များမှ BOC လုပ်ငန်းဆောင်ရွက်ခဲ့သည့် အဆောက်အဦများ၊ မြေနေရာများကို မူလပိုင်ရှင်များသို့ ပြန်လည်ပေးအပ်ခဲ့သည်ကိုလည်း သိရှိခဲ့ရပြီး သက်ဆိုင်ရာဌာနသို့ ဆက်သွယ် ဆောင်ရွက်ခဲ့ပါကြောင်း၊ ဇန်နဝါရီလ ၁၀-၁-၂၀၁၂ ရက်နေ့စွဲဖြင့် စာအမှတ်၊ ၂၀၆/၄၅/အ ၁၀၅ ဖြင့် မြန်မာ့ရေနံထွက် ရောင်းဝယ်‌ရေးလုပ်ငန်း ရုံးချုပ်မှ ပြည်ထောင်စုမြန်မာနိုင်ငံ စီပွားရေးဦးပိုင်လီမိတက်မှ          အသုံးမပြုသည်‌့အချိန်တွင် ပြန်လည်လျှောက်ထားပါရန် အကြောင်းကြားစာ လက်ခံရရှိခဲ့ပါကြောင်း၊ ယခုအခါ ပြည်ထောင်စုမြန်မာနိုင်ငံ စီးပွားရေးဦးပိုင်လီမိတက်မှ  စက်သုံးဆီရောင်းချခြင်းကို ရပ်ဆိုင်းထားခဲ့ပြီး ဖြစ်ပါကြောင်း၊ လွိုင်လင်ခရိုင်၊ လွိုင်လင်မြို့နယ်တို့မှ လယ်ယာမြေနှင့် အခြားမြေများ သိမ်းဆည်းခံရမှုများ ပြန်လည်စိစစ်ရေး ကော်မတီသို့ တင်ပြဆောင်ရွက်သော်လည်း ကျေနပ်မှုမရှိပါသဖြင့် ပြည်သူ့လွှတ်တော်သို့ တင်ပြပြီး သက်ဆိုင်ရာဝန်ကြီးဌာနမှ မျှမျှတတဖြေရှင်း ဆောင်ရွက်ပေးနိုင်ပါရန် တင်ပြလာပါသဖြင့် ရှမ်းပြည်နယ် (တောင်ပိုင်း)၊ လွိုင်လင်မြို့၊ ရပ်ကွက် (၄)၊ ပင်လုံလမ်း၊ ကွင်းအမှတ် (၅၄) ဦးပိုင်အမှတ် (၈၉) ဧရိယာ ဝ.၂၆၁ ဧကအား ပြည်သူပိုင်အဖြစ် ၁၉၆၉ ခုနှစ်တွင် သိမ်းဆည်းခံရပြီး မူလပိုင်ရှင်သို့ ပြန်လည်စွန့်လွှတ်ပေးရန် အစီအစဉ်ရှိ/မရှိ၊ အစီအစဉ်ရှိပါက မည်သည့်အချိန်တွင် စွန့်လွှတ်ပေးမည်နည်းနှင့် အစီအစဉ်မရှိပါက မည်သည့်အတွက်ကြောင့် ဖြစ်သည်ကို သိရှိလိုပါကြောင်း မေးမြန်းပါသည်။

ယခင် မြန်မာ့ရေနံကော်ပိုရေးရှင်း (ယခုမြန်မာ့ရေနံထွက်ပစ္စည်းရောင်းဝယ်ရေးလုပ်ငန်း) သည် လွိုင်လင်မြို့၊ စက်သုံးဆီ အရောင်းဆိုင်အမှတ် (၀၇၇၀)ကို ၂၂-၁-၁၉၇၀ ရက်နေ့တွင် မူလပိုင်ရှင် ဦးထွန်းဖေထံမှ ကိုယ်စားလှယ်ရပ်ဆိုင်း၍ လွှဲပြောင်းရယူခဲ့စဉ်က ဖွဲ့စည်းခဲ့သော ရာဖြတ်ကော်မတီ၏ ဆုံးဖြတ်ချက်အရ အဆိုပါဆိုင်တွင် မြန်မာ့ရေနံကော်ပိုရေးရှင်းပိုင် ဖြစ်သော်လည်း ဂိုဒေါင်တွင် ကိုယ်စားလှယ်ဟောင်းပိုင် ဖြစ်သဖြင့် အပြီးအပိုင်ဆက်လက် သိမ်းယူရန်ဖြစ်ပါကြောင်း၊ အစောင့်အိမ်တွင် ကိုယ်စားလှယ်ပိုင် ဖြစ်သဖြင့် ဆက်လက်သိမ်းယူရန် ဖြစ်ပါကြောင်း၊ မြေတန်ဖိုးနှင့်ပတ်သက်၍ ဖော်ပြထားခြင်း မရှိပါကြောင်း စိစစ်တွေ့ရှိရပါသည်။ ၂၅-၃-၂၀၁၀ ရက်နေ့တွင် ကျင်းပပြုလုပ်ခဲ့သည့် ပုဂ္ဂလိကပိုင် ပြုလုပ်ရေးကော်မရှင် အစည်းအဝေး (၁/၂၀၁၀) ၏ သဘောတူခွင့်ပြုချက်ဖြင့် မြန်မာ့ရေနံထွက်ပစ္စည်း ရောင်းဝယ်ရေးလုပ်ငန်း လက်အောက်တွင်ရှိသော မိုးနဲရှိစက်သုံးဆီဆိုင်၊ ကွန်ဟိန်းရှိစက်သုံးဆီဆိုင်၊ လင်းခေးရှိစက်သုံးဆီဆိုင်၊ လဲချားရှိစက်သုံးဆီဆိုင်နှင့် မေးခွန်းပါ လွိုင်လင်ရှိ စက်သုံးဆီဆိုင် ငါးဆိုင်အား ဦးခွန်အောင်ထွန်း (MTA တပ်မဟာ-၈) သို့ အပြီးအပြတ် ရောင်းချလိုက်သည်ဟု ပုဂ္ဂလိကပိုင် ပြုလုပ်ရေးကော်မရှင်၏ အမိန့်ကြော်ငြာစာ ထုတ်ပြန်ခဲ့ခြင်း ဖြစ်ပါကြောင်း၊ အဆိုပါအမိန့်ကြော်ငြာစာအရ မြန်မာ့ရေနံထွက်ပစ္စည်း ရောင်းဝယ်ရေး လုပ်ငန်းလက်အောက်ရှိ လွိုင်လင်မြို့၊ စက်သုံးဆီအရောင်းဆိုင် (၀၇၇၀) ၏ ဆိုင်အဆောက်အဦ၊ မြေ ဝ.၂၆၁ ဧကအပါအဝင်ကို ဦးခင်အောင်ထွန်းထံသို့ အပြီးအပြတ်လွှဲပြောင်း ပေးခဲ့ရပါကြောင်း၊ ပုဂ္ဂလိကပိုင်ပြုလုပ်ရေးလုပ်ငန်း ကော်မရှင်၏ အမိန်ကြော်ငြာစာပါ အပိုဒ် ၄ အရ စွမ်းအင်ဝန်ကြီးဌာန၊ မြန်မာ့ရေနံထွက် ပစ္စည်းရောင်းဝယ်ရေးလုပ်ငန်း လက်အောက်ရှိ ၎င်းစက်သုံးဆီဆိုင် အရောင်းဆိုင် ငါးဆိုင်ကို ဝယ်ယူသူ  ဦးခွန်အောင်ထွန်း၏ အမည်ပေါက်မြေဂရန် ထုတ်ပေးရေးကို ယင်းစက်သုံးဆီဆိုင် အရောင်းဆိုင်တည်ရှိရာ မြို့များတွင် မြို့မြေစီမံခန့်ခွဲရေးကို တာဝန်ယူ ဆောင်ရွက်နေသော ပြည်ထဲရေးဝန်ကြီးဌာန အထွေထွေအုပ်ချုပ်ရေး ဦးစီးဌာနက တာဝန်ယူ ဆောင်ရွက်ပေးရန် ဖြစ်သည်ဟု ပုဂ္ဂလိကပိုင်ပြုလုပ်ရေး ကော်မရှင်၏ အမိန့်ကြော်ငြာစာတွင် ပြဋ္ဌာန်းထားခြင်း ဖြစ်ပါကြောင်း၊ သို့ဖြစ်ပါ၍ ယခုအခါ ပုဂ္ဂလိကလက်သို့ လွှဲပြောင်းပေးခဲ့ရပြီး ဖြစ်သည်ကတစ်ကြောင်း မြန်မာ့ရေနံထွက်ပစ္စည်း ရောင်းဝယ်‌ရေးလုပ်ငန်း၏ ပုံသေပိုင်စာရင်းမှ အဆိုပါဆိုင်နှင့်မြေအား စာရင်းပိတ် ဖျက်သိမ်းခဲ့ခြင်းကို ပြည်ထောင်စုအစိုးရအဖွဲ့ အစည်းအဝေး အမှတ်စဉ် (၁၄/၂၀၁၁) တွင် တင်ပြမှတ်တမ်းတင် အတည်ပြုထားခဲ့ပြီး ဖြစ်ပါကြောင်း၊

ထို့အပြင် ပြည်ထောင်စုအစိုးရအဖွဲ့၏ ခွင့်ပြုချက်အရ လယ်ယာမြေနှင့်အခြားမြေများ သိမ်းဆည်းခံရမှုများ ပြန်လည်စိစစ်ရေး ဗဟိုကော်မတီက နိုင်ငံတော်က သိမ်းဆည်းထားသည့် လယ်ယာမြေနှင့် အခြားမြေများကို မူလမြေပိုင်ရှင်များက ပြန်လည်လျှောက်ထားခြင်းနှင့် ပတ်သက်၍ သိမ်းဆည်းမြေ၊ တိုင်ကြားစာများနှင့် ပတ်သက်ပြီး ၁၉၈၈ ခုနှစ်နောက်ပိုင်း မြေသိမ်းဆည်းမှုများကိုသာ စိစစ်ဖြေရှင်းဆောင်ရွက် ပေးသွားရန် မူဝါဒချမှတ်ထားပါကြောင်းနှင့် ဌာနအနေဖြင့် ၎င်းမြေအား ပုံသေပိုင်ပစ္စည်းစာရင်းတွင် ဆက်လက်တည်ရှိခြင်း မရှိသည့်အတွက်ကြောင့် မြေစွန့်လွှတ်မှုအား ဝန်ကြီးဌာနအနေဖြင့် ဆောင်ရွက်ပေးနိုင်ခြင်း မရှိပါကြောင်း ရှင်းလင်းဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန ၊ ဒုတိယဝန်ကြီး ဒေါက်တာထွန်းနိုင် 

လျှပ်စစ်နှင့်စွမ်းအင်

httpss://www.pyithuhluttaw.gov.mm/question-3547