မြန်မာ့ရေနံနှင့် သဘာဝဓာတ်ငွေ့လုပ်ငန်းမှ ကုန်းတွင်းလုပ်ကွက် ရေနံမြေများနှင့် ကမ်းလွန် လုပ်ကွက်များကို ရေနံကုမ္ပဏီများနှင့် စာချုပ်များ ချုပ်ဆိုပြီး ဆောင်ရွက်ရာတွင် ၎င်းလုပ်ကွက် များ၏ ဆိုက်စမစ်တိုင်းတာခြင်း အခြေအနေများကို သိလိုခြင်းနှင့် စီးပွားဖြစ်ထုတ်လုပ်နိုင်မည်‌့ အခြေအနေ များရှိ/မရှိ သိလိုခြင်းနှင့် စပ်လျဉ်းသည့်မေးခွန်း

ဦးနေမျိုးထက်( ကျောက်တံတားမဲဆန္ဒနယ်)

မြန်မာ့ရေနံနှင့် သဘာဝဓာတ်ငွေ့လုပ်ငန်းမှ ကုန်းတွင်းလုပ်ကွက် ရေနံမြေများနှင့် ကမ်းလွန် လုပ်ကွက်များကို ရေနံကုမ္ပဏီများနှင့် စာချုပ်များ ချုပ်ဆိုပြီး ဆောင်ရွက်ရာတွင် ၎င်းလုပ်ကွက် များ၏ ဆိုက်စမစ်တိုင်းတာခြင်း အခြေအနေများကို သိလိုခြင်းနှင့် စီးပွားဖြစ်ထုတ်လုပ်နိုင်မည်‌့ အခြေအနေ များရှိ/မရှိ သိလိုခြင်းနှင့် စပ်လျဉ်းသည့်မေးခွန်း

မိမိတို့တိုင်းပြည်အတွက် ရေနံသဘာဝဓာတ်ငွေ့နှင့် ရေနံဂက်စ်သည် အလွန်လိုအပ်ပါကြောင်း၊ တိုင်းပြည်၏ဝင်ငွေအတွက် ရေနံနှင့် သဘာဝဓာတ်ငွေ့လုပ်ငန်းမှ ဝင်ငွေနှင့် အခွန်များ အများဆုံး ရခဲ့ပါကြောင်း၊ မိမိတို့နိုင်ငံတွင် စွမ်းအင်လျှပ်စစ်၊ စွမ်းအင်ကဏ္ဍများ အများအပြားလိုသည့်အပြင် စွမ်းအင်ကဏ္ဍနှင့်ပတ်သက်၍လည်း ပူပန်မှုများများစွာ ရှိနေပါကြောင်း၊ စွမ်းအင်နှင့် လျှပ်စစ် ဝန်ကြီးဌာနအနေဖြင့် ရေနံသဘာဝဓာတ်ငွေ့လုပ်ကွက်များကို နိုင်ငံခြားကုမ္ပဏီများနှင့် ဆောင်ရွက်လျက် ရှိနေပါကြောင်း

ထို့ကြောင့် မြန်မာ့ရေနံနှင့် သဘာဝဓာတ်ငွေ့လုပ်ငန်းမှ ကုန်းတွင်းလုပ်ကွက် ရေနံမြေများနှင့် ကမ်းလွန်လုပ်ကွက်များကို ရေနံကုမ္ပဏီများနှင့် စာချုပ်များချုပ်ဆိုပြီး ဆောင်ရွက်ရာတွင် ၎င်းလုပ်ကွက်များ၏ ဆိုက်စမစ်တိုင်းတာခြင်း အခြေအနေများနှင့် စီးပွားဖြစ်ထုတ်လုပ်နိုင်မည်‌့ အခြေအနေများ ရှိ/မရှိကို သိရှိလိုပါကြောင်း မေးမြန်းပါသည်။

နိုင်ငံတော်၏ ရေနံနှင့်သဘာဝ ဓာတ်ငွေလိုအပ်ချက်ကို ဖြည်‌့ဆည်းပေးနိုင်ရန်အတွက် မြန်မာနိုင်ငံ အတွင်း ကုန်းပိုင်းနှင့် ကမ်းလွန်လုပ်ကွက်များကို ရေနံနှင့် သဘာဝဓာတ်ငွေ့ရှာဖွေ တူးဖော် ထုတ်လုပ်ခြင်းအား နိုင်ငံတကာအတွေ့အကြုံရှိ ရေနံကုမ္ပဏီများနှင့် ပူးပေါင်းပြီး ထုတ်လုပ်မှုအပေါ် ခွဲဝေခံစားရေးစာချုပ်များ ချုပ်ဆို၍လည်းကောင်း၊ မြန်မာ့ရေနံနှင့် သဘာဝဓာတ်ငွေ့ လုပ်ငန်း ကိုယ်တိုင်က ရှာဖွေ၊ တူးဖော်၊ ထုတ်လုပ်ခြင်းဖြင့် လည်းကောင်း ဆောင်ရွက်လျက်ရှိပါကြောင်း၊  မြန်မာနိုင်ငံအတွင်း ဘူမိအနည်ကျချိုင့်ဝှမ်း ၁၇ ခုရှိပြီး အဆိုပါ ၁၇ ခု အနက်မှ ကုန်းပိုင်း လုပ်ကွက် ၅၃ ကွက်နှင့် ကမ်းလွန်လုပ်ကွက် ၅၁ ကွက် စုစုပေါင်းလုပ်ကွက် ၁၀၄ ကွက်ပိုင်းခြားပြီး ဆောင်ရွက်နေပါကြောင်း၊ ကုန်းပိုင်းလုပ်ကွက် စုစုပေါင်း ၅၃ ကွက်ရှိသည့်အနက် နိုင်ငံခြား ကုမ္ပဏီများနှင့် ပူးပေါင်းဆောင်ရွက်နေသည့် လုပ်ကွက် ၂၅ ကွက်၊ မြန်မာ့ရေနံ နှင့်သဘာဝ ဓာတ်ငွေ့လုပ်ငန်းက ဆောင်ရွက်နေသည့် လုပ်ကွက် ၁၀ ကွက်နှင့် လစ်လပ်နေသည့် လုပ်ကွက် ၁၈ ကွက်ရှိပါကြောင်း၊

မြန်မာ့ရေနံနှင့်သဘာဝဓာတ်ငွေ့လုပ်ငန်းက ဆောင်ရွက်နေသည့် လုပ်ကွက် ၁၀ ကွက်တွင် တွင်းတူးဖော်ခြင်းနှင့် ထုတ်လုပ်ရေးလုပ်ငန်းများကို ဆောင်ရွက်လျက်ရှိပြီး ဆိုက်စမစ်တိုင်းတာခြင်း လုပ်ငန်းများကို ဆောင်ရွက်ခြင်း မရှိပါကြောင်း၊ နိုင်ငံခြားကုမ္ပဏီများနှင့်ပူးပေါင်းဆောင်ရွက်နေ သည့် လုပ်ကွက် ၂၅ ကွက်တွင် ထုတ်လုပ်ရေးလုပ်ငန်းဆောင်ရွက်နေသည့် လုပ်ကွက် ၃ ကွက်နှင့် တွင်းတူးဖော်ခြင်းလုပ်ငန်းဆောင်ရွက်နေသော လုပ်ကွက် ၄ ကွက် စာချုပ်ရပ်စဲရန် ဆောင်ရွက်နေ သည့် လုပ်ကွက် ၁၀ ကွက် ဆိုက်စမစ်တိုင်းတာခြင်းလုပ်ငန်း ဆောင်ရွက်နေသည့် လုပ်ကွက် ၈ ကွက်ရှိပါကြောင်း၊ ကမ်းလွန်လုပ်ကွက်များတွင် စုစုပေါင်း ၅၁ ကွက်ရှိပြီး နိုင်ငံခြားကုမ္ပဏီများနှင့် ပူးပေါင်းဆောင်ရွက်နေသည့် လုပ်ကွက် ၃၆ ကွက်၊ လစ်လပ်နေသည့် လုပ်ကွက် ၁၅ ကွက် ရှိပါကြောင်း၊ လက်ရှိလုပ်ကွက် ရှစ်ကွက်တွင် သဘာဝဓာတ်ငွေ့ထုတ်လုပ်သည့် ရတနာ၊ ရဲတံခွန်၊ ရွှေနှင့် ဇောတိက စီမံကိန်းများ ပါဝင်ပါကြောင်း၊ တွင်းတူးဖော်ခြင်းလုပ်ငန်းဆောင်ရွက်နေသော လုပ်ကွက် ၇ ကွက်နှင့် စာချုပ်ရပ်စဲရန် ဆောင်ရွက်နေသည့် လုပ်ကွက် ၉ ကွက်ရှိပြီး ဆိုက်စမစ် တိုင်းတာခြင်းလုပ်ငန်းကို ဆောင်ရွက်နေသည့် လုပ်ကွက်များသည် အကွက် ၂၀ ရှိပါကြောင်း၊ 

ရေနံနှင့် သဘာဝဓာတ်ငွေ့ရှာဖွေ တူးဖော်ခြင်းအတွက် နိုင်ငံခြားကုမ္ပဏီများနှင့် စာချုပ်ချုပ်ဆို ဆောင်ရွက်နေသည့် လုပ်ငန်းအဆင့်များအနေဖြင့် လုပ်ကွက်များအတွင်း ပြင်ဆင်ရေးကာလ၊ လေ့လာရေးကာလများကို တစ်နှစ်မှ သုံးနှစ်ကြာထိလည်းကောင်း၊ ရှာဖွေခြင်းနှင့် တွင်းတူးဖော်ရေး ကာလကို ငါးနှစ်မှ ခြောက်နှစ်ကြာထိလည်းကောင်း ဆက်လက်ဆောင်ရွက်ရပါကြောင်း၊ ထိုသို့ ဆောင်ရွက်ရာတွင်  ယခု ကုန်းတွင်းလုပ်ကွက်များအနက် 2D နှင့် 3D ဆိုက်စမစ်လုပ်ငန်းများ ဆောင်ရွက်နေသည့် လုပ်ကွက်များပါဝင်ပါကြောင်း၊ တိုင်းတာမှုလုပ်ငန်းများကို ဆောင်ရွက် နေသည့်အတွက်ကြောင့် အချက်အလက်များ စုဆောင်းနေသည့် အဆင့်သာ ဖြစ်ပါကြောင်းနှင့် ထိုကဲ့သို့ 2D နှင့် 3D ဆိုက်စမစ်များ တိုင်းတာရရှိသည့် အချက်အလက်များအပေါ် ဘာသာပြန်ယူ Interpretations လုပ်ပြီးမှသာ ဖြစ်နိုင်ချေရှိသည့် တွင်းနေရာ Location များကို ရွေးချယ်ကာ ရှာဖွေရေးတွင်း တူးဖော်ခြင်း လုပ်ငန်းများကို ဆက်လက်ဆောင်ရွက်ရပါကြောင်း၊

2D ဆိုက်စမစ်၊ 3D ဆိုက်စမစ် တိုင်းတာခြင်းကြောင့်သော်လည်းကောင်း၊ ရှာဖွေရေး တွင်းများ တူးဖော်ရာမှရရှိသည့် ရလဒ်များကြောင့်သော်လည်းကောင်း ရေနံနှင့် သဘာဝဓာတ်ငွေ့ စီးပွားဖြစ် ထုတ်ယူနိုင်ချေမရှိသည့် လုပ်ကွက်များကို စာချုပ်ရပ်စဲပြီး မြန်မာ့ရေနံနှင့်သဘာဝ ဓာတ်ငွေ့ လုပ်ငန်းကို လုပ်ကွက်များပြန်လည်အပ်နှံရပါကြောင်း၊

စာချုပ်ရပ်စဲရန်ဆောင်ရွက်နေသည့် ကုန်းတွင်းပိုင်းလုပ်ကွက် ၁၀ ကွက်နှင့် ရပ်စဲပြီးလုပ်ကွက် ၄ ကွက်ရှိပါကြောင်း၊ ကုန်းတွင်းပိုင်းလုပ်ကွက် ၃ ကွက်အနက် MOGE ကဆောင်ရွက်နေသော လုပ်ကွက်တစ်ခုနှင့် ကုမ္ပဏီကဆောင်ရွက်နေသော လုပ်ကွက်တစ်ခုကို ရှိပါကြောင်း၊ ကမ်းလွန်လုပ်ကွက် ၁၂ ကွက်တွင် 2D နှင့် 3D ဆိုက်စမစ်များ တိုင်းတာနေပါကြောင်း၊ ဆိုက်စမစ် များ တိုင်းတာပြီးနောက် ရှာဖွေရေးတွင်း တူးဖော်ဆောင်ရွက်နေသည့် ကမ်းလွန်လုပ်ကွက် ၇ ကွက်ရှိပါကြောင်း၊

သဘာဝဓာတ်ငွေ့နှင့်ရေနံ ထွက်ရှိနိုင်မှုအလားအလာ အားနည်းသည့် လုပ်ကွက်များကို စာချုပ် ရပ်စဲရန် ဆောင်ရွက်နေသည့် ကမ်းလွန်လုပ်ကွက် ၉ ကွက်နှင့် စာချုပ်ရပ်စဲပြီး လက်မှတ်ထိုး ထားသည့် လုပ်ကွက် ၂ ကွက်ရှိပါကြောင်း၊ ရေနံနှင့်သဘာဝဓာတ်ငွေ့လုပ်ငန်း ရှာဖွေခြင်း ဆောင်ရွက်ရာတွင် 2D နှင့် 3D ဆိုက်စမစ်များ တိုင်းတာရရှိသည့် အချက်အလက်များအရ စမ်းသပ်တွင်းတူးဖော်ခြင်းများကို ဆောင်ရွက်လျက်ရှိပါကြောင်း၊

စမ်းသပ်တွင်းများတွင် သဘာဝဓာတ်ငွေ့ရှိကြောင်း တွေ့ရှိခဲ့ပါက စီးပွားဖြစ်ထုတ်လုပ်နိုင်မည်‌့ ပမာဏရှိ/မရှိကို   ဆက်လက်ဆောင်ရွက်ကြရပြီး တိုင်းတာရရှိသည့် Result များအပေါ် Third Party Certificate အတည်ပြုချက် ရရှိအောင် ဆက်လက်ဆောင်ရွက်ကြရပါကြောင်း၊ ထို့နောက် ရေနံနှင့်သဘာဝဓာတ်ငွေ့ ထုတ်လုပ်ရောင်းချနိုင်ရန်အတွက် လိုအပ်သည့် လုပ်ငန်းစဉ်များကို ဆောင်ရွက်နိုင်ရန် အကဲဖြတ်ကာလနှင့် ဖွံ့ဖြိုးရေးကာလအဖြစ် ခြောက်နှစ်မှ ရှစ်နှစ်အထိ သတ်မှတ်ဆောင်ရွက်လျက် ရှိပါကြောင်း၊ လုပ်ငန်းသဘောသဘာဝအရ  အဆိုပါဖွံ့ဖြိုးရေး ကာလအတွင်း ရေနံနှင့်သဘာဝဓာတ်ငွေ့ ဈေးကွက်ရှာဖွေခြင်း၊ ထုတ်လုပ်ရေးစင်နှင့် ပိုက်လိုင်း များတည်ဆောက်ခြင်း၊ တိုင်းတာပို့လွှတ်ရေးစခန်းများ တည်ဆောက်ခြင်းကို ဆက်လက် ဆောင်ရွက်ပြီးမှသာ ဓာတ်ငွေ့ပို့လွှတ်ရောင်းချသည့်နေ့က စတင်၍ ထုတ်လုပ်ရေးကာလကို စတင် ရောက်ရှိခြင်း ဖြစ်ပါကြောင်း၊

ချုပ်ဆိုပြီးခဲ့သည့် စာချုပ်များအရ ယခုအချိန်တွင် ကုန်းပိုင်းနှင့်ကမ်းလွန်လုပ်ကွက် ၂၀ ကွက်တွင် ဆိုက်စမစ်တိုင်းတာခြင်းလုပ်ငန်းများကို ဆောင်ရွက်နေဆဲဖြစ်ပါကြောင်း၊  ကမ်းလွန် လုပ်ကွက် A-6 ၊ AD-1 နှင့် AD-7 တို့တွင် သဘာဝဓာတ်ငွေ့ရှိကြောင်း စမ်းသပ်တွေ့ရှိခဲ့သည့် အတွက်ကြောင့် စီးပွားဖြစ်ထုတ်လုပ်နိုင်သည့် ပမာဏရှိ/မရှိအခြေအနေကို အသေးစိတ်စူးစမ်း ဆက်လက် ဆောင်ရွက်လျက်ရှိပါကြောင်းနှင့် ကုန်းတွင်းနှင့် ကမ်းလွန်လုပ်ကွက်များတွင် စီးပွားဖြစ် ထုတ်လုပ်နိုင်သည့် ပမာဏများ ရှိပါက ပြည်သူလူထုထံ ထုတ်ပြန်ကြေညာသွားမည်ဖြစ်ပါကြောင်း ပြန်လည်ဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်

Source: httpss://www.pyithuhluttaw.gov.mm/question-3546