လစဉ်သုံးစွဲပြီးသော ယူနစ်များကို Digital စနစ်ဖြင့် မီတာမဖတ်နိုင်သေးမီ မြန်မာနိုင်ငံအတွင်းရှိ မြို့နယ်လျှပ်စစ်ဌာနတိုင်း၏ ဝန်ထမ်းလိုအပ်ချက်များကို ပြန်လည်စိစစ်ပြီး ဝန်ထမ်းများ အမြန်ဆုံး ဖြည့်ဆည်းခန့်ထားပေးနိုင်ခြင်းရှိ/မရှိနှင့်စပ်လျဉ်းသည့်မေးခွန်း

လစဉ်သုံးစွဲပြီးသော ယူနစ်များကို Digital စနစ်ဖြင့် မီတာမဖတ်နိုင်သေးမီ မြန်မာနိုင်ငံအတွင်းရှိ မြို့နယ်လျှပ်စစ်ဌာနတိုင်း၏ ဝန်ထမ်းလိုအပ်ချက်များကို ပြန်လည်စိစစ်ပြီး ဝန်ထမ်းများ အမြန်ဆုံး ဖြည့်ဆည်းခန့်ထားပေးနိုင်ခြင်းရှိ/မရှိနှင့်စပ်လျဉ်းသည့်မေးခွန်း

ဒေါ်နန်းခမ်းအေး( နမ္မတူမဲဆန္ဒနယ်)

နမ္မတူမြို့နယ်လျှပ်စစ် အင်ဂျင်နီယာရုံး၊ နမ္မတူမြို့၏ ဖွဲ့စည်းပုံစာရင်း ဖြစ်ပါကြောင်း၊ ၎င်းစာရင်းအရ ဒုတိယလက်ထောက် ကြီးကြပ်ရေးမှူး မီတာစာရေးသည် ခွင့်ပြုနှစ်ဦးလို့ ပါရှိသော်လည်း လုံးဝလစ်လပ်လျက် ရှိနေပါကြောင်း၊ တောင်ပေါ်ဒေသအတွက် ဒုတိယလက်ထောက် ကြီးကြပ်ရေးမှူး မီတာစာရေးတစ်ဦးသည် မီတာအလုံးရေ ၇၀၀ ကို ဖတ်ရခြင်း၊ ကတ်ဖြည့်ရခြင်း၊ မီတာဘေလ်ရေးရခြင်း၊ ဘေလ်ဝေရခြင်းနှင့် ငွေကောက်ရခြင်းတို့ကို တာဝန်ယူရမည် ဖြစ်ပါကြောင်း၊ မီတာ ၃၈၀၄ လုံးရှိသည့် နမ္မတူမြို့အတွက် ဒုတိယလက်ထောက် ကြီးကြပ်ရေးမှူးငါးဦး လိုအပ်နေ ပါသော်လည်း တစ်ဦးမှ တရားဝင်ခန့်ထားပေးခြင်း မရှိသေးပါကြောင်း၊ တစ်မြို့နယ်လုံးတွင် ရှိနေသည့် မီတာဖတ်ရန်အတွက် နေ့စားဝန်ထမ်းတစ်ဦးကိုသာ ခန့်ထားနိုင်ပါကြောင်း၊ မြို့နယ်လျှပ်စစ် အင်ဂျင်နီယာရုံး (နမ္မတူမြို့) ၏ နေ့စားဝန်ထမ်းစာရင်း ဖြစ်ပါကြောင်း၊ ၎င်းစာရင်းကို ကြည့်လိုက်မည် ဆိုပါက ဝန်ထမ်းတချို့သည် လုပ်သက်ခြောက်နှစ်ကျော်ခန့်ရှိပြီ ဖြစ်သော်လည်း ဘဝအာမခံချက် မရှိဘဲ နေ့စားအဖြစ်သာ လုပ်ကိုင်နေသည်ကို တွေ့ရှိရပါကြောင်း၊ နေ့စားစတင် ခန့်အပ်သည့် အချိန်တွင် လျှောက်ထားသူ၏အရည်အချင်း ဘွဲ့တစ်ခုခုရရှိပြီးသူ ဖြစ်ရမည့်အပြင် ဌာနက အသုံးမလိုသည့် အချိန်ခန့်ထားမှုကို ရပ်ဆိုင်းမည်ဖြစ်ကြောင်းနှင့် နေ့စားခန့်အပ်ခြင်းသည် ဝန်ထမ်းအဖြစ် ခန့်အပ်မည် မဟုတ်ကြောင်းကိုပါ သိရှိကြောင်း သဘောတူလက်မှတ် ထိုးထားရပါမည်။ တရားဝင်မီတာဖတ်ရက်ကို တစ်လငါးရက်ဟု သတ်မှတ်ထားပါကြောင်း၊ ရုံးစိုက်ရာမြို့နှင့် ငါးမိုင်အထက် ဝေးကွာသော ဒေသများအတွက် မီတာဖတ်ရသည့် မီတာစာရေးကို ယာဉ်များစီစဉ်ပေးခြင်း မရှိဘဲတစ်လ လောင်စာဆီဖိုး ၂၅၀၀ ကျပ်နှုန်းဖြင့် သတ်မှတ်ထားပါကြောင်း၊ သို့သော် ၂၀၁၀ ခုနှစ်မှ ယခုအထိတိုင် နမ္မတူမြို့နယ်တွင် မီတာဖတ်ရန်အတွက် ဓာတ်ဆီဖိုးငါးလသာ လက်ခံရရှိခဲ့ဖူးသည့် အတွက်ကြောင့် မီတာဖတ်စာရေးများအတွက် စီးစရာယာဉ်တစ်မျိုးမျိုး စီစဉ်ပေးရန်နှင့် ရုံးစိုက်ရာမြို့၏မိုင်အကွာအဝေးအပေါ် မူတည်ပြီး ကုန်ကျမည့်လောင်စာဆီများကို အပြည့်အဝ ထောက်ပံ့ပေးရန် လိုအပ်လျက်ရှိနေပါကြောင်း၊ ဖွဲ့စည်းပုံအခြေခံဥပဒေ၏ ပုဒ်မ ၃၁ တွင် နိုင်ငံတော်သည် ပြည်သူများအလုပ်လက်မဲ့ နည်းပါးစေရန် တတ်နိုင်သမျှ ကူညီဆောင်ရွက်ရမည်ဟု ပြဋ္ဌာန်းထားပါကြောင်း၊ လျှပ်စစ်၏မူဝါဒတွင်လည်း နိုင်ငံတော်၏လူ့စွမ်းအား အရင်းအမြစ် တိုးမြှင့်ရန် ဆောင်ရွက်ရေးဟုလည်း ပါရှိထားပါကြောင်း၊ ဝန်ထမ်းအမှန်တကယ် လိုအပ်နေပြီး အတွေ့အကြုံ ရှိသည့် နေ့စားများကို တရားဝင်ခန့်ထားမှု မရှိခြင်းသည် နိုင်ငံသားတစ်ယောက်အနေဖြင့် နိုင်ငံသားအခွင့်အရေး ဆုံးရှုံးနေသည်ကို တွေ့မြင်ရပါကြောင်း၊ နမ္မတူမြို့နယ်သာမက အခြားမြို့နယ်များတွင်လည်း လျှပ်စစ်နှင့်ပတ်သက်ပြီး ဝန်ထမ်းလစ်လပ်မှုသည် ဤကဲ့သို့ ဖြစ်ရပ်များရှိနေသည်ကို တွေ့ရှိရပါကြောင်း၊ လျှပ်စစ်ဌာနနှင့်ပတ်သက်ပြီး လျှပ်စစ်စွမ်းအားစီမံရေး ဦးစီးဌာနနှင့် လျှပ်စစ်ဓာတ်အား ဖြန့်ဖြူးရေးလုပ်ငန်းများတွင် အရှုံးမရှိသော်လည်း လျှပ်စစ်ဓာတ်အား ထုတ်လုပ်ရေးလုပ်ငန်း၊ လျှပ်စစ်ဓာတ်အားပို့လွှတ်ရေးနှင့် ကွပ်ကဲရေးဦးစီးဌာန၊ ရေအားလျှပ်စစ် အကောင်အထည်ဖော်ရေး ဦးစီးဌာနများတွင် အရှုံးပေါ်နေသည်ကို တွေ့ရှိရမည်ဖြစ်ပါကြောင်း၊ နိုင်ငံအတွက် အရှုံးပေါ်နေသည့် လျှပ်စစ်ဌာနအတွက် ကုစားမှုမပြုနိုင်ခင်ကြားတွင် ဝန်ထမ်းပိုမိုတိုးချဲ့ ခန့်ထားခြင်းဖြင့် အမှားအယွင်းများကို နည်းနိုင်သမျှနည်းအောင် အကာအကွယ်ပြုနိုင်ပြီး လျှပ်စစ်ကဏ္ဍကို ပြန်လည်မြှင့်တင်ရေး လိုအပ်လျက်နေသည့်အတွက်ကြောင့် လစဉ်သုံးစွဲပြီးသည့် ယူနစ်များကို Digital စနစ်ဖြင့် မီတာမဖတ်နိုင်သေးမီ မြန်မာနိုင်ငံအတွင်းတွင်ရှိသည့် မြို့နယ်လျှပ်စစ် ဌာနတိုင်း၏ ဝန်ထမ်းလိုအပ်ချက်များကို ပြန်လည်စိစစ်ပြီး ဝန်ထမ်းများ အမြန်ဆုံးဖြည့်ဆည်း ခန့်ထားပေးနိုင်ခြင်း ရှိ/မရှိသိရှိလိုပါကြောင်း မေးမြန်းပါသည်။

လျှပ်စစ်ဖြန့်ဖြူးရေးကဏ္ဍတွင် ၂၀၁၉ ခုနှစ် ဖေဖော်ဝါရီလအထိ ဝန်ထမ်းခန့်ထားခွင့် ဖွဲ့စည်းပုံအရ ခွင့်ပြုသည်မှာ ၂၀၀၈၃ ဦး ဖြစ်ပါကြောင်း၊ လက်ရှိထားခန့်ထားပြီး ဦးရေမှာ ၁၀၆၄၆ ဦးဖြစ်သည့်အတွက်ကြောင့် ၅၀.၀၁ ရာခိုင်နှုန်း ခန့်ထားပြီး ဖြစ်ပါကြောင်း၊ ဝန်ထမ်းသစ်ခန့်ထားရေးနှင့် ပတ်သက်ပြီး ဖွဲ့စည်းပုံခွင့်ပြုအင်အား၏ သုံးပုံနှစ်ပုံတွင်သာ ခန့်ထားဆောင်ရွက်သွားရန်ဟု ၁၇-၉-၂၀၀၉ ရက်စွဲပါစာအမှတ်၊ ၁/၃၄၈-အုပ်ချုပ်မှု/အဖရ (၂၀၀၉) ဖြင့် ပြည်ထောင်စုအစိုးရ အဖွဲ့ရုံးက ညွှန်ကြားထားသည်ကို လိုက်နာဆောင်ရွက်နေရခြင်း ဖြစ်ပါကြောင်း၊

ဝန်ကြီးဌာနအနေဖြင့် လျှပ်စစ်ဖြန့်ဖြူးရေးကဏ္ဍတွင် ဦးစီးအရာရှိ (ဘဏ္ဍာ) ခြောက်ဦး၊ အမှုထမ်း ၁၁၀၃ ဦးအား ခန့်အပ်ခွင့်ပြုပါရန် ပြည်ထောင်စုအစိုးရ အဖွဲ့ရုံးထံ တင်ပြခဲ့ဖူးပါကြောင်း၊ လက်ရှိ အခြေအနေတွင် အရာထမ်းငါးဦးနှင့်  အငယ်တန်းအင်ဂျင်နီယာ (၂) ၃၇ ဦး ခန့်ထားခွင့်ရရှိသဖြင့် ဆောင်ရွက်နေဆဲ ဖြစ်ပါကြောင်း၊ လျှပ်စစ်ဖြန့်ဖြူးရေးကဏ္ဍတွင် ယခင်က လျှပ်စစ်မရသေးသည့် မြို့နယ်များကို လျှပ်စစ်စနစ်များ ရောက်ရှိအောင် တိုးချဲ့ဆောင်ရွက်သွားရခြင်းဖြစ်သည့် အတွက်ကြောင့်  မြို့အသစ်များ လျှပ်စစ်ရရှိလာသည်အမျှ လျှပ်စစ်ရုံးများကို တိုးချဲ့ဖွဲ့စည်းဆောင်ရွက် သွားရန်လည်း ထပ်မံလိုအပ်ပါကြောင်း၊ အလားတူ ဓာတ်အားခွဲရုံ အသစ်များကို နှစ်အလိုက်များစွာ တိုးချဲ့တည်ဆောက် သွားသည့်အခါ အဆိုပါ ဓာတ်အားခွဲရုံ အသစ်များကို ထိန်းသိမ်းမောင်းနှင် နိုင်ရန်အတွက်လည်း ဝန်ထမ်းခန့်ထားခွင့် ဖွဲ့စည်းပုံများရရှိရန် လိုအပ်ခြင်း ဖြစ်ပါကြောင်း၊ ၎င်းအတွက် လျှပ်စစ်ဖြန့်ဖြူးရေးကဏ္ဍတွင် ခရိုင်လျှပ်စစ် အင်ဂျင်နီယာ ရုံးခြောက်ရုံးဖွဲ့စည်းခွင့်၊ မြို့နယ်လျှပ်စစ် အင်ဂျင်နီယာရုံး ရှစ်ရုံးဖွဲ့စည်းခွင့်၊ မြို့လျှပ်စစ်မှူးရုံး ခြောက်ရုံး ဖွဲ့စည်းခွင့်၊ ၆၆ ကေဗွီဓာတ်အားခွဲရုံ ၄၆ ရုံအတွက် ဝန်ထမ်းဖွဲ့စည်းခွင့်၊ ၃၃ ကေဗွီဓာတ်အားခွဲရုံ ၁၄၁ ရုံအတွက် ဝန်ထမ်းဖွဲ့စည်းခွင့်ရရှိရန် ဌာနတွင် လိုအပ်ချက်များ ဖြစ်ပေါ်နေခြင်း ဖြစ်ပါကြောင်း၊ လက်ရှိအခြေအနေတွင် ဝန်ထမ်းဖွဲ့စည်းပုံ တိုးချဲ့ပြင်ဆင်ခြင်း၊ ဝန်ထမ်းအသစ် ခန့်ထားခြင်းတို့နှင့် ပတ်သက်ပြီး လိုက်နာဆောင်ရွက်ရန်အတွက် လူ့စွမ်းအားအရင်းအမြစ် စီမံခန့်ခွဲမှုအစီရင်ခံစာအပေါ် အခြေခံသော အမိန့်ကြော်ငြာစာ ထုတ်ပြန်ပြီးမှသာ အဆိုပါ အမိန့်ကြော်ငြာစာတွင် ပါရှိသော သတ်မှတ်ချက်များနှင်‌့အညီ စိစစ်တင်ပြရန်ဟု ပြည်ထောင်စုအစိုးရ အဖွဲ့ရုံးက ပြန်လည်ညွှန်ကြား ထားသည့်အတွက်ကြောင့် ဝန်ထမ်းခန့်ထားခြင်းနှင့် ပတ်သက်ပြီး အဆိုပါ အမိန့်ကြော်ငြာစာ ထုတ်ပြန်ရရှိလာလျှင် သတ်မှတ်ချက်များနှင့်အညီ ဌာနကဝန်ထမ်းများကို အမြန်ဆုံး ဖြည့်ဆည်းခန့်ထားရန် ဆက်လက် ဆောင်ရွက်သွားမည် ဖြစ်ပါကြောင်း၊

ယခုကဲ့သို့ ကိစ္စရပ်များသည် နိုင်ငံတစ်ဝန်းလုံးတွင် မိမိတို့တွေ့ကြုံခံစားနေရခြင်း ဖြစ်ပါကြောင်း၊ ပင်မ ဓာတ်အားခွဲရုံများ၊ ဓာတ်အားဖြန့်ဖြူးရေးခွဲရုံများကို တည်ဆောက်လိုက်ခြင်းမှာ ဆေးရုံများ၊ ကျောင်းများအသစ် တည်ဆောက်လိုက်ပြီးသကဲ့သို့ ခွဲရုံများ၊ လိုင်းများတည်ဆောက်ရုံဖြင့် ပြည်သူများ လျှပ်စစ်ရရှိခြင်း မဟုတ်ဘဲ အဆိုပါခွဲရုံများကို ၂၄ နာရီ၊ ၃၆၅ ရက် ပြုပြင်မောင်းနှင်ရန် ဝန်ထမ်းများ များစွာလိုအပ်ခြင်း ဖြစ်ပါကြောင်း၊ ဝန်ကြီးဌာနအနေဖြင့် ပြည်သူများ လျှပ်စစ်ဓာတ်အားရရှိရန် ကြိုးပမ်းအားထုတ်တည်ဆောက်သည့် အတွက်ကြောင့် ပင်မဓာတ်အားခွဲရုံများ၊ ဓာတ်အားခွဲရုံများ အများကြီး တိုးချဲ့ပြီးစီးသွားသော်လည်း ယနေ့အထိ ဝန်ထမ်းခန့်ထားခွင့် မရရှိသည့်အတွက်ကြောင့် ဌာနတွင်ဝန်ထမ်း Shorted များစွာ ဖြစ်ပေါ်နေခြင်း ဖြစ်ပါကြောင်း၊ ယခု နမ္မတူမြို့နယ်လျှပ်စစ် အင်ဂျင်နီယာရုံး၏ ဖွဲ့စည်းပုံခွင်ပြုအင်အားအရ အမှုထမ်းခွင်‌့ပြု ရှစ်ဦးတွင် အမြဲတမ်းလေးဦး၊ နေ့စားလေးဦး ခန့်အပ်ထားခြင်း ဖြစ်ပါကြောင်း၊ တောင်ပေါ်ဒေသတွင် မီးသုံးသူဦးရေ ၇၀၀ တွင် မီတာဖတ်စာရေးတစ်ဦးနှင့် မြေပြန့်ဒေသမှာ မီးသုံးသူ ၈၀၀ တွင် မီတာဖတ်စာရေးတစ်ဦးနှင့် ခန့်ထားပေးလျက်ရှိရာ နမ္မတူမြို့နယ်လျှပ်စစ် အင်ဂျင်နီယာ ရုံးတွင် မီးသုံးသူက ၃၈၀၄ ဦးရှိသည့်အတွက်ကြောင့် လျှပ်စစ်ကျွမ်းကျင် (၄) တစ်ဦး၊ လျှပ်စစ်ကျွမ်းကျင် (၅) တစ်ဦး၊ နေ့စား (မီတာ) တစ်ဦး၊ နေ့စား (လိုင်း) တစ်ဦး စုစုပေါင်းလေးဦးကို မီတာဖတ်ခြင်း၊ မီတာဘေလ်ဝေခြင်း၊ မီတာမှတ်တမ်းများ ရေးသွင်းခြင်းတို့ကို တာဝန်ခွဲဝေပြီး ဆောင်ရွက်နေရခြင်း ဖြစ်ပါကြောင်း၊ လက်ရှိတွင် အမြဲတမ်းဝန်ထမ်း ခန့်ထားခွင့်များ မရရှိသေးသည့်အတွက် နေ့စားဝန်ထမ်းများကို ခန့်ထားပြီး အစားထိုးတာဝန် ပေးလျက်ရှိနေခြင်း ဖြစ်ပါကြောင်း၊ နေ့စားများကို အမြဲတမ်းဝန်ထမ်း အဖြစ် ခန့်အပ်နိုင်ရေးနှင့် ပတ်သက်ပြီး ညွှန်ကြားချက် ရရှိလာသည့်အခါ နိုင်ငံ့ဝန်ထမ်းနည်းဥပဒေပုဒ်မ ၁၇ အရ ပြင်ပက လျှောက်ထားသူများအနေဖြင့် မိမိဌာနအတွင်း နေ့စားများကိုလည်း လုပ်ထုံးလုပ်နည်းနှင့်အညီ ယှဉ်ပြိုင်စနစ်ဖြင့် ဝင်ရောက်ဖြေဆိုပြီး ခန့်အပ်ထားနိုင်ရေးကို ဆောင်ရွက်ပေးသွားမည် ဆိုသည်ကိုလည်း မေးခွန်း ထဲပါရှိခဲ့သည့် ဆီဖိုး တစ်လ ၂၅၀၀ ကျပ်ဆိုသည့် အသုံးအနှုန်းမှာ နည်းနည်းလေးတိမ်းစောင်းနေပါကြောင်း၊ အမှန်တကယ် ခရီးစရိတ်အဖြစ်ပေးခြင်း ဖြစ်ပါကြောင်း၊ ယာဉ်ယန္တရားပေးခြင်းမှာ ဌာနတွင် ဘတ်ဂျက်ထည့်ပြီး ယာဉ်ယန္တရားဝယ်ခွင့် မရှိသဖြင့် ယာဉ်လည်းဝယ်၍ မရပါကြောင်း၊ ဖမ်းဆီးယာဉ်များကို ခွဲဝေရရှိသည့်အထဲကမှ တစ်နိုင်ငံလုံးအနှံ့ လုပ်ငန်းလိုအပ်ချက်အရ မျှတခွဲဝေသုံးစွဲနေရသည့် အခြေအနေဖြစ်သည့်အတွက်ကြောင့် ယာဉ်က ခွဲဝေပေးနိုင်မည့် အနေအထား မရှိသည်ကိုလည်း ဖြည့်စွက်ရှင်းလင်း ဖြေကြားပါသည်။

ဒေါ်နန်းခမ်းအေး (နမ္မတူမဲဆန္ဒနယ်) က ဆက်စပ်မေးခွန်းမေးမြန်းပါသည်။

နမ္မတူမြို့က ၂၀၁၀ ခုနှစ်ကတည်းကနေပြီး လျှပ်စစ်စတင်သုံးစွဲခဲ့ရပါကြောင်း၊ ယခု ၂၀၁၉ ခုနှစ်အထိ ဆိုလျှင် ဝန်ထမ်းများကို အမြဲတမ်းဝန်ထမ်း ခန့်အပ်ပေးရန် ဖြစ်သင့်သည့် အခြေအနေတွင် ရှိနေပါကြောင်း၊ နောက်ပြီး ဝန်ထမ်းများကို မည်သည့်အတွက်ကြောင့် ယာဉ်တစ်မျိုးမျိုး ချပေးရန်ကို တောင်းဆိုသလဲဆိုလျှင် နမ္မတူကနေပြီး မိုင် ၃၀ ဝေးသည့်ကျေးရွာ အုပ်စုများအထိ အဆိုပါ ဝန်ထမ်းများသည် ကွင်းဆင်းပြီး မီတာဖတ်ရပါကြောင်း၊ ၎င်းနေရာတွင် တစ်လနေမှ ၎င်းဝန်ထမ်းမျေားကို ၂၅၀၀ ကျပ ပေးသည်ဆိုတာ လုံးဝမဖြစ်နိုင်သည့် အခြေအနေ ဖြစ်နေပါကြောင်း၊ မိမိမေးမည့်မေးခွန်းက ဝန်ကြီးကနေပြီး မိမိကို နေ့စားလေးဦးဆိုပြီး ပြောသွားပါကြောင်း၊ တကယ်တမ်းက နေ့စားလေးဦးမရှိပါကြောင်း၊ ဒေါ်သဇင်အေးဆိုသည့် နေ့စားက အလုပ်မှ ထွက်သွားပြီး ဖြစ်ပါကြောင်း၊ ၎င်းတို့မှာ တရားဝင် အမြဲတမ်းဝန်ထမ်းအနေဖြင့် ခန့်ထားလိုငြားလိုလို စောင့်ရင်း၊ စောင့်ရင်း ယခုလိုထွက်သွားရခြင်း ဖြစ်ပါကြောင်း၊ ထို့ကြောင့် ယခု နေ့စားဝန်ထမ်းက သုံးဦးရှိပါကြောင်း၊ ပြီးလျှင် နေ့စားဝန်ထမ်းများကိုလည်း ဦးစားပေးအနေဖြင့် ခန့်ထားရန် တောင်းဆိုချင်ပါကြောင်း၊ နေ့စားဝန်ထမ်းက သုံးဦးဖြစ်သည်ဆိုသည်ကို ဝန်ကြီးအနေဖြင့် ပြန်လည်ရုပ်သိမ်း ပေးနိုင်ခြင်းရှိ/မရှိ မေးမြန်းလိုခြင်း ဖြစ်ပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

နေ့စားသုံးဦးဖြစ်နေခြင်းမှာ မေးခွန်းလာရောက်ဖြေဆိုသည့်နေ့ နောက်ဆုံးအခြေအနေတွင် အတိမ်းအစောင်း ရှိနိုင်ပါကြောင်း၊ နေ့စားဝန်ထမ်းများသည် ၎င်းတို့၏ စိတ်ဆန္ဒအလျောက် အလုပ်ကို လာမဆင်းလျှင် ယခုကဲ့သို့ လျော့ပါးသွားနိုင်ခြင်း ဖြစ်ပါကြောင်း၊ ထို့ကြောင့် လေးဦး၊ သုံးဦးက ကိုယ်စားလှယ်ကြီးပြောသည့် သုံးဦးဆိုတာလည်း ပိုမိုမှန်ကန်နိုင်ပါကြောင်း၊ မိမိအနေဖြင့် မေးခွန်းစတင် မေးသည့်အချိန်တွင် ပြုစုထားသည့်အချက်အလက်အရ ထိုစဉ်ကာလက လေးဦး ဖြစ်ပါကြောင်း၊ ယခုဖြေဆိုသည့်အချိန်တွင် မြေပြင်မှာ သုံးဦးဖြစ်နေနိုင်ပါကြောင်း၊ ၎င်းနှင့်ပတ်သက်ပြီး အထူးအငြင်းပွားစရာ မရှိပါကြောင်း၊ ပထမဖြေကြားခဲ့သလို ယခုအခက်အခဲများကို မိမိတို့အနေဖြင့် ပိုပြီးပြေလည်ချင်ပါကြောင်း၊ ဝန်ကြီးဌာနအနေဖြင့် မိမိတာဝန်ယူဆောင်ရွက်ရသည့် လုပ်ငန်းသည် ပစ္စည်းအရောင်းအဝယ်သဘော မျိုးဆန်သည့်တိုင်အောင် ဝန်ဆောင်မှုဆိုသည့် Service ပေးခြင်း လုပ်ငန်းပါဝင်နေခြင်း ဖြစ်ပါကြောင်း၊ Service ပေးခြင်းလုပ်ငန်းကို ဆောင်ရွက်သည့်အခါ ဝန်ထမ်းမရှိဘဲ Service ပေး၍ မရပါကြောင်း၊ ၎င်းအတွက် ပြည်သူ့လွှတ်တော်တွင်လည်းကောင်း၊ အမျိုးသားလွှတ်တော်တွင်လည်းကောင်း လျှပ်စစ်နှင်‌့စွမ်းအင် ဝန်ကြီးဌာနအနေဖြင့် ဝန်ဆောင်မှု ကောင်းအောင် ဆောင်ရွက်ပေးနိုင်ရန် ဝန်ထမ်းခန့်ထားခွင့်ကို များစွာလိုအပ်နေသည်ကိုလည်း ဆွေးနွေးခဲ့ဖူးပါကြောင်း၊ ယနေ့စားဝန်ထမ်းများကို ဝန်ထမ်းအဖြစ် ခန့်ထားခွင့်ရရှိလာသည့် အချိန်တွင် အမြန်ဆုံးခန့်ထားရန် စီစဉ်ဆောင်ရွက်ပေးသွားမည်ကိုလည်း ထပ်မံဖြေဆိုအပ်ပါကြောင်း၊ လက်ရှိ လုပ်ကိုင်နေသည့် နေ့စားဝန်ထမ်းများကို ဦးစားပေးခန့်ထား ပေးပါဆိုသည့်နေရာတွင် ခြွင်းချက်လေး အချို့ရှိပါကြောင်း၊ အလုပ်တကယ်ခန့်တော့မည့် အချိန်တွင် အသက် ဘယ်နှနှစ်ထက်မကြီးရဆိုသည့် နိုင်ငံ့ဝန်ထမ်းဥပဒေကို မိမိတို့လိုက်နာရပါကြောင်း၊ ထိုအခါ ဘောင်ထဲဝင်နေသည့် နေ့စား ဝန်ထမ်းများကို မိမိတို့ဝန်ကြီးဌာနအနေဖြင့် ဦးစားပေးခန့်ထားပေးမည်ဆိုသည်လည်း ပြန်လည်ရှင်းလင်း ဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်

Source: https://www.pyithuhluttaw.gov.mm/question-3749