တောင်ကြီးခရိုင်၊ ဖယ်ခုံမြို့အတွင်း၍ရှိ မိုးဗြဲဆည်(ခ)ဖယ်ခုံအင်း၏ အရှေ့ဘက်တွင် နေထိုင်သော ကျေးရွာများကို လျှပ်စစ်ဓာတ်အားဖြန့်ဖြူးပေးရန် အစီအစဉ်ရှိ/မရှိနှင့်စပ်လျဉ်းသည့်မေးခွန်း

တောင်ကြီးခရိုင်၊ ဖယ်ခုံမြို့အတွင်း၍ရှိ မိုးဗြဲဆည်(ခ)ဖယ်ခုံအင်း၏ အရှေ့ဘက်တွင် နေထိုင်သော ကျေးရွာများကို လျှပ်စစ်ဓာတ်အားဖြန့်ဖြူးပေးရန် အစီအစဉ်ရှိ/မရှိနှင့်စပ်လျဉ်းသည့်မေးခွန်း

ဦးဖိုးမောင်( ဖယ်ခုံ မဲဆန္ဒနယ်)

ရှမ်းပြည်နယ် (တောင်ပိုင်း)၊ မိုးဗြဲဆည် (ခေါ်) ဖယ်ခုံအင်းဟာ ၁၉၆၈ ခုနှစ် ၁ လပိုင်းမှ ၁၉၇၁ ခုနှစ် ၉ လပိုင်းအထိ ၃ နှစ်ကျော်ကာလအတွင်း ဘီလူးချောင်းကို ရေကာတာတည်ဆောက်ရာမှ ဖြစ်ပေါ်လာသည့် အိမ်တစ်အိမ်ဖြစ်ပါကြောင်း၊ မိုးဗြဲရေကာတာမတည်ဆောက်မီ အချိန်က ဘီလူးချောင်း ဘေးတစ်ဘက်တစ်ချက်တွင် နန်းသုတ်ရွာ၊ စကွယ်ရွာ၊ ပါလိရွာ၊ ဈေးတန်းရွာ၊ ဘဝသိရွာ၊ လဟွဲရွာ၊ နောင်လိုင်ရွာစသည့် ရွာများသည် ဘီလူးချောင်းကို အမှီပြုပြီး လယ်ယာစိုက်ပျိုးရေး၊ ငါးမွေးမြူရေးစသည်‌့ လုပ်ငန်းများဖြင့် အသက်မွေးဝမ်း နေထိုင်ခဲ့ကြပါကြောင်း၊ မိုးဗြဲဆည်တည်ဆောက်ပြီးနောက် စိုက်ပျိုးမြေ ဧက ၁၀၀၀၀ ကျော် ရေနစ်မြုပ်ခံရသည်‌့အပြင် ဘီလူးချောင်းဘေးရှိ ကျေးရွာများသည် ရေမြုပ်ဧရိယာလွတ်ရာ အင်း၏အရှေ့ဘက်ကမ်းရှိ တောင်ကုန်း/တောင်စောင်းများအပေါ်သို့ ပြောင်းရွှေ့နေထိုင်ကြရပါကြောင်း ထို့ကြောင့် ၎င်းရွာများသည် ယနေ့ထိတိုင် ဖွံ့ဖြိုးမှုနောက်ကျနေဆဲ ကျေးရွာများဖြစ်ပါကြောင်း၊

မိုးဗြဲဆည်တည်ဆောက်ရခြင်း ရည်ရွယ်ချက်ကို လေ့လာကြည်‌့သည့်အခါ (၁) အချက် ဆည်၏ အောက်ဘက် လယ်ဧက ၂ သောင်းကျော်ကို နွေ၊ မိုး၊ ဆောင်းရာသီမရွေးစိုက်ပျိုးနိုင်ရန်၊ (၂) အချက် ဘီလူးချောင်းရေကြီး ရေလျံမှုကို ကာကွယ်ပေးရန်အတွက်၊ (၃) အချက် လောပီတရေအားလျှပ်စစ် စက်ရုံ ၂၀ မီဂ္ဂါဝပ်ရှိသော စက်ငါးလုံးအတွက် တစ်နှစ်ပတ်လုံး လိုအပ်သောရေကို ထိန်းညှိဖြည်‌့ဆည်း ပေးရာတွင် အဓိကအရေးပါသော အခန်းကဏ္ဍတွင် ပါဝင်သောကြောင့် မိုးဗြဲဆည်ကို တည်ဆောက်ရခဲ့ကြောင်း လေ့လာသိရှိရပါသည်။

လောပိတရေအားလျှပ်စစ်စက်ရုံမှ မြန်မာပြည်အနှံ့ မဟာဓာတ်အားလိုင်းနှင့် လျှပ်စစ်ဓာတ်အား ဖြန့်ဝေပေးနိုင်ခဲ့သော်လည်း မိုးဗြဲဆည်တည်ဆောက် မှုကြောင့် ပြောင်းရွှေ့ခံခဲ့ရသော ဖယ်ခုံမြို့နယ် အရှေ့ဘက်ကမ်းရှိ ကျေးရွာများတွင် ယနေ့အချိန်အထိ လျှပ်စစ်မီးခံစားခွင့် မရရှိသောကြောင့် အထက်ပါမေးခွန်းကို မေးမြန်းရခြင်း ဖြစ်ပါသည်။

ဖယ်ခုံမြို့နယ်၊ အင်းအရှေ့ဘက်ရှိ နောင်လိုင်ကျေးရွာအုပ်စု နောင်လိုင်၊ ဆောင်ဒူထက်၊ ဆောင်ဒူအောက်၊ ကျွန်းကုန်းကျေးရွာ ၄ ရွာ လျှပ်စစ်ဓာတ်အား ရရှိစေနိုင်ရေးအတွက် မိုးဗြဲဆည်တွင် တည်ရှိသည့် မိုးဗြဲဓာတ်အားခွဲရုံမှတစ်ဆင့် ဆီးမီလောကျေးရွာအထိကို ဓာတ်အားပေးထားသော ၁၁ ကေဗွီဓာတ်အားလိုင်းမှ ၁၁ ကေဗွီဓာတ်အားလိုင်း ၂.၈ မိုင် ထပ်မံဆွဲသွားပြီး ၄၀၀ ဗို့လိုင်း စုစုပေါင်း မိုင် ၄ မိုင်နှင့် ၁၁/ဝ.၄ ကေဗွီ ၂၀၀ ကေဗွီအေ ထရန်စဖော်မာ နှစ်လုံး တည်ဆောက်တပ်ဆင် ပေးရမည်ဖြစ်ပါကြောင်း၊

အင်းအရှေ့ဘက်ရှိ ကုရင်ကျေးရွာအုပ်စု၊ ရွှေစန်းကျေးရွာ လျှပ်စစ်ဓာတ်အား ရရှိနိုင်စေရေးအတွက် နောင်လိုင်ကျေးရွာက လျှပ်စစ်ဓာတ်အား ရောက်ရှိသွားပြီဆိုလျှင် ၎င်းကျေးရွာမှတစ်ဆင်‌့ နောက်ထပ် ၁၁ ကေဗွီဓာတ်အားလိုင်း ၂.၈ မိုင်၊ ၁၁/ဝ.၄ ကေဗွီ ၂၀၀ ကေဗွီအေ ထရန်စဖော်မာတစ်လုံးနှင့် ၄၀၀ ဗို့ ဓာတ်အားလိုင်း၂.၅ မိုင် တည်ဆောက်ပေးရမည် ဖြစ်ပါကြောင်း၊ ကုရင်ကျေးရွာအုပ်စု၊ နန်းဟူး၊ ဆင်ဖြူ၊ တောင်ပို့ကြီး၊ ကုန်းပေါ၊ ညောင်မွန်း၊ ငါးမူးကျေးရွာခြောက်ရွာ လျှပ်စစ်ဓာတ်အား ရရှိစေနိုင်ရန် ရွှေစန်းကျေးရွာ လျှပ်စစ်ဓာတ်အားရရှိသွားလျှင် ၎င်းကျေးရွာမှတစ်ဆင့် နောက်ထပ် ၁၁ ကေဗွီ ဓာတ်အားလိုင်း ၄ မိုင်၊ ၁၁/ဝ.၄ ကေဗွီ ၂၀၀ ကေဗွီအေ ထရန်စဖော်မာ လေးလုံးနှင့် ၄၀၀ ဗို့လိုင်း ၇ မိုင် တည်ဆောက်ပေးရမည် ဖြစ်ပါကြောင်း၊

သို့ပါ၍ နောင်လိုင်ကျေးရွာအုပ်စုတွင်ရှိသည့် ရွာလေးရွာနှင့် ကုရင်ကျေးရွာအုပ်စုတွင်ရှိသည့် အထက်ပါ ကျေးရွာခုနှစ်ရွာ လျှပ်စစ်ဓာတ်အားရရှိစေနိုင်ရန် ဆောင်ရွက်ရမည်‌့ လုပ်ငန်းများကို  ၂၀၁၉-၂၀ ဘဏ္ဍာရေးနှစ် ရှမ်းပြည်နယ်အစိုးရ၏ ဘတ်ဂျက်ရန်ပုံငွေတွင် ထည်‌့သွင်းလျာထားပြီး အကောင်အထည်ဖော် ဆောင်ရွက်ပေးသွားမည် ဖြစ်ပါကြောင်း၊ ဆက်လက်ပြီး အင်းအရှေ့ဘက်တွင် ရှိသည့် လွယ်ပေါကျေးရွာအုပ်စု၊ မခေခမ်း၊ လွယ်ဟယ်၊ ပိန်းနဲကုန်း၊ နန်းဆွတ်၊ နန်းပေါ်လုံ၊ လွယ်ပေါနှင့် ဆောင်နန်းခဲကျေးရွာခုနှစ်ရွာ၊ နားဟီးကျေးရွာအုပ်စု၊ နားဟီး၊ အုန်တိုင်း၊ နားကုန်း၊ ကာလ၊ လွိုင်စတီ၊ ဘန်းခူး၊ နန်းစမုတ်နှင့် ပုံးလောကျေးရွာရှစ်ရွာ လျှပ်စစ်ဓာတ်အား ရရှိစေနိုင်ရေးအတွက် ညောင်မွန်းတွင် ၃၃/၁၁ ကေဗွီ ၅ အမ်ဗွီအေ ဓာတ်အားခွဲရုံတစ်ရုံကို ပြည်ထောင်စု၏ ငွေလုံးငွေရင်းဘတ်ဂျက် ရန်ပုံငွေဖြင့် ၂၀၂၃-၂၄ ဘဏ္ဍာရေးနှစ်တွင် တည်ဆောက် ဆောင်ရွက်ရန် လျာထားရေးဆွဲထားပြီး ဖြစ်ပါကြောင်း၊ အဆိုပါ ၃၃ ကေဗွီ ဓာတ်အားခွဲရုံ တည်ဆောက်ပြီးသည့်အချိန်တွင် အဆိုပါကျေးရွာများအတွက် လိုအပ်သော ၁၁ ကေဗွီ ဓာတ်အားလိုင်းနှင့် ထရန်စဖော်များ ၄၀၀ ဗို့ဓာတ်အားလိုင်းများ တည်ဆောက်ခြင်းလုပ်ငန်းများကို ရှမ်းပြည်နယ်အစိုးရအဖွဲ့ ပြည်နယ်အစိုးရ ရန်ပုံငွေတွင် ထည်‌့သွင်းလျာထားပြီး ဆက်လက်ဆောင်ရွက် ပေးသွားမည် ဖြစ်ပါကြောင်း ရှင်းလင်းဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်      

Source: https://www.pyithuhluttaw.gov.mm/question-3833