မုံရွာမြို့နယ်ရှိ ကျောက္ကာရွာရေနံချက်ဖိုများနှင့် ဖန်ခါးကျင်းနယ်မြေ ရေနံချက်ဖိုများ အပါအဝင် စစ်ကိုင်းတိုင်းဒေသကြီးတစ်ခုလုံးရှိ ရေနံချက်ဖိုများကို ပိုမိုအဆင့်မြင့်သော ရေနံချက် စက်ရုံများအဖြစ် မြေဧရိယာ(၂)ဧကဖြင့် တည်ဆောက်ခွင့်ပြုပေးနိုင်ခြင်းရှိ/မရှိနှင့် စပ်လျဉ်း သည့်မေးခွန်း

ဦးညွှန့်အောင် (မုံရွာ မဲဆန္ဒနယ်)

မုံရွာမြို့နယ်ရှိ ကျောက္ကာရွာရေနံချက်ဖိုများနှင့် ဖန်ခါးကျင်းနယ်မြေ ရေနံချက်ဖိုများ အပါအဝင် စစ်ကိုင်းတိုင်းဒေသကြီးတစ်ခုလုံးရှိ ရေနံချက်ဖိုများကို ပိုမိုအဆင့်မြင့်သော ရေနံချက် စက်ရုံများအဖြစ် မြေဧရိယာ(၂)ဧကဖြင့် တည်ဆောက်ခွင့်ပြုပေးနိုင်ခြင်းရှိ/မရှိနှင့် စပ်လျဉ်း သည့်မေးခွန်း

          မြန်မာတစ်နိုင်ငံလုံးတွင် တရားဝင်လိုင်စင်ထုတ်ပေးထားသည့် ရေနံချက်ဖိုပေါင်း ၄၄၆ ဖိုနှင့် လုပ်ငန်းရှင် ၁၄၇ ဦးရှိသည်ဟု သိရှိရပါကြောင်း၊ ရေနံချက်ဖိုပေါင်းသည် စစ်ကိုင်းတိုင်း ဒေသကြီးတွင် အများဆုံးဖြစ်ပြီး ၃၇၉ ခုရှိသည်ဟု သိရှိရပါကြောင်း၊ အဆိုပါ ရေနံချက်ဖိုများ သည် ထင်းကိုသာ လောင်စာအဖြစ် အသုံးပြုနေရပါသေးသည့်အတွက် အနီးနားရှိ သစ်တော ၊ သစ်ပင်များ ကုန်ဆုံးကုန်ပြီဖြစ်ပါကြောင်း၊ ၂၀၀ ခန့် ရေနံချက်ဖိုသည် ချက်ပြီးသား ရေနံချေးကို ချေးချွတ်ရန် ဆာလ်ဖျူရစ်အက်ဆစ် ငါးဂါလန်ပုံး ငါးလုံးခန့်လည်း သုံးကြရသည့်အတွက် ယင်းမှ ထွက်ရှိသည့် ကတ္တရာချေးများလည်း နီးစပ်ရာမြေသဘာဝ ပတ်ဝန်းကျင်ကို ပျက်စီးစေပါ ကြောင်း၊ မီးအန္တရာယ်ကိုလည်း မကြာခဏ ကြုံတွေ့ရပါကြောင်း၊ထို့ကြောင့်   ရေနံချက်ဖိုများကို ထင်းအသုံးမပြုရသော၊ ကတ္တရာမထွက်သော၊ မီးအန္တရာယ်နည်း ပါးသောအဆင့်သို့ ပြောင်းလဲ အဆင့်မြှင့်ပေးရန် လိုအပ်ပါကြောင်း၊ ရေနံချက်ဖို ပိုင်ရှင်များအနေဖြင့်လည်း ပြောင်းလဲလိုကြ ပါကြောင်း၊ သို့ဖြစ်ပါ၍ လုပ်ငန်းရှင်များ၊ အလုပ်သမား၊ နိုင်ငံတော် အားလုံးအဆင်ပြေချောမွေ့ စေရန်၊ အသေးစားရေနံချက်ရုံတည်ဆောက်ခြင်းကို မြေအကျယ်အဝန်းနှစ်ဧကဖြင့် ခွင့်ပြု လိုင်စင်ထုတ်ပေး နိုင်ခြင်းရှိ/မရှိ၊ အစီအစဉ်ရှိပါက မည်ကဲ့သို့ ပြုလုပ်ပေးပါမည်၊ အစီအစဉ်ရှိပါက မည်သည့် အတွက်ကြောင့်ဆိုသည်ကို သိရှိလိုပါကြောင်း မေးမြန်းပါသည်။

          လျှပ်စစ်နှင့်စွမ်းအင်ဝန်ကြီးဌာနသည် ဒေသတွင်းထွက်ရှိသည့် ရေနံလက်ယက်တွင်းများမှ ထုတ်လုပ်သော ရေနံစိမ်းများကိုအသုံးပြု၍ ချက်လုပ်ကြသည့် မိရိုးဖလာရေနံချက်ဖိုများကို ထုတ်လုပ်နည်း စနစ် စနစ်တကျဖြင့် ဆောင်ရွက်လာကြစေရန်ရည်ရွယ်ကာ ဒေသန္တရရေနံ ချက်လုပ်ခြင်းလုပ်ငန်းများ လုပ်ကိုင်ဆောင်ရွက်ခွင့် ခွင့်ပြုမိန့်အတွက် အမိန့်ကြော်ငြာစာ (၆/၂၀၁၅) ကို ၆-၃-၂၀၁၅ ရက်နေ့တွင် ထုတ်ပြန်ခဲ့ပေးပါကြောင်း၊ မိရိုးဖလာ နည်းလမ်း များဖြင့် ရေနံချက်ဖိုများကဆောင်ရွက်သည့် ရေနံချက်လုပ်ငန်းများအား စနစ်တကျ နည်းလမ်းများဖြင့် ဆောင်ရွက်သည့် အသေးစားရေနံချက်လုပ်ခြင်းလုပ်ငန်း(Mini Refinery)သို့ အဆင့်မြှင့်တင် ဆောင်ရွက်နိုင်ရန်အတွက် ယခင်ကထုတ်ပြန်ခဲ့သော အမိန့်ကြော်ငြာ စာ(၆/၂၀၁၅)ကို ပြင်ဆင် သည့်ဒေသန္တရရေနံချက်လုပ်ခြင်းနှင့် အသေးစားရေနံချက် လုပ်ခြင်းဆိုင်ရာ အမိန့်ကြော်ငြာစာ အမှတ်(၂၁၁/၂၀၁၉)ကို ၂၃-၅-၂၀၁၉ ရက်နေ့မှာ ထုတ်ပြန်ပေးခဲ့ပါကြောင်း၊ရေနံချက်စက်ရုံ Mini Refinery တည်ဆောက်မယ့်မြေနေရာအတွက် မြေလွတ်၊ မြေလပ်နှင့် မြေရိုင်းဖြစ်ပါက မြေလွတ် ၊ မြေလပ်နှင့် မြေရိုင်းများစီမံခန့်ခွဲရေးဥပဒေနှင့်အညီ ခွင့်ပြုမိန့် ရယူဆောင်ရွက် သွားရမည်ဖြစ် ကြောင်း၊ မြေပိုင်ဆိုင်မှုနှင့်ပတ်သက်ပြီး ခွင့်ပြုမိန့်ရရှိပါက စက်ရုံတည်ဆောက်မည့် Layout Plan နှင့် Design၊ Detail Drawing များနှင့်အတူ တိုင်းဒေသကြီးအစိုးရအဖွဲ့၏ သဘောထား မှတ်ချက်ဦးစွာ လျှောက်ထားရပါကြောင်း၊ ထို့နောက် မီးသတ်ဦးစီးဌာန၊ ပတ်ဝန်းကျင်ထိန်းသိမ်း ရေးဦးစီးဌာန၊ မြန်မာ့ရေနံထွက်ပစ္စည်း ရောင်းဝယ်ရေးလုပ်ငန်းနှင့် စက်မှုကြီးကြပ်ရေးနှင့် စစ်ဆေးရေးဦးစီးဌာန၊ ခရိုင်၊ မြို့နယ်စီမံခန့်ခွဲရေး ကော်မတီတီ၏ သဘောထားမှတ်ချက်များနှင့် အတူ ဝန်ကြီးဌာနကို ဆက်လက်လျှောက်ထားရပါကြောင်း၊ယခုအခါ တစ်ရက်လျှင် ရေနံစိမ်း ဂါလန် ၃၀၀၀၀ အထိ ချက်လုပ်မည့် အသေးစား ရေနံချက်လုပ်ငန်း(Mini Refinery)အတွက် ဘေးအန္တရာယ်ကင်းရှင်းရေးနှင့် အဆိုပါ လုပ်ငန်းခွင်အတွင်း ရေနံစိမ်းများ၊ ဓာတ်ဆီ၊ ဒီဇယ် ထုတ်လုပ်ပြီး FO များ အသီးသီးကိုသိုလှောင်နိုင်မည့် သိုလှောင်ကန်အဝန်းအဝိုင်း တည်ဆောက် ရန်၊ ရေနံချက်လုပ်မည့် စက်တန်းဧရိယာနှင့် အဆိုပါစက်များကို ထိန်းချုပ်မည့် ပင်မ Control ခန်း၊ ထိန်းချုပ်ခန်းများ၊ ရေနံစိမ်း အပူပေးမီးဖို၊ မီးသတ်ရေကန်၊ မီးသတ်အဆောက်အဦ၊ ၎င်းတို့အတွက် Pump House များနှင့် အအေးခံရေသိုလှောင်ကန်၊ အသုံးပြုပြီး ရေများ စွန့်ပစ်သည့် နေရာ၊ အရန်မီးစက်ထားရန်နေရာ၊ ရေနံစိမ်းများသယ်လာသည့် အချိန်တွင် ဆီတင် ရန်နှင့် ချက်လုပ်ပြီးရေနံနှင့် ဓာတ်ဆီများ၊ ဒီဇယ်များကို ပြန်လည် တင်ရန် အတွက် အသုံးပြုမည့် Pump House များ၊ ပြန်လည်ဖြန့်ဖြူးမည့် Filling Station၊ ရုံးခန်း၊ ဝန်ထမ်းနားနေဆောင်၊ စွန့်ပစ်ပစ္စည်းများ Treatment System များအတွက် လိုအပ်သော မြေနေရာများ စသည့် ကိစ္စရပ်အသီးသီးအတွက် လိုအပ်သည့် မြေနေရာများကို စနစ်တကျလျာထားဆောင်ရွက်ရန် သတ်မှတ်ထားခြင်း ဖြစ်ပါကြောင်း၊မုံရွာမြို့နယ်အတွင်း ကျောက္ကာကျေးရွာရှိ ရေနံချက်ဖိုများနှင့် ဖန်းခါးကျင်းနယ်မြေရှိ ရေနံချက်ဖိုများသည် တစ်ခုနှင့် တစ်ခု တစ်ဆက်တည်း တစ်တန်းတည်း အလွန်နီးကပ်စွာ တည်ရှိသည့်အတွက်ကြောင့် ဘေးအန္တရာယ်တစ်စုံတစ်ရာဖြစ်ပေါ်လာပါက လုံလောက်သည့် အန္တရာယ်ကင်း အကွာအဝေးမရှိသည့် အနေအထားတွင် ဖြစ်ပေါ်နေပါကြောင်း၊ ရေနံချက်ဖို များကို ပိုမိုအဆင့်မြင့်သည့် ရေနံချက်စက်ရုံများ တည်ဆောက်နိုင်ရန် Mini Refinery အတွက် လုံလောက်သည့် လုပ်ငန်းဧရိယာကို ကန့်သတ်သတ်မှတ် ပေးထားခြင်းဖြစ် ပါကြောင်း၊ မတော်တဆမီးလောင်လာပါက ဘေးပတ်ဝန်းကျင်တစ်ခုလုံး၊ အခြားရင်းနှီမြှုပ်နှံသူများအားလုံး ပျက်စီးဆုံးရှုံးခြင်းကြုံတွေ့ရနိုင်ပါကြောင်း၊ ထို့ကြောင့် အသေးစားရေနံချက် လုပ်ငန်း များ၏ လုပ်ငန်းဧရိယာအကျယ်အဝန်းသည် စုစုပေါင်း စတုရန်းပေ အားဖြင့် ၁၇၄၂၄၀ စတုရန်း ပေ၊ ဧကအားဖြင့် လေးဧကဟု သတ်မှတ်ထားခြင်းဖြစ်ပါကြောင်း၊ လက်ရှိ ရေနံချက်ဖိုများအတွက်ကို Mini Refinery အတွက် ကန့်သတ်ထားသည့် ဧရိယာ အကျယ်အဝန်းသည် ရင်းနှီးမြှုပ်နှံသူများ အတွက် မတော်တဆဘေးအန္တရာယ်ဖြစ်လာခဲ့ပါက အနီးအနားတွင် နေထိုင်သူများအပါအဝင် အခြားသောရေနံချက်ဖိုများ၏ ပစ္စည်းများ ထိခိုက် ဆုံးရှုံးမှုနည်းပါးစေရန် လုံလောက်သည့် Safety Distance များရရှိစေရန် နိုင်ငံတကာ၏ လုပ်ထုံးလုပ်နည်းများနှင့်ကိုက်ညီအောင် သတ်မှတ်ပေးထားခြင်းဖြစ်သောကြောင့် မြေဧက နှစ်ဧကဖြင့်  ခွင့်ပြုပေးနိုင်ခြင်းမရှိပါကြောင်း ပြန်လည်ဖြေကြားပါသည်။

လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး  ဒေါက်တာထွန်းနိုင်

လျှပ်စစ်နှင့်စွမ်းအင်

https://www.pyithuhluttaw.gov.mm/question-4045