ကြို့ပင်ကောက်မြို့နယ်၊ ကြို့ကုန်း ကျေးရွာအုပ်စုအတွင်းရှိ အုန်းနှဲကုန်း၊ သံဖြူချောင်း၊ သက်ရင်းကုန်း ကျေးရွာများ လျှပ်စစ်ဓာတ်အား အဆင်ပြေစွာ ရရှိနိုင်ရေးအတွက် မည်သို့ဆောင်ရွက် ပေးမည်ကို သိလိုခြင်းနှင့် စပ်လျဉ်းသည့် မေးခွန်း

ဦးဌေးမင်းသိန်း (ကြို့ပင်ကောင်မဲဆန္ဒနယ်)

                   ကြို့ပင်ကောက်မြို့နယ်၊ ကြို့ကုန်းအုပ်စု၊ အုန်းနှဲကုန်းကျေးရွာ၊ သံဖြူကျောင်း ကျေးရွာနှင့် သက်ရင်းကုန်း ကျေးရွာများသည် ကြို့ပင်ကောက် မြို့နယ်နှင့် ဇီးကုန်းမြို့နယ် နယ်နိမိတ်ဒေသများတွင် ဖြစ်ပြီး ကျေးရွာမီးလင်းရေးကို ၁၉၉၄ ခုနှစ်တွင် ၅၀ ကေဗွီအေ ထရန်စဖော်မာ တည်ဆောက်၍ ဆောင်ရွက်ခဲ့ခြင်းဖြစ်ပြီး ယခုအချိန်တွင် မီတာ ၁၄၇ လုံး တပ်ဆင် အသုံးပြုနေခြင်း ဖြစ်ကြောင်း။ ဒေသဖွံ့ဖြိုးတိုးတက်လာသည်နှင့်အညီ Capacity တိုးမြှင့်ဆောင်ရွက်ရန်နှင့် အိမ်ခြေအားလုံး လျှပ်စစ်ဓာတ်အားရရှိအသုံးပြုရန် လိုအပ်လာသည် ဖြစ်ကြောင်း၊ NEP နှစ်မိုင်ပတ်လည် မီးလင်းရေးဆောင်ရွက်သည့်အချိန်တွင် မီးလင်းပြီး ကျေးရွာ များ ဖြစ်သည့်အတွက် မပါဝင်ခဲ့ကြောင်း၊ လက်တွေ့တွင် အိမ်ခြေအားလုံးလွှမ်းခြုံ၍ လျှပ်စစ်       ဓာတ်အား မရရှိကြသေးကြောင်း၊ ကြို့ပင်ကောက် မြို့နယ်ဘက်ခြမ်းတွင် ထရန်စဖော်မာ တည်ဆောက်ထားသော်လည်း ဇီးကုန်း မြို့နယ်၊ မရင်းကျေးရွာ မီးလင်းရေး ကော်မတီမှတစ်ဆင့် လျှပ်စစ်ဓာတ်အားခများ၊ အခြားဝန်ဆောင်မှု စရိတ်စခများ ပေးချေနေရခြင်း ဖြစ်ကြောင်း၊ ကျေးရွာ မီးလင်းရေးအတွက် မြို့နယ်နှစ်မြို့နယ်တွင် လျှပ်စစ်အင်ဂျင်နီယာများနှင့် တွေ့ဆုံ ညှိနှိုင်းမှုအရ လက်ရှိ ထရန်စဖော်မာအား Capacity တိုးမြှင့်ပေးပြီး သံဖြူချောင်းကျေးရွာအတွက် ခွဲထုတ်ပြီး သီးသန့် 11 KV နှင့် ထရန်စဖော်မာ တစ်လုံးတည်ဆောက်မည်ဆိုပါက သင့်တော် မည်ဟု သိရကြောင်း၊ ၎င်းရွာများသည် ရွာခွဲများဖြစ်သည့်အတွက် သီးသန့်စီ မီးလင်းရေး ကော်မတီ တစ်ခုစီနှင့် ၄၄၀ လိုင်းမှ စတင်ပြီး တည်ဆောက်မည်ဆိုပါက ရေရှည်တွင် အဆင်ပြေ နိုင်မည်ဖြစ်သည့်အပြင် လျှပ်စစ်အန္တရာယ်လည်း ကင်းစေမည် ဖြစ်ကြောင်း၊မိမိတို့ SDG (၁၇) အောင်မြင်စေရန် လျှပ်စစ်အန္တရာယ်နှင့် သီးခြားဝန်ဆောင်ခများ သက်သာစေရန်နှင့် ပြည်သူများ အချင်းချင်း ညီညွတ်စေချင်သည့်အတွက် ဖြစ်ကြောင်း၊ အုန်းနှဲကုန်းကျေးရွာသည် ၁၉၉၄ ခုနှစ်တွင်တည်ဆောက်ခဲ့သည့် ၅၀ ကေဗွီအေ ထရန်စဖော်မာမှတစ်ဆင့် မီးသွယ်တန်းထားသည့် အတွက် တစ်ရွာနှင့်တစ်ရွာ ဝေးကွာမှုများသည့်အတွက် ဓာတ်အား ပျောက်ဆုံးမှုများနှင့် မနိုင်မနင်းဓာတ်အားအသုံးပြုနေရခြင်းဖြစ်ကြောင်း၊ သစ်သားတိုင်ဖြင့် သွယ်တန်းထားသည့် အတွက် လျှပ်စစ်ဓာတ်ကြိုးများ ပြတ်ကျခြင်းများလည်း ရှိခဲ့ကြောင်း၊ ကျွဲ၊ နွား သေဆုံးမှုများနှင့် လူထိခိုက်ဒဏ်ရာရခဲ့ဖူးသည့် သမိုင်းကြောင်းများလည်း ရှိခဲ့ကြောင်း၊ ဒေသတစ်ခုလုံးကိုခြုံပြီး ကရင်ကုန်းရွာ၊ အိုးဘိုစုရွာ၊ သံဖြူချောင်းရွာ 11 KV လိုင်း တည်ဆောက်မည်ဆိုပါက အသင့်တော်ဆုံးတစ်ခု ဖြစ်လာမည်ဖြစ်သည့်အတွက် ကြို့ပင်ကောက်မြို့နယ်၊ ကြို့ကုန်းအုပ်စု၊ အုန်းနှဲကုန်းကျေးရွာ၊ သံဖြူကျောင်းကျေးရွာနှင့် သက်ရင်းကုန်း ကျေးရွာရှိ အိမ်ထောင်စုတိုင်း လျှပ်စစ်ဓာတ်အားအဆင်ပြေစွာ ရရှိနိုင်ရေးအတွက် မည်သို့ဆောင်ရွက်ပေးမည်ကို သိရှိလိုပါ ကြောင်း မေးမြန်းပါသည်။

              ပဲခူးတိုင်းဒေသကြီး (အနောက်ပိုင်း)၊ ကြို့ပင်ကောက်မြို့နယ်၊ မယင်းချောင်းခွ ကျေးရွာအုပ်စု၊ မယင်း(အရှေ့) ကျေးရွာ၏ ၁၁/၀.၄ ကေဗွီ ၅၀ ကေဗွီအေ ထရန်စဖော်မာမှ အုန်းနှဲ ကုန်းကျေးရွာနှင့် သက်ရင်းကုန်း ကျေးရွာတို့သို့ ၄၀၀ ဗို့ ဓာတ်အားလိုင်း ပေ ၇၇၀၀ နှင့် သံဖြူချောင်း ကျေးရွာသို့ ၄၀၀ ဗို့ ဓာတ်အားလိုင်း ပေ ၂၈၀၀ ကို ကိုယ်ထူကိုယ်ထ တည်ဆောက်ပြီး ၁၉၉၅ ခုနှစ်တွင် စတင် လျှပ်စစ်ဓာတ်အား သုံးစွဲခဲ့ကြောင်း။ ထို့သို့ သုံးစွဲစဉ်ကာလက မီးသုံးသူဦးရေ နည်းပါးသည့်အတွက် ဗို့အားပြည့်ဝစွာ ရရှိခဲ့သော်လည်း ယခုအခါ မီးသုံးသူဦးရေ တဖြည်းဖြည်း များပြားလာသည်နှင့် အမျှ ဗို့အားကျဆင်းမှု တွေ့ကြုံလာရခြင်း ဖြစ်ကြောင်း၊ အုန်းနှဲကုန်း၊ သံဖြူချောင်းနှင့် သက်ရင်း ကုန်း ကျေးရွာများ လျှပ်စစ်ဓာတ်အား ကောင်းမွန်စွာ ရရှိနိုင်ရန်အတွက် လက်ရှိ အမျိုးသား လျှပ်စစ်ဓာတ်အားရရှိရေး စီမံကိန်းပထမအဆင့်အဖြစ်ရန် ကြီးအောင်ကျေးရွာ ၊  လျှပ်စစ် ဓာတ်အားရရှိရေး ဆောင်ရွက်လျက်ရှိသည် ၁၁ ကေဗွီ ဓာတ်အားလိုင်းမှ ဓာတ်အားကို ချိတ်ဆက် ရယူပြီး အုန်းနှဲကုန်းကျေးရွာသို့  ၁၁ ကေဗွီ ဓာတ်အားလိုင်း (၂၆၀၀) ပေ နှင့် ၁၁/၀.၄ ကေဗွီ ၁၀၀ ကေဗွီအေ ထရန်စဖော်မာ (၁) လုံးအား လည်းကောင်း၊ အုန်းနှဲကုန်းကျေးရွာထံသို့ ၁၁ ကေဗွီ ဓာတ်အားလိုင်းမှတစ်ဆင့် ဓာတ်အားချိတ်ဆက်ရယူကာ သက်ရင်းကုန်းကျေးရွာထံ ၁၁ ကေဗွီ ဓာတ်အားလိုင်း  ပေ ၂၁၀၀ နှင့် ၁၁/၀.၄ ကေဗွီ ၁၀၀ ကေဗွီအေ ထရန်စဖော်မာ တစ်လုံး အား လည်းကောင်း၊ အမျိုးသားလျှပ်စစ် ဓာတ်အားရရှိရေးစီမံကိန်း  ပထမအဆင့်ဖြင့် ရန်နိုင် ကျေးရွာ လျှပ်စစ်ဓာတ်အားရရှိရန် တည်ဆောက်ဆောင်ရွက်လျက်ရှိသည့် ၁၁ ကေဗွီဓာတ်အား လိုင်းမှ တစ်ဆင့် ဓာတ်အားချိတ်ဆက်ပြီး သံဖြူချောင်းကျေးရွာသို့ ၁၁ ကေဗွီ ဓာတ်အားလိုင်း  ပေ ၃၅၀၀ နှင့် ၁၁/၀.၄ ကေဗွီ ၁၀၀ ကေဗွီအေ ထရန်စဖော်မာ တစ်လုံးတို့ကို တည်ဆောက် ဆောင်ရွက်ပေးရန် လိုအပ်ကြောင်း၊ အဆိုပါကျေးရွာသုံးရွာ လျှပ်စစ်ဓာတ်အား ရရှိရန် လိုအပ် သည့် တင်ပြပါလုပ်ငန်းများ ကိ ၂၀၂၀-၂၀၂၁ ဘဏ္ဍာရေးနှစ်မှ စတင်ပြီး ပဲခူးတိုင်းဒေသကြီး အစိုးရ၏ ရန်ပုံငွေဖြင့် ထည့်သွင်းလျာထားဆောင်ရွက်ရန် ညှိနှိုင်းဆောင်ရွက်ပေးလျက် ရှိပါကြောင်းနှင့် ဘဏ္ဍာငွေ ခွင့်ပြုချက် ရရှိသည်နှင့် အကောင်အထည်ဖော် ဆောင်ရွက်ပေးသွားမည် ဖြစ်ပါကြောင်း ရှင်းလင်း ဖြေကြားပါသည်။

လျှပ်စစ်နှင့် စွမ်းအင်ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်

လျှပ်စစ်နှင့်စွမ်းအင်

https://www.pyithuhluttaw.gov.mm/question-4058