မီတာဖတ်ခြင်း၊ မီတာ ကောက်ခံခြင်းများတွင် လျှပ်စစ်သုံးစွဲသူနှင့် လျှပ်စစ်ဌာနတို့အကြား ပွင့်လင်း မြင်သာမှု ရှိရန်အတွက် လူမြင်နိုင်သောနေရာ သို့မဟုတ် အိမ်ခြံဝင်းများ အတွင်းတွင် မီတာပုံးများ ထားရှိရန် အစီအစဉ် ရှိ/မရှိနှင့်စပ်လျဉ်းသည့် မေးခွန်း

                         ဇူလိုင် ၁ ရက်နေ့မှစပြီး လျှပ်စစ်နှင့် စွမ်းအင်ဝန်ကြီးဌာနက လျှပ်စစ်ဓာတ်အားခများကို ၂၀၁၉-၂၀၂၀ ဘဏ္ဍာရေးနှစ်တွင် ကျပ် ၃၂ ဘီလီယံ အမြတ်ရရန် ခန့်မှန်းထားပြီး တိုးမြှင့် ကောက်ခံခဲ့ ပါကြောင်း၊ ပြည်သူများသည် လျှပ်စစ်ဌာန၏ အခက်အခဲနှင့် အကြောင်းအရင်းကို သိရှိကြသည့်အတွက် တာဝန်ကျေစွာ ပေးဆောင်ခဲ့ကြပါကြောင်း၊ သို့သော် လျှပ်စစ်မီတာခ ပိုမိုပေးဆောင် ကြရခြင်းနှင့် အကူလျှပ်စစ်ဌာနနှင့် ပြည်သူများ ကြည်ကြည်ဖြူဖြူ အပြန်အလှန် နားလည်မှုရှိပြီး ပွင့်လင်းမြင်သာမှုဖြင့် ပေးဆောင်ရန် လိုအပ်နေပါကြောင်း၊ပြည်သူများသည် လက်တွေ့တွင် မိမိသုံးစွဲထားသည့် လျှပ်စစ်ယူနစ်များကို လျှပ်စစ်မီတာပုံးများ မှတစ်ဆင့် အလွယ်တကူသိရှိနိုင်မှ လျှပ်စစ်ချွေတာသုံးစွဲရေးမှတစ်ဆင့် မိသားစု စရိတ်ချွေတာရေးကို အထောက်အကူပြုနိုင်မည် ဖြစ်ပါကြောင်း၊ ထို့ပြင် လျှပ်စစ်နှင့်စွမ်းအင်ဝန်ကြီးဌာနသည် ပြည်သူ များမှ ကြည်ဖြူယုံကြည်စွာပေးအပ်သည့် လျှပ်စစ်ခများမှတစ်ဆင့် တစ်နိုင်ငံလုံး လျှပ်စစ် လုံလောက်စွာ ဖြန့်ဖြူးနိုင်ရေး စီမံကိန်းများကို အောင်မြင်အောင် ဆောင်ရွက်နိုင်မည် ဖြစ်ပါ ကြောင်း၊မီတာပုံးအများစုသည် ဓာတ်တိုင်များပေါ်တွင် စုပုံထားရှိပြီး မိမိမီတာသည် မည်သည့် မီတာဖြစ်ကြောင်းမသိနိုင်သည့် အမြင့်တွင်ထားသည့်အတွက် သုံးစွဲသည့်ပမာဏကို အလွယ် တကူ ကိုယ်တိုင်မသိနိုင်၊ မီတာခများကိုလည်း လျှပ်စစ်ဌာနနှင့်ဖြန့်ဖြူးရေးအတွက် တင်ဒါ အောင်ထားသည့် ကုမ္ပဏီများက တောင်းသည့်အတိုင်းပေးရမည်ဟု ယုံကြည်နေသည့်အပြင် လစဉ်မီတာယူနစ်များ ကောက်ယူရာတွင် မကောက်ယူမိသော မီတာယူနစ်အကျန်များနှင့် ပတ်သက်ပြီး သံသယများ ဝင်နေကြပါကြောင်း၊ ထို့ကြောင့် လျှပ်စစ်ဌာနကို ယုံကြည်မှု အားနည်းလာပါကြောင်း၊ မီတာခများကို အမှန်တကယ် ကုန်ကျသင့်သည်ထက် အလွန်အကျွံ ပေးဆောင်နေရသည်ဟု ယူဆလာပါကြောင်း၊ ထို့ကြောင့် လျှပ်စစ်ဌာန၏ စေတနာဖြင့် ဆောင်ရွက်ချက်ကို အဆိုးမြင်လာကြပါကြောင်း၊ ပြည်သူ့ ကိုယ်စားလှယ်များကို ယခုကိစ္စနှင့် ပတ်သက်ပြီး လွှတ်တော်တွင် တင်ပြမေးမြန်းပေးရန် ပြောကြား ခဲ့ကြပါကြောင်း၊ အဆိုးဆုံးသည် နိုင်ငံတော် အစိုးရနှင့် လျှပ်စစ်နှင့် စွမ်းအင်ဝန်ကြီးဌာန၏ ပြည်သူ များအပေါ်တွင်ထားရှိသည့် အခက်အခဲနှင့် စေတနာကို အကောင်းမမြင်နိုင်ခြင်းသည် ပြည်သူ့အကျိုး ကို ဆောင်ရွက်နေသည့် အစိုးရအတွက် မပေါ့ဆသင့်သတိထားသင့်သည့် အကြောင်းကို ထောက်ပြလိုပါကြောင်း၊ ၎င်း အချက်များကြောင့် ပဲခူးမြို့တွင် လျှပ်စစ်ဓာတ်အားဖြန့်ဖြူးရေးလုပ်ငန်းသည် တင်ဒါယူ ဆောင်ရွက်နေသည့် ကုမ္ပဏီကို ဒီဇင်ဘာလ ၄ ရက်နံနက်ပိုင်းက လူအင်အား ၁၀၀ ခန့်ဖြင့် ဆန္ဒ ထုတ်ဖော်ခဲ့ကြသည့်အချိန်တွင် ဓာတ်တိုင်ထိပ်ဖျားရောက် မီတာပုံးများကိစ္စနှင့်ပတ်သက်ပြီး သက်ဆိုင်ရာဌာနများသို့ ဆက်တိုက်တိုင်ကြားခဲ့သော်လည်း ဖြေရှင်းမှုများ မရှိသည့်အတွက် ဆန္ဒထုတ် ဖော်ခဲ့ကြကြောင်းကို သိရှိရပါကြောင်း၊ သို့သော် အမြင့်ဆုံးရောက် မီတာပုံးများနှင့် ပတ်သက်ပြီး ၂၀၁၉ ခုနှစ်၊ ဇူလိုင်လ ၄ ရက်နေ့က လစဉ် သတင်းစာရှင်းလင်းပွဲတွင် လျှပ်စစ်နှင့် စွမ်းအင် ဝန်ကြီးဌာန ဒုတိယအမြဲတမ်းအတွင်းဝန်က ပြည်သူများအနေဖြင့် လျှပ်စစ်အသုံး ပြုရာတွင် ကျသင့် မီတာသုံးစွဲမှုကို အလွယ်တကူဖတ်ရှုနိုင်ရန်အတွက် ဓာတ်တိုင်ပေါ်ရှိ မီတာပုံးများကို အများမြင်သာ သည့်နေရာတွင် ရွှေ့ပြောင်းတပ်ဆင်နိုင်ရန် သက်ဆိုင်ရာ အဖွဲ့များကို ညွှန်ကြားထားကြောင်း၊ ဆောင်ရွက်ရန်အတွက် ဆောင်ရွက်သူများ အဆင်ပြေ စေရန်၊ လုပ်ဆောင်ရန် ကြာမြင့်နိုင်ခြေကို တွက်ချက်ပြီး စီမံချက်တစ်ရပ်ကို တစ်ပတ်အတွင်း ပြန်တင်ရန် ညွှန်ကြားထားကြောင်း ပြောကြားခဲ့ပြီး ရန်ကုန်တိုင်းဒေသကြီး YESC သည် ဓာတ်အားသုံးစွဲသူများ၏ တပ်ဆင်ထားသည့် မီတာ အားလုံးကို ရုံးချုပ်မှကြီးကြပ်ပြီး ခရိုင်၊ မြို့နယ်လျှပ်စစ်မန်နေဂျာရုံးက ဝန်ထမ်းများကိုယ်တိုင် ဓာတ်အားသုံးစွဲသူများနှင့် မျက်မြင်ဖတ်ရှု မှတ်တမ်းတင်၍ မှန်ကန်ကြောင်း လက်မှတ်ရေးထိုး ပေးစေလိုကြောင်းနှင့် ဓာတ်တိုင်ပေါ်တွင် မီတာတပ်ဆင်ပြီး HHU မီတာဖတ်ကိရိယာဖြင့်ဖတ်၍ ကွန်ပျူတာစနစ်ဖြင့် ဆောင်ရွက်နေသည့် မီတာများ၏ ဖတ်ရှုချက်များကို အားလုံးသိရှိနိုင်ရန် အတွက် မီတာဖတ်ပြီး နောက်တစ်နေ့တွင် သက်ဆိုင်ရာ နယ်မြေရှိ ရပ်ကွက်အုပ်ချုပ်ရေးမှူးထံ ပေးပို့အပ်နှံထားမည်ဖြစ်ကြောင်း ပူးပေါင်းဆောင်ရွက်ရန်လည်း မေတ္တာရပ်ခံထားကြောင်း သတင်း များတွင် ဖော်ပြထားသည်ဟု သိရှိရပါကြောင်း၊ထို့ပြင် မီတာပုံးများကို ပြည်သူမြင်သည့်နေရာတွင် ပြန်ချသည့်စရိတ်ကို ပြည်သူကခံစရာမလိုဘဲ ဌာနက ခံမည်ဟု ပြောသွားကြောင်း၊ ထိုသို့ သိရှိခဲ့ရသော်လည်း ပြောသည့်အတိုင်း မြေပြင်တွင် မဆောင်ရွက်နိုင်သေးသည့်အတွက် အထက်တွင် ဖော်ပြခဲ့သည့် ပြဿနာများ၊ သံသယများ၊ အထင် လွဲမှုများကို ယနေ့တိုင်ပေါ်ပေါက်လျက် ရှိနေရခြင်း ဖြစ်ပါကြောင်း၊ ထို့ကြောင့် သုံးစွဲသူများ မြင်နိုင်မည့် နေရာဖြစ်သည့် နေအိမ် သို့မဟုတ် သင့်လျော်ရာ နေရာတွင် မီတာပုံးများ ထားရှိရန် လိုအပ်နေသည့်အတွက် မီးသုံးစွဲသူ မဲဆန္ဒရှင်များ၏ အလိုနှင့်အညီ လျှပ်စစ်ဌာနနှင့် ပြည်သူ အစဉ် ကြည်ဖြူ၍ နှစ်ဦးနှစ်ဖက် ဆန္ဒပြည့်ဝစေရန် မိမိအနေဖြင့် မီတာပုံးများကို လက်လှမ်း၊ မျက်မှန်း မီသည့်နေရာတွင် ထားခြင်းမရှိဘဲ ဓာတ်တိုင်များအပေါ် အမြင့်ဆုံးတွင် တင်ထားသည့် အခြေအနေ၊ ဓာတ်အား သုံးစွဲမှုနှုန်းထားများ တိုးမြှင့်ထားချိန်တို့တွင် မိမိတို့ သုံးစွဲထားသည့် မီတာယူနစ်များကို ပြည်သူတွေက ပွင့်လင်းမြင်သာစွာ သိရှိ သုံးသပ်နိုင်ရန်အတွက် ယခုမေးခွန်းကို မေးမြန်းရခြင်း ဖြစ်ပါကြောင်း မေးမြန်းပါသည်။

          လျှပ်စစ်နှင့် စွမ်းအင်ဝန်ကြီးဌာနပိုင် မီတာများကို လူမြင်နိုင်သည့်နေရာ သို့မဟုတ် အိမ်ခြံဝင်းများ အတွင်း တပ်ဆင်ထားခြင်းနှင့် အဝေးမှ Hand Held Unit (HHU)ကိရိယာဖြင့် ဖတ်ယူရန် တိုင်ပေါ်တပ်ဆင်မီတာဟူ၍ နှစ်မျိုးအသုံးပြုထားပါကြောင်း၊ မြန်မာနိုင်ငံတစ်ဝန်းလုံး တွင်လျှပ်စစ်နှင့်စွမ်းအင်ဝန်ကြီးဌာနပိုင်မီတာတပ်ဆင်သုံးစွဲထားမှုသည်စုစုပေါင်း  ၅၀၆၄၈၉၄ လုံးရှိပြီ ဖြစ်ပါကြောင်း၊ တိုင်ပေါ်တပ်ထားသည့် မီတာများသည် ရန်ကုန်တိုင်းဒေသကြီးအတွင်းတွင် ၃၆၁,၃၇၂ လုံး၊ မန္တလေးတိုင်းဒေသကြီးအတွင်းတွင် ၁၃၇၁၇၂ လုံး၊ ကျန်တိုင်းဒေသကြီးနှင့် ပြည်နယ်များ၌ ၂၇၃၈၇၈ လုံး တိုင်ပေါ် တပ်ဆင်ထားခြင်း ဖြစ်သည့်အတွက် တစ်နိုင်ငံ လုံး စုစုပေါင်း တိုင်ပေါ်တွင် တပ်ထားသည့် အရေအတွက် ပေါင်းသည် ၇၇၂၄၂၂ လုံး ရှိသည့်အတွက် တပ်ဆင်သုံးစွဲနေသည့် မီတာစုစုပေါင်း၏ ၁၅.၃ ရာခိုင်နှုန်းခန့် ရှိနေပါကြောင်း၊လက်ရှိတွင် ပထမဆုံး မီတာခ တိုးမြှင့်ကောက်ခံရန်အတွက် စီမံချက်ဖြင့် မီတာများ ဖတ်ရှုခဲ့ ရာတွင် တိုင်ပေါ်တပ်မီတာ၏ ယူနစ်ဂဏန်း Display ကို ဓာတ်ပုံမှတ်တမ်းရိုက်၍ အိမ်ရှင်ကို သက်သေ ပြသပြီး၊ အိမ်ရှင်နှင့် ဖတ်ရှုသူနှစ်ဦးတို့၏ အတည်ပြုပြီး လက်မှတ်ရေးထိုး ဖတ်ရှုသည့် စနစ်ဖြင့် ပွင့်လင်းမြင်သာစွာ ရှိစေရန် ဆောင်ရွက်ခဲ့ပါကြောင်း၊ တိုင်ပေါ်တွင် တပ်ထားပြီးသည့် မီတာအလုံး ခုနှစ်သိန်းကျော်ကို လူမြင်နိုင်သည့်နေရာ သို့မဟုတ် အိမ်ခြံဝင်းများအတွင်း မီတာပုံးများဖြင့် ပြောင်းရွှေ့ တပ်ဆင်ပေးပါက စုစုပေါင်းကုန်ကျငွေသည် ၃၈.၄ ဘီလီယံ နိုင်ငံတော်က ကျခံရမည် ဖြစ်ပါကြောင်း၊ ရန်ကုန်တိုင်းဒေသကြီးအတွင်းတွင် ကျပ် ၁၈.၅ ဘီလီယံခန့်၊ မန္တလေးတိုင်း ဒေသကြီးအတွင်းတွင် ၄.၆ ဘီလီယံခန့်နှင့် ကျန်တိုင်းဒေသကြီးနှင့် ပြည်နယ်များ အတွက် ၁၅.၃ ဘီလီယံခန့်ကို ဘတ်ဂျက်မှ ရရှိမှုအပေါ် မူတည်၍ အပိုင်းလိုက် ဆောင်ရွက်ရမည်ဖြစ်ပါကြောင်း၊ထို့အပြင် လျှပ်စစ်နှင့်စွမ်းအင်ဝန်ကြီးဌာနသည်  မီတာသုံးစွဲသူ အရေအတွက်တိုးတက် များပြားလာသည်နှင့်အမျှ လူအားဖြင့် မီတာဖတ်ရှုခြင်းကြောင့် ဖြစ်ပေါ်လာသည့် အားနည်းချက်များကို ကျော်လွှားနိုင်ရန်အတွက် မီတာများအား ဌာန၏ Control Center သို့မဟုတ် မြို့နယ်ရုံးရှိ ကွန်ပျူတာမှ သုံးစွဲယူနစ်များကို ဖတ်ရှုခြင်း၊ ဗို့အားအခြေအနေများ ဖတ်ရှုခြင်း၊ တရားမဝင် ဓာတ်အား သုံးစွဲမှုများကို စောင့်ကြည့်ခြင်း၊ မိမိတို့သုံးစွဲသည့် ယူနစ်နှင့် ဓာတ်အားခ ကျသင့်ငွေများကို  Mobile Phone Application  မှတစ်ဆင့် မီးသုံးစွဲသူများ ကိုယ်တိုင် ကြည့်ရှုစစ်ဆေးခြင်း၊ On-line Billing စနစ်ဖြင့် ဓာတ်အားခ ပေးချေခြင်းစသည့် SMART မီတာစနစ်ကို ပြောင်းလဲတပ်ဆင် နိုင်ရန်အတွက် Automatic Meter Reading(AMR)နှင့် Advance Metering Infrastructure(AMI) စနစ်များကို နယ်မြေများသတ်မှတ်၍ Pilot Project များ စတင်ဆောင်ရွက်နေပြီဖြစ်ပြီး တစ်ဆင့်စီ တိုးတက် ဆောင်ရွက်သွားမည် ဖြစ်သည့်အပြင် နိုင်ငံတကာတွင် အသုံးပြုနေသည့် Pre-paid စနစ်မီတာကို ပြောင်းလဲကျင့်သုံးရန် စီစဉ်ဆောင်ရွက်ထားရှိပါကြောင်း ရှင်းလင်း ဖြေကြားပါသည်။

ဒေါက်တာစိန်မြအေး(ဒလမဲဆန္ဒနယ်) က ဆက်စပ်မေးခွန်း မေးမြန်းပါသည်။

          လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီးက ပြည့်ပြည့်စုံစုံ ဖြေကြားသွားသည့် အတွက် များစွာ ကျေးဇူးတင်ရှိပါကြောင်း၊ သို့သော် လက်ရှိတွင် ဖြစ်ပေါ်နေသည့် အခြေအနေသည် ပြည်သူများ၏ သံသယက ကြီးထွားနေသည့်အတွက် ယခုလုပ်ဆောင်ချက်ဖြင့် လုံလောက်မည်ဟု မထင်သည့် အတွက် ပြည်သူလူထုအတွင်းတွင် မီတာပုံးများနှင့် ပတ်သက်ပြီး ဖြစ်နေသည့် သံသယများကို မည်ကဲ့သို့ ထိထိရောက်ရောက် ပြန်လည် ဖြေရှင်း ဆောင်ရွက်ပေးနိုင်မည် ဆိုသည်ကို မိမိအနေဖြင့် ထပ်ဆင့်မေးခွန်း မေးချင်ပါကြောင်း၊ ၎င်းသံသယသည် မိမိမြို့နယ်တွင် အင်မတန် ပေါ်ပြူလာ ဖြစ်သည့်သံသယဖြစ်ပြီး ခဏခဏ မေးနေသည့်အတွက် ဘတ်ဂျက်တောင်းခံရမည်မှာများသည့် အတွက် မဆောင်ရွက်ပေးနိုင် သည်ကို လက်ခံရမည် ဖြစ်သော်လည်း ၎င်းအစီအစဉ်ကို မည်ကဲ့သို့ ဆောင်ရွက်မည်၊ မည်သည့်အတွက် ယခုကဲ့သို့ အခက်အခဲ ဖြစ်သည်ကို ပြည်သူများကို ပညာပေးခြင်းဖြင့် ဆောင်ရွက်နိုင်ရန် အစီအစဉ် ရှိ/မရှိ မေးမြန်းပါသည်။

လျှပ်စစ်နှင့် စွမ်းအင် ဝန်ကြီးဌာန၊ ဒုတိယဝန်ကြီး ဦးခင်မောင်ဝင်း

          ကိုယ်စားလှယ်တော်ကြီး၏ ထပ်ဆင့်မေးခွန်းနှင့်ပတ်သက်ပြီး ဖြေကြားရမည်ဆိုပါက မိမိတို့ ရှုပ်ထွေး Service များကို ဆောင်ရွက်ရန်အတွက် ဌာနအနေဖြင့် စီစဉ်ဆောင်ရွက်မည် ဖြစ်ပါ ကြောင်း၊ တိုင်ပေါ်တွင် တပ်ထားသည့် မီတာများကို သက်ဆိုင်ရာ မီးသုံးသူအနေဖြင့် သံသယရှိ သည်ဆိုပါက  သက်ဆိုင်ရာ လျှပ်စစ်အင်ဂျင်နီယာရုံးကို အသိပေးအကြောင်းကြားပြီး မြို့နယ် အင်ဂျင်နီယာရုံးမှ တိုင်ပေါ်ကို ၎င်းတို့ ကိုယ်တိုင်တက်ပြီး တယ်လီဖုန်းဖြင့် ဓာတ်ပုံရိုက်ဖတ်ပြီး မီးသုံးစွဲသူများ ပွင့်ပွင့်လင်းလင်း ရှိစေရန် နှစ်ဦးနှစ်ဖက် ရှင်းလင်း ပြောကြား မည့် အစီအစဉ်ကို တင်ပြထားပြီးဖြစ်သည့်အတွက် လက်ရှိတွင် တိုင်ပေါ်မှတို င်အောက်ချမည့် ကိစ္စ မစီစဉ်နိုင်မီအချိန်တွင် ၎င်းနည်းဖြင့် မိမိတို့ ဖြေရှင်းပေးလျက် ရှိပါကြောင်း ဖြေကြားပါသည်။

လျှပ်စစ်နှင့် စွမ်းအင် ဝန်ကြီးဌာန၊ ဒုတိယဝန်ကြီး ဦးခင်မောင်ဝင်း

လျှပ်စစ်နှင့်စွမ်းအင်

https://pyithu.hluttaw.mm/question-4164